مكتملة فانتازيا وخيال درامية رواية المنبوذة (1 مشاهد)

[قيصر ميلفات]

المنبوذة

الجزء الأول من رواية المنبوذة​

بتعرفو شنو عن العالم السفلي والاشباح والجن اعوذبالله من ان يحضرون!!
قصتي بدت من سنتين!!! الصراحة بدت من يوم اتولدت بس اتطورت قبل سنتين!!
اسمي منار!! عمري سبعةعشر عام… اتولدت في ضواحي العاصمة!! صدقو اولا تصدقو ملقبني بالمنبوذة واللقب مشى علي!!
سبب اللقب للاسف اهلي اتشائمو بي!! امي يوم عرفت انها حامل بي بيتنا اتحرق وفقدو كل شي!! يوم ولادتي ابوي اتوفى **** يرحمة ويغفر ليه!! والنفر الناس مني اكتر شكلي!!!
صدقوني عمري ما كرهت نفسي ولا زعلت من خلقة **** او اعترضت عليها!! بس منو يقنع مجتمعنا المريض بالحتة دي!!
انا اتولدت بتشوه خلقي!! انفي وشفتي العلوية ارنبية!! فشكلي كان بخوف الشفع الفي بيتنا وحتى شفع الجيران!! ما فهمت نظرات الشفقة والنفور من اهلي الا بعد كبرتا ودخلت المدرسة!!
المديرة رفضت تقبلني لانو الطلبة ما اتقبلو وجودي وقالت ارعبت الطالبات وعملت بلبلة في المدرسة! ! ونصحت اهلي بأنو يدخلوني مدرسة لذوي الاحتياجات الخاصة!!
والدي **** يرحمو كان متوسط الدخل وما خلا لينا ميراث غير اسمو والبيت الوارثو مع اخوانو من ابوه **** يرحمهم اجمعين…. وزوج امي الجديد ما مسئول عن دراستي وكفاية انه بصرف علي!! بس امي **** يمتعها بالصحة والعافية اصرت اني اتعلم!! وباعت جزء من دهبها الجابو ليها ابوي عشان تدفع لي قصد المدرسة بس حتى المدرسة رفضتني!! وقالت اني **** طبيعية ومن الخطأ يقبلوني في مدرسة لذوي الاحتياجات الخاصة!! لانهم كلهم معاقين ومتوحدين وتواجدي وسطهم قد يسبب لي مشكلة نفسية!! ونصحو امي بأنها تشوف لي مدرسة عادية ودي كانت اول صدمة لي!! فضلت في البيت واقراني كانو بيمشو المدارس وحياتهم طبيعية!! وشأت الاقدار انه جارتنا اختها اساتذة ويوم جاتها زيارة وعرفت قصتي!! اتوسطت لي في مدرسة قرية لمنطقتنا وقبلوني بس تخيلو شرطهم اني اتنقب عشان ما اسبب حالة ذعر بين الطالبات!!

عمري سبعة سنوات لم اتنقبت وانا ما عارفة يعني شنو نقاب ولا حتى عارفة الفروض والواجبات….!
المهم نزلت وكنت حريصة اني ما ابين شكلي للطالبات رقم اصرارهم الشديد انهم يشوفوني بس بتزكر تحذير امي انو نهائي م اقلع نقابي لاي زول عشان ما يسحروني!! صدقوني كنت مفتكرة اختلافي عن البقية بميزني زي ما امي بتقول وفعلا صدقت كلامها!! لحدي ما يوم بعض الطالبات المشاغبات وبحكم الطفولة! خطفو نقابي من وشي وتاني البسكتهم شنو من الكواريك والصريخ!! لمن خوفوني انا زاتي…الادارة استدعت اهلي والمديرة اعتذرت لي وبتذكر باست راسي وقالت لي انت مميزة شديد وحلوه بالجد!! واتكلمت مع امي بخصوص عملية تجميلية وامي بررت ليها انه الظروف صعبة والجراحة الا تتم خارج البلاد والوضع ما بسمح!! بس مستقبلا اكيد حتوديني لو **** سهل!! كملت دراستي عادي بس فعلا بقيت منبوذة!! ماف طالبة بتقرب ناحيتي!! ولا بنتشارك حل الواجبات!! لدرجة انه حتى العمل الجماعي سوا كان اختبار او سمنار ماف واحدة بترضي اني اكون ف مجموعتها!! ولو الاستاتذة جبروهم بقبلو اسمي بس ما بخلوني اشارك في الاعداد!! لحدي ما امتحنت تامن!!!
لحدي هنا كده قصتي مع البشر بقت معروفة ليكم!! خلونا بعد شوية ونحكي محور قصتي مع العالم الاخر!! حماكم ****!!
من صغري بحس اني فعلا ما طبيعية ووريتكم اني صدقت امي بأني بت مميزة!!
بس الشي الناس كانو م عارفنو وحتى انا كنت مفتكراه شي طبيعي انو كانت بتحصل لي بعض الظواهر الغريبة!!
بسمع همس!! كأنو ف زول بيتكلم معاي!! ومرات بتكلم مع نفسي بس بجيني احساس اني متكلم مع شخص قدامي!!
واتطورت الاعراض وبقيت بحلم بحاجات وبتحصل بحزافيرها!! بشوف موقف قدامي وبكون مكرر بالكربون!! بسمع تعليق من شخص لشكلي او استهزاء من اي زول لو زعلت ولا بكيت بسبب كلامو ولا كلامهم بتصيبو حاجة!! حتى ولو كان قضاء وقدر بس صدقوني بيصدف مع زعلي منهم بسبب الموقف البدر منهم!!
واهلي بدو يلاحظو الحتة دي وبقولو لامي البت دي عندها ريح احمر ولا ازرق ما عارفة!! المهم مدخلين فيها شريحة انو بتك ما طبيعية ومعاها عارض!! لدرجة انو اولاد عمومتي لو شاكلوني ممكن الواحد تجيهو حمى ولا يقع يتعوق!!! وده الشي النفرهم مني اكتر وخلا اهلهم يحذروهم من الاختلاط معاي ولا يقربو مني!! وتاني بقيت منبوذة من اهل بيتي وما فضل معاي زول بطبطب علي غير امي والصوت البسمعو مرة بعد مره!!
قبل ما احصل مرحلة البلوغ بإسبوع بقيت اشوف احلام مرعبة بالجد كوابيس مخيفة شديد!!
وبشوف طيف مرا في الحلم بتتحسس وشي وبقول لي حنتحد قريب!! حتكوني لي قريب!! وبتختفي وجسمي برتعب!!
لحدي ما في يوم وانا قاعدة اقرا لاني ممتحنة اليوم التاني!! سمعت نفس الهمس المرافقني من طفولتي بقول لي الليلة الحجاب بيناتنا حينكشف!! الليلة احتفال الدم!! وانا في لحظة كلامها معاي بكون مجمدة وبقد حاسة الحركة وصوتي بروح!! ولاول مره احس بقربها لي للدرجة دي!! ولدرجة انو غرفتي ضلمت براها وامي جات قالت لي لشنو طفيتي اللمبة!! خلاص قريتي!!؟ وانا مقيدة في الكرسي ما قادرة ارد عليها ولا اناديها تدثرني وتزملني!!! لم م رديت عليها مشت تجيب تلفونها لانو اللمبة ابت تولع معاها لم جات لقتني في الكرسي واللمبة مولعة وبقرا!!! عاينت لي مساااافة وطلعت!!
تاني الصوت رجع وكانت بتتكلم بفرح وبتقول لي انا جييييت!
انا حسيت بسيل بكب تحتى حاجة سخنة شديد!! لم قمت مخلوعة ورفعت ملابسي لقيت كمية دم خيالية!! انا بنزف شديد!! وصرخت لامي!!

وكان ف زول بدق في باب شارعنا وانا بقول ليهم ما تفتحو ماف زول يفتح امي اللحقيني !!
امي جات جارية علي!! وزوجها مشى يفتح الباب ودخل الشي الكلنا بنخاف نذكر اسمووو اتحصنو ونومو حنواصل بعدين….

الجزء الثاني من رواية المنبوذة​

البيت فجأة بقى زي المقبرة!! هدوء مخيف!! واحساس بطاقة سلبية محيطة بالمكان!! كأنهم في بيت مهجور!! منار سكتت وزوج امها ما رجع بعد ما فتح باب الشارع والام وقفت مصدومة وهي شايفة بتها في بركة دم!!! صرخت بأعلى صوتها بس حتى زوجها كان مرمي علي الارض بدون حركة!؟ الجيران سمعو الكواريك!! جو جارين اول حاجة شي لمحوه نادر واقع علي الارض وسامعين حنان بتكورك في حتة تانية!! ف انقسمو فريقين!! الجار وولدو رفعو نادر والجار التاني ومعاه واحد من قرايبينو جرو على حنان وشافو منار برضو مرمية على الارض والدم مالي المكان! اتخلعو افتكرو هجم عليهم حرامي!!! وبسألو. في حنان بس كانت في حالة هلع وما قدرت ترد عليهم!! اسعفوهم علي المستشفى والشرطة بقت تستجوب فيها!! بس ردها كان واحد انها ما عارفة شي؟! زوجها نادر مشى يفتح الباب وما رجع!! وبنتها كانت بتصرخ لم حصلتها لقتها في الحالة الذكروها الجيران!!
لحدي ما الزوج فتح!! وفي استجوابو قال انو كان في زول بيضرب الباب بقوة!! لم فتح ما لقى زول!! وطلع برا كان الشارع فاااااضي!! وهو راجع وقبل ما يقفل الباب حسى بشي ارتضم بيه بقوة موجة عاتية علي ظهرو ووقع مغشي عليه… اما الدكتور شخص حالة منار بأنها حالة نادرة الحدوث!! وتقريبا واحدة في المليون!! انه يحصل نزيف للفتاة في اول طمث ليها!! وحتى الحالات السابقة ما بتكون بالكمية دي!! بس ما عندهم تفسير تاني للموضوع؟!
لم الام سألتهم لشنو بنتها ما استعادت وعيها !! الدكتور قال حصلت ليها بعض المضاعفات لانها فقدت دم كتير بس حتستعيد وعيها قريب!! ده تشخيصهم العضوي بس ماف زول عارف منار الحاصل والحيحصل معاها شنو؟!
فعلا نص الليل فتحت وشافت امها نايمة جنبها في السرير!! ولم وعرفت انها في المستشفى!! حاولت تقوم من السرير بس راسها كان لافي ووقعت على ظهرها!! امها حست بيها وقامت مخلوعة!! منار مالك في شنو؟! حاسة بشي؟! هزت راسها وقالت ليها انا كويسة!! وقبل ما تنطق بحرف تاني لمبة العنبر الهم فيه ضربت بصوت عالي!! لمن الام جات ناطة!! الغريبة منار ما خافت!! وقلت لامها ارقدي وما تتكلمي ياامي وحتى لو سمعتيني بصرخ ما تجي علي!! سمعت صوت ضحكات وكأنه في زول بستهزاء بكلامها!! امها قالت ليها ما تخوفيني في شنو؟! والام اكيد ما سمعت الصوت ولا كانت حتفوت من الخوفة!! شوية كده والصبح اذن!! جات الممرضة تدي منار الدرب لقت اللمبة طافية!! نادت عامل في المستشفي ركب واحدة تانية ولم ربطها كورك ووقع من السلم الكان طالع فيه وبقى يزحف للخلف!! وكل الحضور قام عليه!! افتكرو ضربتو كهرباء … قال ليهم وهو بيرجف ما ضربتني كهرباء بس كأني شفت لي شي!! قام مخلوع واتنفض وكأن مربوش وبتصرف بغرابة وطلع من العنبر ونسى شنطتو حقه الشغل!! منار عاينت للسقف وركزت كويس بس ما شافت شي!! لم حولت عيونها لامها وقبل ما تكلم اللمبة اخدت ليها ربربة وكأنها بتدي منار اشارة لشي معين!! امها قامت صلت وخلت الممرضة بتركب الدرب لبنتها!! بعداك الواطا صبحت والدكتور قال منار تطلع خلاص ما عليها شي وكتب ليها فايتمينات عشان تعوض فقدان دمها!! وطلع!! جات الممرضة تطلع ليها الفراشة لانه تاني ما عندها حقنة او درب! وفي اثناء ما الممرضة بتفك في اللصقة كانت منار بتعاين ليها بطريقة غريبة وفجأة عيونها قلبو بياض بس الاسود اختفى تماماً ويدها بقت ترجف!! الممرضة ضحكت وقالت ليها معقولة خايفة من مرقة الفراشة يا كبيرة!! ولم عاينت لمنار شافت منظر عيونها صرخت وفكت يدها وقامت جارية!!
الدكتور جا وفحص منار لقاها طبيعية والممرضة دخلتها خوفة لمن جاتها حمى!!
الدكتور قال لحنان انا امس كنت شاكي بس الليلة اتأكدت!! بنتكم نسأل **** السلامة والعافية شكلها ممسوسة!! صاح انا طبيب بس بؤمن بالجن والعين والسحر!! وبعتقد انه بنتكم منار علاجها ما عندنا لانو ما ظهرت معانا اي اعراض لمرض عضوي!! فحاولو اعملو ليها رقية شرعية!! الام عاينت ليه بزهول واتزكرت كلام اخواتها واهلها الزمان بخصوص منار!! شكرت الدكتور وطلعو علي البيت!!
طول الطريق كانو ساكتين وبتفكر في كلام الدكتور!! لم وصلو البيت واخدو راحتهم جهزت الفطور!! وبعد فطرو!! فتح الموضوع نادر وقال لمنار امس لم انا مشيت افتح الباب كنتي بتكوركي وقلتي ما افتحو لشنو؟! منار قلبها اتغمص وقالت ليهم احسن ما نناقش الموضوع!! قال ليها انا في مقام ابوك لازم تكلميني!! قالت ليه ماف شي ي ابوي انا كويسة! سكت ما سألها تاني!! خلتو بلعب مع اولادو الصغار وهي مشت على غرفتها!! لقت امها جايبة ليها فوط صحية شالت منهم وقفلت عليها باب الغرفة عشان تاخد خصوصيتها وتغير ملابسها!! فعلا قلعت وفضلت بالملابس الداخلية!! وعايزة تشيل بجامتها من الشماعة لقتها ماف؟! شكلو امها نزلتها سبت الغسيل!!! فتحت الدولاب ومسكت جلباب وقبل م تطلعو في يد مسكتها جوه!! اتخلعت من الهبشة بس ما خافت!! وكانت اليد ظاهرة بشعة شديد وكأنه جلد تمساح او ضب صحراوي!! ومخالبها زي النسر الجارح!! وكانت بتتحسس يد منار بطريقة غريبة بس منار ولا رمشت ولا حتى قلبها ضرب!! شالت جلبابها وقفلت الدولاب!! تاني فتح براهو!! لبست جلابابها وتاني قفلتو واتكرر نفس المشهد!! دفرتو بغضب وقفلتو بالمفتاح!!؟ فشباك الغرفة ضرب بقوة لمن جات ناطة وشعر جسمها قام!! امها سمعت الكركبة جات جارية وقالت ليها منار انت كويسة؟! فتحت الباب وقالت ليها ما تخافي علي ما علي شي!! امها ابتسمت وجات ماشة!! وسمعت صوت بقول ليها سلميني نفسك ولا بحصل عليك عن طريق وامك!! ومن جابو سيرة الام منار ارتعبت وجسمها ارتعش!! وقالت الا امي!! انتِ منو وعايزة مني شنو؟! وكانت منفعلة!! وامها سمعتها بتتكلم براها!! بكت واتصلت علي اختها قالت ليها الحقيني منار جنت!! لازم نتصرف!! واختها قالت ليها وصفو لي الشيخ الفلاني الكان حكيت ليك عنو وانت رفضتي لازم نمشي ليه بكرة!! بجي عليكم الصباح ونمشي!! منار رقدت في سريرها وهي خايفة علي امها اكتر من نفسها وماف طريقة تقرأ قرأن لانها ما طاهرة وبقت تتحصن بالايات الحافظاها والاذكار المعنية!! بعد خلصت! الهمس كان قريب شديد ولدجة انها حاسة بسخونة نفس في اذنها وبتقول ليها مفتكرة انك كده حتتخلصي مني؟! وحسيت بشي مخترق جسدها لدرجة انها بتسمع طقطقة عضامها واصوات الضحكات جواها!! واغمى عليها..

اتحصنو قبل ما تنومو ونواصل بعدين

الجزء الثالث من رواية المنبوذة​

منار ما عارفة نفسها في الواقع ولا بتحلم!! كانت في مكان مجهول! والاضاءة خافتة واقرب للظلام! بقتت تتلفت يمين شمال وما شي غير الضباب وم متسمع غير صوت الارض!! صدقوني الارض كانت بتتنفس!! وكأنة في بركان ثائر وعلي وشك الانفجار!! بقت تقول انا وين؟! سمعت الصوت الما بيخفى عليها!! بتقول ليها نحنا في ديارنا!!
منار الخوف بدا يتسلل لدواخلها وقالت ليها انتِ منو؟ وعايزة مني شنو؟! فجأة قام اعصار وفيه نار لاهبة وبقى يلف حولين منار وهي ف نصو!! ولمن جلدها بدا يتقشر من شدة اللهب!! بس الغريبة ما كانت حاسة بالالم!! وبتعاين لجسمها مزهولة!! وفي وسط النار شافت طيف اقرب لجسم المرأة من الرجل!! قالت ليها ملكتك………….؟ وذكرت اسم سرياني اذا اتذكر اعوذ ب**** قد يحضر عفريت من الجن اعوذبالله من الشيطان الرجيم!! منار رددت الاسم!! الطيف بقت تضحك بفرح وقالت لمنار انتي المختارة!! انتي الوحيدة الما احترقتي بعد ذكر اسمي!! وفجأة وبسرعة عالية غيمة سودا غطت منار!! وفي اثناء ما بتحاول تشوف البيحصل حولينها ولقت نفسها في سريرها وناس البيت حولينها وبقولو الحمد *** فتحت!! بادرت بالسؤال وقالت ليهم ف شنو؟! نادر قال ليها سمعناك صرختي!؟ ولم دخلنا عليك كنتي فاقدة الوعي بس لم امك رشتك بالموية فتحتي الحمد***!! انتي كويسة!! قالت ليهم شكلي كنت بحلم!! الام كل شوية خوفها بزيد علي بنتها.. وحسبت الساعات في يدها لحدي ما. اليوم التاني جا! ومن الشمس شرقت طلعت علي اختها وساقت معاها منار!! في الاول رفضت تمشي معاها واتحججت بأنها ممتحنة والامتحان حيفوتها!! امها رفضت وقالت ليها اصلا انت م قريتي وغير كده شايلين ليك اورنيك من المدرسة!!! في الاخر قدرت تقنعها وطلعو!! وخالتها لاقتهم في السوق وودتهم للشيخ؟! شكلهم وصلو بدري لقو الحتة فاضية!! واخت حنان لانها متعودة تجي قالت ليهم ما شفتو المكان ده بتملي كيف لحدي الظهر!! و**** محل تقعدي فيه م تلقي!! سألو عن الشيخ! حوارو قال ليهم الشيخ في خلوه بطلع بعد يومين!! مريم اخت حنان بتعرفو لانها مواظبة علي الجية! وبقت تحنس فيه عليك **** ي فلان شوف ابونا الشيخ وبت اختي حالتها صعبة!! قال ليها و**** م بقدر اساعدك الا بعد يومين وليك علي ادخلك بعد بكرة اول زول لابونا الشيخ!! فجأة وهم طالعين جا طالع راجل مبشتن ولابس مشرط ومسك منار من يدها!! كلهم اتخلعو ولمن منار بقت تلاوي فيه قايلاه مجنون!!؟
بس الحوار قال ابونا الشيخ!!؟ بخلعة كده!! الشيخ اتلفت عليه وقال ليه دخلهم لي سريع!! ودخل لنفس الغرفة الطلع منها! ! الحوار اتخلع!! وقال ليهم لي عشرين سنة بخدم ابوي الشيخ ما حصل قطع خلوتو عشان اي شي ومهما كان السبب!! امو ماتت ما طلع من خلوتو يطلع عشان بتكم دي؟! مريم قالت ليه عشان بتنا تعبانة وقلبها ابيض ابونا الشيخ بكون شافها في الخيرة!! منار خطوتين ما مشتهم سمعت الهمس!! قالت ليها ده كلب مطيع لينا ما حيفيدك! امها لما شافتها واقفة مسكتها وقالت ليها ارح ادخلي!! ومنار مترددة!! خالتها قالت ليها عارضها قوي بتك دي ودفرتها دفر ودخلو!! الشيخ نهرهم وقال منار بس!! الباقي برا!! خالتها بقت تكبر وتهلل!! من كرامات الشيخ انه عرف اسم منار وهو ما حصل شافاها ولا بيعرفها!! قمة الجهل والتخلف!!؟
قالت لامها خليك معاي!! امها قالت ليها انا قريبة جنب الباب!! وطلعو!! جاها ملهوف! مسك يدينها وبعاين فيهم بطريقة غريبة كأنه بقرأ ليها كفها!! وبسأل فيها نظرك كيف؟ عندك قصر نظر ولا لا!! وعينك فيها حول!! وكان مرتبك شديد!! وقال ليها لسانك اهم شي اللسان مشقوق!! عندك شقة في لسانك!! وعايز يجر ليها نقابها قامت مزعورة وقالت ليه انت شيخ!! كان حيطير من الفرح وكأنو لقى ليه كنز!!
طلعت منو مسرعة وشبة مهرولة!! امها حصلتها وبقول في شنو مالك الحصل شنو؟! بس منار ابت تقيف وطلعت برا البيت وامها وراها!! وخالتها دخلت للشيخ الدجال!! قالت لينا بتنا عندها عارض مووووش ي شيخنا!! ضحك وقال ليها كلنا معانا عوارض بس بنتحصن!! وشال بيانات منار وسكنها ورقم تلفون امها ووعدها انه يجي للبيت يعمل ليها رقية شرعية وطلعت منو مبسوطة نظام اجزت وساعدت بت اختها بس ما عارفة المصيبة الوقعت فيها بنت اختها شنو؟!
منار رجعت البيت والصوت بيهمس ليها كشفو حقيقتك!! حيتنافسو عليك بس انا بحميك لانك ملكي!!

منار خالفت واعترفت لامها بأنها بتسمع اصوات وفي مرا بتتكلم معاها!! من هي صغيرة!! الام من الخلعة صدمت!! منار بعد امها فاقت خلت معاها خالتها مريم وطلعت علي مستشفى للامراض العقلية!! بقت تبكي وبتقول ليهم انا مجنونة عالجوني انا بقيت خطر علي ناس بيتنا انا تعبانة!! وبقت تصرخ!!لحسن حظها كان في دكتور في حوش المستشفى وسمع كلامها مع الحراس الرفضو يخلوها تدخل!! جا عليها وقال ليهم خلوها تجي علي عيادتي!! فعلا في خلال خمس دقائق ودوها ليه!! سلم عليها بطيبة وشاغلها ولشنو بنتي الحلوه الامورة تجي مستشفى امراض عقليه!! وقايلها بتمر بمشكلة اسرية وقال ليها انا اولادي لم اشاكلهم بشيلو ملابسهم في كيس وبقولو حنخلي ليك البيت ي بابا!! ضحك وقال ليها جيلكم ده غريب شديد!! نحنا زمان الواحد دمعتو في عينو واثر اصابع الكف في وشو ويقعد ياكل غصب!! اسسسه انتو كان الاكل ما عجبكم ساااي ممكن تطردونا من البيت!! منار قلعت نقابها!! لم شاف التشوه الخلقي!! اتجمدت ضحكتو!! وعرف انها بتمر ب ازمة حقيقية!! وبقي يحفز فيها انتي حلوه ودي طفرة جينية وعادي بترجعي طبيعية انا بساعدك وبوصلك لجراح تجميلي شاطر!! وما تشتغلي بالمجتمع لانك لو كنتي ملكة جمال مستعدين يطلعو فيك عيب!!
بكت وقالت ليه عمري م شلت هم لشكلي وصدقني شكلي ونظرة الناس لي دي ابسط همومي ومشاكلي!! الدكتور بإستغراب قال ليها طيب مشكلتك شنو؟! وحكت ليه قصتها بالتفصيل!! الدكتور لمن ملامحو اتغيرت!! بالجد خاف!! ولم هبش الرزنامة بدون قصد ووقعت علي الارض لم قام ناطي!! منار ابتسمت!! وقالت ليه انت موووش بتمر بالحالات دي كتير!! ولا المجانين البتتعامل معاهم ديل لابسهم مهرج ما جن!! قال ليها اعوذبالله من الشيطان الرجيم!! نحنا بنتعامل مع مرضى يعني بشر زينا بنديهم ادوية ومرات كهرباء وبنفضفض معاهم زي ونستنا دي!! بس ما حصل اتعاملنا مع دلاك مباشرة!!! واستعاذ ب**** منار قالت ليه فما بالك انا متعايشة معاها من صغري واااسه حاساها جنبي!! الدكتور قام على حيلو ووقف جنب الباب!! قال ليها معليش ما بقدر اساعدك شوفي ليك شيخ حقيقي وبعالج بالقرأن ما دجال!! اما زولك المشيتو ليه ده من عبدة الشيطان اعوذبالله ومفتكرك شخص زهروي!! قالت ليه كيف يعني زهروي؟! قال ليها في ***** بتولدو بميزة انهم بتواصلو مع العالم الاخر!! قلت ليه مع الاموات!! قال ليها لا اعوذبالله من ان يحضرون!! العالم الاخر نوع البتتكلم معاك دي!! المهم ابحثي عن الموضوع في النت وان شاءالله تتعالجي وابعدي عن الدجال ده لانو شكة فيك وحيعمل المستحيل عشان يحصل عليك!! اختفي من سكنك لفترة ولا امشي محل ما يقدرو يصلو ليك فيه!! وكل الكلام ده وهم جنب باب عيادة الدكتور!! في طالب امتياز لقط كلمة زهروي لانه ده بحث تخرجو واجازو زمان بس ما حصل لاقى شخص حقيقي وفي قصص ما بتتصدق اساسا!! وهي طالعة حصلها جنب باب المستشفى افتكرتو عايز يعاكسها قلعت نقابها وعاينت ليه بغضب وكملت طريقها وقبل ما تقطع الزلط وقفت ليها عربية في وشها وخطفوها وهو الوحيد الكان في الشارع وشاف الحصل!!؟
نواصل بعدين
يتبع ……..

الجزء الرابع من رواية المنبوذة​

طبيب الامتياز ارتعب وبقي يكورك للحراس وبقول ليهم خطفوها!! وقدر يشيل رقم اللوحة!! الناس جمهرت عايزة تشوف الحاصل شنو؟ على امتداد بصرهم كانو بعاينو بالاتجاة البأشر عليه الدكتور!! بس فجأة شافو كمية دخان اسود عالية وكأنه في انفجار حصل!! المسافة كانت بعيدة بس احمد طبيب الامتياز ومعاه الحارس وشخص زائر لمريض جرو اتجاه الدخان!! لم قربو يصلو احمد اتعرف علي العربية وقال ليهم بلهفة!! دي نفس العربية الخطفت البنت!!
لم قربو اكتر شافو منار مرمية علي الارض وجزء من ملابسها محروقة والعربية مولعة في الجماعة الحاولو يخطفوها!! احمد والمعاه حاولو يكسرو القزاز وينقذوهم ولانهم سامعين اصوات صريخهم!! والعربية قزازها كأنه مقوى!! نهائي ما عايز يتكسر لحدي م الاصوات اختفت والمطافي جات ولقوهم الثلاثة بسواقهم متفحمين!!
الناس سألت عن سبب الحريق بس الدكتور سكت والحارس قال ليه موووش قلت حاولو يخطفو البنت!! احمد قال ليهم لالا شكلي لخبطت!!؟
مشى على منار لقاها صاحية وبتتكلم معاها سستر!! سلم عليهم وسألها اذا حاسة بشي!! قالت ليه كويسة!! وجات قايمة قال ليها اخدي راحتك!! ما اشتغلت بكلامو وشكرتهم وجات طالعة!! عبايتها كانت محروقة في الجهة العلوية وكانت بتحاول تداري فيها بالطرحة!! قلع الابكوت حقو وقال ليها ممكن اوصلك!! شكرتو وطلعت!! مشت البيت وناس البيت كانو متوترين وخايفين عليها!! من امها شافتها صرخت وخالتها مريم جات تنهر فيها مشيتي وين وما كلمتي زول؟؟ ومالك بتعملي في امك كده لو حصل ليها شي اخوانك ديل الحيربيهم منو!! مشت لامها وحضنتها واعذرت منها وقالت ليها كنت تعبانة!!! وحبيت اتمشى شوية!! امها قالت ليها ده شنو!! وكانت قاصدة اللابكوت!! قالت ليها انتِ كنت وين ؟؟ وده جبتيهو من وين؟؟ وبخلعة قالت ليها كنتي ف المستشفى!! منار شايفة امها منهارة م حبت تزيد العليها وقالت ليها ما تخافي علي انا كويسة!!
وبقبلت يدها ومشت علي غرفتها قبل ما امها تلاحظ للعباية المحروقة!! غيرت وكانت بتعاين للابكوت!! سمعت همس خافت بقول ليها مستحيل اسمح ليه ينهى عذريتك!! منار اتخلعت ولا فكرت ف الموضوع اصلا وقالت بينها وبين نفسها يمكن يكون الدكتور عندو نواية سيئة عشان كده سمعت الكلام ده!! مشت استحمت وجات اتغدت وخالتها قبل ما تطلع قال ليها نرجع متين للشيخ!! منار قالت ليها ما تجيبي لي سيرتو ولا ح اخليك تتربطي عندو!! خالتها اتخلعت وخافت ولانها عارفة انه منار م طبيعية ويمكن تتأذى بسببها!! وقالت ليها قبلك وقبالك مالي ومالك ان شاءالله تجني!! حنان شاكلت منار علي الاسلوب وعلي الكلام الفارغ القالتو وامرتها تعتذر من خالتها!! بس الخالة طلعت مسرعة وغضبانة واختها وراها بتحاول تطيب في خاطرها ومنار مشت علي غرفتها وقفلتها عليها!! كانت قاصدة تخوف خالتها عشان تتوبها من قصة الدجالين ديل وكمان ما ناقصة يخطوفها تاني وهي للان ما عارفة سبب محاولة خطفها شنو؟؟!
تمت يومين ورجعت للمدرسة وحياتها الطبيعية!! لحدي ما يوم كانت بتطبق في الملابس المغسلة وشافت اللابكوت!! اتزكرت انها ما رجعتو للدكتور ولا حتى عارفة ليه رقم!! وقررت بكرة وهي راجعة من المدرسة تمشي المستشفى ترجعو!! وهي شايلة الملابس وماشة علي الدولاب طارت فوق ووقعت علي ظهرها في السرير وكأنه في زول دفرها!! حاولت تقوم بس حست بزول ضغط علي صدرها شديد لدرجة انه النفس غلبها!! والصوت كان مسموع شديد وتخين وكأنو غير طبقة الصوت وتضايقت شديد من شدة حدة الصوت ولمن حست ب فتقة اضانها وحاجة سخنة نزلت!! شكلهم طلعو دم!!
ولاول مره تشوف الطيف بالوضوح ده!! العيون عبارة عن دوائر اسود بأحمر وشكل الفم ما واضح بس اقرب لاسنان القرش النمر!! ولم الطيف قرب منها اكتر حست ب الارض جاثبيتها تضاعافت الاف المرات ولمن بتحس بالسرير ماشي يغطس لتحت وفقدت الوعي!!
قامت نص الليل وجسمها كلو ممزق!! والصداع حيكسر راسها!! فتحت التلاجة شربت موية ولقت ف الرف التحت امها عندها حبوب وبقت تفتش لبندول!! زوج امها كان نايم بس حس بالحركة طلع لقاها ماسكة اشرطة الحبوب وبتشوف فيهم!! جا جاري عليها ملهوف خطفهم من يدها!! افتكرها عايزة تنتحر!! ابتسمت وقالت ليه عايزة بندول بس!! نهرها وقال ليها ماف بندول امشي اتعشي ده الجوع عامل ليك صداع!! وفضل معاها لحدي ما رجعت غرفتها حتى رجع لمنامتو.. اليوم التاني مشت المدرسة وامها ابت تتكلم معاها كانت زعلانة بسبب موقف منار الكان حصل مع خالتها ولسسسه ما سامحتها!! زوج امها اداها مصروفها وطلعت!! وقبل ما تقفل باب الشارع اتزكرت اللابكوت!! رجعت شالتو ومشت!! بعد خلصت دوام المدرسة طلعت علي المستشفى وما عرفت اسم دكتور احمد بس السستر الكانت حاضرة اليوم داك اتعرفت عليها واستلمت منها اللابكوت وقالت ليها اسمو احمد!! دكتور احمد!!

منار قالت ليها اشكريه نيابة عني وقولي ليه اسفة لانها اخرتو معاها!! السستر ضحكت وقالت ليها كلميه انت هدا واقف وراك!! منار اتلفتت عليه وهي مبتسمة!! وصدقوني ابتسامة م اي زول بستحمل يشوفها بس نقول *** في خلقة شئون!! قال ليها ممازح وبعد ما قررت افتح فيك بلاغ!! ابتسمت وقال ليها اتفضلي علي مكتب علي يمينو!! شكرتو وقالت انها مستعجلة وما كلمت اهلها انها حتطلع بعد اليوم الدراسي!! قال ليها م حأخرك!! وما حبت تكسفو قدام الدكتورات ومشت معاه!! وهي قلبها مقبوض!! سألها تشربي شنو بس رفضت وقالت ما عايزة شي!!
عم الهدوء لدقايق وقال ليها للان ما قادر استوعب الحصل معاك؟!! للان متخيل المشهد حق العربية وهي مشتعلة وانت مرمية علي الارض!! كيف طلعتي منها؟؟ وكيف اتحرقت!! والجماعة ديل منو!! ابتسمت وقالت انا زاتي م عارفة جات قايمة وشكرتو للمره الاخيرة وجات ماشة قبل ما يرد عليها!!
قال ليها ما عايزة تعرفي يعني شنو شخص زوهري!! وقفت بس ما اتلففت!! شافت عينين في الحيطة بحمرو ليها ما عرفت تطلع ولا ترجع!! قال ليها صدقيني ما باخد من زمنك كتير بس من حقك تعرفي انت بتمري بشنو؟!
اتنهدت بصعوبة وجات راجعة وقالت ليه قول؟؟!
ابتسم وقال ليها بشكرك علي حسن ظنك فيني وياستي الشخص الزوهري دي خرافة زي الدمبعلو والبعاتي والغول!!؟
قالت ليه وانا علاقتي شنو بالخرافة دي وشنو يعني زوهري؟!
قال ليها جاي عليك بالكلام!! معاني كلمة زوهري متعددة في ناس قالو من الزهر!! اللهو النرد!! زهر الليدو الواحد ده!! ويعني الحظ! ! شخص زوهري يعني شخص محظوظ!! وفي ناس قالو مشتق من كوكب زحل الطفل البتولد لم يقترن كوكب زحل مع كوكب الارض يعتبر محظوظ وزوهري لبعض المفسرين!! لكن الراجح انه زوهري جاية من زوهر اكبر دجال ومشعوذ يهودي وصاحب اكبر كتاب في السحر والشعودة عرفتو البشرية ويعتبر مرجع للسحرة لدهم بالطلاسم والرموز والاسماء السريانية حماكم ****…
قالت ليه بإنفعال انا علاقتي شنو؟! في دجال شكة انك زوهرية!! قالت ليه عرف كيف اذا اصلا الموضوع كلو خرافة!! واذا افترضنا انو كلامو صحيح حيستفيد مني في شنو؟! قال ليها في علامات خفية وظاهرية!!
خفية ما بعرفوها الا السحرة لانو الشخص الطبيعي صعب بشوفها!! اما الظاهرية حول العين اليمين وميلانها للشمال ولمعتها الملحوظة والخط الافقي في اليد والعلامة الفي منبت الشعر في البين ونخلة ف الراس واللسان المشقوق!! وغيرها من الصفات!! قالت ليه بس الصفات دي انا م عندي!! ابتسم وقال ليها عشان كده انا قلت ليك من الاول انها خرافة!!
قالت ليه طيب عايزين مني شنو؟!
قال ليها الدجالين والسحرة بتنافسو على الشخص الزوهري لانه بعتبر حلقة وصل بين عالم البشر والجن!! وبعتقدو انه الشخص الزوهري بقدر يتحصل علي كنوز الارض المحروسة من قبل الجن الما بقدر زول عادي يصل ليها!! وبالمختصر كده دم الشخص الزوهري للجن زي الزئبق الاحمر للبشر غالي ونادر وسري للغاية!!؟
وقبل ما منار نعقب علي كلامو المكتب ضلم والواطا نهار وبقى ماف واحد فيهم شايف التاني! !!
اعوذ بكلمات **** التامة من شر ما خلق

نواصل بعدين

يتبع ……..

الجزء الخامس من رواية المنبوذة​

منار خافت علي دكتور احمد اكتر من نفسها!! وهو بقى يستعيذ ب**** من الشيطان الرجيم وبتحصن بس ظاهر من صوتو انه مرعوب شديد!! وهي بقت تقول عايزة مني شنو؟! ابعدي مني وما تأذيني!! وفجأة ظهرت مرا معلقة متمسكة في السقف بشكل عكسي زي الضب ورقبتها مكسورة وموجهة تجاة الارض وكأنها بتعاين لمنار بس الشعر والضباب خافين ملامح وجهها!! ولاول مره منار تخاف بالجد وكل شعرة في جسمها قامت وقلبها بقى يضرب بقوة واطرافها بردت!! وقالت بصوت متقطع عايزة مني شنو!!؟ المرا لفتت رقبتها ببطء علي احمد وبقت تعاين لية برقبة مايلة وابتسمت!! ابشع اسنان وبنقط من خشمها شي اسود!! والمشكلة لم ينزل علي الارض بيعمل صوت وكأنه موية اتكبت علي ماعون فاضي في النار!! احمد كان متجمد وفي حالة لا وعي!! وتركيبتنا البشرية ما بتستحمل ولا بتقدر تواجهة مواقف زي ده عشان كده **** جعل علي بصرنا حجاب يحمينا من اننا نتخت في موقف زي ده!! منار قالت ليها ابعدي منو مشكلتك معاي انا هو ما ليه ذنب!! وقبل ما تتم كلمتها دي احمد وقع مغشي عليه!! والغريبة انها علقتو في الجو وما خلتو ينزل الارض!!! وخاطبت منار في نفسها يعني ما كانت بتتكلم بس منار نفسها بقت تكلمها!! وقالت ليها تبعدي عنو ولا اقتلو!!! منار قامت جارية بس الباب بيبعد منها وكأنه جاري وهي وراهو وما قادرة تصلو!! وطيف المرا اختفى وشافت ثعبات اقرع عدو شنب متلفي في احمد ولدغو فى نص جبينو فصرخت بأعلى صوتها وكل شي رجع طبيعي!! حتى احمد اتخلع وقال ليها مالك انتِ كويسة!! بقت تتنفس بصعوبة وما قادرة تتكلم وبقلبها بضرب بقوة وقالت وهي بتمتم انت كويس!! قال ليه مستغرب حسيت كأني شردت بذهني ولا في لحظة كده مرت بي ما قادر اتزكرها ولا عارف نحنا كنا بنقول في شنو؟! بس غير كده انا كويس!! شكله الناس البرا سمعو صريخها جا دكتور يشوف الحاصل شنو؟! لقاها قاعدة في الكرسي واحمد قال ليه معليش بس اختنا انفعلت شوية!! الدكتور التاني طلع!! منار قامت ورجولها بترجف وقالت ليه لمصلحتك لازم تبعد عني!! لو سمحت ما تقرب ناحيتي وشكرا علي المعلومات الزودتني بيها!! وجات ماشة وهي دايخة وقفها وبقول ليها في شنو مالك!! وهي سامعة كلامو بعيييد وطلعت!! رجعت بيتهم بس حست بنفسها ما كويسة نهائي في حاجة فيها ما طبيعية!! قلقانة وخايفة…اهلها حاولو معاها انه يطلعوها من الجو الكئيب العايشاه ده بس فشلو وكل يوم حالتها بتسوء …لدرجة انها بقت ما بتمشي المدرسة وما بتقعد معاهم ولا بتتكلم مع زول؟! بقت انطوائية بمعنى الكلمة!! وحتى طيف المرا والاصوات الكانت بتسمعها اختفت!! بس كانت بتحلم بأحلام مخيفة شديد!! ارضي اول مره تشوفها شكل اشجار غريبة مخلقات بشعة السماء لونو وشكلو ما زي سمائنا الدنيا الكلنا بنعرفها وفي نهاية كل حلم كل شي بيتدمر!! وكأنه ده الانفجار العظيم الاتكلمو عنو علماء الفلك!! والارض بتتلاشى وكل شي بختفي!! وبتفضل بس منار معلقة في فضاء واسع واسود وبتتفرج علي الكوكب وهو بيتلاشى!! نفس الحلم بتكرر يوميا!!! البت قربت تجن بقت تخاف انها تنوم من بشاعة المنظر وقوتو ورهبتو!! وكل حلم بخيفها اكتر وكأنه بزيد جرعة الرعب فيه!! امها فاض بيها وابت تستسلم لليأس ومشت جابت شيوخ من خلوه مشهورة في السودان عشان يرقو منار!! وحكت ليهم كل شي وعن الاصوات البتسمعها بنتها ووافقو يجو معاها!! وصلو ودخلت عليها عشان نتاديها لقتها قاعدة في نص الغرفة وعاملة ليها دائرة فيها طلاسم وحروف عبرية ومدنقرة امها ارتعبت!! وبتقول ليها منار مالك!! ده شنو؟!
منار ما رفعت راسها!! امها جات جارية عليها لقت حولين عيونها كدامات ودوائر سود وخشمها اسود وعيونها مغبشة وبعد تدقيق حتى بتقدر تشوف سودهم!! صرخت ومسكتها من اكتافها وبتقول ده شنو العمليهو ف نفسك ده!! وكانو رؤوس اصابعينها جلدهم اتزال لانها دعكتهم في الارض ودمهم عملت بيه الطلاسم دي والكتابة الفي الارض!!؟ امها وقعت على ضهرها وصرخت الجماعة جو جارين!! لم دخلو بقو يستعيذو ب****!! من بشاعة المنظر وبشاعة الريحة وشكل الغرفة الغريب!!
الشيوخ طلعو اتوضو ودخلو!! نادر قال ليهم اديكم مصاحف!! حنان قالت ليه ديل حفظة لكتاب ****!! ودخلو وقعدو في اماكن متفرقة في البيت!! كل واحد ف زاوية وبدو يقرو!!! جاهم واحد خامس كان برا ما دخل معاهم اول وبقى واقف مقاصد منار وبقى يرقي فيها!! والاخرين لسسه ما كملو البقرة وهو بيقرا في ايات السحر والعين!! ولسسسسه منار بتتهز ومتنقرة راسها!! ماف ااااي تجاوب معاهم!! الجلسة استمرت لاكتر من ساعتين خلصو البقرة وال عمران والخامس رقاها اربعة مرات بس ماف ااااي تجاوب!! طلعو وقالو لاهلها بنتكم ممسوسة والعياذبالله بس الجن المتلبسها غريب!! وما اتأثر بقرايتنا وما **** لانو الطلاسم والدم بيوحي بكده!! فنحنا بنقترح انكم تسلمونا المريضة نمشي بيها المسيد وان شاءالله يرقوها كبار المشايخ والحفظة وبإذن **** تتعالج!! امها وزوج امها اتشاورو في الموضوع وفي الاخر وافقو!! بس بشرط انه زوج امها يسافر معاها لانه امها حتقعد مع الاولاد ورعايتهم!! المشايخ رحبو بالفكرة وقالو حباب اي زول عايز يزورنا في المسيد….امها دخلت عليها عشان تجهزها وكانت الصدمة انه منار اختفت!! صرخت بأعلى صوتها وكلهم جو عليها!! وبتقول بنتي شالوها بتي حرموني منها!! وبتمسك راجلها من رقبة الجلابية وبتقول ليه نادر رجع لي بتي نادر شالو مني متي ووقعت صادمة!!! الشيوخ اتصلو لناس اعلا منهم وافقه منهم في الدين وفي خلال ساعة زمن البيت اتملا مشايخ وكدو ليهم انهم قفلو عليها الباب من برا!! وفتحوه بنفسهم ولقوها ماف!! اختفت!! بقو يقرو في المكان وبحصنو في البيت وبرشوه بموية زمزم وموية رقية شرعية وما عرفو يقرو الطلاسم لانو شغل دجالين!! بس للاسف ما قدرو يساعدو اهل منار!! ابوها مشى فتح بلاغ فقدان بس ماف زول صدق كلامو بأنو بنتو اختفت وبعد ما جاب معاه الشيوخ كشهود بس في الاخر وكيل النيابة وافق انه يفتح البلاغ فقدان!! وبرضو ده ما شي بساعدهم!!! وما قادرين يصلو لبنتهم ولا عارفينها مشت وين!! بس مريم المره ده ساعدتهم بالجد لانه الكورة جات في ملعبها بسبب احتكاكها بالدجالين والمشعوذين!! مشت لشيخ وصفو ليها وحكت ليه بالحاصل!! جا معاها بنفسو وكان مزهول!! بعد تردد من اهل منار حتى سمحو ليه يدخل البيت وغرفتها لانهم كانو محطمين وفي ذروة يأسهم علي فقد بنتهم!! الدجال عمل ليه حركات كده وتمتم بكلمات غير مفهومة وقلع شبشبو و**** يكرمكم اتمسح ببول!! ودخل الغرفة!! وقال ليهم جيبو لي نار!! ولع ليه بخرة وكب فيها اعشاب وجلود وحاجات كده ما معرفة نسأل **** العفو والعافية والهداية!! وبقى يردد في اسماء سريالنية واتجنن وهاج وقفل عليه الغرفة وشكلو استحضر جن والعياذبالله وقرا الطلاسم المكتوبة في الدائرة العملتها منار وسمعوه بصرخ وبتخبط في الغرفة وكأنه في حمير هائجة جوه!! وبره اهل منار مرتعبين وندمو لانهم سمعو كلام مريم!!!؟

وبعد ربع ساعة الدجال طلع وكأنه داقنو وكان دايخ وعيونو متغيرة والشر بتدفق منه!! قال ليهم حصلو بنتكم!! منار المختارة منار يمكن تكون نهاية العالم علي يدها!! طبعا اهلها مصدومين وما عارفنو بقصد شنو ولا مصدقين!! امها قالت ليه منار وين؟؟! قال ليهم خطفها جن!! والجن الخطفها مرسل من قبل شيخ سفلي!! نادر قال ليه دجال بعني!! المشعوذ حس بالاهانة!! حنان قالت ليه عايز منها شنو؟! قال ليها عايز يقدمها قربان للشيطان!! (اعوذ ب**** من ان يحضرون) بس الاسوأ انه الخطفها تاني من الدجال اسوأ من الشيطان نفسو!! ده كل العرفتو من خدامي!! حصلو بنتكم!! مع انه صعب تلقوها بس الا تتعاملو مع شيخ اعلا مني في السفليات وكون خدامو اكبر من خدامي!! وقال ليهم انا بواصل مع واحد ما سوداني للاسف من دول الجوار مشهور بين الدجالين بتعاملو مع الجن العياذبالله وانه احتمال يساعدهم اذا عرف انه منار فعلا الزوهرية المختارة!!؟ وطلع من عندهم!!! حنان قالت ليه لازم نصل ليه!! نادر انفعل فيها وقال انا خجلان من نفسي ومن ***!! انت عارفة اذا نحنا متنا في لحظتنا دي نعتبر مشركين!!! نحنا دخلنا دجال بيتنا!! انت قادرة تتخيلي بشاعة عملتنا انو الراجل المنافق ده استحضر جن العياذبالله في بيتنا!! نمشي من **** وين؟! حنان حضنتو وبكت!! وقالت ومنار!! قال ليها الحاجة دي فوق طاقتنا بس **** عارف وشايف ومعاها!! **** بحميها ما نحنا!! ولو جبنا ابليس زاتو ما بنقدر نغير قدر كتبه رب العالمين!!! حنان بكت لمن داخت!!! وخبر اختفاء منار انتشر كيف ما معروف!! هل عن طريق السلطات الحكومية بعد معرفتهم بالقصة الحكاها ليهم نادر!! ولا عن طريق المشياخ بتوع المسيد ولا الدجال الجا البيت ولا مريم خالتها؟! المهم كل الاسافير بتتداول الخبر ده بين مصدق ومكذب!!؟ وفي بعض منهم قالو ده المسيح الدجال وهرطقات كتيرة!!
وبعد تلاتة يوم من اختفاء منار جا شاب ثلاثيني دقة الباب!! فتح ليه نادر وسألو عايز منو!! الضيف طلب انه يدخل البيت وانه جايهم بخصوص بنتهم منار!! نادر دخلو الصالون بلهفة وبقول ليه انت منو؟! وعرفت شنو عن منار؟!!! من جابو اسم منار امها جات جارية!! وقالت ليه عليك **** في خبر عن بتي!! وكانت بتبكي ومتجرسة شديد!!؟
الشاب قال ليهم انا اسمي اشرف انا اخو دكتور احمد!!
قالو ليه بإستنكار د.احمد ده منو؟!
قال ليهم القصة طويلة بس بنتكم بتعرفو وهو عارف مكانها وين؟! فرحو شديد وقالو ليه منار وين؟؟ ووين اخوك ده خلية يوصلنا ليها عليك ****!!! قال ليهم وهو حزين وعيونو اتملت دموع احمد اتصاب بالجنون والان بتعالج في المستشفى الكان شغال فيه دكتور!! اهل منار اتخلعو!! قال ليهم انا حاسي بأنو اخوي مسحور ولا ممسوس عن قصد واذا اتوصلنا لبنتكم يمكن نقدر نعالج اخوي!! قالو ليه طيب عرفت بيتنا كيف؟! وعرفت مكان منار كيف واخوك مجنون!!! قال ليهم زي ما وصف لي بيتكم وهو مجنون وفعلا طلع وصفو صاااح يمكن يكون وصفو لمكان منار صاح وان شاء **** يطلع المكان الوصفو غلط!!!؟
نادر اتخلع وقال لية ليه قال ليك منار وين؟! اشرف سكت لوهلة وقال ليهم في مكان قريب من البحر الميت!! نادر اتخلع!!
اعوذ بكلمات **** التامات من شر ما خلق!
نواصل بعدين

يتبع ……..

الجزء السادس من رواية المنبوذة​

حنان صرخت!! نادر نهرها وسكتها وقال ليها ما ناقصنك انتِ التانية!! وقال لأشرف انت متأكد ولا ده كلام زول مجنون!! اشرف قال ليه اخوي خاشي في حالة صدمة ومرات بتكلم براه وكأنه بتونس مع زول!! ومن خلال انصاتنا لكلامو قدرنا نعرف منار وعنوانكم ده بالاضافة للمكان الهي فيه الان!!
نادر قال ليه انت تقصد البحر الميت الواحد داك!! ولا ف منطقة في السودان بسموها كده!! اشرف قال للاسف ياهو زاتو ماف غيرو!! نادر قال بحزن طيب نصلها كيف؟ ونحنا تكلفة سفرة لبورسودان م عندنا!! اشرف قال للاسف حتى لو قدرنا نصل ما حنعرف المنطقة الهي فيها بالضبط!!
نادر قال كيف يعني!!! قال ليه خافينها في سجن من سجون سيدنا سليمان للجن!! امها لم سمعت الكلام ده وقعت صادمة!!! يمكن يكون كلام فوق الخيال وصعب العقل البشري يتقبله بس للاسف. حصل!! وحلهم الوحيد انهم يستعينو بوسيط من الجن العياذ ب**** عشان يتواصلو معاها!! نادر قام علي حيلو وشكر اشرف علي زيارتو. ليهم وقال نحنا ما ناس وسائط وكلام فاضي ولا بندخل نفسنا في متاهات الدجل والشعوذة!! اذا فعلا بنتنا بتمر بالظروف العصيبة والاستثنائية دي **** معاها وحيحميها ونحنا فوضنا امرنا ليه!! اشرف قال ليه فكر في الموضوع واديني خبر وخلا رقم تلفونو وطلع!!
حنان قالت ليه يعني خلاص انا خسرت بتي!! قعد جنبها واساها وقال ليها خلي ايمانك قوي برب العالمين وان شاءالله **** حيحميها حيسهلها عليها!!
حنان اتصلت كلمت مريم!! والاخيرة اتصلت كلمت الدجال الجا. واستحصر جان(العياذ ب****) في بيت اختها!! والدجال ما صدقت لم سمع الخبر!! وسألها عن صحة الكلام ده!! واكدت ليه انه اختها قالت زارهم اخو واحد دكتور بيعرف منار وهو الكلمهم بمكانها!! الدجال قفل منها واتصل علي واحد. اعلى منه مرتبة في السحر!! هم كانو عارفين انها اتخطفت من قبل جن!! بس ما كانو عارفين الموقع وين!؟ فالدجال التاني قال ليه عايز الولد البيقدر يتواصل معاها وعايز دم من منار ولو كان نقطة واحدة!!
الدجال الادنى مرتبة رسل ناس وقدرو يخدعو اهل احمد انهم بعالجو بالقرأن وانهم حيساعدو ولدهم وانه مرضو م عضوي بل ممسوس!! واهلو ما قدر يتقبلو الحالة البعيشها ولدهم وكانو متأكدين بأنه مسحور عشان كده وافقو يخليوهم يسوقوه بس علي شرط انه يرافقو اشرف اخوه!! وبكدة قدر يتحصل علي احمد وما عرف يجيب دم من منار!! لدرجة انه رسل خدام ليه يشوفو بيتها!! بس ما لقو حاجة ولدجة انه ملابسها الداخلية ما سلمت من التفتيش على امل انهم يلاقو ولو اثر من دمها!! لحدي ما وسوس ليه واحد من جماعتو نسأل **** يحميكم منهم! انه الطلاسم الكتبتها منار كانت من دمها وجرحت نفسها وهي بتكتب بأصابعيها!! ونفس الجان اليعاذ ب**** الدجال كافئو ونفذ طلباتو الهي تدنيس المصحف الشريف واستعمال بعض صفحاتة في مواعين مدنسة نسأل **** العفو والعافية!!! ونفس الخادم مع انه ما بحصل العكس والدجال هو البيخدم في الجان بس المسميات بتختلف والدجال بيوهم نفسو انه عندو خدام من العالم السفلي!!
المهم نفس الخادم وسلو لبيت ناس منار!! وفعلا الخادم في دقائق جاب ليه تراب من غرفة منار الفيه بقايا لا ترى بالعين المجردة من دم منار!!
دخلو احمد وهو في كرسي متحرك لانه اتشل للاسف في غرفة مظلمة وقالو لاشرف خليك برا كانو دجالين اتنين والغريبة ما ظاهر فيهم!! وبتحس التدين في وجوههم!! ولعو بخورهم وبقو يرددتو في كلمات بلغة ما مفهومة ويرشو احمد بومية في صينية دهب قدامهم وهو عاجر عن الحركة تماما ولمن رقبتو متشنجة بالجنب الشمال ليه!! وعايزين يتقربو للمارد الساجن منار وقدمو ليه القرابين!! ما كانو شايفنو ولا سامعنو بس الوسيط كان احمد!! بقى يخاطبهم بلسان احمد!! ورفض عروضهم وقرابينهم!! بس للاسف طلب منهم شيء ان بستحي اكتبو و**** يحاسبني عليه!!! وللاسف وافقو بدون تردد

والدجال الادنى مرتبة مكن الدجال التاني من نفسو وفي نفس الوقت الكان الجان الحارس مستمتع بالنظر ليهم عن طريق احمد!! وااكد ليهم انه ممكن يرجع منار بس في قوة اعلا منه مسيطرة عليها!! وبعد اكتملت طقوسهم وجلستهم لتحضير الجن وانهم حيلاقو منار في الحتة الفلانية!! تخيلو معاي جابها في ولاية تانية وهي ما واعية بأي شي!!؟ وواحد من الدجالين كلف تابع من اتباعو البقولو ليهم الناس حيران او حوار!! انه يشوفها في المنطقة المعنية وفعلا لقاها مغمى عليها في مكب نفايات!! من مكانة داك رفعها وجابها الخرطوم. للدجالين!! كانو منتظرنها علي احر من الجمر!!
وما كانو ناوين يرجعوها لاهلها!! لانهم متكرين انهم لقو كنز وحيوصلهم. لمال قارون انا هم عايزين!! رجعو احمد لاهلو وادوهم بخرات صباح ومساء ووصفو لاهلو كم حاجة كده من العطارة وكلو كلام فاضي سااي غير انهم استغلوه عشان يتواصلو مع الجان العياذبالله الحاجز منار ما عملو ليه شي!! وصلوها ليهم وودوها لمكان سري بمارسو فيه السحر وما حبو يضيعو الزمن وكانو عاملين طقوسهم. بس منتظرين جية منار!! لم جابوها وربطوها ف صليب وكانت مرقدنها عكس اتجاة القبلة وربطو ليها تمائم وعروق وحجبات وكتبو علي جبينها بالدم!! وبقو يفتشو لعلامات الطفل الزوهري بس ما لوقو شي يشجعهم! ! لحدي ما جرحوها في رقبتها وشافو لون الدم الفاتح شديد!! وكانو فرحانين كأنهم لقو كنز ثمين!! وجارو منها حبة دم في كاسات نحاسية ولا ذهبية ما معروف!! وبدو يرددو في اسما شواطين وبنجسو فيها!! لحدي ما واحد فيهم قال للتاني ما تنسى انه دي المختارة!! ويمكن العفريت المعاها يظهر فجأة ويبوظ شغلنا!!؟
الدجال الكبير قال للتاني طالما انها عذراء معناها الجنية متابعاها وحتحاول تتاخدها لصفها!! واتفقو انهم ينهو عذرية منار عشان سحرهم يمشي فيها!! فبادر واحد انه تتم مجامعتها عشان يقطعو حلقة الوصل بين منار والساحرة التانية!! وبعد تشاور خلو المفعول بيه قبيل داك يبادر ويعتدي عليها!!
يمشي عليها خطوتين وهي نايمة في ثبات وكأنها ميتة!! قرب عليها ووقف الصليب بشكل افقي وبدا يقطع في ملابسها بسكينو وبقى يتحسس جسمها بالسكين!! وقال ليه كان ما شنات وشها وخشمها المقطوع ده كان عرستها!! وفي اثناء ما هو بتحرش بيها وقرب عليها اكتر عشان يأذيها فتحت بعيون حمراء بعدسة سودا وماف اثر لبياض عيونها!! وابتسمت بخبث!!
اعوذبكلمات **** التامات من شر ما خلق واعوذ ب**** من ان يحضرون
نواصل بعدين
يتبع ………

الجزء السابع من رواية المنبوذة​

الدجال من شدة الخلعة جدع السكين من يدو ورجع للخلف كم خطوة وبقى يردد في تعاويذ وكلمات سريانية ومنار بتحرك رقبتها من اقصى اليمين لاقصى الشمال ببطء وبتعاين ليهم!!
بقى يرش فيها من الموية الكانت في صينية ذهبية وهي وبتصرخ وبتتأوه وبتتلفت يمين شمال وتعابير وشها بتوحي بالالم!! والدجال لم شاف حالتها ماشة تتدهور قرب عليها اكتر وختى يدو في جبينها وبقى يلقي في تعاويذو الشيطانية عليها وكان عايز يحضر جن العياذبالله عشان يصد هجومها ويسيطر عليها ويحميهم منها!! اذا تطلب الامر…بس هي فاجأتهم واثناء ما يدو عليها يدو اتلصقت في جبينها وما قدر يشيلها منها رغم محاولاتو المتكررة!! وسند يدو التانية علي كتفها وبجر في الماسة في جبينها بس ما قدر!! وضحكت ضحكة شيطانية تقشعر منها الابدان وفجأة تحولت ضحكتها لنظرة غضب والسودا الفي نص العين الحمراء بدى يتلاشى وبقت كلها بالون الاحمر وهي بتلهث زي الكلب ولعابها سايل!! والدجال بقى يصرخ من شدة الالم والدجال التاني بقى يسمع صوت تقطقة عضامو وكل ما عضم يتكسر الدجال بنهار اكتر وكأنو حجمو بدا يتغلص!! ولم برك على الارض ما برك بركبو لانهم اتكسرو ووقع علي افخاذو وكأنو عضام الركب والرجول ذابو!! والدم بقى يتطاير في الجو من منافذ جسمو وبعض منو كب ليها على وشها!! وبنفس النظرة اللئيمة ديك عاينت للدجال التاني بس داك عمل تلاسط واصلا معاه حراس من الجن بحكم خبرتو في التعامل معاهم!! وما قدرت تصل ليه بس الحاجة الما عمل ليها الدجال حساب انه حتى الجان وان كان مخلوق من نار برضو بتحرق بالنار!!
فالمشاعل الكانو بطبقو بيها طقوسهم ديك وداقنها في زوايا الحجرة وفي اطراف الصليب قدرت منار تتحكم فيهم وازداد اشتعالهم بصورة غريبة عجيبة مزهلة للعين!! كان منظر مهيب ومخيف والنار بتشتعل بصورة يصعب وصفها وعمت المكان وكأنه الاوكسجين بساعد علي سرعة اشتعالها!! ف جان واحد من حراس الدجال النار طالتو وفر بعمرو واختفى ،،،الدجال لم لقى موقفو ضعيف امر المارد المعاه انه يطلع بيه من هنا!! والاخير اخترق حيطة الغرفة وقبل ما الدجال يطلع هو اختفى لانه نوع النار الكانت مشتعلة اضعاف النار النحنا بنعرفها دي!! والدجال قبل م يلب بثواني ظهرو كلو اتشوى ولدجة انه لحمة ظهرو اتخرطت بسبب لفحة نار واحدة وسلسلتو الفقرية ظهرت!!

بس قدر يتلب لكن ما معروف اذا حينجو ولا لا!!؟
وهنا منار اتجننت وما قدرت تسيطر علي النار ولا علي نفسها وكل شوية النار زائدة بطريقة مهولة وقدرت تلتهم كل البيت والهمس الكان بجيها بقى اوضح بل بقى منها وفيها شكلها المرا الطيف اتلبستها!! وبتقول ليها وهي بتخاطب نفسها دمريهم دمريهم احرقي الكون!! ما بستحقو الرحمة ولسسسسه النار مشعللة ومنار بتغضب اكتر والنار بتذيد وتشتد معاها!!! واكتر من تلاتة مطافي ما قادرة تطفي النار وحتى بدو يجلو في سكان الحي داك لانو النار طالت كذا بيت وشكلها مخيف وكأنها نار غاز ولا بنزين لونها ما كان احمر ولا اصفر ولا برتقالي زي النار البنعرفها دي؟؟! كانت خضراء مايلة للبنفسج بالجد مخيفة وما قدرو يوقفوها وكأنو الموية بتزيدها لهب!!! في ناس اقترحو التراب بس حتى قلابات التراب ما طفتها!! وبقت حديث الناس والمحطات التلفزيونية!! والساحرة قربت تسيطر علي منار بالكامل!! صاااح استحوذت علي جسدها بس لسسسه في جزء من عقلها ما بتقدر تصل ليه وده سبب تميزنا كبشر!! الشيطان بستحوذ على اجسدنا وبوسوس لينا عشان نعصي **** بس في حتتتته جوانا بتصدو وبترجع لربنا وبتتوب وبتستغفر وبتحس بالذنب!!! يلا الحتة دي ماف مخلوق بيقدر يصل ليها ولا يتحكم فيها لانها اختبار من **** هل عبدي حيتوب!! هل عبدي حيلعن الشيطان ويستغفر!! هل عبدي كثير الذكر والخوف مني….فكل واخد فينا يشوف الحتة دي وين جواهو!!!؟
منار وهي مستيلمة للساحرة فجأة شافت احمد!!! احمد؟؟؟ الجابو هنا شنو؟! سؤال صعب الاجابة عليه لانه حتى انا ما عارفة الرابط البجمعهم شنو؟! يمكن لانو ممسوس وسبب المس الساحرة المتلبسة منار! عشان كده بقدر يشوفها ولا يتواصل معاها!! ؟
فالساحرة بتأمرها انه تنهي البشرية وبتشجع فيها وبتقول في نفسها انتِ منبوذة!! انت نكرة العالم سيء وما لازم يعيشو لازم يموتو وبقت تعرض ليها في مخيلتها مشاهد مؤلمة مرت بيها منار من طفولتها ونظرات الناس ليها والطالبات والاهل واحتقار الناس ليها واحمد بقى يخاطبها وسامعة صوتو بس ما شايفاه وبقول ليها طيب وامك واخوانك والناس البتحبك والناس الكانو داعمنك وانا!! لسسسه في ناس طيبين وبستحقو العيش!!! فالساحرة حست بأنه احمد قادر يتواصل معاها فكلفت قرينو انه يسكتو وللاسف قد يكون اسكتو للابد!! ومنار اتشوشت وعقلها اتذبذب وفجأة وقعت مغشي عليها والنار بدت تتلاشى بالتدريج!! فصرخة الساحرة كانت مدوية بس للاسف نحنا كبشر ما بنقدر نسمعها بس كل الطيور والدواب الكانت قريبة نفرت وارتعبت وهربت من المكان!! وحتى الناس احتارت وبالذات رجال المطافي الليهم تلاتة ساعات ما قادرين يطفو النار الالتهمت حي كامل وفجأة بدت تنطفي براها!!
المشهد كان مهيب ومرعب عشرات سيارات المطافي والاسعاف والناس مجمهرة وما فاهمين حاجة وفي ناس بقولو ده بفعل جان العياذ ب**** لانه في ظواهر زي دي اتكررت كتير في السودان واخرها الحصلت في شمال السودان في احدى قرى حلفا!!!
لم النار انطفت تماما الناس بدت تدخل البيوت وتحاول تشوف اذا سلم شي من ممتلكاتهم لانهم طلعو ونجو بروحهم بس بدون ما يطلعو شي من بيوتهم!!؟
وفي بعض من رجال الاطفاء دخلو علي بيت الدجالين مصدر النار البسببو الجيران بلغو انه في بيت مشتعل في المنطقة الفلانية؟!! فلم دخلو عشان يشوفو سبب الحريق شنو؟! ومع انهم عارفين السبب بس لازم يكتبو تقرير لازم يلقو مبرر منطقي للناس وللرأي العام ولا حيصيبو الناس بحالة ذعر!! فكانت الصدمة انهم شافو بنت مجردة من الملابس مرمية علي الارض!! واحد فيهم قلع البالطو حقو وغطاها وقال ليهم اتسكتو علي الواقعة دي وما تعملو شوشرة لحدي ما نشوف الحكاية شنو؟!
كلهم مذهولين وبستعيذو ب**** كانو تلاتة واقسمو لبعض انهم ما حيطلعو الشافوه ده للناس لحدي ما يحصلو علي اجابات مقنعة!!
واحد اتحسس نبضها لقاها نفسها ضعيف!! قال ليهم حية!! مرقوها بالفتحة الفتحها الجان للدجال وواحد فيهم جاب عربية اسعاف وودوها المستشفى!! وبالصدفة عرفو من دكتور في المستشفى انه دي البيت الانتشرت صورها في وسائل الاعلام بأنها مختفية وخاطفها جن!! فإتخلعو اكتر!! وقررو انهم يكلمو السلطات وهي مخيرة اذا عايزة تنشر الخبر ولا تتستر على الحدث!! وفعلا ده الحصل والشرطة اتصلت كلمت اهلها وطلعو مخلوعين وفرحانين وما مصدقين الحصل!!! وصلو المستشفى وفتحت شافتهم وبكت وامها حضنتها وبكت فيها!! وامها بقت تتحسس في جسمها وبتقول ليها انت كويسة كنت وين وعملو فيك شنو؟! منار قالت ما متذكرة شي وما عارفة الحصل معاي شنو؟! نادر قال ليها زحي منها ما تكتمي نفسها كفاية جاتنا بصحة وسلامة!!! الدكاترة عملو ليها كل الفحوصات وطلعت نضيفة والظاهرة دي حيرت الاطباء كيف جدران البيوت اتأكلت والابواب الحديدية ذابت من واقع الحرارة بس كيف جسمها ولا خرشة ولا نقطة ما فيه!! قالو لاهلها حتفضل معانا لحدي ما نشوف المشكلة وين وحتكون تحت المراقبة!! وفعلا فضلت هناك لكم يوم بس ما حصل شيء والهمس الكان بجيها زمان بقى كوابيس وكأنه الساحرة بتنقم منها وبتحاول ترعبها بشت الطرق!! وفي اثناء ما هي بتتمشى في المستشفى بالصدفة شافت غرفة مريض فاتحة ولقت نطهرها انها شايفة شيطان حماكم **** طالع للمريض في راسو!! ما حقدر اوصف ليكم شكلة لانه حتى انا ما شفتو بس منار اتعرفت عليه وعلى بشاعة شكلو!! صرخت وجرت عليه وللحظة ما كانت عارفة انه ده احمد وميت سريريا وبس خلاياه شغالة وكبستو في السرير وبتضرب فيه والطاقم الطبي جا جاري وبحاولو ينقذوه منها بس هي مشعبطة فيه وبتصرخ بطريقة جنونية ومخيفة شديد وقدرت تخنق الشيطان العياذبالله من ان يحضرون واعوذ بكلمات **** التامات من شر ما خلق

نواصل بعدين
يتبع ……..

الجزء الثامن من رواية المنبوذة​

في اثناء منار متجننة ومحكِمة الخناق علي الجن العياذ ب****! الدكاترة حاولو يحقنوها بحقنة مخدر بس انصدمو لم يشوفو رأس الابرة بنتني وما بقدر يخترق جسد منار!! واتفلتت عاينت ليهم بنفس النظرة الشيطانية ديك وكان نفسها قايم وعيونها بدت تتقلب للون الاحمر بالتدريج فبعض من الممرضات وقو صادمات وفي منهم القام جاري!! وعضنت احمد من جبينو لمن جلدة رأسو طلعت في سنونها وطلع دم اسود داكن ريحتو كويهة وغيرت الغرفة وحتى الماشي في ممر الغرف بشمها ووقعت في صدرو فاقدة للوعي!! الطاقم الطبي استعان برجال الامن التابعين للمستشفي!! بس لم جو لقوها فاقدة للوعي و مرمية في صدر احمد وباقي جسدها في الارض!! رفعوها بحذر وكانو خايفين من انها تصحى والممرضين بقو يسعفو في احمد لانو نزف شديد من جبينو والشافو من بعيد بقول نهشت وشو كلو ما عضت الجبين بس!! ودوها غرفة في الطابق السفلي وكلبشوها في السرير عشان لو وعت ما حيقدرو يسيطرو عليها!! واتصلو كلمو رجال الشرطة بالحصل والغريبة لم وصلو المستشفى لو احمد الميت سريريا وكل الدكاترة قنعو منو ومنتظرين يومو يتم مفتح وما بيشكو الا من صداع بسبب عضة منار!!! فما صدقو عيونهم واستنتجو زي كده انه منار خلصتو من جان متلبسو العياذبالله…
وهي لسسسسه كانت نايمة لم دخلو عليها كانت مبتسمة وملامح الطفولة واضحة للعيان ومن نظره واحدة بتأثر القلوب الرحيمة!! واحد من رجال الشرطة قرب عليها وكان بشوف في نقش اسود في يدها!! وحاول يقراه بس بلغة غير معرفة ليهم وقبل ما يرجع يدها لمحلها فتحت!! اتخلع وفكا يدها ولمن شهق من شدة الخوف!! ضحكت ببراءة وضحكت معاها الشرطي التاني!! قال ليها شكلك رايقة!! اتلفتت يمين شمال لقت نفسها ف غرفة غير غرفتها قالت ليهم انا وين؟! قالو ليها في عملية صيانة في غرفتك عشان كده جبناك هنا!!
شافت نفسها مكلبشة وعيونها دمعت قالت ليهم ما اكون اذيت لي زول!! قالو ليها ابدا بل ساعدتي زول!! والكلباش ده عشان ما تأذي نفسك!! نحنا خايفين عليك ما منك!! اتنهدت وقالت ليهم طيب اهلي وين؟؟! قالو ليها اسسسه حنجيبهم ليك !!!؟
كانو بحاولو قدر الامكان انهم يخلوها هادئة عشان ما تنفعل وما تتلبسها الجنية ديك العياذ ب****؟!
في اثناء ما هي راقدة وبتعاين بالشباك حست بالسرير لافي بيها ونفسها بدا يكتم وعرفت انه الساحرة ديك حتحضر وفجأة باب الغرفة فتح!!
احمد الاصابو الجنون واتشل وبقى يمشي بكرسي متحرك!!؟ المن يومين مات سريرياً جاي داخل عليها بشحمو ولحمو وظاهر عليه بأنه في افضل حالاتو بس الشاش ملفوفة في جبينو بسبب عضتها!!
شافتو ابتسمت تلقائيا واتبادلو الابتسامات!! سلم عليها واتنهد بصوت مسموع وقال ليها اهاااا تاني حيحصل لي شنو من وراك!!؟ ضحكت وغطت شفتها الارنبية بيديها مستحية منو!!!؟ قال ليها حمدلله علي سلامتك!! قالت ليه مستنكرة!! حمدلله علي سلامتك انت ومعليش لانك عانيت من وراي واطمنك تاني وشي ده ما حتشوفو عشان ما تنتظر حاجة تاني تصيبك من وراي!! وقالتها بزعل نظام ردت علي كلامو المن شوية!! ضحك وقال ليها وكمان عاملة فيها زعلانة!!!
انا ادبست فيك للابد حتى وان بعدتي عني حأتزكرك يوميا!! عقدت حاجبيها مستنكرة وقالت كيف؟؟!
اشر علي جبينو وقال ليها قرمة الوحش الفي جبيني دي الاتسبب فيها منو!!! وبقت تضحك لمن تتلوي في السرير واعتذرت منه وقبل ما يرد الغرفة كهربتها بقت تذبذب ومنار حست بالجاذبية ذادت وقالت ليه اطلع اطلع سريع!! جات حتأذيك تاني اطلع!! وارتعبت بالجد وهاجات ولانها مكلبشة م قدرت تقوم!! قرب عليها وقال صدقيني ما خايف!! شوفي عيوني!! ثبت راسها بيديهو الاتنين وقال ليها شوفي هنا!! عاينت ليه جوه عيونو وقال ليها شايفة خوف في عيوني!! بكت وقالت انت ما عارف ممكن تعمل فيك شنو دي ما عندها رحمة وعايزة تبيد العالم والبشرية!!! قال ليها طيب خليها تشوف طريقة تانية بس عن طريقك ما حتقدر!! وفجأة سمعو صوت ضحكات مستهترة!! واحمد جسمو خدر وبقى ما قادر يشوف كويس وقرب يغمى عليه!!! منار لم شافت حالتو انفعلت وقالت ليها سوقيني انا حأمشي معاك بإرادتي بس ما تأذيهو!! وشافت الطيف حق الساحرة متعلق بشكل عكسي في السقف وبتعاين ليها من تحت رجولها ومنظرها بشع شديد وعاينت ليد منار لكم ثانية والكتابة العبرية الفي يدها اتقلبت من اللون الاسود للنار وكانو كاتبين في يدها بالنار وما انطفت ومنار بتصرخ واحمد فقد الوعي. واخر شي اصوات صريخ منار الجابت الطاقم الطبي والشرطي جارين لم فتحو باب الغرفة لقو احمد واقع علي الارض ومنار مافي!!!؟

وكلهم وقفو متجمدين ومرعوبين!!! رجعو لكمايرة المراقبة شافوها بتتكلم مع احمد وبيضحكو وفجأة منار اتغيرت وبقت تصرخ والكاميرا اتشوشت وما عرفو الحصل شنو بعد داك!!!؟ احمد بعد استعاد وعيو بقى يسأل عن منار!! وكلهم منتظرنو بفارق الصبر عن يحكي ليهم الحصل معاهم شنو؟! كان متوتر شديد وقال ليهم ضحت بنفسها عشاني!! مشت معاها بإرادتها عشان ما تأذيني!! قالو ليهم هي منو؟! قال ليهم شيطانة (العياذبالله) في دكتور داخ!! قام طالع مهرول!! اشرف حاول يمتعو وقال ليه كفاية الحصل معاك من ورا البنت دي!! خليها تحل مشاكلها براها ما قصرت معاها!! وكمان انت في يدك شنو عشان تساعدها!! وهو انت عندك المقدرة يعني!!!؟ ولا عارفها مشت وين؟! احمد ما اشتغل بكلامو وطلع!! اشرف حصلو وقال ليه طيب والدتنا ذنبها شنو تتألم بسببك شوف ليها ولصحتها!! قال ليه امي حتدعو لي وتحصني و*** حيحميني وصدقني لو ما ساعدت منار ما حيكون في امي ولا اي زول بتعرفو!! وجرا جري وقف ليه تاكسي!! قال للسواق وديني جامعة الخرطوم!!! كان متوتر وخايف علي منار السواق بعاين ليه بالمرايا وبقول ليه انت كويس ي ولدي!! واحمد شارد وبحاول يرسم في يدو بس بدون قلم وكأنو بردد في حاجة وما عايز ينساها!! لم السواق وصلو احمد قال ليه معليش ما شايل معاي قروش وطلع ليه من اصبعو خاتمين فضة قال ليه خليهم معاك وحافظ علي ده لانو حق ابوي **** يرحمو وقام جاري!! بتاع التاكسي وقف محتار!!!
جرا المكتبة الكبيرة حقه الجامعة وسأل عن عم حسن!! ده اقدم زول في الجامعة ومن لمن كان اسمها كلية غردون وكان مرشيد سياحي وعارف وبيتكلم اكتر من عشرين لغة!!!؟ قالو ليه طلع الفطور !!
جرا ليه في الكافتيريا ولمن بيلهث من شدة التعب!!! قال ليه عايزك ضروري!! في جماعة قالو ليه ما شايفو بيفطر!! قال ليهم الموضوع مستعجل لو سمحت تعال معاي!! عم حسن قام ولانه بعاني من مشاكل في الظهر بسبب العمر وامراض الشيخوخة ديك!! واحمد ماشي مهرول واتلفت لقى عم حسن ياداب بتاتي في خطوطين!! جا عليه وعاين ليه مسافة وقال ليه اعفي لي وسامحني علي الحاعملو!! وشال عم حسن في ضهرو عم حسن بقى يضحك قال ليه و**** انت مجنون ي ابني نزلني بقع!! والناس مصدومة من المنظر وصلو داخل المكتبة وجرا ليه الكرسي وقال عايز قلم!! عم حسن بعاين ليه مستغرب من تصرفات الولد المجنون ده!! واحمد خطف القلم من جيب عم حسن وشال اقرب كتاب وصلتو يدو وفتح اخر صفحة وبقي يرسم في النقوش وتاني يشطب يقول لا ما كده ويرسم تاني لحدي ما استغر علي نمط معين ونقوش مرصوفة بطريقة مرتبة شديد وقال ليه ترجم لي ده تابع لاي لغة ومعناه شنو؟! عم حسن شاف بس لانو نظرو ضعيف قال عايز نظارتو ووصفها لاحمد وجرا خطوتين ووصلها وجابها ليه وهو نفسو قايم!! عم حسن ركز في الكتابة وملامح وشو اتغيرت وقال ليه لقيت الكلام ده وين!! احمد قال ليه في بت حياتها في خطر عليك **** ساعدني!! عم حسن قال ليه ماف اخطر من كلماتك دي!!
دي لغة عبرية وترجمة الحروف بتقول عندما تجتمع ملكة الكون مع منبوذة الكون سيعم الدمار وتطهر الارض اليوم…
بس اليوم دي لو ما انت كاتبها غلط تقصد الليلة يوم9 ولو انت نقلتها غلط معناه غروب الشمس
انت متأكد ده نفس النص!!
احمد قال ليه تقريبا هو!!
قال لاحمد لقيت الجملة دي وين!!
احمد قال ليه لقيتها عند صديقة وشكر عم حسن واعتذر علي تصرفو غير المسئول وجا طالع!! عم حسن ناداهو احمد اتلفت!! عم حسن قام بصعوبة وقال لية نزل الرفوف دي واحمد قال ما مشكلة يساعدو ويطلع فعلا نزل ليه الرفوف!! عم حسن قال ليه اخر كيس داك جيبو! ! احمد سلمو ليه وجا طالع عم حسن قال ليه مالك مستعجل اقيف!! وقالها بنهرة احمد قال ف نفسه الراجل ده عايز مني شنو!!!
لم قرب فتح الكتاب وكان بنفس اللغة الجابها احمد للترجمة وفصعق مش لانه شاف اللغة العبرية لانه شاف طلاسم مرسومة في الكتاب كان شافها في مخيلتو لم كان بتواصل مع منار وهي مسجونة في تخوم البحر الميت!! وقال لعم حسن وهو بتلعثم من شدة الخلعة ده ده انا شفتو؟! وكان مؤشر علي رسمة في الكتاب!! عم حسن قال ليه انا قريت الجملة الانت جبتها دي قبل خمسين سبعين سنة دي نبوءة يهودية بأنه ساحرة مختلطة الدم ملعونة ومسجونة حتجي اخر الزمان وتنتقم !!؟ وكلها اسرائليات ما صدقناها بس جملتك دي ارعبتني اكتر من الرعب الانا شايفو في عيونك!! احمد قال ليه طيب الكتاب م وضح هي شنو ولا جات من وين وكيف يعني مختلطة الدم!وكيف نقدر نتخلص منها!!؟ عم حسن قال ليه مخلطة الدم انها كانت منبوذة من قبيلتها لانها ما من الجن الصافي(العياذبالله) وفي بعض كتب علم الارواح اليهودي ذكر انها من سلالة الحِن!! احمد بخلقة قال ليه الحن ديل مووش السكنو الارض قبل الجن و**** ابادهم لانو افسدو في الارض؟! عم حسن قال ايووا للاسف؟؟ في اشارات وتكهنات بس لكن ماف طريقة مضمونة عشان تخلص منها ولا نتعرف عليها اكتر لانه الناس الكتبو الكلام ده ما طبقوه فيها وجرد نظريات!! احمد قال طيب منار بتكون وين؟!

عم حسن قال دي المنبوذة!!!؟
احمد قال بغضب اسمها منار ياعم حسن!!! لو وريتني القاها وين تكون ما قصرت!! قال ليه في اول مكان بتشرق فيه الشمس واخر مكان بتغيب فيه الشمس!! احمد قال دي فزورة ولا شنو؟! من وين اعرف مكان زي ده؟! عم حسن قال الكتاب قال كده انه ده مسكنها الوحيد فاسأل بتاع جغرافيا بيعرف المنطقة دي بتقع وين؟!
ف احمد احتار وما عرف يتصرف بس مصر انه يصل لمنار وينقذها!!
اعوذبكلمات **** التامات من شر ما خلق واعوذ ب**** من ان يحضرون
نواصل بعدين

يتبع ………

الجزء التاسع من رواية المنبوذة​

دكتور احمد طلع من المكتبة وقبل ما يقطع الزلط وقفو الحرس!! احمد اتلفت عليه وفضل مكانه!! جا عليه الحارس ومدا ليه ختم الفضة حقتو؟ احمد استغرب وقبل ما ينطق بكلمة الحرس الجامعي قال ليه في سواق تاكسي قال لي في ولد لابس قميص كبدي ولافي شاش في راسو اديهو الامانة دي!! احمد ابتسم واتأثر لدرجة انه عيونو لمعو!! وشكر الحرس وشكر صاحب التاكسي الشهم ومشى برجولو على طوووول شارع الجامعة وهو بفكر في كلام عم حسن!! هل ده كلام حقيقي ولا خرافة!! واذا كان خرافة طيب النقش الفي يد منار ده يفسرو بشنو؟! وكيف يعرف مكانها وراسو جاط شديد ولم انتبه لقى نفسو قريب الكبري!! وما عندو قروش عشان يوقف ليه مواصلات بس وقف تاكسي وقال ليه ما شايل معاي قروش بعد اصل البيت بديك!! السواق ولا رد عليه دور عربيتو ومشى!! احمد ابتسم واتزكر موقف بتاع التاكسي الاول ودعى عليه من اعماق قلبه!! ولسسسه منتظر يجي تاكسي تاني وقف ليه واحد!! وناداه دكتور احمد!! اتلفت عليه ومشى مسرع!! الشاب فتح ليه الباب وسلم عليه! اتضح انه اخو مريض كان بعالجو الدكتور المتدرب معاه احمد… دردشو مع بعض وكفر ليه عن الحادث!! افتكرو حادث سير لم شاف الشاشة في جبينو واحمد مشاه وما حب يفتح معاه مواضيع ولا يكلمو بموضوع الشلل ولا الموت السريري!! احمد قال ليه ممكن استعير تلفونك اذا مفعل انترنت!! الشاب قال ليه جدا!! فتح التلفون ومداهو لاحمد بحث في كروم عن اول مكان بتشرق فيه الشمس !! ما لقى اجابة واحدة!! وظهر ليه في البحث اعلا التلال والمرتفعات وجمال الشنو كدا من استعجالو ما قراها كويس!! بحث عن اخر مكان تغيب فيه الشمس برضو ما حصل علي اجابة مناسبة وكان في كذا خيار لكذا منطقة!!! الشاب قال ليه بتبحث عن شي متعلق بشغلك ولا شنو؟! شكلو فضولي شديد!! احمد ابتسم وقال ليه بتعرف اول مكان بتشرق فيه الشمس وين؟! الشاب ضحك وقال ليه بعرف المملكة التي لا تغيب فيها الشمس!! احمد ضحك وتاني سألو بس لشنو بتسأل لقيتو سؤال في لعبة ولا شنو؟ احمد غير الموضوع وقال ليه غريبة من متين ناس المرور ديل بتمركزو هنا!! والشاب ما صدق وبدا يحكي عن مواقف حصلت ليه رجال المرور والمخالفات الدفعها والاتهرب منها!! لحدي ما احمد وقفو وشكرو وقال ليه نازل هنا!! فعلا نزل وشكرو ومشى شارعين برجولو لحدي ما وصل بيت وليد صديقو المقرب!! دق الباب وفتح ليه اخو وليد الصغير سلم عليه وهو ما مصدق عيونو وقال بخلعة مووش من يومين كنت في الانعاش!! احمد ضحك وقال ليه موتا وقمت بعاتي!! الاخير ضحك وكفر ليه وفضلو علي البيت!! وكلهم رحبو بيه وضيفوه وفرحو بشوفتو طيب ومعافى!! واتصلو علي وليد قال ليهم قريب ما تخلوه يطلع!! وفعلا ربع ساعة وجا جاري جري مهرول وبقول ليهم وينو!! لم شافو حضنو بعض وكأنو ليهم سنين من بعض وهزر معاه وقال بعد ما قلنا حنرتاح منك تاني جيتنا ناطي!! واشتبكو بالايدين كانهم بيضربو في بعض!! ام وليد قالت ليهم اخجلو ي رجال يا دكاترة!! شفع الروضة ما زيكم!! ضحكو ومشو علي غرفة وليد وحكى ليه المستجدات بس لانو وليد عرف قصة منار من اول يوم لاقاها احمد في المستشفى!! وليد اتهجم وملامحو اتجمدت!! وقال ليه ده شنو فيلم الرعب ده!! انت جادي دي نهاية العالم ولا انت لسسه مجنون!! احمد ضحك وقال ليه امش صالح قمر ساااي يمكن تاني ما تلاقيها!! جدعو بالمخدة وضربت رأس احمد واتألم شديد لمن داخ!! وليد ارتعب!! وجاهو جاري ملهوف وبيعتذر واحمد بين واعي وما واعي شاف منار قاعدة في قمة زي الجبل وحولينها تلاتة مرتفعات وكأنهم تلاتة جبال جنب بعض وبعداك استعاد وعيو وشاف وليد خايف عليه! ! قال ليه انا كويس ياعارض!! وليد لمن قعد علي الارض وبقى ينفث نفسو بتوتر وقال حتشلني في يوم و****!! احمد قال ليه جيب تلفونك!! وقبل وليد يرد احمد شافو في الكنبة اتاولو ولقى وليد لقى بصمة اليد حقة احمد!! ضحك وقال ليه متين موتا انا!! كان تخليني اموت بعداك القي بصمة يدي!! وليد ضحك وقال حزفتها بالغلط و**** اتلخبطت لي مع بصمة قمر وما قدرت افرزهم فمت زعلتي منها حزفتهم الاتنين!!! احمد قال ليه انت الراجل الوحيد العامل بصمة لخطيبتو في تلفونو الخاص!! وليد ضحك وقال ليه لاني مسكين ما شيطان زيك!!
فأحمد فتح التلفون عن طريق كلمة المرور لانه برضو عارفها!! ودا يبحث في النت اعلى قمة في العالم،قمة مسلطحة عالية،ثلاثة جبال مرتفعات، وفي كل بحث من ديل كان ببحث عن صور!! بس ما شاف الشكل الاتخيلو من شوية!! فكتب مرتفعات غريبة، ثلاثة جبال غريبة وفجأة ظهرت ليه صورة مشابها للشافها بس ما هي زاتها!! فتح الصورة لقاها في بحيرة في اثيوبيا والصدمو انو التعليق المع الصورة كاتبين انو اول مكان بتشرف فيه الشمس!! فقام مصدوم!! وقال ليه شكلي لقيتها!! وكلم وليد بموقف الروئية الضبابية الشافها في مخيلتو لم وليد ضربو بالمخدة!! وليد قال ليه فالنفترض انك ما مجنون!! ولا بتتهيأ حاجات صعبة الحدوث!! وانه فعلا منار هناك في نفس المكان ده واشر علي الصورة! قال ليه وريني حتصل ليها كيف؟! ما تقل ادبك وتقول لي حتسافر اثيوبيا ولا حتمشي تفتش عن جبال الشيطان دي العياذبالله!! احمد ابتسم وقال حنمشي لعم حسن هو بساعدنا وجا طالع ووليد وراهو!! قال عم حسن ده منو!! احمد قال ليه عمك بتاع المكتبة داك!! وليد قال اهاااااا! ؟

وداك علاقتو شنو بالموضوع!!! احمد قال حاحكي ليك في الطريق!! وفعلا ركبو عربية وليد ورجعو تاني علي الجامعة!!! وفي الطريق حكى ليه قصة عم حسن!! وليد خاف اكتر وقال ليه بصراحة عقلي ما قادر يستوعب كلامك ده يااحمد بس اذا فعلا نحنا بنشهد نهاية العالم تبقى عوجة!!احمد ضحك وقال ليه العالم عارف ليه شنو انت موت ساااي!! وليد ضحك وقال صحي و**** سودانا بقى جحيم الارض!! **** يلطف بيه ويرفع سخطة وينزل رحمتة علينا!!
شوية كده ووصلو المكتبة!! عم حسن لم شافهم ابتسم بسخرية!! وقال لاحمد كنت متأكد من انك حتجي راجع!! وليد سلم عليه سلام معرفة وعم حسن استغرب ده منو وبعرفني من وين؟؟! احمد بادر بالكلام وقال ليه ده وليد صاحبي ودفعتي!! وكلنا بنعرفك يا عم حسن بس ما حصل جمعنا معاك موقف!! قال ليهم ارح وراي!! وداهم نهاية المكتبة ودخلهم غرفة صغيرة كده ماف زول منتبه لوجودها وماف زول شاف بابها فاتح!!؟ دخلو وراهو وكانت ضيقة شديد!! وليد قعد في رزمة كتب!! عم حسن نهرو لم قام مخلوع وافتكر قعد في عقرب ولا ثعبان!! وقال ليه اقعد بأدبك ولا اطلع بره!! الكتب دي اغلى من اعضائك الحيوية!! احمد مازح وليد وقال ليه يعني كليتك المانعة دي كان بعناها ما بتساوي سعر كتاب!! وليد ضحك!! عم حسن اتغاظ من ضحكم وزح وليد من قدامو وشال كتاب من رف قزاز قال ليه ده!! في منو نسختين بس!! الفي يدي دي والتانية في متحف اللوفر!! وكل الكتب الحولينك ديل ما بقلو اهمية من ده!! وانا غلطان لاني دخلتكم هنا!!
وقبل ما يطلعهم احمد اعتذر منو وعلي جهلهم عن اهمية الكتب وندرتها!! وقال ليه انا عرفت المكان البتشرق فيه الشمس اول!! وراهو الصور والمكان وموقع البحيرة الفي اثيوبيا!! عم حسن قال ليهم بس انا راجعت كتاب بخصوص الموضوع ده وطلعت بنتيجة مختلفة!! قالو ليه مستنكرين لقيت شنو؟! في صلاية فرشها في الارض وقال ليهم اقعدو!! وليد لم قعد في الصلاية حمر ليه!! طوالي نزل منها علي الارض واحمد بداري في ضحكاتو!! عم حسن قعد ف نص الصلاية والنص التاني خته فيه الكتاب وهم قعدو علي الارض!! الكتاب ده ذكر انه مختلطة الدم حتحرر اعوانها!! وفي بعض الروايات قالو اهلها وعشيرتها!! وليد قال ليه منو ؟! قبل ما يرد احمد قال ليه انت مووش قلت لي انها من الحِن!! عم حسن قفل الكتاب وقال ليهم الساحرة الخاطفة بنت جنسكم ذكرت في روايات محرفة عن التوراة والانجيل وبعض الكتب اليهودية!! عن الساحر العظيم!! وفي ناس قالو ساحرة!! وبعض المسلمين الجاهلين قالو الوصف مطابق للمسيح الدجال!! يعني الروايات مختلفة ومعظمها مغلوطة!! وليد قال ليه اخدنا علي قدر عقولنا واشرح لينا اكتر اذا تكرمت!!
عم حسن قال ليهم اسمها ما مذكور في الكتب ولو كان موجود ماف زول بيقدر ينطقو الا المنبوذة!! واصولها من عشيرة الحِن السكنت الارض قبل الجن! ولم عصو **** وافسدو في الارض **** سلط عليهم الجن!! حاربوهم وقتلوهم دي دوايتنا المسلمين وراجعو كتاب البداية والنهاية لابن كثير صفحة خمسين اتكلم عنهم بالتفصيل!! بس الذكر في الاسرائليات انهم بعد هزمهم الجن هرب بعضهم للكهوف وعاشو في باطن الارض!! وواحد من الجن اعجب بواحدة من الحِن واتزوجها في السر و انجبو بنت وكشف امرهم واعدموهم وما قدرو يعدمو الطفلة لحكمة يعلمها **** ونفو صاحبة الدم المختلط في القمر!! في نص القمر تحت صخورو وبكدة قالو حتفضل منبوذة للابد وتبقى عبرة للغير!! وقالو انو يأجوج ومأجوج هم ما تبقى من الحِن والبن ورجعو سكنو الارض بعد خلق البشر!! ولم افسدو فيها تاني **** سلط عليهم ذو القرنين وسجنهم بين السدين!! وليد مخلوع قال ليه الكلام ده صحي!! عم حسن قال اسرائليات والرسول الكريم قال لينا لا نصدقها ولا نكذبها!!؟
احمد قال ليه مستنكر!! طيب الساحرة اتحررت كيف؟! عم حسن قال ليه ده الكلام الانا خايف **** يأثمني عليه!! احمد قال كيف؟!
قال ليهم في كتاب السحر العظيم ذكر انه في *** حينشق ليه القمر!! ولم القمر ينشق حتتحرر الملعونة!! وليد قام علي حيلو وقال لاحمد الرسول صل **** عليه وسلم انشق ليه القمر فعلا!! عم حسن قال ليه استهدي ب**** يمكن يكون ده كلام كذب ساااي وصدف بس!! ما تصدق اي حاجة بتسمعها!!؟ احمد قال ليه عايز تقنعني انه منار في اعلى السدين والساحرة من خلالها عايزة تحر يأجوج ومأجوج!! عم حسن قال الكتاب بقول كده!! وليد قال ليهم وماف زول علي وجه الارض عارف موقع السد ده وين؟! عم حسن قال ليهم دي المشكلة هنا!! احمد قال طيب حنعرف مكان منار كيف؟

نواصل بعدين

يتبع ……

الجزء العاشر من رواية المنبوذة​

عم حسن قال لاحمد اقعد!! احمد كان متوتر شديد وقال ما قادر ياعم حسن البنت دي بتهمني شديد!! حاسس كأنو في صلة قرابة بيناتنا!! عم حسن قال ليه انت عرفت موقع التل الفي اثيوبيا كيف؟! قال ليه قبيل في حالة لا وعي واتهيأت اني شفت منار وكانت في المكان ده!! وبعد صعوبة حتى قدرت اتوصل ليه عن طريق الانترنيت ويمكن يكون غلط!؟ عم حسن قام على حيلو وقال ليه يمكن يكون صاااح و دي اشارة ليك؟! ولا يمكن منار تكون عندها القدرة في انها تتواصل معاك!!! احمد قال معقولة لكن!!! عم حسن قال معقولة لكن في حالات معينة يا انت ممسوس لا سمح **** ولا اتمسيت قبل كده!! انه الشخص الممسوس هو الوحيد البيقدر يشوف شر خلق **** والعياذ ب****!! وليد بقى يعاين لاحمد وقال لعم حسن احمد اتمس من كم يوم لدرجة انه اتشل ومات سريريا!!؟ عم حسن اتشهد وقال ليه بس معناه ده السبب!! عشان كده بتحاول تتواصل معاك!! احمد قال يعني انا لسسسه ممسوس!!؟ عم حسن ضحك وقال ليه انا امين مكتبة ما شيخ؟ خلاهم بيضحكو!! وقال لاحمد بس ابعد عن الجوطة وصفي ذهنك ولا اخد ليك نومة ويمكن يمكن!! تتواصل معاك!؟ غير كده ما حنقدر نصل ليها!! احمد شكرو وقبل ما يطلع قال ليه معليش للسؤال بس بتعرف الشخص الزوهري موووش!! عم حسن ابتسم وقال ليه ما بنكر انك دكتور لكن الانا بعرفو انت ما بتعرف ربعو يا ولدي!! احمد حك راسو وجدد اعتذارو!! عم حسن قال ليه دي خرافة حقة دجالين ساااي بغشوهم الجنون العياذ ب**** وبخلوهم يضحو بطفل برئ ويقدموه ليهم كقربان!! بس ماف حاجة اسمها *** زوهري وهي زوهري زاتها لو عرفت معناها تموت من الضحك!! احمد قال عارف اللهو الطفل من يتولد بتم استبدالو من قبل الشيطان بطفل جن العياذ ب****!! ولا بتلبسو الشيطان من وقت ولادتو!! عم حسن قال ليه ما هدا انت عارف!!؟ فمعقولة يكون في *** كده؟؟ قال ليه طيب لشنو الدجال قدر يميز منار دون غيرها ولشنو كانو عايزين يقدموها قربان للشيطان عشان يلبي طلباتهم!! عم حسن قال ليه تسألهم هم السؤال ده؟ بس انا بستنتج ليك انهم عرفو عن طريق شياطينهم انها مرغوبة ومطلوبة لساحرة وشيطانة اعظم منهم عشان كده بقو يتسابقو عليها!! يا عشان يقدمها ليها ويحصلو على شي معين منها ولا خايفين انه الشيطانة العياذبالله منها اذا قدرت تستحوذ علي منار حتكون عدو لا يهزم وقد تستعبدهم!! عشان كده السحرة من بني جنسنا بقو يتنافسو عليها!؟
احمد شكر عم حسن وقال ليه لو اتوصلت لاي شي بديك تلفون وشكرا لمساعدتك!!؟ قال ليهم الطريق الانتو ماشين فيه ده صعب واعملو حسابكم وانتو ما بتتعاملو مع مخلوق عادي؟! انتو بتتعاملو مع شي حتى الجاااان بهابو وبخاف منو؟! وليد قال لانها مختلطة الدم ولا كيف؟! عم حسن قال ليه الواقفة وراك دي!! وليد قام جاري بكورك ولمن دقش الباب خلا عم حسن واحمد بيضحكو!! وقال لاحمد قبل ما يطلع صحبك ده قلبو خفيف ما تدخلو في المعمعة دي ولا حتفقدو للاسف!!؟ احمد عاين لعم حسن مسااافة وشكرو مره تانية وطلع!! احمد اتلفت يمين شمال ما شاف وليد لم طلع برا للعربية لقاه راكب وغضبان وبقول ليه انا تاني اجي معاك!!؟ وانا تاني كان باريت امور سحر ومشعوذين اكون حيو*ن زيك!! واحمد بيضحك قال ليه خلاص سوق ولا حتسوق بينا العربية هي؟! وليد انفعل وقرب يفتح باب العربية وينزل واحمد بيضحك وبتأسف وبقول خلاص سكتت و**** تاني ما اجيب سيرتها!! وتاني بقى يضحك!! وصلو البيت والطريق كلو مشغل القرأن الكريم بصوت شيخ نورين وماف واحد بيتكلم مع التاني!! لحدي ما احمد نزل وقال لوليد ارح انزل سلم على الحاجة!! وليد سب ليه ودور عربيتو وخلا احمد واقف بيضحك!!
دخل البيت وكانو قلقانين عليه وامو بكت وشاكلتو مشيت وين؟ ولشنو ما شلت تلفونك وانت لشنو بتعمل فيني كده انا بموت و****!! حضنها وقبل راسها واعتذر منها ووعدها انه تاني ما يطلع قبل ما يكلمها!! اشرف كان قاعد بس زعلان من اخوة ابا يتكلم معاه ولا يسألو من شي وكان متشاغل بتلفونو عن قصد!! احمد جا جنبو وقال ليه معليش!! وطلع علي غرفتو!! ونظرات الأسى في عيون اخوه متابعاه لحدي ما دخل!!
جات امو وقالت ليه يا اشرف ياولدي اتكلم مع اخوك وخليه يبعد عن سكك الاسحار دي!! ما كافية الحصل فينا!! ختى تلفونو وقال ليها حاولت يا امي بس ولدك عنيد و**** وما عارف البيت ده الرابطو بيها شنو؟؟ انا اخوه الكبير بس عمري ما شفتو في الحالة دي ولا متمسك بشي للدرجة دي؟ والحاجة البتزعل انو الموضوع ما لعب عيال ولا هزار دي امور سحر ودجل وشعوذة وعالم سفلي العياذ ب****!! بس انا بتصرف ما تخافي… وربت علي يدها وطلع!!
احمد قلع قميصو ورقد في سريرو وبعاين للسقف!! وبقول بينو وبين نفسو وين انتي يا منار؟؟! ما انتبه بس حس بخدر في جسمو وقال ده بكون بسبب الارهاق لانو من استعاد وعيو وهو ما اخد راحة ولا نام حتى؟!! بقى يتقلب والنوم ما عايز يجيهو وقرب يقوم ياخد ليه دش بس قلبو قبضو شديد وحس بخدر في الرجول ولسانو تقل شديد!! وكأنه حيرجع يتشل تاني!! وقال في نفسو معقولة ده الجاثوم (شلل النوم) (اب كباس لغير الناطقين بها!!)

وخلاص الشي اتملكو وما فضل الا يكورك وحتى لو كورك ماف زول بيسمعو لانه الحالة دي بتكون مرت علينا كلنا!! بس هو صااحي ما نايم كيف تجيه الحالة دي! وقال في نفسو منار؟؟ دي انتِ؟ وضربات قلبو زادت ولمن بدا يتشنج وفجأة لمح طيف الساحرة في وشو وشهق بقوة واغمى عليه!!
لم فاق قام مخلوع وقال اكيد ده ما حلم وشاف الساعة لقاه المغرب قرب يأذن يعني فاقد الوعي لاكتر من ساعة!! قام واتصل علي عم حسن وحكى ليه الحصل!! عم حسن قال ليه منار بتحاول تتواصل معاك بس الساحرة بتدخل وبتمنعها حاول ما تفكر فيها بصوت مسموع وما تذكر اسمها بصوت مسموع لانه الساحرة مراقبة وحتعرف انك عايز تتواصل معاها؟ ! احمد قال ليه بس انت ذكرت اسمها عادي ما خايف الساحرة تسمعك ولا تأذيك!!؟ عم حسن قفل الخط في وش احمد وخلاه محتار وبيضرب اخماس في اسداس!!؟
طلع صلى اوقاتو الفاتت عليه والمغرب واتغدا مع ناس البيت وحاول يطلع يشم هوا بس امو حلفت كان تخليه يطلع!! ضحك وقعد اتونس معاها وفتح اللابتوب حقه وبدأ يراجع في بحوث وفجأة وبدون ما يدري جاتو غفوة وهو في كرسية وشاف نفسو في مكان مخيف؟! ما كان مرعب بس هادئ لدرجة مخيفة!! واضلم شديد وكأنو بيسمع هدير امواج وجسمو بقشعر واول اسم جا على بالو وهو بيحلم قال منار!! حس بيها واقفة وراهو وبتهمس في اضانو ولمن جسمو بكششش شديد وقلبو بيضرب بقوة وبتقول ليه بصوت بطىء ناعس!! انا في سواكن!! وفجأة صحى مخلوع ولمن جا ناطي وكان جسمو عرقان شديد وقلبو لمن بيوجعو من شده ما بيضرب وقال سواكن؟!
اعوذ ب**** من همزات الشياطين واعوذبالله من ان يحضرون!!
نواصل بعدين

يتبع ……….

الجزء الحادي عشر من رواية المنبوذة​

دكتور احمد قام مخلوع ولمن حلقه ناشف؟! قام شرب ليه موية وهو بفكر معقولة تكون في سواكن؟! وامشي كيف انا؟ واقول لناس بيتنا شنو ؟واذا مشيت القاها في اي حتة!! والزمن كان ما مناسب عشان يتصل على عم حسن!! طلع غرفتو صلى العشاء ونام!! من الصبح كلم ناس البيت وقال ليهم عايز ابعد وانسى الحصل معاي!! وطالما انا موجود هنا صدقوني الموضوع ما بروح عن بالي!! والدته ايدت الفكرة ودعمتها وقالت لو عايز تسافر داخل السودان امشي لعمك في عطبرة ولا خالتك منال في بورسودان!! من جواه فرح لانه لقى مخرج بس ما حبه يحسسهم انه مهتم لموضوع السفر الداخلي وقال ليهم لالا حااسافر خارج البلاد لكم يوم؟! اشرف اتدخل منفعل وقال ليه نهائي ماف ليك سفر خارج السودان وما تجادلني في الموضوع ده وجوازك زاتو ما حتشوفو ولو اضطر الوضع صدقني بحظر جوازك من السفر!! وانا متأكد انه سفرتك دي وراها إنٌ!!! بس نهائ ما بتغادر!! امهم حاولت تهدي اشرف وقالت لاحمد اسمع كلام اخوك وبما انها سفرة يومين ولا اسبوعين احسن امشي لعمك ولا ااااي ولاية تانية ما بنمنعك وبتكون طمنتنا عليك وما بذرت قروشك في السفر!! قال ليهم بزعل خلاص بسافر بورسودان افضل وقالها بزهج وطلع غضبان ظاهريا!! بس من جواه بنطط من الفرح!! صبح الواطا ومشى لاهل منار!! لقى حالتهم صعبة شديد وامها صحتها متدهورة!! سلم عليهم ووراهم انه احمد اخو اشرف!! ونادر استقبلو بشهامة وكرم السودانين وحتى مريم خالة منار كانت موجودة وبتساعد اختها واولادها في شغل البيت!! وجات لاحمد انت موووش الاتشليت!! سمعت قالو ودوك لشيخ كاااارب من جلسة واااحدة يومين بس مشيت برجلينك صحي الكلام ده؟؟! ومكانو وين ياربي شيخك ده!! عاين ليها بإشمئزاز واختصر الرد عليها في تلاتة كلمات شفاني رب العالمين!! عاينت ليه بإستغراب ورجعت علي المطبخ!! سألهم اذا في خبر عن منار ولا قدرو يتحصلو علي اي معلومة تفيدهم!! قالو ليه بحزن ماف خبر عنها وخلينها علي رب العالمين ما بيدنا شي الا وعملناه!! بس نحنا ما عندنا القدرة نحارب لينا شيطان العياذبالله!!!؟ قال ليهم ان شاءالله حترجع بس كترو الدعوات!! وسألوه اذا عارف عنها شي بس ما جاب ليهم سيره التواصل معاها ولا موضوع سواكن!! وخلا لنادر ظرف تحت المخدة وطلع بدون ما يقول ليهم دي حاجة بسيطة اتساعدو بيها! !؟
مشى الجامعة لقى عم حسن لاول مره يغيب!!! سأل عن بيتو ومشى ليه هناك!! فتحت حفيدتو الباب سلم عليها بإبتسامة وسألها عن عم حسن قالت ليه جدو في الصالون اناديهو ليك؟! ابتسم وقال ليها انا ما عايز اتعب جدو؟ خليني انا بمش ليه؟! صرت وشها وقالت ليه ماما قالت لي ما تدخلي الغرباء الا هي تكون قاعدة!! احمد ضحك وقال ليها طيب نادي لي زول كبير!! وفجأة ظهر عم حسن قال لاحمد عارفك عنيد ولايوق وبتصلني في البيت ارح على الصالون!! احمد ضحك وسلم عليه ودخل معاه علي البيت!!
وقال ان شاءالله عافية الليلة مالك ما مشيت علي المكتبة!! عم حسن ما رده وقال ليه اها سبب الزيارة شنو؟! احمد صلح قعدتو وقال ليه امس حلمت ولا كوبست ما عارف بس منار قالت لي انها في سواكن!! عم حسن بإستنكار قال ليه شفتها!!؟ احمد عقد حاجبية وقال لا!! بس حسيتها واقفة وراي وسمعت صوتها!! قال ليه يمكن تكون دي الساحرة عايزة تضللك ولا عايزة توديك هناك لموتك!!؟ احمد ابتسم وقال بس انا ما خايف؟! عم حسن بغضب قال ليه في خيط رفيع بين الشجاعة والحماقة فبتمنى ما تتجاوزو!! احمد ضحك وقال و**** ما خايف بل العكس متحمس للموضوع!! قال ليه بإنفعال طيب اذا مشيت سواكن حتلاقاها منتظراك بفستان فرحها مثلاَ!! ولا حتفتش سواكن طوبة طوبة وزاوية زاوية عشان تلقاها!! احمد قال ما عارف بس حأمشي وعايزك تساعدني!! عم حسن قال ليه اساعدك كيف وانا ما عارف هل هي فعلا هناك ودي كانت اشارة ليك عشان تساعدها! ولا دي مكيدة عاملاها الشيطانة العياذبالله منها عشان تتخلص منك ولا تتوهك!! ولا يمكن فعلا حاجزة منار هناك وكل مره بتغير مكانها عشان ماف زول يقدر يصل ليها؟! احمد قال و**** ما عارف ياعم حسن بس حدسي بقول لي انها هناك واذا ساعدتني ولا لا انا حأمشي!! عم حسن. غضب من عناد احمد وقال طالما انت متخذ قرارك جايني لشنو؟! احمد قال عشان تساعدني!! صدقني ماف زول واقف معاي ووليد بتصل علي بتجنبو عشان ما ابقى ليه سبب في مشكلة يصعب تداركها!!

عم حسن قال ليه وانا كيف اقدر اساعدك!!
احمد قال ليه نكون صريحين انا شاكي انك عندك ارتباط مع العالم السفلي ومتبحر فيه!! عم حسن ملامح وشو اتغيرت!! احمد قال ليه انا ما متأكد بس زي م قلت من شوية احساسي عمرو ما خذلني!! لانو الشجاعة الشفتها في عيونك والحماس للموضوع ودرايتك بمواضيع يمكن تكون مجهولة لاكبر العلماء دي اكيد ما جات عن فراغ!! اكيد في حاجة خفية في الموضوع!! والشي الحيرني اكتر انا ليه من بين كلللل البشر والناس البعرفهم جيتك انت بالتحديد!! لشنو ما نزلت النقوش الشفتهم في يد منار في مترجم التلفون وعرفت اصل اللغة ومعناها!! لشنو اجي لعم حسن الانا درست في الجامعة دي اربعة سنة بالاضافة للدراسات العليا ماحصل لاقيتك ولا اتكلمت معاك في اي موضوع!! فكيف في وقت حوجتي للمساعدة وفي الموضوع ده بالذات لجأت لشخص ما بعرفو!! كل الاسئلة دي كانت شاغلة بالي من مساءامس!! عم حسن ابتسم وقال ليه اول مره اشوف زول يقراء مجال ويكون مناسب لشخصيتو زيك!! احمد قال ليه بحماس كدي خليني من علم النفس ووريني قصتك واوعدك ما اكلم زول!! عم حسن ضحك لحد القهقهة وقال ليه انت مسكين يااحمد ياابني!! انا ما بخاف الا من رب العباد!! قام قفل عليهم الصالون وشغل التكيف عشان صوتو يشوش علي اي زول بره ممكن يسترق السمع!!؟
وقال ما تتوقع اني احكي ليك قصتي ولا املكك معلومة اكتر من الانا عايزك تعرفها!!؟ احمد قال بلهفة ودي بتكفيني!! عم حسن قال ليه بتؤمن بالجن اكيد!! احمد ضحك وقال بعد كل الحصل معاي ده لو شككت الا اكون زول مخبول!! عم حسن طلع طاقيتو من راسو ومسح علي راسو شديد وكأنو مصدع!! احمد اتخلع وقال ليه برهبة ما تقول لي انت من الجن!!؟ عم حسن ضحك لمن اتشرق وقال ليه اسكت لا بتقتلني قبل ما تعرف!! احمد صلح قعدتو وقال اها انا سامعك!! عم حسن قال وبتؤمن بأنه في جن **** وفي الكافر!! احمد قال القرأن قال كده!! انا منو عشان اكذبو!!؟ عم حسن قال انا قبل خمسين سنة تقريبا كنت شغال في المنطقة الفلانية وكانت في غرب السودان ماف داعي لذكر اسمها!! حفاظا علي سلامتكم وسلامتنا!! احمد قال متحمس اها قول وبعدين!! عم حسن قال كنا شغالين في دكان محاصيل بننضف وبنعتل والمهم متحركين!! يوم بتذكر كنا في رمضان وصاحبي ده معاي وانا اتجرست شديد وقربتا افطر بالجد بتذكر اني قربت افقد الوعي من شدة التعب والعطش!! فصاحبي ده قام اتوضى وما بعرف كان خاتي مصحفو وين وبدأ بقرا انا من **** ما خلقني وللان ما سمعت زول بيقرا قران بالطريقة دي ولا بعذوبة الصوت ده انا و**** وتالله والشهادة *** حسيت نفسي في مكان تاني راح العطش والتعب ونسيت هموم الدنيا ونسبت زاتو انا منو!! وبقيت ابكي بسمع في كلمات رب العالمين وكأني اول مره اسمعها!! ما عارف بس حسيت بضعفي وتقصيري وكنت متمني *** يقبض روحي وانا في حالة الخشوع ديك وفجأة صاحبي بقى يبكي معاي وانفعل اكتر مني واختفى!! انا بعد الموقف ده اتأكدت انو اصابني الهزيان وبقيت في حالة لا وعي وبشوف حاجات ما حاصلة!! بس بعد شوية ركزت كويس!! ده انا وده الدكان!! ودي شوالات المحاصيل ودي الدموع ونخرتي سايلة وكل شي زي ما هو بس وين صاحبي ووين العطش؟؟! قمت مخلوع!! رجعت بيت قريبنا الكنت نازل معاهم والنوم غلبني والتفكير عايز يفوت بي!! وبغالط في نفسي مستحيل يكون اختفى فعلا!! وبعداك بكم يوم ما جا محل الشغل وانا ما كلمت زول والصراحة كنا جاهلين في الوقت داك وبنصدق قصص البعاعيت وقلت خلاص ده قرين زول ميت ولم انا كشفتو اختفى ورحل مكان تاني زي ما بنسمع القصص الزي دي من الناس!! بس ما حبيت اعمل شوشرة وافضح امرو وقلت حسيبو رب العالمين انا منو عشان ابهت لي زول ولا ادي الناس صغرة في تأليف قصص!! وكل الناس البتسألني منو بقول ليهم مشا لاهلو عندو ظروف وحتى قروشو عند التاجر ما شالها ولا شال ملابسو؟! والموضوع تم اسبوعين يوم وانا. نايم في ديوان قرايبنا الساكن معاهم ظهر لي صاحبي!! دخل فيني خوفة للان ما مرقت!! وما بحكي ليك قصتو لانها ما بتهمك يااحمد ولدي وانا عاهدتو اني ما احكيها لزول بس طلع انه من الجن وبتمثل في هيئة البشر عشان يتعلم القرأن وعلومة وعرفت انهم قبيلة كاملة وبختارو اماكن تحفيظ القرأن في مختلف البقاع وبسكنو جنبها عشان ما يأذو البشر بدون قصد ولا البشر يأذوهم وبدليل انه بعرفو لاكتر من سنتين ما غلط في زول ولا زول غلط فيه و**** اكرمو بحفظ كتابة الكريم وكرمو علي بني جنسو بأنه ممكن يعيش عيشة البشر وبدل ما يسكن في المزابل ويقتات بفضلات الدواب والعظام بياكل طعام البشر ومتعايش معاهم بس ما بظهر حقيقتو لزول وشاءت الاقدار انه ينفعل في قراءة القران ويرجع لطبيعتو بدون ما يشعر لوجودي وبدون ما انا اشوف طبيعتو الشيطانية كيف لانه **** جاعل في اعيننا غشاء!! بس اللازم تعرفو انه من اليوم داك ونحنا صداقتنا زي ما هي ما اتغيرت ولا اتأثرت وماف زول عارف الموضوع ده غيرك وعايزك توعدني انه يكون سر بيناتنا!!؟ احمد زُهل من الكلام السمعو وقال ليه يعني القصص البنسمعها انه في مناطق في السودان ساكنين فيها جن وقرية كاملة تابعة ليهم ده صحي!!؟ عم حسن ضحك وقال ليه هم اتخلقو قبلنا وعمرو الارض قبلنا وللان ساكننها معانا بس **** فاصلنا عن بعض الا العايز يمشي ليهم بإرادته!! اما موضوع القرى اكيد عندهم قرى ومدائن بس اكيد ما في العلن زي ما انت قلت واكيد ما بظهرو نفسهم بالطريقة دي ولا بعيشو زينا واحد !! احمد قال يعني ممكن يساعدنا!! عم حسن قام علي حيلو وقال ليه ولا تفكر تدخلو في الموضوع!! احمد قال طيب اذا ما عايز تساعدني لشنو اتدخلت في القصة دي وكيف خليتني الجأ ليك؟! عم حسن قال ياريت لو كان سمعت كلامو وما قربت عليك بس الشلاقة والفضول البشري اخليه لمنو؟! احمد ابتسم وقال كيف؟ قال ليه يوم حكى لي قصة منار وانه في بشرية مطادرة من قبل جن وشياطين وانها ممكن تكون سبب في ابادة البشرية وانا اتحمست للموضوع!! بس عرفت فيما بعد انه ماف زول واقف معاها غير شاب غريب عنها وممسوس كمان وبحارب معاها حبيت اساعد وطلبت منو انه يدلك علي وفعلا جيتني براك!!؟ احمد ابتسم وقال كلام ما بخش العقل ولو سمعتو من زول ممكن احلف قسم انه بكذب بس معقولة ده كلو يحصل معاي؟!

عم حسن قال ليه وانا كمان شاكي انها في سواكن بس صاحبي م متأكد لانه ما بحتك بالمردة والشياطين الكفرة بس الاخبار بتتناقل بيناتهم وكنت خايف عليك من الممكن يحصل فيك اذا مشيت!! واكون انا السبب بشكل او بأخر!! احمد قام متحمس وقال يعني منار فعلا في سواكن وياداب البسمة ارتسمت في وشو!! وعم حسن قال ليه انا ما بقدر اساعدك و**** بس امشي سواكن واتوكل علي رب العالمين واكيد **** حينصرك وصاحبي اذا عرف حاجة بديك اشارة بس ما بتواصل معاك!! وزي ما قدر يوصلك لي بدون تواصل يمكن يقدر يوصلك لمنار!
احمد شكرو وطلع من عندو وحجز تذكرة سفرو لبورسودان واشرف شال منو جوازو عشان م يغشهم ويسافر برا السودان وما كده وبس وداهو لحدي ما ركب الباص واتحرك علي بورسودان حتى رجع البيت!!! احمد كان متحمس شديد واخد ليه غمضة وكلم المضيف انه حينزل في سواكن وانه ما بيعرفها ونبه عليه يذكرو اذا وصلوها واخد ليه غمضة …..
اعوذبالله من همزات الشياطين واعوذبالله من ان يحضرون واعوذ بكلمات **** التامات من شر ما خلق
نواصل بعدين
يتبع ……..

الجزء الثاني عشر من رواية المنبوذة​

احمد نام وصحى تلاتة مرات وبسأل في الراكب جنبو لسسسه ما وصلنا سواكن!! الراجل بيضحك ويقول ليه شكلك اول مره تجي علي الشرق!!؟ احمد ابتسم وقال فعلا بس انا بطبعي ما بحب القعدة الطويلة!! والراجل بدا يحقق معاه سياحة ولا زيارة وبي راسك المضروب وشاشك ده ماشي وين ولا عدكم مناسبة!! احمد ضحك وقال للراجل اسكت عشان اقدر ارد عليك!! الاخير ضحك واعتذر من احمد على التطفل وقال ليه زي ما انت ما بتحب القعدة الطويلة انا كمان ما بحب اسكت لفترات طويلة خشمي بقرصني عديل كان سكتت!! ولتبادلو الضحكات ودردشو مع بعض!! في نفسو قال لو قلت ليه ماشي اوقف نهاية العالم حيطلعني مجنون! ابتسم وقال ليه ماشي زيارة وبالمرة اتفسح فيها شوية!! وبعد ساعات طوال المضيف نبهه الناس انهم داخلين علي سواكن!! احمد قلبو ضرب بقوة واختلطت عليه مشاعر الخوف من المجهول والحماس!! ودع الاستاذ الكان قاعد جنبو وقال ليه ممازح **** يصبر الطلبة عليك واتبادلو الضحكات واحمد نزل شنطة ضهرو من سبت الباص ولوح للاستاذ ونزل!!؟ اسقبلتو المدينة الساحلية بلفحة سموم خلتو يكشر وشو!! وطلع الكاب من الشنطة لبسو ووقف بتاع تاكسي قال ليه ماشي الفندق الفلاني الفي المدينة القديمة!! ده وصفو ليه عم حسن وراكب مع السواق وبتلفون ومنبهر بجمال الاماكن وزخرفة البيوتات وكأنها تحفة اثرية!! وفجأة اتذكر وليد وقال ياريت لو كان معاي وشاف النعيم ده!! وبدون مقدمات اعدل الجو ومال للبرودة اكتر!! وسأل السواق متعجب مووش الجو كان سخن ولا عشان الباص كان تكيفو عالي وياداب جسمي اتأقلم!! السواق ضحك وقال ليه لالا اصلا سواكن مشهورة بتغلب اجوائها وما تستغرب لو جات مطرة!! كان عندو لكنة اهل الشرق وظاهر علية انو ادروباوي! احمد اندهش وقال ليه لانها مدينة ساحلية ومناخها مرتبط بالبحر الاحمر ولا في سبب تاني!! السواق ابتسم وقال ليه دي سواجن!! وسكت!! الغربية ما قال سواكن وما بسبب اللكنة لانه قبيل قال لاحمد سواكن عااادي!! بس احمد نبيه وعارف اسطورة سواجن!! وعارف انه سواكن ليها معنين الاول وده الاشهر والمتداول عن ساكنيها والزوار انه *** **** سليمان عليه السلام كان بسجن فيها المردة العاصين وسميت سواجن بالسبب ده!! والمعنى التاني متداول في كتب المستكشفين والروحانين انه اصل الكلمة سواها جن!! بعنى انه عمرها الجن قبل البشر وكانت من اعظم الممالك للجن وبعد ما سلط **** الملائكة علي الجن ونفوهم منها بعضهم سكن تحتها في البحار وبين المرجان والبعض الاخر استقر في اماكن معينة فيها يعلمها البشر ومتعايشين معاها وبتجنبوها و**** اعلم!!

وفي اثناء ما احمد بفكر في الكلام ده وبستنتج السواق قال ليه وصلنا يا شاااب!! حتى احمد انتبه ودفع القروش وشكر السواق ونزل!!! من ما عتب اول درج في باب الفندق رياح قوية اشبه بالعصار طافت في المكان!! دخل وسلم وسأل موظف الاستقبال اذا في غرفة شاغرة والاخير وراهو العروض حقة الاصحاب وحقة العرسان ومميزات الغرف!! ودرجاتها واسعارها المتفاوتة وعلي حسب الخدمات بتعلو القيمة!! ضحك وقال ليه جايكم براااي عزابي وتاني ضحك!! الموظف حك راسو وقال ليه بس من شوية مووش دخلت معاك عروس!! احمد اتلفت بخلعة وما شاف زول وقال للموظف وينها!! الموظف سيطر عليه الخوف وقال ليه شكلي بتخيل!! وشال بيانات احمد وكتبها بنفسو من البطاقة ورجعها ليه وسألو عن مده الاقامة احمد قال تلاتة يوم وقابلة للتجديد ودفع قروش الغرفة والموظف مشى اتناول المفتاح وسلمو لاحمد ويدو بترتعش!! احمد استغرب واستلمو منو وطلع على الغرفة!! كانت عكس الوصف تماما!! ضيقة شديد وبلكونتها رادمنها عفش شكلو الغرفة كان فيها صيانة!! وحتى مفرش السرير لونو كئيب!! اشمئز! منها زح الستارة من البلكونة عشان يدخل هوا نضيف لانها كاتمة شديد والمروحة بتلف في الدقيقة عشرة لفات بس!! وفي اثناء ما بجر في الستارة كأنه لمح بت واقفة وارها وقفلها بسرعة وافتكر انه بالاتجاه التاني في غرفة مقاصداه واتلفت كأنه ماشي علي السرير بس اتزكر انه البلكونة مطلة علي الشارع وماف غرفة مجاورة!! رجع تاني مسرع وفتح الستارة بسرعة ما شاف اااي شي الا العفش القبيل مردوم!! استعاذبالله من الشيطان الرجيم ورجع رقد في السرير وعينو وقعت علي الوسخ الماسك في اجنحة المروحة والحالة هي شغالة واجنحتها برضو ظاهرة وقال ده احتيال عينك عينك وكلام فارغ!! وجا قايم منفعل راجع للموظف بس تلفونو رنه وكانت والدتو!! لمن خبط جبينو!! نسى يتصل يطمنها!! رده يا نبع الحنان ي غالية اعفي لي و**** انشغلت وكلام كتييير قالو ليها!! وكذب ليها وقال انه الباص اتعطل بيهم في سواكن وااااسه هو في الفندق الفلاني وبكرة من الصباح بجيبو ليهم باص تاني!! وامو خافت اكتر بس طمنها وشال منها اشرف التلفون!! احمد كان بختار كلماتو بعناية عشان اخوة نبيه وممكن يكشفو!! قال ليه تصل بالسلامة وانا شاكي انك عامل ليك عملة بس انت راجل وما بنخاف عليك وخلي بالك من نفسك ولو عايز تصارحني باااي موضوع انا اخوك!! احمد عض طرف لسانو وعرف انه اشرف نقش كذبتو وقال ليه ابشرر ياخ انت اخوي واكيد برجع ليك حتى ولو ما واجهتني مشكلة وقفل منهم ونسى هو كان عايز يعمل شنو قبل ما تجية المكالمة وفتح شنطتو طلع ليه بجاما رياضية وخت التلفون في الشاحن دخل الحمام!! الشامبو خاتنو منظر سااي كان فاضي ضحك وطلع بعد ما قلع ملابسو بس اتلف ببشكيرو الخاص بيه لانه حق الفندق كان زي قطعة المسح!! لفاه في نصو وطلع فتح شنطو طلع صابونتو وفرشتو ومعجون اسنانو كان (جاااهز زي امي لم تكون مسافرة

) وهو راجع علي الحمام التلفون الثابت حق الغرفة ضرب!! ابتسم وقال ب**** ده شغال يعني!! وافتكرو خدمة الغرف ورده بسرعة عشان يسمعو شكلة اول بس ما كان في زول برد!! واحمد بقول الووو وبعد كم ثانية تاني الوووو كان سامع صوت شخشخة وكأنه في كلام متقطع وركز عشان يسمع بس زي الزول البيمسح علي المايك بيدي سريع وبصوره متكرره كركبة وشخشخة ساي لم زهج وعايز يقفل الخط سمع ضحكة بنت وكأنها عروس بداعبها زوجها في ليلتها الاولى!! ضحكة ناااعمة ناااعسة خاااافضة وكلها خجل!! احمد كل شعرة في جسمو قامت وقلبو بقى يضرب بقوة ولمن بقى يناهج!! وقفل الخط بسرعة وخوف وبقى يعاين للتلفون!!! وبدا يسترجع في كلام موظف الاستقبال القبيل!! رجع الحمام ودا يستحم تاني سمع التلفون الارضي برن ما اشتغل بيه رن لغرابة الدقيقة بعداك فصل وهو بستحم حس بالموية ماشة تقل وبقي يغسل جسمو سريع سريع قبل ما تقطع ويتموسر!! وبنفس السرعة البشطف فيها جسمو بالموية حس وكأنه في يد تانية بتغسل معاه!! وقف غسيل ومسح الصابون من عيونو وبقى يشوف طشاالش بسبب الموية واثر الصابون بس ما شاف شي!! تاني الخليه يغمض شنو كان قلبو حيطير من شدة الخوفة!! وقبل ما يغتسل كويس وابقايا الصابون في شعرو واضنينو وحتى باقي الجسم تقريبا بس غلبو القعاد وبدا يلبس في بجامتو ولمن يديهو بتلخبطن!! فتح الباب وكان عالق ما فتح معاه والكهرباء فجأة قطعت وقال بسم **** بسم **** وقرب يكورك ونسى زاتو انو ذكر اسم الجلالة في الحمام والحمدلله اتمكن من الباب وقام جاري وباقي ملابسو في يدو!! ومن الخلعة نسى الباب اتجاهو علي وين وهو بكابس وبفتش في الباب الكهرباء جات لمن شان نفسو بصعوبة وقعد في اقرب كرسي جنبو!! وقبل ما دقات قلبو تنتظم باب الغرفة دقة لمن قام ناطي وقال منو بخلعة كده!! الطارق قال خدمة الغرف!! احمد لبس الشورت حقو كويس وفتح الباب غضبان انفعل في الموظف!! وينها الخدمات دي شوف المروحة دي اسسسه شغالة وتعال مسكو من يدو وقال ليه وينو صابونكم وينها خدماتكم والكرور الفي وشي ده شنو وكان بأشر علي البلكونة!!! الموظف قال ليه انا ما عندي دخل في الموضوع وراجع ادارة الفندق وعلى حد علمي علي حسب قروشك بتلقى البناسبك!! احمد استغرب من فظاظة الردود ووقاحة الموظف!! احمد بإنفعال قال عايز شنو؟! قال ليه جيت اغير الفرش واشوفك اذا عايز حاجة بس شكلك مرتاح وجا طالع!! احمد قال ليه اكون غبي زيكم لو قعدت في الفندق ده وتاني ما تتصلو علي لحدي م اقابل مديركم!! العامل ضحك وقال ليه اصلا التلفون منظر ساااي وما شغال!! وقفل باب الغرفة قبل ما احمد يرد!! قال ما شغال!!؟

وخطف شنطتو وشال تلفونو ونزل!! لقى موظف تاني في الاستقبال وقال ليه رجع لي قروشي ما عايز انزل في مزبلتكم دي واتجادل معاه فوق لمن لما الناس وصاحب الفندق اتدخل!! واعتذر لاحمد علي سوء الخدمات وقال انه بعاني من نقص في الايدي العاملة بس بعالج المشاكل في القريب العاجل!! ومع انه في نظام الفندق القروش اذا اتدفعت ما بترجع لصاحبها بس اكراما لاحمد وتعويضو عن المشكلات الحصلت معاه سيد الفندق قال للموظف رجع ليه ثمن الليلتين القادمات واخصم حق اليوم!! في نزيل معاه في الفندق قال ليه الواطا ليلت وماف فندق قريب من هنا والتجول في شوارع سواكن بالليل خطير واسأل مجرب!! احمد قال ليه بس ما بقدر ابيت في الخرابة دي!! الشاب قال ليه راحتك بس انا نصحتك!! احمد سلمهم المفتاح وجا طالع !! كان الظلام حاالك وماف اثر للقمر بالجد منظر مخيف لدرجة انه ما قادر يشوف علي بعد تلاتة امتار في شنو بسبب قطعة الكهرباء القبيل بس الفندق عندهم مولد مشغلنو!! احمد احتار يمشي وين ولا يتصرف كيف؟! وقال احسن يستحمل الليلة دي بس في الفندق ومن الصباح يتخارج!! دخل ورقد في كراسي في الصالة برره ما عايز يرجع الغرفة!! جاه موظف وقال ليه بعتذر من سيادتك بس ممنوع انك تنوم هنا اتفضل علي غرفتك لانه المكان ده عام وفي اسر ونزلاء ممكن يتضايقو من الحته دي!! احمد اتأفف وقال ليهم مصرين ترجعوني الغرفة ديك! طيب بدلوني بواحدة تانية ان شاءالله تكون اصغر من ديك ما عندي مشكلة!! قالو ليه للاسف كل الغرف مليانة بس غرفتك المتوفرة!! شال منهم المفتاح وقال انا كنت حاسس انه فندقكم ده بقصر اجلي!! وطلع علي الغرفة اتحصن وقرا اية الكرسي والمعوذات ودخل ومن اول خطوتين جاتو ريحة باااااردة لمن استنشقها لمن جسمو خدر وسمع نفس الضحكة القبيل في التلفون…..
اعوذبالله من همزات الشياطين واعوذبالله من ان يحصرون واعوذ بكلمات **** التامات من شر ما خلق…
اتحصنوا ونواصل بعدين

يتبع ………

الجزء الثالث عشر من رواية المنبوذة​

احمد اتجمد جنب الباب عايز يهرب بس ما قادر يتحرك!! عيونو مفتحة بس جسمو مشلول!! شاف طيف ممشوق القوام وعرف انها انثى؟! بس هي منو وعايزة مني شنو؟ وبسأل نفسه الف سؤال لحدي ما استقرت قدامو وحس بيها بتاعين ليه جوووه عيونو بس ما كان شايف عدستها ولا حتى ملامح وشها واضحة!! بس فايحة منها ريحة طيبة شديد ومريحة للاعصاب!! وقرب يغمى عليه بس فجأة تلفونو ضرب وانارة الغرفة رجعت طبيعية وما قدر يقيف فعلا وقع علي الارض وحبى على ركبو حتى وصل السرير وعيونو مزغللة ماقادر يشوف حتى منو المتصل واكتفي بسماع الصوت!! وقال بصوت متعب ونفس خامي الووو!! عم حسن قال ليه بلهفة انت كويس طمني عليك!!؟ احمد دمعتو جات نازلة وقال ليه حاسي كأنه نزعو مني شي ولا زرعو لي شي في راسي تقيل شديد وحاسي بخدر ما طبيعي وكأني عايز اتشل وخلاص لسانه فعلا تقل وبقى يلوك الكلام وقال لعم حسن منار في رقبتك اذا حصل لي شي ما تخليها وغاب عن الوعي!! عم حسن خاف عليه شديد لانه صاحبة الجني كلمو انه الساحرة عرفت انه احمد في سواكن وبما انها لقت مكانها المناسب وبدت الطقوس حقتها عشان تسيطر سيطرة تامة علي منار ! ما حتغير مكانها بس حتى المكان مستحيل شخص عادي يقدر يصلو وما كده وبس رسلت اعوانها يضللو احمد ويجننوه ومنهم عروس الفندق!!؟ عم حسن اتصل علي واحد من سواكن وقريب للفندق النازل فيه احمد وطلب منه يمشي يشوفو لانه ما برد علي تلفونو وبعد ما فقد الوعي حصل معاه شنو؟! الراجل فعلا جا الفندق ورفضو يخلوه يدخل علي الغرف ولا يشوف احمد وكلمهم انه كان بتكلم معاه بالتلفون وقال ليه انه تعبان وفجأة سمع صوت خبطة وكأنه وقع علي الارض!! وده كلو عشان يخلوه يخش بس رفضو واتصلو عليه في رقمو الخلاه مع بياناتو وما رده!! الموظف المناوب طلع علي غرفتو ودقة باب غرفتو بس ما جا فتح وندهو بأسمو دكتور احمد دكتور احمد برضو ما رده!! الموظف التاني جاب النسخة التانية من المفتاح الخاصة بالادارة وفتح الباب وكانت الصدمة انهم لقو الغرفة فاااضية واحمد ماف!! موظف الاستقبال اكد للمدير انه شال المفتاح وطلع وتاني ما جا نازل!!؟ فإحتارو والزمن كان 12ونص صباحا يعني حيكون مشا وين؟! وبتاع الامن الحارس الفندق بقي يحقق مع الراجل الرسلو عم حسن قال ليك شنو؟! واتكلمت معاه في حوالي الساعة كم والتاعبو شنو وكلام كتييير!! وبقو يتشاورو في بعضهم هل يتصلو للشرطة ولا يصبرو شوية!! المدير نهرهم وقال كل واحد يشوف شغلو وماف زول يجيب سيرة الشرطة ما عايز يعرض الفندق حقه لاي خسائر وبالذات لو الناس سمعت انه في نزيل اختفى في الفندق!!؟ وقال ليهم حكيون مشى وين يعني! ! بكون نزل وانتو ما شفتوه ولا انتبهتو ليه ولبكرة لو ما جا راجع نتصل للشرطة!!! الراجل اتصل كلم عم حسن البدورو خاف شديد وما عرف يتصرف وحتى صاحبو الجن العياذ ب**** من ان يحضرون ما قاعد معاه ولا عندو شغرة وصل بيناتهم وقت ما يطلبو بيجي!! مرات بجي من نفسو ومرات عم حسن بتكلم عنو وبطلبو وفعلا الاخير بلبي النداء!! بس المره دي عم حسن قدر ما اتكلم مع نفسو وحتى انه ذكرو بأسمو السرياني الشيطاني وبرضو ما جا!! وما عرف يتصرف كيف؟! اما احمد كان ماااشي في شارع غريب وحتى تشيدو والمباني المحيطة بيه كانت غريبة الطراز ما حصل شاف طريقة بناء زي دي!! ما كانت فخمة ولا مهجورة كانت عادية بس ما فيها مداخل ما فيها ابواب وهدوء مخيف!! وبنادي لو في زول سامعو بس بدون جدوه!! لحدي ما وصل جدار!! ما مبني بطوب ولا حديد!! كان زي الطيف ولا موجات كهرومغناطيسية! ! اقرب شكل مشابه ليها هو الشفق الازرق وما البتشاف بالعين المجردة ده ولا وكانه بعاين ليه بتلسكوب!! كان منظر مهيب ومخيف وجميل في أنٍ واحد!! وسمع صوت انين قلبو رعش وقال منار دي انتِ؟! سمع صوت بكاها كانت هي بس ما قادرة تتكلم!! اتلبش وبقى يحاول يخترق الجدار دا بس بدون فائدة وكأنه بمرر يدو في دخان ما قادر يخترقو!! وبعد عدة محاولات فاشلة وحس بضو وراهو وسبحان **** لم شاف جمال الشمس وهي بتشرق!! كانت ما حارة وكمان بقدر يعاين فيها مباشرة بدون ما تأثر علي عيونو!! وتاني حسسسه كأنه الارض لافة من تحتو ووقع!! وما صحى الا علي اصوات الناس المتلمين جنبو وبسألو حي ولا ميت!! واحد اتحسس نبضو وقال ليهم حي!! رشوه بموية وفتح بصعوبة وبقي يعاين ليهم واحد واحد وقال ليهم انا وين!!؟
رفعوه من الارض وكان واقع جنب الفندق واتعرف عليه النزيل الحذرو امس انه ما يطلع وقال ليه انا ما وريتك وقلت ليك خطر انك تطلع بالليل واحمد *** انه ما اصابك مكروه!! وسندو لحدي ما دخلو الفندق!! اطمنو عليه وسألوه كان وين والحصل معاه شنو بس قال ليهم ما متذكر!! المدير وشوش مع الموظف والاخير طلع لملم حاجات احمد وجابهم ليه وقال ليه اقامتك معانا انتهت والغرفة اضطرينا نأجرها لانك اجرتها ليوم واحد بس!! ابتسم وشال شنتطو واتفقد حاجاتو لقى حتى باقي صابونتو دخلوها لي يعني اتخارج بعدلك!! شال شنطتو وطلع!! اتفقد تلفونو لقاه قاعد في جيبو!! وقبل ما يقرر يمشي علي وين لقى الراجل الامس منتظرو وقال ليه انا عمك محمود من طرف عمك حسن!! سلم عليه بخوف وافتكرو الجن صاحب عم حسن ولا واحد من جماعتو لانه عم حسن قال ليه حيساعدك!! كان متوتر شديد!! وقال لاحمد اتفضل معاي علي بيتي في الشارع التاني ده!!! احمد اتخلع وقال ليه لالا شكرا ليك جايني صاحبي!! الراحل شايف احمد خايف ومرتبك بس ما عارف السبب شنو ولا عارف بموضوع صاحب عم حسن داك!!؟ اتصل عليه عشان يطمن احمد شوية وبعد سلم عليه اداهو ليه بالتلفون احمد جنب شوية وقال لعم حسن صاحبك عايز يوديني بيتو!! عايز يجنني ولا يساعدني هو!!! عم حسن ضحك وقال ليه ده ما صاحبي داك ده صاحب عادي زي وزيك يا بليد!! واطمن عليه وخلا احمد بيضحك علي نفسو وحكى ليه عن الحصل معاه!! عم حسن قال ليه بستفسر عن الموضوع من صاحبي الاصلي ما زولك ده وبديك خبر!! احمد ابتسم وياداب اطمن!! مشي مع عم محمود بيتو وكان قريب شديد شارع واحد بس من الفندق!! استحم وغير ملابسو وكان جيعان فطر اول حتى شرب شاي الصباح!! عم حسن اتصل علية وقال امس الساعدك صاحبي!! لم العفريتة عايزة تتلبسك وتسيطر عليك صاحبي ساعدك وابعدك عن الفندق وخلا واحد من جماعتو يدلك علي مكان منار بس هو ما بيقدر يدخل معاك لانه بعد اسلم المنطقة ديك بقت محظورة ليه وما بيقدر يصلها ولا يدخلها وواحد من المردة لانهم خايفين من الممكن تعملو فيهم الساحرة اذا ابادت البشرية واسفتردت بحكمهم وانتقمت منهم علي قتل سلالتها وابادتها عن الوجود!! احمد قال طيب انا ما عارف انا كنت وين وحتى المكان ما كان طبيعي وكأني في مدينة اسحار ولا شنو ما عارف؟! عم حسن قال ليه اكد لي انه ترك ليك اشارة بس انت شغل مخك وارجع ذكرياتك وشوف الحاجات المرت بيك حتلقى المفتاح!!! احمد قفل منو وبقي بتذكر!! من اول ما فتح في المكان داك لحدي ما وقع مغشي علية ما كان في اااي اشارة!!؟ وجاهو عم محمود يدردش معاه ويعرف منو مشي وين امس باليل!! وقال لبه ارح علي الصالون مالك واقف في الشمس!! لانه كان بتكلم مع عم حسن طلع بره البيت!! واتذكر الشمس!! عاين ليها وجهرتو ما قدر يستمر في المعاينة بس اتذكر انو لم كان واقف قدام الجدار كانت الشمس وراهو وياداب شارقة!! يعني الاتجاة كان غرب!!؟ بس في اااي مكان؟!

ده اول راس خيط!!
دخل الصالون واتصل علي والدتو كلمها انه في سواكن والبلد عجبتو شديييد وحيقعد فيها يومين حتى يمشي بورسودان لخالتو منال!! امو زعلت وقالت ليه البلد غريبة عليك وانت عيان كان تصل بورسودان اول بعداك ترجع ليها!! المهم اقنعها انه مبسوط وطلب رضاها وعفوها وقفل!! وكان حيقفل التلفون عشان والدتو لو كلمت اشرف اكيد حيتصل عليه وقبل ما يقفلو شاف انتبه لعداد الخطوات اليومي في شاشة القفل!! لقاها قريب العشرين الف خطوة لمن انهجم متين هو مشي المسافة دي كلها!! وقال يمكن يكون دي المسافة القطعها الباص امس!!! بس راجع نفسو لانه حساب الخطوات بتجدد تقائيا 24ساعة يعني بعد الساعة 12صباحا بتبدا خطوات المشي الجديدة!! فقام مخلوع مدهوش فرحان وقال معقولة دي الخطوات الانا مشيتها وانا ما واعي!!!
نواصل بعدين

يتبع ………

الجزء الرابع عشر من رواية المنبوذة​

عم محمود جا شايل القهوة وشاف احمد واقف مخلوع وبعاين لتلفونو! قال ليه خير ياولدي في مشكلة!! احمد قعد علي الكنبة وقال ليه لا ابدا ماف شي!!؟
وحك دِقنو!! عم محمود قال ليه سكرك كيف؟! بس احمد شكرو وقال انه ما بشرب قهوة واستأذن منه وقال حيتمشى شوية!! والاخير ما متعو وقال ليه دارك ومطرحك وقت ما جيت مرحب بيك وجزيرة سواكن صغيرة ما بتروح ان شاءالله واتبادلو الضحكات وطلع!! رجع اتذكر المشهاد الحصل معاه وهو فاقد للوعي وبرضو ما وصل لإشارة تالتة وقال احسن يبدا بالمتوفر وبعداك حيشوف الممكن يحصل معاه شنو؟! دخل الطبيق وحول خطوات المشي لكيلو مترات وطلعت معاه قريب الخمس كيلو!! ورجع قصاد الفندق وشغل الجي بي اس وفتح الخرائط وشاف الخمسة كيلو بكل الاتجاهات بقع وين في سواكن!! الاتجاة الشرقي طلع السوق!! والغربي طلع الميناء اما الشمالي والجنوبي احياء سكنية!! وبقى محتار هل الشمس الكانت بتشرق وراهو وهو في المكان داك بتشرق من نفس اتجاهنا الواحد ده ولا بإتجاة عكسي!! لو طلع الاتجاه واحد معناها منار مسجونة في الميناء!! واتصل على عم حسن وكلمو!! الاخير قال ليه انا ما متأكد بس تقريبا شروق الشمس واحد سوا كان في ارض بشر ولا جان ولا اي مخلوق تاني وما اظنها بتطلع غرب الا يوم القيامة!! احمد قال ليه حلووو كده شبه عرفنا مكان منار طيب كيف اقدر اخترق الجدار الطيفي داك!!؟ عم حسن قال ليه للاسف صاحبي قال لي لا انس ولا جان بقدر يخترقو لانه الساحرة تعاويذها قوية وما اي زول بقدر عليها!! قال ليه ودا كلووو هين بس المشكلة بعد ادخل كيف اقدر اتخلص عليها ولا احرر منار من قبضتها وانا جدارها الحاجز ما قادر اخترقو!!
عم حسن قال ليه دي مهمة انتحارية يااحمد ياولدي وخسارة كبيرة لينا اذا ضيعنا شاب زيك؟! احمد ابتسم وقال المقسومة ما بتفات ياعم حسن!! وانا شنو قدام السلف الصالح!! وحتى البشرية بتستحق النجاة!! عم حسن ابتسم بسخرية وقال نحنا بنشهد نهاية العالم وفي ناس بتقاتلو في صفوف عيش!! احمد ابتسم وقال لو **** بورينا نحنا حنموت كيف ومتين ماف زول حيقوم من صلايتو لحدي ما اجله يحين!! عم حسن قال ليه بس التاريخ ما حيذكرك وتضحيتك حتروح سااي!! احمد ضحك وقال كفاية انه الناس حتضحك وتبتسم وتحزن وتعيش بسلام!! ده اكبر انتصار لي!!! عم حسن اتنهد بإرتياح وقال ليه ده سلاحك!! طيبة قلبك دي حتنقذك!! احمد ضحك وقال كان ما انقذتني بجيك شبح ولا بعاتي وبطين عيشتك!! اتبادلو الضحكات وعم حسن وعدو انه يرجع للكتب القديمة وحيشوف بطلع بشنو؟! احمد قفل منو ومشى الميناء!! اووووو من ميناء سواكن!! بالجد جنة السودان!! وانبهر بجمال المكان وعراقة الميناء وحجم البواخر والكمية المهولة من الحاويات اما صوت صافرات السفن دي دنيا تانية!!! وكل مشاعرو اتحركت ولمن عيونو لمعو من شده الفرح!! وهو مزهول بالمنظر وبتلفت هنا وهناك لاقاه راجل واقف جنب سور قديم متهالك في اطراف الميناء!! احمد سلم عليه وسألو عن سر السور ده شنو وليه ما تمت ازالتة!! الراجل ما رده السلام وقال لاحمد لو كان من صنع البشر كان اتزال!! احمد صعق!! وقال للراجل تقصد شنو؟! كان فاهم بس عايز الراجل يقولها!! الراجل ابتسم وقال لاحمد شايف الاجابة في عيونك!! ونفض ايديهو وجا ماشي!! احمد تبعو وحاول يماشيهو بس سبحان **** قدر ما اسرع في المشي ما قدر يمشي معاه في خط واحد يا سبقو يا كان خلفو بخطوة!! احمد انتبه للحته دي واصر انه يوازي مشي الراجل بس زي المغنطيس المتنافر لم تختوه الموجب مع الموجب بحصل تنافر وما بتلصقو في بعض!! بس ده الحصل ما احمد بحس برجلو بتزوق وما بتحازي رجل الغريب!! فاحمد عرف انه ما طبيعي!! وسألو عن المنطقة!! قال لاحمد الانت عايزو ما بتلقاه في الميناء جرب ادخل الجزيرة!! وكانت علي بعد مية متر تقريبا من الميناء!! احمد قال في نفسو انا كيف ما فكرت فيها ويمكن فعلا تكون منار مسجونة هناك!! وفي اثناء ما بخاطب نفسو انتبه وما شاف الراجل فجأة اختفى وين احمد ماعرف!!؟ قلبو دقاتو زادت واستعاذ ب**** ودخل جزيرة سواكن!! وكانت ما اقل جمال من الميناء والحركة فيها كتيرة شديد والزوار منتشرين طلبة وسياح اجانب وعرسان وكانت مزدحمة!! ومناخها اكتر شي بميزها كاننا في اوروبا ما في السودان!! ولدرجة انه احمد بقي يتلفت الجماعة ديل عندهم تكيف مركزي ولا ده جو طبيعي!! بالجد اتمنى لو كان في ظروف غير البتمر بيه ولا كان معاه وليد والشله!! اتصل عم حسن ملهوف وقال ليه ما عندنا زمن!! الساحرة قربت تصل لمبتقاها!! احمد بخلعة قال كيف!! قال ليه اتذكر في كتاب السحر الاعظم (والعظمة *** الواحد الاحد) انها حتستغل اختفاء اقمر في ثلاثة مناطق مختلفة الولى زي ما انت كان شفتها في بحيرة في اثيوبيا وتاني حولتها في سواكن ويوم اكتمال سحرها وتتحد معاها حنكون اتأخرنا شديد وحتحرر يأجوج ومأجوج!!؟ احمد لم ركبو رجفت وقال كيف الكلام ده؟! انت متأكد!!!

عم حسن قال للاسف!! وبدليل انه فعلا القمر كان غايب لليلتين في شرق السودان وسواكن بالتحديد ماشافوه!! احمد اتذكر ظلام امسس الدامس وزاد خوفو!! وقال طيب نحصلها كيف وانا حاليا في جزيرة سواكن ما عارف اتصرف!! بس زولك ساعدني!! عم حسن قال دقيقة!!
زولي منو الساعدك؟! واحمد قبل ما يرد هجمت عليه كلام عاتية ضخمة شديدة السواد عالية الصوت حادة النباح واحد شبه ليه في صدرو وكان وزنو تقيل شديد لدرجة انه احمد وقع علي قفاه!! والتاني جراهو من رجلو والناس بتكورك بس زول قرب عليه ماف الناس كلها مخلوعة من بشاعة المشهد ومنظر الكلاب وضخامتها وبحكم انهم عارفين تاريخ المنطقة وبالاخص الجزيرة ماف زول حاول يعرض نفسة للمشاكل!! لحدي ما احمد نزف وكان حيفقد وعيو من شده الالم وقبل ما الكلاب ينزلو بيه تحت الجزيرة جا واحد جاااري وبكورك!! ومحط الكلب الاول بسوط العنج الكان شايلو والتاني كشر عن انيابو الطول انياب الاسد وقرب شب فيه بس الشاب لحقو التاني والكلاب تلبت في الموية وسبحت مبتعدة واتلفت واحد فيهم عاين لاحمد بغيظ ولمن عيونو غطاها السواد وابتعدو!!! احمد مسك في كتف الشاب والاخير بلكنة الادروبات قال ليه انت كويس يا شاب!! احمد هزا راسو بمعني ايوااا!! وساعدو عشان يقوم وجسمو كلو برشع دم!! دخل احمد علي كافي قريب ليهم وشكلو تابع ليه!! واداهو شرب موية وكان بشوف في جروح احمد!! قال ليه *** ستر ونجاك!! بس انت عملت ليهم شنو؟! ما بطلعو لاي زول الا يكون اذاهم ولا مسلطنهم عليه!! احمد قال هم منو؟! الشاب قال حراس الجزيرة!! ماف زول بشوفهم بس اليوم البطلعو بنخلي ليهم الجزيرة حفاظا علي ارواح وسلامة الناس!! احمد قال ليه بس انت طردهم بسوط!! الشاب قال بس ما اي سوط ورفع سوطو متفاخر قال ورثتو من ابوي وابوي عن جده!! ماف جن بقدر يقيف قدام سوط العنج!! السوط برفعو عنك وممكن يختفي عديل بس ما بخليك في حالك وبرجع ينتقم منك لكن نحنا محصنين منهم واهلنا محجبننا منهم!! احمد شكرو علي مساعدو!! وجا قايم بيضلع!! الادروباوي قال ليه واهلك بجنو كان شافوك بحالتك دي وملابسك المشرطة فيك دي!! ودخل علي زواية كده وطلع ليه جلابية سواكنية بسديري وقال ليه ده اعتذار بسيت عن الهصل معاك بكنتهم السمحة ديك!! احمد شكرو مره تانية وساقو علي غرفة قريبة منهم واول اتشطف والموية ما قادر يكبها في جسمو وكأنه مجرح بموس وبتشطف عصارة ليمون!! دخل لبس وماشاءالله من جمال السواكنية عليه!! الشاب ضحك ورطن بس احمد ما فهمو قال شنو؟! وقال لاحمد السواكني يخلوه ليك تبارك ****!؟
احمد ابتسم وشكرو مرة تانية وجا ماشي!! الشاب قال ليه اخوك اوكاش تحت امرك وخدمتك بس حاول ابعد عن السكة الانت ماشي فيها عشان ما تخسر نفسك!! احمد قال ان شاءالله!! وقبل ما يطلع من الجزيرة لاقاه راجل تاني واحمد المره دي خاف واتجنبو بس الراجل ناداه من ورا وقال ليه طلبك في الجزيزة المهجورة واتبع الكديسة!! احمد اتلفت عاين للراجل شافو كبر لصلاة الظهر!! ومشى كم متر وسأل ليه واحد شكلو مرشد سياحي لانه كان بشرح للناس المعاه في معالم سواكن الاثرية!! لم شاف حالة احمد المزرية قال ليه انت كويس ياشاب!! عايز اااي مساعدة!! احمد شكرو وقال ليه عايز الجزيرة المهجورة!! الراجل ملامح وشو اتغيرت وجنب بأحمد من الناس السألو قدامهم وقال ليه انت مجنون!! ماف زول بمشي هناك الا لو عايز يموت!! احمد قال ليه لشنو؟! قال ليه تابعة لمخلوق تاني اعرذبالله من ان يسمع او يحضر!!احمد قال ده كلام حقيقي ولا اشاعة!! الراجل انفعل وقال ليه شكلك ما عايز تقتنع وانت حر بس انا ما بوصفها ليك اعذرني وقال لاحمد **** يهديك!! افتكرو ماشي لدجل ولا شعوذة وما خلاه!! احمد بقى واقف لحدي ما جات كديسة مارة قدامو وصوت مؤاها خافت وكأنها عيانة بس كانت ما بتقدر تمشي عديل ورجولها الخلف زي المشلولين ولا ضهرها مكسور!! وبقت تزحف قدام احمد واتلفتت عاينت ليه ومشت!! احمد جسمو كشششه وقلبو انتفض بس اتوكل علي **** وتبعها!! ماشي وراها لمسافة وخلو الكافيهات ووسائل الترفية وراهم وجو مارين بشجر ومنحوتات وبرضو خلوها وراهم بعداك الواطا بدت تضلم وكأنو المغرب قرب يأذن احمد شاف الساعة لقاها 12ونص ظهر!! فزاد خوفو!! بعداك هم الهدوء ماف لا صوت حفيف اشجار ولا اوصوت ناس بس اصوات الغربان متفرقة فوق الاشجار!!! وكان نظرو مركز علي غراب حس وكأنه بعاين ليه جوووه عيونو وفجأة طار لبعيد!!
ولم انتبه لقى الكديسة ماف محل مشت ما عرف!!! وبقى وسط مكان فعلا مهجور!! واتصل علي عم حسن بس ماف اشارة!! شاااف صخرة عالية شوية طلع عليها بصعوبة وتاني اتصل!! عم حسن رده وقال ليه بلهفة من قبيل بحاول في تلفونك مقفول الساحرة لسسسه ما عرفت مكان يأجوج ومأجوج وعملت سلسلة زلازل متفرقة وللاسف الناس مفتكرنها بفعل الطبيعة! ! بس ده بدينا شوية امل انو لسسسه قدامنا شوية وقت ويمكن يومين كحد اقصى!! وين انت؟! وقبل ما احمد يرد الخط فصل وتلفونو عمل مكالمة طوارئ فقط!! وقال في نفسو اذا حررت يأجوج ومأجوج تبقى فعلا دي النهاية وما حا اقدر اعمل شي!! **** ساعدني وقبل ما يقفل شفاهو في شي دفرو ومن فوق ووقع متدحرج للاسفل ولقى نفسو قدام الجدار الطيفي!!

نواصل بعدين
يتبع ……….

الجزء الخامس عشر من رواية المنبوذة​

دكتور احمد كان مرمي علي الارض وما قادر يتحرك ولا حتى يدو!! وبقى مفتح وبعاين للجدار!! والتراب اختلط بدموعو وقال منار!! انتِ سامعاني!! وزحف بصعوبة حتى يدو لامست الطيف بس نفس المشهد السابق اتكرر وكأنه بحاول يمسك سراب ولا دخان!! بس حس بحاجة غريبة كان في ضغط ولا تفاعل بينو وبين الجدار!! وكأنه خاتي يدو في نافورة ولا موية فاايرة!! فدائرة عينو اتسعت ونبضاتو اتسارعت وقال بلهفة منار دي انتِ؟! وبدون ما يحس لقى نفسو قاعد جنب الطيف. واتجاهل كل التعب!! ختى جبينو في الطيف وقال ليها كيف اقدر احررك يابنت الناس!! كيف اقدر اصلك!؟ وبدون ما يلاحظ لانه مدنقر ومغمض كان في دائرة بتتسع في الطيف وبفتح ببطء وفجأة حسس بسموم لمن خت يدو علي جبينو عشان يتجنب لفحتو!! وانتبه للفتحة ف انتدهش وحاول يوسعها بيدو ما قدر!! حاول يدخل راسو برضو ما قدر بس ما قادر يشوف منار ونده عليها بلهفة وخوف منااار؟!! سمع صوت انينها وقالت بصوت حزين متألم احمد!! فا اتوتر اكتر وانفعل بس كلو علي الفاضي ما قادر يخترق الطيف!! قالت ليه اطلع ما بتقدر تتقلب عليها!! انا ما بقدر اصدها بس بقاوم سيطرتها علي!! ما بخليها تستغلني وتبد سلالتي!! وفجأة لمحها كانت ملامح احمد وحالتو افضل منها بالف مره!! بالجد كانت بتحتضر!! عبارة عن هيكل عظمي مرمي على الارض وعيونها حوليها حلقات سواد داكن!! وكانت مرمية علي الارض ومتجهة علي احمد وبقوة خاصة بيها اكتسبتها من الساحرة حاولت تزيل الحجاب البيناتهم!! بس ما قدرت غير انه تحدث فتحة صغيرة صعب عليهم تجاوزها!! بالجد اتألم لم شاف حالتها وقال ليها اوعدك ما اخليها تأذيك اكتر!! قاومي واصبري وانا….. قبل ما يكمل كلامو الجدار رجع قفل تاني!! شكلو قواها خااارت!! بقى ينده بإسمها وبحاول يخترقو تاني بس ما قدر!! قام علي حيلو وبقى يتلفت المرة دي ما كان نفس المكان الشاف فيه الجدار المرة الفاتت ما كان في مساكن ولا شجر!! كان عبارة عن ارض سودااء وكثيفة الضباب واجوائها سموووم بس بدون شمس!! ولا في ضوء شمس ولا نجوم وكأنه في باطن بركان!!! قدر ما يمشي ويبتعد بكون ضايع ماف وجهة ماف طريق ظاهر؟! بالجد كان تائه حرفيا!!
لم لقى نفسو مستهلك طاقتو علي الفاضي وكأنه ماشي في متاههة؟! استسلم وقعد لانه بالجد فتر!! ولولا تدخل صاحب عم حسن كان حيفضل مسجون هناك للابد وما حيقدر يطلع!! ظهرت ليه الكديسة القبيل من حيث لا يدري!! ولمن فرح بشوفتها!! مشت قدامو وهو تابعها وقال انت صاحب عم حسن!! وكأنه متوقع الكديسة ترد عليه!! بس كأنه بتكلم مع نفسو!! وفجأة شاف ضوء قدامو وكأنه في نفق مظلم وشاف المخرج!! مشى مهرول وحتى الكديسة ما انتبه ليها لم اختفت ومن وصل الضوء وانتشلوه صيادين لقوه غرقان في البحر علي طرف الجزيرة!! ضغطو علي صدرو وهو ممدد علي الارض وكانو بحاولو انعاشو فإستعاد وعيو وهو مشروق وبطلع الموية بخشمو ونخريه!! وبكح!! قالو ليه حمدلله علي السلامة غرقت كيف؟؟ ووين ياشاب!! عاين ليهم مخلوع ورجع تاني رقد علي ظهرو وبعاين للسماء!! كان المغرب بأذن يعني من الظهر هو مختفي في المكان المجهول!! بعد استجمع قواه قام علي حيلو وشكرهم وطلع علي الجزيزة بس منعوه من الدخول قالو الوقت اتأخر وما بسمحو للزوار يقعدو بعد المغرب!! وفي بنات جو جارين بكورو قالو في زول بقى يفلقهم بالحجار لدرجة انهم اغراضهم ما شالوها من شده الخوفة!! طلع ولقى تلفونو في جيب السواكنية وابتسم بسخرية!! قال يااما التلفون مسكون ولا الجن ده ظريف بعد يغمى علي بخت لي تلفوني في جيبي!! ومن قال كده تلفونو سبحان **** انفجر!! بالجد انفجر في يدو وكأنه فيه بارود!! بس الحمد*** ما عوق يدو!! واتخلع وقال اسسسه لو وليد موجود بقول لي انت سحار!! طلع الشرايح وخلا التلفون واقع في مكانو داك!! واجر ركشة لبيت عم محمود وبعد وصل حتى دخل يجيب قروش المشوار من شنطتو لانه لم هجمت عليه الكلاب قروشو الشايلها مصاريف وقعت!! بس ولد عم محمود دفع هو وما انتظرو يطلع يدفع!! وسألوه قلقانين كنت وين يازول شغلت بالنا عليك وحتى عم حسن اتصل علينا اكتر من عشرة مرات عشان يطمئن عليك!! قال ليهم حصل معاي حادث بسيط وانتبهو لجسمو الفيهو خدوش وجروح بسبب فعله الكلاب!! زاد خوفهم اكتر واصرو انه يسعفوه بس في اثناء ما بجادلهم ورافض يمشي معاهم خبطو زول من ورا في عنقرتو بالجد سخنت معاه واتلفت بغضب شديد!! بس اتحولت ملامحو لابتسامة عريييضة لم شافو وقال ولييييد!! الاخير نبزو واحمد قام علي حيلو وسلمو لبعض بالاحضان!! بالجد فرح بشوفة صاحبو ولمن قلبو اطمئن!! احمد قال ليه مستنكر كيف عرفت اني هنا!! وليد قال ليه هاك طمئن خالتي اول حتموت عديل من خوفها عليك!! احمد اتهجم واتذكر انه ما اتصل عليهم وبدأ يعتذر ويتأسف وهي تبكي وتجوط!! بالجد اتأثر شديد ولمن دموعو نزلت من بكاء والدتوو!! وخوفها عليه!! واشرف خطف منها التلفون اول مره يسب اخوه!! وسمعو فارغ وقال ليه انت اكتر زول مستهتر وغير مسئول يلاقيني واتفعل شديد!! واحمد ساكت لانه مقدر انفعال اخوة المبرر!! وقال ليهم تلفوني وقع مني في البحر كنت بتفسح وخسر!! واشرف انفعل اكتر بتتفسح!! انت بتغشني انا ؟!! انت بتستغباني يااحمد!! معقولة بتستخف بعقلي للدرجة دي؟!! ومن الزعل قفل الخط في وشو!! وليد شايف حالة صاحبو وما حبه يزيد العليه وقال ليه ما تشغل بالك بتعرف اشرف كويس بروق سريع!! بس ليهم حق ياااخ والحمدلله اطمئنو عليك!! احمد قال ليه جيت كيف؟! قال ليه جابتني ساحرتك يعني؟! وضحك!! قال ليه ده عمك حسن!! قال لي انك هنا وكان خايف عليك شديد!! بيناتكم في شنو الزول ده بقى مهتم بيك كده!! احمد ابتسم وقال عايز يعرس لي بنتو!! وليد اتنهد بصعوبة وقال ليه عم حسن شرح لي الحاصل ووراني صعوبة الموقف الانا عايز ادخل فيه نفسي وعشانك يا متخلف ممكن نعمل اكتر من كده!! احمد ضحك وقال ليه بس بتكون قمر شوكشتك وجاي تنتحر هنا!! وليد جا ناطي ليه في رقبتو واحمد بيضحك وبقول ليه اعقل فضحتنا!! وعم محمود جا لقاهو كابسو في السرير لم شافوه خجلو وهو بقى يضحك قال ليهم ماشاءالله **** يديم خوتكم!! وجاب لاحمد غداء وقال لوليد زود معاه بس الاخير رفض وشكرو وقال لسسه ما هضم الاكلو وشكرو علي كرمو الفائض!! احمد بحزن قال ليه اكلت قبل ما تطمن علي وبكل وقاحة بتقولها قدامي!! وليد ضحك وقال انتي مباري لي شيطانتك ديك مالي ومالك انتظرك انا جاي جيعان!!! عم محمود استغرب وقال شيطانتو!! احمد كشر لصاحبو وحاول يتدارك الموقف وقال ليه ده مجنون ساااي ما تشتغل بيه!! عشان انفصلت عن خطيبيتي وجيت اغير جو عايز يشغلها لي! عم محمود حك راسو وابتسم وطلع!! احمد نهر وليد براحها وقال ليه اقدر علي خشمك ده ياااخ ولا ارجع!! وفي اثناء ما هو بياكل وبدردش مع صاحبو اتصل عم حسن لوليد وقال عايز احمد!!

سلم عليه واطمئن علي صحتو واحمد قال الحمد*** وقام خلا الاكل مع انه ماشبع بس الموضوع اهم!! طلع الشارع وحكى لعم حسن بالحصل!! عم حسن قال ليه عارف انك وصلت الجدار؟!! صاحبي رسل ولدو يوجهك!! احمد اتخلع وقال ليه ولدو كديس!! عم حسن بغيظ قال ليه ولو جاك بشكلو الحقيقي بتقدر تتحمل شوفتو ولا فصاحة ساااي!! احمد ابتسم وحكى لعم حسن عن الشافو وعن حالة منار الصعبة!؟ الاخير قال ليه انا بحاول اشوف تأثير منار شنو بعد ما اتمست!! وبما انها قدرت تحدث ثغب في الطيف اكيد بتقدر تعمل حاجات تانية ودي مشكلة؟؟! منار بقت سلاح ذو حدين وده بيعني انه الساحرة فعلا قربت تتملكها ولدرجة انه بعض قوتهم بقت مشتركة!! احمد قال يعني صعب اننا نستعيدها!! عم حسن قال صعب بس ما مستحيل ؟! واكيد في ثغرة رايحة علينا واكيد حنعرفها!! احمد قال ليه كان في تلاتة دوائر في جبين منار!! زي الخرز ولا الكريستال!!! لونهم بااهت والوانهم ما قدرت ادقق فيهم بس الفي النص سودا والبلاطراف واحدة حمرا والتانية مشكلة!!! بتدي كم لون وكأنه جوهرة بتغير لونها كل شوية!! عم حسن قال تقريبا قريت عن الموضوع ده بس ما متذكر وين ومتين؟! بسأل صاحبي وبديك خبر!! وقبل ما يقفل سألو عن قصة يأحوج ومأجوج دي يحلوها كيف؟!
عم حسن قال ليه لكل اجل كتاب!! يمكن تقدر تعرف مكانهم بس هل حتقدر تحررهم هل اذا حررتهم حينصاعو لامرها ولا حيعصوها وحتبيدهم مع البشرية!! احمد قال بس مكانهم مووش ما بيعلمو الا ****!!! عم حسن قال ليه اي كتاب قريت الكلام ده!! اتحدى اااي واحيد يجيب دليل انه **** ولا رسوله قال الكلام ده!! صااح مكانهم مجهول بس ده ما يعني انه مستحيل العثور عليهم!! احمد قال بس دي علامات الساعة وكلنا عارفنها!! ومن كل حدب ينسلون!! عم حسن قال فعلا بس علامات الساعة كتيرة وفي التفاسير وبالاخص تفسير ابن كثير ذكر انه بعد ظهور يأجوج ومأجوج وظهور الدجال بعم الفساد وبنزل *** **** عيسى وبقتل الدجال وبخلص الناس منهم وبحكم الارض لاربعين سنة وبعم السلام الارض لدرجة انه الاغنام بترعى مع الذئاب!! وده كلو ولسسه علامات الساعة الكبرى ما انتهت وتاني المسيح حيتوفاه **** والناس حتكفر وحيعم الفساد الارض ولدرجة انه القرأن حيختفي من الارض وحتفضل المصاحف ورق فاااضي بدون اياات حتى بعداك القيامة حتقوم علي اشر خلق الارض!! هل يأجوح ومأجوج حيكونو موجودين ولا دي مرحلة عقاب للبشر وحتنتهي قبل قيام الساعة!! هل ساحرتنا حيكون ليها يد في الموضوع ولا حتفشل؟! كل التساؤلات دي حنعرف اجوبتها مع الايام!!؟ احمد قال ليه الكلام ده صااح؟!! عم حسن قال ليه ارجع لكتب التفاسير والبداية والنهاية لابن كثير!! احمد شكرو علي مساعدتو وقال ليه اشكر صاحبك بالانابة عني!! وقفل منو وقال شكلي ح اشهد حرب ملحمية بين ساحرة عظيم ووبعض البشر مع مساعدة من بعض الجن!! بالجد حاجة فوق الخيال!! وليد جاهو وقال بتتكلم براك ولا زولتك معاك!! وقالها بهزار بس فجأة في شي خبط علي وشو ولمن وقع مغمي عليه واحمد جرا عليه ملهوف؟ !!
اعوذ بكلمات **** التامات من شر ما خلق..
نواصل بعدين
يتبع …….

الجزء السادس عشر من رواية المنبوذة​

احمد جسمو رجف من خوفو علي صاحبو وبنادي فيه بهلع!! وليييد ولييد انت سامعني وليد فتح عيونك!!؟ ولد عم محمود سمع صوت احمد العالي وجا جاري!! وبقول ليه في شنو؟ ! احمد قال ليه ساعدني ورفعوه ودخلو بيه الصالون!! رشوه بشوية مويه واحمد بتحسس النبض وولد عم محمود ما فاهم شي واحمد ما عايز يرد عليه!! لحدي ما وليد فتح وقال ليهم انا وين؟! احمد اتأفف ولمن قعد بقوة علي الكرسي وشبك يدينو ورا رقبتو وقال ليه وكأني كنت ناقصك!! محمد انفعل وقال ليهم فهموني حاجة!! وابوه جا داخل قال خير مالكم؟! وليد ما فاهم شي وبعاين لاحمد؟! الاخير قال ماف شي خطير ياعم محمود بس وليد عندو سكري ومرات بتجيهو نوبات وبخش في كومه!! بس الحمد*** شوفة عينك فتح وبقي كويس!! محمد قال ليه نوديك المستشفى عشان تعمل فحص!! وليد قال لا حاسي بنفسي افضل وشكر ولد عم محمود … والاخير طلع مع ابوه وخلاهم بعاينو لبعض!! وليد جسمو هبط وبقول لاحمد الشي الضربني داك شنو؟! انت شفتو؟! احمد قال المشكلة ما في اننا شفناه ولا لا!! المصيبة انه معانا حاجة سوأ كانت متلبسانا ولا مراقبانا!! وليد قام علي حيلو وقال بإنفعال وبنبرة خووف!! قول متابعاني ومتلبساني!! بس ما تجمعني معاك انا لسسسه صغير وعرس ما عرست!! احمد ضحك قال ليه نحنا علي مشارف نهاية العالم وانت بتفكر في العرس!! وليد قال ليه اسسسه كان نشرنا الكلام ده في مواقع التواصل ما حنصيب الناس بحالة زعر وبتعم العالم الفوضى!! احمد قال ليه والحيصدقك منو؟! وليد قال لاحمد الشي الضربني ده بكون مساني!! احمد قال ممازح بكون لقاك عفن ودمك تقيل ما طاق القرب منك وهرب بعمرو!!! وليد ابتسم وقال بالجد الموضوع اكبر مما كنت متصور!! احمد جا قعد جنبو وقال ليه عشان كده ما عايز ادخلك في الموضوع ده!! لملم حاجتك ومن دغش الرحمن ارجع الخرطوم ولو **** رايد لينا نتلاقى حنتلاقى!! ولو كانت النهاية وانا فشلت ممكن نتلاقى في الجنة!! وليد ابتسم بسخرية وقال ليه انت ضامن الجنة يعني!! وقبل ما احمد يرد وليد اردف!! انا جيت بإرادتي وما اكذب عليك بالجد خايف بس جيت عشان اتخلص من خوفي!! وعشان اساند صحبي فما تقول تخاريفك دي تاني عشان ادفرك بالشباك ده واخلص عليك قبل الساحرة!! وفجأة الشباك ضرب لمن وليد جا ناطي!! ما معروف صدفة ولا فعلا في شي معاهم!!
اليوم التاني من الصباح اتصلو علي عم حسن كلموه!! وقال ليه يعني اسسسه وليد ولا اتشل ولا خشمو لفه ولا حصل ليه اااي شي وطبيعي!!؟ احمد اكد ليه انه طبيعي!! قال ليه خلي بالك منه يمكن يكون اتمس لا سمح ****!! احمد اتخلع لانه اتذكر هو لمن اتمس حصل فيه شنو؟؟! وقال ليه اعرف كيف انه ممسوس!! عم حسن قال ما تحسسو بشي وبعدين بوريك تعمل شنو؟! وقال ليه انت متابع؟ اعوان الساحرة متابعين تحركاتك!! بس لشنو هي خايفة منك!! لشنو ما قتلتك لحدي الان!! قال ليه برهبة انت متصل عشان تخوفني ولا شنو ياعم حسن!! ابتسم وقال ليه لا بس لشنو مرسلة اتباعها عشان يراقبوك!! معناة انت بتقدر تعمل حاجة بس هي شنو؟! لشنو الساحرة حاولت تجننك وحاولت تحبسك في الجزيرة وحاولت تخطفك بس ما قتلتك!! هل وحياتك ليها مصلحة فيها ولا وفاتك بتضرها!! احمد بإستهتار قال ليه شكلك لخبطت بيني وبين منار!! لو عايزاني كان خطفتني انا ما منار وضحك!! عم حسن قال انت ما عارف حاجة!! احمد سكت وملامحو اتغيرت!! وقال ليه تقصد شنو؟! لانه حس بعم حسن جادي شديد!! عم حسن غير الموضوع وقال ليه بمناسبة الجواهر الشفتها في جبين منار ده سحر عاملاه الساحرة عشان تقدر تتحد مع منار!! الدائرة السواء مجمع شر الحِن والحمراء ذروه شر الجن اما المختلطة وكل مره بتشوفها بلون دي مجمع شر الانس بس ما قدرت تسيطر علي منار عشان توحد اللون وغالبا ما حيكون لون النار الاصفر بس طالما هي ما قادرة تسيطر علي منار ما حتوحد قوى الشر الجواها عشان تحكم الارض!! احمد قال اذا الجن بشرهم وحدهم افسدو الارض ودمروها والحن نفس الحكاية والبشر افظع منهم!! طيب اذا اجتمع شرهم التلاتة في شيطان مارد حيحصل شنو؟!
عم حسن قال ليه القيامة حتقوم!! احمد اتنهد بصعوبة وقال ليه طالما اني متابع ما عايز زول يتأذي بسببي وكان بيقصد عم محمود واسرتو!! وكلم عم حسن انهم حينتقلو لفندق عشان الشي المتابعهم ما يضر زول من ناس البيت الهو معاهم!! عم حسن سكت ما رده بس شكلو كان مؤيد الفكرة!! قفل منو ودخلو السوق اشترى تلفون جديد واول مكالمة فيه كانت لوالدتو صبح عليها وكان ظاهر في صوتها والتعب والحزن!! بالجد خاف عليها!! وحلف ليها انه كويس وما علية شي وقال ليها وليد معاي وبتفسح في سواكن وما علينا شي!! حتى اطمئنت شوية ودعت ليه انه **** يحفظهم ويحميهم ويردهم ليها سالمين!! سألها عن اشرف قالت ليه طلع علي الشغل!!

ودعها وقفل منها واتصل علي اشرف!! اول ما رده عليه بس بعد كم محاولة حتى رد بإنفعال وقال عايز شنو؟! احمد سكت!! اشرف قال ليه بعد تعرف انت عايز شنو بعداك اتصل!! وقفل الخط في وشو!! حاول يتصل تاني بس وليد مسك منو التلفون وقال ليه خليه انا بتكلم معاه بعدين !! اسسسه بكون غضبان!؟ ومن السوق مشو البنك وسحب ليه زيادة قروش عشان اجار الغرفة في الفندق!! رجعو البيت وشالو شنطهم عم محمود زعل ما خلاهم يمشو وسألهم اذا في زول ضايقهم ولا سمعهم كلمة وحتى اولادو اتدخلو وما خلوهم يمشو!! بالجد كانو طيبين شديد!! احمد قال ليهم نحنا ماشين رحلة بحرية لمده يومين تلاتة بعد نرجع اكييد حنجي نسلم عليكم وشكروهم علي حسن ضيافتهم وودعوهم وطلعو متأثرين لانهم كسرو بخاطر عم محمود الماعارف هم بمرو بشنو بس سلامتهم عند احمد اهم من زعلو منهم!!! لم جو جنب الفندق النزل فيه احمد اول قال لوليد اها رايك شنو نحجز فيه!! وليد خبطو بالشنطة وقال ليه و**** افترق عنك هنا وكل واحد يمشي بطريق!! احمد بقي يضحك وبقى يحاكي لوليد في عروس الفندق وصوتها وبقى يهبشو من رقبتو وبحاول يخوف فيه!! وبيضحك! بس وليد ما هزاهو كلام احمد وكأنه بحكي ليه في نكتة بايخة ولا كلف نفسو انه يبتسم معاها!!؟ احمد عقد حاجبينو مستغرب!! وكملو طريقكم لحدي ما ركبو المواصلات ومشو لفندق مشهور في نص البلد!! بالجد كان فخم شديد وراقي! ومع انه قروش الليلة الواحدة ضعف قيمة تذكرة الخرطوم بورسودان بس يستاهل لكن!!
دخلو غرفتهم ووليد جرا قعد في السرير الجنب مفتاح الكهرباء وقال لاحمد ده سريري!! احمد ضحك وقال انت تلفونك ماسورة الا ترضعو كل ساعتين!!! لكن انا حقي جديد ممكن بطاريتو تقعد يومين عادي!! اتبادلو الضحكات ووليد قال ياريت لو قمر معانا وبقي ينطط في السرير احمد جدعو بقميصو وبيضحك ودخل علي الحمام!! اخد دش بمزاج مع انه لسسسه الخدوش الصابون بوجعو فيها بس برضو استمتع بالموية وتصميم الحمام الحديث!! طلع لقى وليد ماف اتمسح وكان بجفف شعرو بالبشكير ووقف قصاد البلكونة وبعاين تحت!! شاف وليد تحت بتكلم مع زول جنب النافورة!! بس ما عرفو بتكلم مع منو لانه الشخص التاني ما كان ظاهر لاحمد!! وكأنه وليد حس بأنه احمد واقف وبعاين ليه!! رفع راسو قصاد غرفتهم وابتسم لاحمد وقال ليه تعال!! احمد لبس غيارو وطلع!! لم نزل تحت لقى وليد في المطعم منزل الاكل ومنتظر احمد!! ضربو صااح واتونسو وبقو يفتشو ليهم في كذبة يقولوها للمدير الطبي بعد يرجعو الخرطوم لم يدخلوهم تحقيق عن غيابهم بدون اذن او عذر!! احمد قال ليه نوريهم اننا كنا بننقذ في العالم!! وليد ضحك وقال ليه انت ممكن يعذروك ولا بصدقوك!! لانك كنت عيان وكلهم عارفين الحصل عليك وواقفين معاك!! بس انا حيفصلوني اكيد!! احمد ابتسم وقال بنلقى لينا حل ما تشيل هم وكدي خلينا نطلع من هنا حيين اول!! وبقو يضحكو!! احمد قال ليه بالمناسبة كنت بتتكلم مع منو ومندااح كده لم شفتك قبل شوية!! وليد قال بإستنكار انا!!؟ شفتني وين يازول؟ ومعاها ضحكة!! احمد بإستغراب قال ليه من شوية مووش انت اشرت لي وقلت لي تعال!!! وليد ضحك بشماتة وقال ليه انت موش انت وانت جيعان!! ابدا و**** الا كان بتخيل انا من الكفتيريا ما طلعت وطلبت الاكل ومنتظرو زي الجنازة قدامي وانت ما عايز تجي ولو اتأخرت دقيقة واحدة كان سبقتك!! احمد قال ما مشكلة بس ما تكلم زول عن البيحصل معانا ولا بموضوع منار!! وليد زعل من كلام احمد وقام خلا الاكل وقال انا ما شافع علي فكرة وما انت براك الدكتور!!؟ احمد ابتسم وما تبع صاحبو!! وقال طيب لشنو ما عايز يوريني كان بتكلم مع منو!!؟ وكمل اكلو وقالو للجرسون ممكن اطلع بباقي الاكل الغرفة!! الاخير قال ليه ماف مشكلة اطلع وانا بجيبو ليك فوق!! احمد شكرو واداهو رقم الغرفة وطلع!! لقى وليد واقد ومتشاغل بتلفونو!! احمد جا قعد جنبو وقال عارف صاحبك مجنون ومعاه شيطانتو ديك!! وضحك!! فما تزعل منو؟! وليد مارده عليه!! احمد قال خلاص بتصل بحنس ليك قمر اخليها ترجع ليك!! وليد قفل تلفونو وخلاه في الشاحن واتجة علي الحيطة!! شوية كده وباب الغرفة دقة!! قام احمد فتح وكان الجرسون القبل شوية جايب الاكل في طاولة متحركة وخلاها جنب الباب بشوية وقال لاحمد اااي خدمة تانية!! احمد اتكيف شديد وطلع ليه حاجة بسيطة كده وماداها للجرسون وشكرو!! الاخير ابا يشيلها مع انه شكلو عايزها بس احمد اصر عليه ودخلها ليه في جيبو وشكر احمد وطلع!! احمد ساق الطاولة قصاد سريرو وبقي ياكل وبستفز في وليد امممم واااااح من الشطة والناس ديل عندهم سماحة شيش!!! وبشفط الشوربة بصوت وشغال اممممم!!! وليد لما الحكاية عجبتو وبقي يبلع في ريقو قام متلب باتجاة احمد وجرا عليه الاكل وقال و**** ما تاكل ده اكلي وانا الطلبتو كمان بعين قوية تشفط في شوربتي قدامي!! واحمد بيضحك وليد قام بالطاولة كلها وما خلى احمد يقرب عليها ولو مدا يدو ساي سكينو قاعدة ليه بالمرصاد لمن خرشو في واحدة من المرات الحاول فيها يخطف منو!! واصوات ص

ضحكات احمد فوق!! بعد ما وليد فش غبينتو في الاكل!! احمد قال ليه انا طالع!! وليد قال ما عندي بيك شغلة!! احمد كان قاصد يخوف وليد وقال يمكن ما اجي تاني مع السلامة وسامح صاحبك وجا طالع!! وليد خطف تلفونو وجا جاري وراهو وقال ماشي وين؟! بخلعة كده!!؟ احمد ابتسم بس ما خلي وليد يشوفها!! وقال ليه ماشي افتش منار!! طلع مسرع ووليد وراهو وبقول اقيف بس تلقاها كيف ونسى موضوع الزعل واحمد سايقو من هنا لهناك وشربو قهوة سواكن المستحيل تكونو شربتو زيها ولم وليد فصل خلاص ورجع طبيعي حتى احمد وراهو انهم طلعو يتفسحو وما كان قاصد يفتش منار!! وتاني البوقف وليد شنو!؟ احمد جاري ووليد بفلق فيه بالحجار!!
بعداك اتصل عم حسن يطمئن عليهم وحس ليهم مبسوطين وسألو عن وليد اكد ليه انه بخير وما عليه شي وانهم راجعين الفندق!! عم حسن قال ليه صفي ذهنك عشان بكرة حتحرر منار لقيت الطريقة!! احمد لم قام علي حيلو وقال كيف؟! عم حسن قال ليه حتعرف بعدين شيل الصبر!! وقفل منو!! وكلم وليد بكلام عم حسن وكان متحمس اكتر من احمد واصر علي احمد يعرف الطريقة شنو بس احمد اكد ليه انو هو زاتو ما عارف كيف؟! ورجعو بعد المغرب ولم وصلو الغرفة العشاء اذن!! احمد اتوضى وقال ليه منتظرك نصلي جماعة!! وليد قال ليه صلي براك انا داخل الحمام وحأتأخر!! احمد ضحك وقال ليه ما حشيتها لكن النهار كلو تسفسف تقول فايتة فيك جوعة!! واحد وقف يصلي والتاني دخل علي الحمام **** يكرمكم!!؟ احمد صلي ورقد في سريرو بتصفح في تلفونو ولسسه وليد ما طلع!! احمد ناداه وقال ليه عجبتك القعدة ولا شنو اطلع ما تفضحنا بكرة بترجع لحمامكم البلدي داك وبطير ليك!! وضحك بإستهتار!! بس وليد ما رد عليه!! ولانه متحمس ليوم باكر رقد علي امل انه ينوم شوية وريح بالو وجسمو من ارهاق اليومين الفاتو!! وعلي غير العادة بعد كم دقيقة بس قدر ينوم!!
وفي اقل من عشرة دقايق شاااف نااااس بكميات مهولة جارين وكواريك ومشهد مخيف شديد ناس جارية بسرعة ونازلة من كل الاتجاهات محل ما يتلفت يشوفهم جاين ناحيتو وبكوركو! ! كانو اقرب للاقزام ومسطحين والوجوة صغار العيون مخيفين الشكل!! وشديدي السرعة!! وقائداهم منار!! بس ده ما منار دي نار بتصرخ وبتلهب!! كانت شرسة شديد والشر بيطاير من عيونها وجارية قدامهم واتلفتت عاينت لاحمد بطريقة مرعبة خلتو يصحى مخلوع وجسمو بيرجف وعرقان!! ومن قام مفزوع شاف وليد واقف ليه جنب راسو وبعاين ليه بطريقة غريبة!!!
نواصل بعدين
يتبع …….

الجزء السابع عشر من رواية المنبوذة​

احمد قام مخلوع وبتنفس بصعوبة ولمن اطرافتو بترتعش!! والخلعو اكتر وليد!! الاتنين بقو يعاينو لبعض لحدي ما احمد استجمع قواه وتركيزو وقال لوليد مالك؟! وليد قال ليه شفتك بتصارع وبتلاوي في السرير وبهمهم بكلمات ما مفهومة وما عرفت اصحيك ولا اجري منك!!؟ احمد قعد في نص السرير وقال ليه شفت كابوس مرعب خلاص!! وليد قال ليه ده بكون بسبب الاجهاد والضغط المريت بيه!! قام دخل الحمام وغير فنيلتو الغرقت بعرقو وشاف الساعة لقاها تسعة مساء!! قال ليه ارح نتعشى وليد قال شبعان ما عايز وطلب من احمد ينزل براه!! الاخير قال ليه انا زاتي ما جيعان بس قلت نغير جوو!! وليد قال ليه ارجع لعم حسن شوف كيف حنقدر نتخلص من العارض دي!! فعلا احمد اتصل بس عم حسن ما رده عليه وبعد محاولة تانية بعد ربع ساعة رده وكان ردو مختصر نوم **** يرضى عليك بنتفاهم الصباح!! ونبه عليه انو ما ينسى التحصين!! وقفل منو!! وليد قال ليه عم حسن ده بلعب بينا والخوف هو زاتو يكون ليه دخل في الموضوع!! احمد ابتسم وقال بسبب تفكيرك العفن ده قمر خلتك!! وليد جدعو بالمخدة ورقد وسند راسو في زواية السرير!! احمد اتشجع واتصل علي اشرف لانه يوم بكرة ما معروف يحصل شنو؟! وفعلا بعد كم جرس اشرف رده بصوت خامل!! احمد سلم عليه واخوه رده ببرود!! احمد جابها ليه من الاخر وقال بعد يوم بكرة ياانتصرت وجيت ياحتفقدوني للابد!! اشرف نط من السرير ووقف علي حيلو وانفعل!! كيف الكلام ده؟! وانت وين؟؟! ويوم بكرة في شنو!! احمد حكى ليه السبب الحقيقي لسفرو لسواكن الاصلاً اشرف كان شاكي فيه؟! فصعق لم سمع الكلام من اخوه وقواهو خارت وجسمو مات وبدون ما يشعر قعد في السرير وعيونو لمعت وسيطر عليها الحزن وقال بألم!!! ماشي تحارب شيطانة!! (العياذبالله) ورددها ليه تاني!! احمد قال ماشي اساعد انسانة!! اخوه قال بألم وانا وامنا والناس الاقرب ليك منها؟؟! هي منو اصلا عشان تضحي بحياتك عشانها وبتعرفها من متين؟! اسبوعين ولا تلاتة!! وانا البعرفك من28سنة ووالدتك الشالتك في بطنها تسعة شهور وللان شايلة همك!! ده كلو يهون عليك!!؟ احمد بكى!! وصوت مخنوق قال انا **** اختارني للمهمة دي!! و**** في حاجة جاذباني شديد للموضوع ده وكأنه ماف غيري!! تصدق انا للان ما عارف منار ابوها اسمو منو!!؟ بس حاسي نفسي بعرفها من زماان حتى قبل ما اتولد!؟ اشرف قال ليه انت واعي بكلامك البتقولو ده!! احمد قش دموعو واتنفس بصوت مسموع وقال ليه اتصلت اكلمك وفي الاخر انت اخوي الكبير وفي مقام ابوي **** يرحمو!! اشرف قال يعني متخذ قرارك وما حتتراجع!! احمد قال ليه ادعو لي **** ينصرني واحرر منار ولا ما حيكون في وجود لينا!! اشرف قال انت مصدق الخرافات دي وانه انت عايز تنقذ العالم وانه دي نهايتو!! البتكلم معاي ده منو دكتور احمد ولا زول تاني!! احمد قال شي فوق الخيال وصعب علي العقل البشري انه يتقبلو بس للاسف حاااصل وصدقني بعمل كل البقدر عليه عشان اوقفو بس انت ادعو لي وادعمني يااخوي!! اشرف استسلم للامر الوقع وما قادر يقنع نفسو ومحتار هل اخوي جن ولا كلامو صااح!! قال ليه خلاص فالنفترض انه كلامك صاااح وانك عايز تنقذ العالم!! بكرة حتعمل شنو وكيف حتنقذ منار والعالم!! احمد ابتسم وقال ليه كده حتطلعني مجنون رسمي بس و**** ما بكذب عليك!! و**** ما عارف!! اشرف اندهش من سذاجة اخوه وقال انت ما طبيعي بالجد جنيت!! ودي غلطتي انا الخليتك تسافر قبل ما تتعالج!! وقال ليه بإستهتار عليك **** ما تنسى بعد تنقذ العالم ترجع البيت عشان نحنا محتاجين ليك وبعداك نشوف موضوع علاجك كيف؟! احمد ضحك وعرف انه اخوة قايلو مجنون!! اعتذر منو لانه كذب عليهم وقفل!! وليد قال ليه و**** لم اكون متشاكل مع حبيبتي ما باخد زمن قدر ده عشان اراضيها!! انت عبيط واخوك اعبط منك!! شوف الساعة عشرة سااعة الا انت بتنضم معاه!! احمد ابتسم وقال ليه نوم نومك بكرة حارسنا شغل كتير!! وليد قال ليه شغل زي شنو عم حسن ما لمح ليك!! احمد قال ليه انت مالك من الصباح بتزن في الموضوع!! اصبر ياااخ الصباح قرب كلها خمس ساعات بس ونفرف!! وليد قال بنبرة غريبة انت ما حتكون حاضر عشان تعرف!! احمد جسمو كشش وقال ليه تقصد شنو؟! وليد ضحك وقال شنو!!؟ قلت شنو انا ما مركز معاك و****!! ماعارف حاسي بنفسي شارد وما مركز ويمكن بهضرب!!؟
احمد قلبو اكلو وقال ياربي وليد امس اصابو مس شيطاني ولا بستهبل علي!!؟
وليد قال ليه سرحان وين؟! احمد ابتسم وقال ليه انا نعست عايز انوم طفى اللمبة وخلا وليد ماسك تلفونو بفسبك!! كان عامل فيها نايم وبراقب في وليد كان طبيعي جدا وبحضر في مقاطع الفيديو وبيضحك!! بعداك احمد نعس فعليا!! وبدون ما يحس علي نفسو اخد ليه غفوة!! وما متأكد استمرت لكم من الزمن بس صحى مفزوع لم سمع اصوات في الغرفة!! فتح مخلوع!! وقلبو بيضرب بقوة وشعر جسمو باقي زي المسامير!! وبحاول يشوف وليد بيعمل في شنو بس الظلام شديد وما قادر يشوف بل بقى يتخيلو واقف هنا ومره هناك!! والقومة غلبتو وفجأة شاف شباك البلكونة فتح ودخلت نسمة قوية الغرفة حركت معاها الستائر وحتى اطراف ملاية سرير احمد!! وبصعوبة قدر يلمح وليد وهو بسحف من السرير وبنزل علي الارض بصدرو زي التمساح!! وكان بعاين قصاد احمد البدورو قرب يقد الحيطة ويقوم جاري وجسو يكش شديد وقلبو لمن بسمع نبضاتو في اضينو وحتى اضنينه من شدة الخوف لمن نملن!! ووليد زاحف حبة حبة زي المفترس البتسلل خلف الفريسة عشان ينقض عليها وبصدر اصوات مخيفة شديد زي خوار الثور!! فكل ما وليد يقرب جسم احمد بيخدر اكتر وكأنه حيفقد الوعي لحدي ما وليد رفع يدو في سرير احمد وماشي برااااحة ووصلها صدر احمد اللمن شهق من شدة الخوف ونفسو كتم!!؟ وبستنشق الهوا وما قادر يزفرو وقرب يغمى عليه ووليد طلع كلو في سرير احمد وبقى بعاين ليه شدييييد في وشو والغريبة احمد مغمض غصب عنه!! جواه عايز يفتح يشوف بس كأنه قافلين عيونو بصباع امير!! وحس بشي بنقط فيه زي اللعاب ولم ايدين وليد استقرت في رقبة احمد واحكم الخناق عليه واحمد قررررب يفتح من شده حزة يدين وليد!! فجأة تلب كديس اسود ضخم وبالرغم من انه ماف اضاءة في الغرفة بس عيونو كانت جاهرة بالابيض وكأنه في زول بضويهو في عيونو ولمعة جسمو باينة وهو شابي في وليد وبخربش فية وبعضي!! وليد صرخ وبقي دايش في الغرفة وبتخبط هنا وهناك عشان يتحرر من الكديس الضخم بس ما قدر واحمد بصعوبة وهو بكح حتى قدر يولع اللمبة الكديس اصدر صوت مخيف جدااا وكأنه بتوعد وليد وقفذ بقوة بالبلكونة!! وليد عاين لاحمد لكم ثانية وجا واقع مغمى عليه!!؟ احمد تلب من السرير وحبى في الارض ووصلو وبقول وليد وليد انت كويس!!؟ فجأة فتح بعيون سوداء خالية من البياض لمن احمد وقع علي ضهرو ورجع حركة خلف وتاني وليد غاب عن الوعي!! اتصل علي عم حسن والاخير رده ملهوف قال ليه اسسه كنت عايز اتصل عليك!! الخايفين منو حصل بس الحمد*** صاحبي كان متابع وهو العرف انه وليد ممسوس وشاف الشيطان متلبسو والعياذبالله وبتكلم بكلامو وبيملي عليه تصرفاتو!! احمد برهبة قال ليه كيف اقدر اساعدوو!! عم حسن قال ليه في موية في شباك بلكونتك شربو منها وامسح علي جسمو وبطلع منو بس اسرع قبل ما يوعى ويقاومك ويمكن يأذيك!! احمد خته التلفون وجرا علي البلكونة وشاف الارتفاع التلب منو الكديس!! بس خطف الموية وجرا علي وليد وبقي يرشو بيها ووليد بكورك وبحاول يقوم علي احمد وقبل ما يدو تصلو احمد بكون سبقو برش الموية ووليد اتجنن وبقي يضرب هنا وهناك وبقفذ زي الكانقر ولا الضفضع من هنا لهناك وبتلفت علي. احمد بجيهو بنفس الهيئة ديك بس احمد بصدو بالموية لمن ووليد ضعف ورقد علي الارض وبشخر وبذبد وبرجف كأنه طاقاه كهرباء!!! ولم استسلم وغمض احمد اسرع ناحيتو وختى ليه الكرستالة في خشمو. كب باقي الموية!! وليد كان بطلع منو بوخ زي حق الحلة وبتلوى في الارض وفجأة طيف اسود طلع منه بسرعة لمن وليد ارتفع لكم سنتمتر من الارض ورجع وقع والشي خبط الحيطة لمن ظهرت فيها تشققات!! احمد لم انتبه سمع اصوات ضرب عنيفة علي الباب فتح لقي الناس مجمهرة وعايزة تشوف البحصل شنو وده منو البكورك ده وفي رجال امن الفندق كمان!! احمد قال ليهم صاحبي مسكو اب كباس وبعد تعب حتى قدرت اهديهو!! دخلو معاه الغرفة وكان مرهق شديد ولمن ركبو بترجف!! وشافوها مقلوبة شديد ووليد مرمي علي الارض جرو عليه ملهوفين فتح لمن اتخلعو وبقولو ليه مالك في شنو؟! هو زاتو اتخلع وبقي يقول ليهم مالي في شنو؟! ضحكو عليه وقالو ليهم ارعبتو كل النزلاء وعملتو ليهم ازعاج ويمكن كواريك صحبك دي تكون سبب في طردكم من الفندق!! وطلعو!! احمد وقع من طولو في سرير وليد وكأن بأن كأنه عايز يبكي وبقول انا عملت شنو ياربي عشان تجيني المصائب دي كلها!! وليد جا قعد جنبو احمد تلب من السرير وقال ليه زح مني اوعاك تقرب علي!! وليد ضحك وقال ليه صحي انا كوركت!! وريني الحصل شنو؟! احمد بغضب قال ليه عايز تقتلني وكمان بتسأل!! وليد خت يديهو في راسو وقال انا!! انا ممسوس يعني؟! واحمد حكى ليه الحصل؟! وتاني البنوم وليد شنو صاحي للصباح قاعد في نص السرير ومولع اللمبة وبتلفت!! احمد ينوم ويصحى يلقاه في نفس الحالة لحدي ما الواطا صبحت!! ومن الصبح وليد ستف شنطتو وقال ليه انا جاي عشان اساعدك واحميك ما عشان اكون سبب موتك!! انا راجع الخرطوم لانه الشيطان العياذ ب**** حيحاول يسيطر عليك عن طريقي!! احمد قال ليه وجودك داعمني بس اذا انت حابب ترجع ما بمنعك!! وفي اثناء ما بودعو بعض اتصل عم حسن وقال ليهم لقينا طريقة نفتح بيها الجدار خليك في الميناء زي الساعة 12ظهر لم تكون الشمس في المنتصف لازم تكون في الميناء في الزمن ده واليوم حنحرر منار!! احمد قام ملهوف وقال ليه من اسسسه بنتظر لحدي ما الساعة 12تجي وقفل منو وطلع مع صاحبو علي ميناء سواكن!!

اعوذبالله من همزات الشياطين واعوذبالله من ان يحضرون
نواصل بعدين
يتبع ……..

الجزء الثامن عشر من رواية المنبوذة​

احمد ووليد طلعو مسرعين لاقاهم المدير الفني في الفندق وطلب يقابلهم بس اعتذرو منو وقالو مستعجلين وطلعو مسرعين !! من بوابة الفندق لقو تكاسي واقفة ركبو اول واحد لاقاهم وبصوت واحد قالو علي الميناء!! السواق ابتسم واتحرك!!
احمد قال لوليد انت ماشي وين يافردة مش قلت راجع!! وليد حمر ليه وقال ما تخليني اخنقك هنا!! والمره دي واااعي ماف شي مسيطر علي!! احمد ابتسم وخبط علي كتف صاحبو وفي اقل من تلت سااعة وصلهم!! واحمد بقول ياربي عم حسن عرف شنو وكيف حنقدر ندخل!! وخلا وليد يحاسب السواق واتقدم هو علي الجزيرة!! ووليد حصلو مهرول وقال ليه عارفك خائن وخسيس عايز تدخل التاريخ براك ويمكن تزوغ مني!! احمد ضحك وقال ليه كان انت شفت الانا شفتو براك حتزوغ!! اتبادلو الضحكات ودخلو نص الجزيرة واحمد شاف اوكاااش بتكلم مع سواح لوح ليه الاخير شافو وابتسم وجا عليه!! سلم عليه سلام معرفة ووليد مستغرب!! عرفو عليه وسلمو علي بعض وقال ليه انت مابتتوب يازول!؟ احمد ضحك وقال لوليد ده الانقذني من الكلاب!! وليد سلم عليه مره تانية وشكرو!! واحمد قال ليه ان شاءالله ما تكون اخر جية!! اوكاش قال ليه ان شاءالله تجينا عريس!! وليد قال امين وانا زاتي معاه!! اتبادلو الضحكات وعزمهم علي قهوة ومشو معاه علي الكافي حقه!! دردش معاهم وسأل احمد عن سبب الجيه!! احمد كان صريح قال ليه جاي في مهمة انتحارية وضحك!!! اوكاش عاين ليه مساااافة جوه عيونو وتاني رطن!! احمد ابتسم وحك دقنو وقال في الحاله دي عايزين مترجم عشان نقدر نتجاوب معاك!! ضحكو مع بعض!! واوكاش قال ليه لم اشوف حاجة تعجبني بنسى بتكلم بلغتي الام!! وليد اتدخل وقال انا زاتي عايز سواكنية زي الاديتها لاحمد!! احمد ضحك بسخرية وهز راسو متعجب من سخافات صاحبو!! اوكاش قال ليه ابشر!! نديك توالي!! واتنهد وقال لاحمد ما جاوبتني الجابك تاني شنو!! احمد صر عيونو وبإبتسامة خفيفة قال ليه جماعتك الاهلك محصننكم منهم عايزين نديهم درس انهم ما يلعبو مع البشر!! وليد مستغرب من صراحة صاحبه!! المن يومين حذرو وقال ماتكلم زول!! وعاين ليه بغضب!! اوكاش قااام على حيلو وقال عرفت من اول ماشفتك!! الجماعة ديل ما بقصدو زول سااي!! وما ببطلعو للعلن ويهجمو عليه كده الا لو المودوع هتير!! بالجد لغتهم العربية المكسرة دي حلوه شديد فيهم!! احمد قام علي حيلو وشاف ساعتو وقال ليه نحنا نستأذن بعده!! وشكرو وقال لوليد ارح!! وليد قال ثواني اتم جبنتي!! اوكاااش دخل علي زاوية كده وجاا شايل السوط حق جدودو في مشمع وقال لاحمد خليه معاك ممكن تحتاجو!! شالو منو وليد وبقى يتمنظر فيه بإعجاب شديد!! وقال لاحمد ممازح ده كان ادو بيه زول محطة بغمى عليه!! احمد ابتسم!! اوكاش قال ليه خليه معاك!! القوة مافي السوط في قلبك!! معنى كلامو انه صاحبك ده شكلو قلبو خفيف وخلي السوط معاك انت!! احمد فهمو وابتسم!! ووليد حس كأنه الكلام ده قاصدو بيه بس ما اتأكد!! احمد شكرو وقال ان شاءالله اقدر ارجعو ليك!! اوكاش ابتسم وقال ليه حترجع ان شاءالله!! واحمد استلم السوط من وليد وطلعو!! وليد قال ليه مالك مستعجل ياداب الساعة عشرة فضل لينا ساعتين تاني!! احمد قال مكان الجدار ما عارفو وين وكل مره بلقاه في مكان بس غالبا ما يكون هنا في الجزيرة المهجورة!! وليد ضحك وقال ليه مهجور انت و****!! شوف المكان ده سمح وفخم كيف!! احمد قال ليه ارح ننزل الجزيزة!! وليد بإستنكار قال طيب دي شنو؟! احمد ضحك وما رده عليه واتقدم ليه خطوتين ومشى بنفس الطريق الكان قادتو ليه الكديسة الجن!! العياذبالله!! وكل شوية مبعدين اكتر ووليد بتلفت بشوف انهم بعيدين من الكافيهات والمتنزة وبقول لاحمد نحنا ما مشينا بعيد!! احمد قال ليه قربنا!! وليد قال بإستغراب انت عرفت المكان ده كيف؟؟ وجيت مع منو!! احمد ابتسم وقال في نفسو كان وريتو جابني جن العياذ ب**** حيتهار لي هنا وانا ما ناقص!! وليد خبطو في كتفو وقال انا بتكلم معاك سرحان وين؟! احمد قال ليه وصفو لي عم حسن!! حتى وليد سكت!! بعد داك دخلو الغابة الصغيرة ديك ووليد بدا يتوتر وقال ليه انت متأكد اننا ماشين صاااح!! احمد قال ببتعنت ااااي ياااهو!! وليد لكز احمد لم الاخير عاين ليه اشر ليه بحواجبينو علي واحدة من الشجرات!! احمد لم شافها لقى في غرابين بعاينو ليهم!! وبقو يرفرفو جنحينهم بطريقة غريبة!! وفجأة بقو يسمعو اصوات غربان بشديدة بس ما قادرين يعرفو مصدر الاصوات جاي من كم شجرة ولا شايفنهم شايفين اهتزاز الصفق والفروع ووليد اتملكو الرعب!! وبقي يهمس لاحمد همس!! ارح ارح نطلع من هنا!! احمد لم شافو متجرس!! مسكو من اكتافو وقال انا خايف عليك اكتر من نفسي!! وما عايز اخسرك ياوليد قوي قلبك وماف شي بصيبك الا الكاتبو ليك رب العالمين!! وليد بقي يتنفس بصوت مسموع وده بدل علي انه نبضات قلبو اتسارعت شديد من شدة الخوف!! احمد قال ليه طريق الرجعة صعب ونحنا ما جينا هنا عشان نرجع!!؟ بس هاك ومده ليه السوط وقال ليه ده محصننو ولا عمالين ليه حاجة غايتو بس صدقني برفع منك شر خلقة اذا قويت قلبك!! وليد شالو ملهوف وكأنه غرقان ولقى طوق نجاتو وطلع السوط من المشمع حقو وبقى شايلو وبتلفت بعاين للشجر!!؟ واحمد اتقدم ليه وبحاول يتزكر في الشارع كويس والمداخل!! ولم الواطا بدت تضلم عرف انه قرب!! ووليد ركبو ساحت وقال ليه بالجد انا خايف يااحمد!! و**** مقوي قلبي بس ده شي فوق مقدرتنا ولا بتشاف زاتو!! احمد قال بس **** حامينا ومميزنا عليهم!! قال ليه بس هديك الشمس بس كأنه اشعتها ما واصلة المنطقة دي شوف الواطا ضلمت كيف!! احمد قال ليه بحاولو يخوفو فينا ما اكتر!! وكملو طريقهم!! وفجأة ومن حيث لا يدرو جو غربان شديدي السواد وعيونهم كبااار لمن بارزة!! وهجمو على احمد وليد قام جاري!! لم اتلفت وشاف احمد بقاوم وبحاول يصدهم بيدينو وهم بنقدو فيه!! وليد جا جاري عليه ورافع سوطو وبكوك خوفة ساااي ما شجاعة!! وحاول يضربهم في الجو وبعد كم محاولة فاشلة قدر يضرب واحد لمن ريشو اتطاير!! والغربان ابتعدت وهي بتنعق بصورة غريبة!! ووليد كان حيطير من الفرح!! احمد ختى يديهو في ركبو وكان بناهج!! وليد جاهو ملهوف وقال ليه انت كويس؟! احمد قال و**** صقعوني في راسي اكتر من شيخ الخلاوي للطلبه!! وليد ضحك واحمد ابتسم!! ووليد بقي يتبوبر وينفش ريشو!! شفتني ضربتو كيف؟! شفتهم طارو خايفين مني كيف!! احمد ضحك بإستهتار وقال و**** صدفت و**** كنت بتبشر ساااي في الجو!! وليد زعل وقال غلطان انا الساعدتك!! شاف الساعة لقاها 11وتلت!! اتصل علي عم حسن!! بس التلفون ما خش وخاف الزمن يجي وما يعرف كيف يخترق الجدار!! وليد قال ليه عم حسن بكون حاسبها صاااح بس انت اصبر!! واحمد انتبه للصخرة الكان طلع ليها المره الفاتت ودفروه منها ولقى نفسو جنب الجدار!! فقال لوليد خليك انت هنا انا بطلع بتصل لعم حسن فوق الاشارة يمكن تكون كويسة!!؟

واكد لوليد اذا وقع من فوق ولا اختفى هو ما يترعب ولا يحاول يحصلو!! وليد قال ليه هو انا من اسسسه مرعوب!! تختفي كيف وتخليني هنا مع شواطنك ديل!! احمد قال ليه انا واثق فيك اكتر من ثقتك في نفسك!! وما تنسى. معاك السوط!! وفي اثناء ما بحاول يقنع صحبو ظهر ليهم الدجال الكان خطف منار وعايز يقدمها قربان للشيطان!! احمد اترعب اكتر من وليد وبإنفعال قال انت الجابك هنا شنو؟! وعايز مننا شنو؟! وما بسمح ليك تقرب من منار وجا هاجم عليه ووليد واقف ما فاهم حاجة!! الدجال ده الضهرو اتحرق داك وحصلت ليه اعاقة ضهرو اتقوس وبقى احدب شدييد ولمن شكلو بشع!!!
احمد بضرب فيه والدجال بقول ليه انا معاك!! انا في صفك اسأل حسن!! احمد وقف وهو لسسه منفعل وبناهج وقال انت بتعرف عم حسن من وين؟ ! وعملت فيه شنو؟؟! وليد اتدخل وقال ليه اتصل اسأل عم حسن يمكن يكون كلامو صاااح!! احمد قال لوليد خليك جنبو!! وطلع علي الصخرة الزمان ديك وابعد كم محاولة حتى رقم عم حسن دخل!! وسألو عن الدجال!! عم حسن سكت لوهلة وقال ليه هو الحيساعدنا عشان نخترق الجدار!! حتى صاحبي ما بقدر يخترقو!! احمد قال ليه بس ياعم حسن ده دجال!! ده كان عايز يقتل منار!! فلشنو يساعدنا!! يعني حيكون خايف علي العالم مثلا!! عم حسن قال انا معاك وحتى انا ما واثق فيه بس صدقني صاحبي قريب منكم شديد!! ولو حاول يتذاكى عليكم ولا يحتال!! حيخلص عليه حتى قبل ما يقرب عليكم!! وماتنسى عدو عدوي صحبي!! احمد قال انا ما مطمئن وحاسي بأننا غلطنا في الجية دي ويمكن يكون كمين لينا!! ده اسوأ من الشيطان ياعم حسن!! وفجأة الخط فصل وما خش معاه تاني!! احمد نزل من الصخرة وكانت بعاين للدجال بإشمئزاز وقرف!! وقال ليه الساعة12 الا خمس دقايق عم حسن قال الزمن المناسب لفتح الجدار منتصف النهااار!!؟ يعني باقي لينا اقل من اربعة دقائق!!
الدجال بقي يهمهم ويخبط برجولو علي الارض وبصدر اصوات غريبة وبرش تراب وموية ريحتها كريها في الجو وبمسح جبينو بدم وبرش باقيه بخشمو وبالجد تصرفات الحيوان بعف منها!! بس ده سخط **** العياذبالله منه ومن امثالو!!؟ وفجأة والواطا ضلمت شدييييد وبدا الجدار يظهر تدريجيا!! واحمد اتحمس وخاف في ان واحد!! وبعداك الدجال بقي يطلع منو حاجة زي الدخان ولا الغبار وامتزجت مع الجدار الطيفي وكأنه حصل تفاعل بيناتهم!!؟ ولونو بقي يتموج شديد وبقى يدي كذا لون وكأنه فاير ولا هائج ولمن بديك احساس انه برجف!! وفجأة بدا يتفكك ويتلاشي ولا يتبخر!! ومن وصل النص احمد شاف منار داقنها في مسامير في جدار صخري خلف الجدار الطيفي وكانت تاكية رقبتها وكانها فاقدة للوعي!! وحاول ينط باقي الطيف قبل ما يختفي كلو ولقى الشيطانة العياذبالله في وشو واخترقت احشائو بيدها!!؟
اعوذ ب**** من ان يحضرون واعوذ بكلمات **** التامات من شر ما خلق!!
يتبع ………

الجزء التاسع عشر من رواية المنبوذة​

بسبب سرعة الساحرة الشيطانة العياذ ب**** احمد ما استوعب حتى متين اخترقت احشائه بيدها وما ادتو حتى فرصة انه يشعر بالألم!! وشهق شهقة عاااالية خلت منار تصحى وترفع رأسها ببطء عشان تشوف مصدر الصوت الحستو مألوف عندها!! وفي نفس اللحظة الهي رفعت فيها راسها !؟ احمد برك في الارض ببطء وهو كمان بعاين ليها!! ولم عيونهم اتلاقت هو ابتسم بحزن وهي صرخت!! وطلع دم كميية من خشمو ووقع علي وشو!!؟ منار بتصرخ وبتبكي بحرقة!! ووليد مصدوم ما قادر يتحرك ولدرجة انه السوط وقع منو وهو ما مستوعب البحصل قدامو!! والساحرة وضحت عليها ملامح النصر!! وبدت ملامحها والوش البشع الماخد من سمكة القرش الاسنان وانف الخفاش والعيون الحمراء بعدستها السوداء بدت تاخد ملامح منار!! ومنار مكسورة ومدنقرة وبتبكي!! الدجال جا ناطي احمد ولمن طلع علي يدو وجاها بتملق ومنصااع وبرك ليها في الارض وبقى يطلب منها توفي بوعدها زي ما هو اوفى بوعدو وجاب ليها احمد برجلينو!! كانت بتعاين ليه بإحتقاار ورمغت وليد بنظرة متفحصة البدور ما قدر يستحمل سحرها ولؤمها وجبروتها وشرها!! فوقع مغمى عليه!! وقاصدت منار ورفعتها من دقنها وهمست ليها في اضانها وقالت ديل الورثو الارض من بعدنا!! وكانت قاصدة الدجال ووليد!! وقالت لولا تدخل الجن وابادتهم لسلالتي لما كان لامثال قومك الجبناء الضعفاء والمثيري للشفقة وجود!! وقالت الشي الوحيد الممكن بسببو اخفف عقابي للجن انه ابوهم المسخ ما سجد لابوكم!! وضحكت ضحكة اتهزت ليها جدران الجبل الهم فيه!! واخيرا وصلت لهدفها خلت منار تستسلم وتفقد ايمانها بأنه في زول من بني جنسها حيساعدها! وبقت تهمهم بكلمات بلغة غريبة على البشر وبتخبط منار علي جبينها!! لحدي ما بدت تتملكها والجوهرة التالتة الفي جبين منار بدت تتوهج وكأنها مشتعلة وثبتت علي اللون الاصفر رمز النار!! واتفاعلو التلاتة مع بعض شر الانس والجن والحِن وبقو يتوهجو في جبينها وعيون منار بقو نفس عيون الساحرة اللسسسة كانت رافعة ايدينها في السماء وكأنها بدعو ليها شخص!! ولا بتسجمع قوة اسلافها القدماء!! وقالت لمنار حانت سااعة العقااب!! حنطهر الارض ونعيد ليها مجدها!! حنحكم العالم!!! وخبطت بإدينها للاسفل بدون ما يلامسو الارض بس الارض اتشققت وبقت تطلع ناار!! وهي منتشية بنصرها واللعنة الكتبتها في يد منار وعن انها منبوذة الكون اشتعلت اكتر من النار القدامهم ومنار بتصرخ من شدة الالم!! والساحرة تقول ليها لازم تعيشيهم اضعاف الالم ده وجرحت منار في محل النقش المشتهل ودمها طلع كأنه حمم ما دم عادي وكانه بركان بدا يسيل فعلا!! فالساحرة شالت منو بمخلبها وعملت منو خط علي جبينها وفجأة بتدت ترتعش وتطلع منها حاجة زي الاعاصير ملونة سودا وبنية وحمراء وكان مشهد مخيف!! الدجال حاول ينسحب براااحة بدون ما تحس عليه!! بس وين يهرب منها!! ثبتت رجلينو في الارض وكأنه صبوه بأسمنت وابتسمت ليه بخبث!! واتلفت مع اعاصيرها الاربعة بشكل لولبي عنيف شديد وفجأة كلهم اختلطو في بعض وبقي اعصار من نار وهي في نصو بتضحك ولا بتقول شنو ما معروف بس تصرفاتها بتوحي بفرحتها!! وفجأة العصار اختفى بنارو وبساحرتو وخلت الدجال برجف وبتلفت يشوفها اختفت علي وين؟! وفجأة منار انتفضت من جدار الجبل الهم فيه واتعلقت في الهواء وكأنه قوة الكون اجتمعت فيها!! واتلفتت شافت احمد غرقان في دمو والدجال متجمد وبحاول يستعطفها ويتودد وتملق وانا خادمك المطيع وانا وانا وقبل ما يتم جملتو بالنار الكانت مشتعلة في الارض شقتو علي نصين!! والابشع انه ما وقع علي الارض لانه رجولو مثبتة فيها وبقي كل نص واقف وقائم بذاتو ودمو بتطاير وهي انفعلت اكتر لم شافت الدم وقالت لازم اغرقهم في دمهم ورفعت يدها فوق وشققت الجبل وخلت صخورو بتتناثر هنا وهناك وطارت بسرعة البرق وهي متلبسة جسد منار منبوذة الارض!!
وبعد مشيها بثواني ظهر شخص سبعيني اصهب اللون شديد البياض داخل الجبل!!؟ وانقذ وليد من سخرة كبيرة كانت حتهشم راسو!! ومس علي جبينو وليد فتح مخلوع!! ومن الخوفة قام جاري بدون ما يفهم اي شي بس النار حولينو من كل الجهات ماف مفر!! واتلفت شاف احمد مرمي!! بكى وجرا عليه وبقول احمد ما تموت احمد اقول لخالتي شنو ي احمد قوم!! انا محتاج ليك ما قادر اتصرف!! وحضنو في الارض وببكي!! وارعبو اكتر منظر الدجال وهو مقسوم نصين!! لم الراجل قرب عليهم!! وليد زاد خوفو وقال انت منو؟؟ وعايز مننا شنو!! ولم قرب علي احمد وليد بقي يفتش في السوط لانو ما عندو وسيله دفاع تانية!! الراجل قال ليه بتأني اسكت!! صوتو ارعب وليد اكتر وخلا كل شعرة في جسمو تقوم!! بقى قاااعد قدام احمد وبمرر يدو عليه وكأنه بفحصو برنين مغناطيسي!! ووليد لم شافو ما اذاهو قال ليه احمد حي!! الراجل قال لسسسه روحو ما طلعت!! وليد بكى وقال حيموت!! الراجل ما رده عليه!! وخته يدو علي جبين احمد وفي ضوء ابيض طلع منه ودخل علي جسم احمد وبقي يمشي في جسمو وعروقو زي الكهرباء ولا البرق!! الراجل مسك يد احمد!! وقال لوليد اتبع الكديس حيطلعك من هنا!! واختفي هو واحمد!!؟ وليد تاني اغمى عليه!!

وفتح على اثر موية في وشو وحس بطعمها غريب فتح بصعوبة شاف في كديس اسود سمين ببول ليه في وشو!! وليد قام مهجوم وبتف وبقش وشو بهدومو!! وعايز يشتر الكديس بس الكديس كان بعاين ليه بطريقة غريبة ومخيفة!! ارعبت وليد ويدو اتجمدت لا قادر يرمي الحجر وراهو لا يضرب بيه الكديس!! وقبلو بضرب شديد!! الكديس جا ماشي قدامو بتبختر!! وليد اتذكر كلام الراجل مع انه ما بعرفو ومن الغباء انه يثق في كلامه بس ما عندو حل!! في اثناء ما هو تبع الكديس وقبل ما يطلع من المكان الملعون ده شاف السوط واقع في الارض دنقر ومسكو في يدوو!! وتبع الكديس ومتأهب لاي حركة كده ولا كده عشان يقع فيه ضرب!! لحدي ما طلع من الجزيرة المهجورة. ولقى الواطا ليل وتقريبا الساعة 11مساء يعني ليهم 11ساعة محجوزين في المكان داك!! وبقي يتلفت بس ما شاف زول وكانت الجزيرة الطبيعية خالية من الزوار والعاملين وجنب الباب شاف زول قاعد علي الارض متمحن!! وليد كان ماشي ببطء ومنهار ومكسور وما عارف يمشي وين ولا يقول للناس شنو وبالاخص اهل احمد!! هل في زول نصيح حيصدق انه خطفو جن!! العياذبالله!! لحدي ما الزول القاعد لمحو وجا عليه مهرول!! وقال وليد!! وين اهمد!! ده اوكاش!! وليد حضنو وبكى وقال ليه ضيعت صاااحبي وما قدرت احميهو!! اوكاش بقي يتشهد وبحاول يواسي في وليد بس بدون فائدة كان منهار تماما!! ورمى ليه السوط في الارض ومشي مكسور ومدلدل يديهو وكأنه ما حاسي بيهم!! ما قدر يرجع الفندق وبقي حايم في الشوارع وببكي علي فقدو الجلل!! لحدي ما سمع اصوات اشعارات كمييية نازلة ورا بعض!! الظاهر انه ياداب اشارة تلفونو رجعت وما كان عندو الرغبة يطلع يشوف منو الاتصل!! ولا رسل!! وحيقول شنو لو كانو اهل احمد!! واتمنى لو مات هناك ولا اتخت في موقف زي ده!! وبعد التلفون ازعجو واتصل لاكتر من تلاتة مكالمات ورا بعض طلعو من جيب بنطلونو وشاف المتصل عم حسن!! رد عليه ملهوف وببكي وبقول ليه احمد مات!! قتلو احمد!! انت السبب الدجال غدر بأحمد!!؟ عم حسن قال ليه اهدا وتعال الفندق انا منتظرك هناك واحمد بخير ما مات وقفل الخط!! وليد لمن فتح خشمو مصعوق من واقع الخبر المفرح السمعو!! وبدون يشعر بقى يكورك ويصرخ بأعلى صوتو وقام جاري!! وفي جماعة بدون ما يفهمو شي قامو جارين وقالو الحتة دي تابعة لسكان الجزيرة الاصلين وجننو الشاب ده لم ازعجهم وقامو جارين لمن واحد يقوم ويقع من شده الخوفة!! وليد جرا لمن فتر ولم خاف انه يضيع لو واصل في الطريق الهو فيه ده ما عارف يوصلو وين عشان كده وقف ليه عربية وقال ليه بنفس مقطوع وصلني معاك الفندق الفلاني!! اول الزول اتردد وخاف من وليد وشكلو ونفسو البلهث!! بس اتوكل علي **** ورفعو!! وقدر ما حاول يعرف من وليد الحصل شنو بس ما لقى جواب ووليد كان بيبكي وبيضحك براهو!! ولم وصلو الفندق قبل ما العربية تقيف كويس وليد فتح الباب وقام جاري وشكر الراجل بدون ما يتلفت ودخل ملهوف وبقي يفتش في عم حسن بس ما شافو تحت وقال ما اظن يخلوه يطلع غرفتنا ونحنا ماف!! ولا يمكن يكون احمد معاه!! وجرا ملهوف وفي كل سلم بخطوة بنادي علي احمد لحدي ما وصل الغرفة وفتحها ملهوف بس ما لقى زول كانت فاضية!! وقال احمد بحزن كده!! عم حسن جاهو بوراهو وقال كواريكك صحت النزلاء كلهم!! وليد حضنو وبكى وقال ليه احمد وين!! ما شفت المنظر البشع الانا شفتو في صحبي ياعم حسن!!؟
عم حسن ربت علي ظهر وليد واعتذر منه لانه وثق في الدجال!! وانه عرض احمد للخطر!! وليد سألو ملهوف احمد وين!! عم حسن دخلو علي الغرفة وقفل عليهم باب الغرفة وقال احمد مشى يكمل مهمتو!! وليد قال مهمة شنو؟! ده ساقوه لا بجر يد لا رجل ولا برمش زاتو!! الساحرة دخلت يدها جووووه بطن احمد ما شفت بشاعة الموقف المرينا بيه اليوم!! عم حس قال ليه انتو دكاترة وبدرسو سنين وسنين وبعد تستعينو بدكاترة في مجالات تانية حتى بتقدرو تشخصو حاله المريض!! بس صاااحبي **** اكرمهم بقدرات خاصة ومن ضمنها القدرة العلاجية او شفاء المرضى ونفس المقدرة دي ممكن تمرض شخص ماعندو اااي شي!! زي ما بيمشو الناس للدجالين عشان يأذو زول في صحتو!! او اقرب مثال احمد مووش مات سريريا واتشل وحصل ليه ما حصل!! يلا زي ما في جن ضراهو بسبب قدراتو!! صاحبي قدر يشفيهو بنفس القدرات والشافي رب العالمين بس صاحبي كان سبب في الشفاء!! وليد دمعتو جات نازلة وقال ليه يعني اسسسه احمد كويس!! عم حسن اكد ليه انه حيكون في افضل حالاتو وكأنه ما مرض قبل اليوم!! وليد ضحك وحضن عم حسن وشكرو علي مساعدتو ليهم ولولاه ما كان حيقدرو يصلو لمنار او يساعدوها!! عم حسن قال ده كلو بعتمد علي نجاح عملية احمد!! ولا للاسف حنخسر كل شي ونقضي علي البشرية!! وليد اتناول ليه موية شكلها مكبوبة من الصباح وشرب لانه حلقو ناشف وقال لعم حسن وريني الحصل بالتفصيل والحيحصل!!؟ عم حسن قال ليه قوم!! وليد استغرب وعقد حاجبينو وقال مستنكر!! اقوم امشي وين؟! عم حسن قال ليه شوف بالشباك!! شوف القمر!! وليد طلع ملهوف وشافو بالبلكونة لقى لونه مايل للبمبي ولا الوردي الخفيييف!! وقال مخلوع ده شنو؟! مالو القمر لونو ما ابيض!! عم حسن قال دي ظاهرة لينا كبشر طبيعية ومعناه القمر والارض كانه في خط ومدار واحد موازي للشمس عشان كده بظهر لينا القمر الوردي!! بس المعلومة الكلكم ماعارفنها انه في عالم الجن العياذبالله بكون القمر عندهم احمممر ودي ليلة طقوس السحر البتقربو بيها بعض الدجالين للجن العياذبالله!! دي ليلة قمر الدم!! ليلة اكتمال الشر!! الببحث عنها كل صاحب نفس ضعيفة وكل ساحر وحتى الجن كأنه يوم عيد ليهم!! وصادفت انه تكون في نفس التاريخ الاتنفت فيه مختلطة الدم للقمر وفضلت مسجونة لملاين السنين!! لحدي ما اتحررت وفضلت تبحث عن منبوذة الارض لاكتر من الف وعام!! وليد قال طيب احمد حينقذ منار كيف وهي شكلها سيطرت عليها!! عم حسن قال انا كنت مستغرب ليه ما قتلت احمد من زمان!! كانت خاتاة كرت رابح حتستخدمو وقت الحاجة عشان تسيطر علي منار!! وقبل ما وليد يقول ليه وضح اكتر!! عم حسن قال ليه لو قضت علي احمد ما حتقدر تسيطر علي منار لانها حتقاوم اكتر انتقاما لاحمد!! بس لم تخلي يجي بنفسو وتقتلو قدامها وتحسسها بضعفها وتنهي النبوءة البتقول انه المخلوق الضعيف هو البيقضي علي الشر!! سوا كان بفض عذرية المنبوذة او بخنجر السحرة والجنون القدامى القتلو بيه اهل مختلطة الدم وما قدرو يقتلوها ودفنوة معاها في القمر!! وليد قال وطالما انه احمد ما مس منار ولا قرب منها!! معناة فضل ليه الخيار التاني بس!! يطلع القمر!! وقالها بدهشة وعدم تصديق!! عم حسن قال اللان صاحبك في القمر ومعاه صاحبي بدلو علي مكان الخنجر الاصلا كان سرر بس بما انه النبوءة اتحققت واتذكر انه المخلوق الضعيف هو البقدر يسيطر علي الخجر وهو الوحيد البقدر يقتلها لانهم حاولو قبل ملايين السنين وفشلو!! وفي وقتها **** ما خلق ابونا ادم حتى!! وليد قال الكلام ده حاصل فعلا ولا انا لسسسه في غيبوبة!! عم حسن قال لحدي الان نحنا في السليم والخطر ما احاط بينا!! لسسسه ما حررت يأجوج ومأجوج ولا دمرتنا عشان تنفرد بتعذيب الجن وحكم الارض!!؟

وليد قال طيب هي مشت وين بمنار!! قال ليه علي حسب الاخبار الوصلت لصاحبي انها في مثلث الشيطان وحتعقد اتفاق مع ابليس!! بأنه يسلمها سلطان الشياطين ويكونو تحت امرها!! ولا حتبيد البشرية وحتبيدهم من خلال قواها الما بتهزم واذا هي كانت مختلطة دم بس من الحن والجن ما قدرو يقتلوها وهي ****!! كيف يقدرو يقتلوها وهي في اوج قوتها وهي متملكة اقوى قوى الشر المطلق من الجن والحن والانس عن طريق منار!! فصعب عليهم يتغلبو عليها!! يمكن يتوصلو معاها لاتفاق وحتبقى دي الطامة الكبرى لينا لانه وجود البشر وعدمو ما بفرق مع الجن!! ولا ساروها في غرورها لحدي ما المخلوق الضعيف اي احمد يقدر يتحصل علي الخنجر وبكده يكون مهدو ليه الطريق في انه يصدها!! وليد قال ليه ولو ما نجح!! عم حسن قال حنموت!! وليد بقي مصعوق من السمعو!! وما مصدق بالرغم من انه عايشو!! وفي لحظة الشرود دي والتفكير الفردي الكانت مسيطرة عليهم سمعو صوت كركبة تحت السرير!! وليد اتخلع وعم حسن استغرب!! لم دنقر لقاها كديسة شكلها دخلت واتحجزت في الغرفة وما قادرة تطلع!!! وليد بإنفعال قال دي ما تكون الكديسة البالت فيني!! عم حسن فتح ليها الباب وقال ليه بإستغراب كيف يعني بالت فيك!! وليد حكى ليه الحصل!! عم حسن ضحك وقال ليه ده ولد صاحبي الصغير بيكرة البشر لانه في واحد اذاهو قبل كده ويمكن يكون بدون قصد!! بس حاقد علينا شديد!! ولو ما ابوه موصيهو ممكن يجننك عادي!! وليد اتخلع وقال يعني ممكن يجي تاني!! عم حسن اتعمد تخويفو وقال احتمال!! وابتسم وقال ليه انا حاجز الغرفة الجنبك راجع عليها!! وليد حلف ما يخليه يطلع ولا حيمشي معاه!! وقال انت كان مشيت ح اعرف اخبار احمد من وين!!؟
عم حسن رقد في سرير احمد وبقي يعاين للسقف!! وفجأة الغرفة بقت اضائتها تذبذب وضلمت فجأة ووليد بقي ينادي في عم حسن!! قال ليه ما تخاف ده صاحبي!! وليد نسى انه صاحب عم حسن جن العياذبالله من ان يحصرون!! وقال ليه بلهفة وينو احمد!!! احمد معاه!! وبقي ينادي بأسم احمد وفجأة الاضاءة رجعت طبيعية وكان عم حسن قاعد في نص السرير وممبتسم قال ليه اتحصلو علي الخنجر وفضل بس يواجهة الساحرة المتلبسة منار!!
وليد قال بس بلقاها كيف وكيف ممكن يقتلها!! عم حسن قال في نفر من الجن حيحموه منها ما تقدر تصل ليه بس ما بقدرو يصلوها ولا يصدوها لكن بقدرو يحمو احمد!!
وفعلا خلوه في اعلا مرتفع في مثلث برمودا ومحاوطنو بجدار عازل صعب علي الساحرة تخترقو من اول محاولة!! يعني هي بتقدر بس بعد عده محاولات!! ولازم احمد يغتنم الفرصة ويحقق النبوءة ويقتل الساحرة!! بس الطريقة كيف ماف كتاب اتكلم عنها!! تقريبا دي خاصية في المخلوق الضعيف الما قدرو يصلو ليها هم!!
وليد قال يعني نقعد ننتظر لحدي الصباح كان صبحت معناها احمد نجح!! وشفناهم من كل حدب ينسلون معناها نتشهد وننتظر الموت!! عم حسن قال الوقت هو سلاحنا الوحيد وفضلو بتناقشو في الموضوع!!
وفي الجانب الاخر من الكوكب وفي منتصف مثلث الشيطان بالتحديد!! كان احمد واقف وخاتي الخنجر في حزام بنطلونو من ورا!! وبعض قادة الجن العياذ ب**** استخدمو مقدراتهم وعزلوه بعازل سحري من الشيطانة الماردة مختلطة الدم!!!
وبعد ما طلعت من زعماء عشائر الجن الما وصلت معاهم لاتفاق!! طارت وهي متوجهة لتحرير ما بين السدين!! ولمحت المخلوق الضعيف!! وما مؤكد هي اللمحتو ولا لسسسه منار موحودة وجزء منها واعي!! وشكلها استوعبت المكيدة او الاتفاق الاخر التم بين الجن والانس عن طريق احمد!!؟ واول حاجة عملتها احرقت مثلث الشيطان ولاول مرة في التاريخ تتشاف الشُهب من الارض طالعة علي السماء وكانت ظاهرة للعيان وعلي مرأ الجميع!! وسيطر الرعب علي قلوب البشر وكل من شاهد منظر الجن وكأنهم شهب مقادرة مثلث الشيطان!! بس احمد كان في الدائرة الاترسمت ليه من قبل قادة الجن!! وجات عليه والغضب متملكها والشرار بتطاير من عيونها وبتصرخ وبتتكلم بذات اللغة غير المعروفة للبشر وقربت علي الحاجز الوراهو احمد واخترقتو بقوه فجرت حوليها المكان وكان عبارة عن نار!! بكل الاتجاهات وكأننا في احدي بوابات الجحيم!!؟
وبنفس الحركة الاخترقت بيها احشاء احمد قبيل اخترقت بيها الحجاب الحاجز الفيه احمد!! وكان مستعد ومنتظر اللحظة المناسبة!!! واحد من كبار قادة الجن قال ليه عن طريق صاحب عم حسن انه اذا عايز يتقلب عليها بغرس الخنجر في جبينها في واحدة من الجواهر الملتهبة!! والاوفق انه يسدد في النص السوداء منبع شر الحِن لانه لو دمر الصفراء حقه شر الانس!! ما حتفقد كل قواها وممكن تقضي عليه في ثانية!! واذا اختار الحمراء حقه شر الجن نفس الحكاية حتضعف بس ما حيقدر ليها ولكن الجن ممكن يتدخل في الحالة دي ويساعدو لانها فقدت السيطرة علي شرهم المطلق!! لكن الاوفق انه يسدد في النص ويقضي علي غضب الحِن الجواها!! وفعلا احمد كان مركز معاها شديد ومن اخترقت الحجاب هاجمها بيدو التانية وضرب الجوهرة السوداء بس احدث فيها شق وما قدر يكسرها تماما!! فزاد جنونها وياداب عرفت خطورة الموقف وانه المخلوق الضعيف فعلا قادر انه يقضي عليها!! ولو ما تلب من اعلا القمة كان حيتنسف معاها!! النار لاهبة في كل الجزيزة بس بعض المردة الكباار ورؤساء عشائرهم حاجبين احمد من النار وكان في حلقة حولينو حامياه من النار بس ملف حجاب حاحز يحميهو من الشيطانة مختلطة الدم!! وفي اثناء ما هي تفكيرها مشتت وبتحاول تصل ليه!! هنا ظهرت قوة المخلوق الضعيف!! بقى يخاطب في منار!! ويذكرها انها موجودة وانها ما لعبة عشان تتحكم فيها ساحرة!! وانه معاها وحيساعدها عشان ترجع لاهلها وناسها وانه بحبها!! قالها كيف هو زاتو ما مستوعب!! بس اتضح انه السلاح البنمتاز بيه نحنا المخلوق الضعيف هو العاطفة والمشاعر والممكن تتغلب علي اقوى السحر وشياطينو!! وبقي يشوش علي الساحرة وبخاطب في منار وفجأة ظهر ليها قدامها وكان مستسلم ورافع يدو ورمى خنجرو وقال ليه انا بحبك وما عندي مشكلة اموت علي يدك!! وجات عليه فرحانة ومندهشة من غباء البشر وقبل ما تنسفو في ارضو اتدخل مارد وخطفو بسرعة البرق من قدامها والقاه في حته تانية وهي وراهو ومن وقبل ما تستقر قدامو فاجئها بخنخرو وغرسو في نص جبينها وحرر الشر الاسود وعم السواد المكان وهي بتصرخ بطريقة مخيفة ونظرها مع شرها المندثر في الاجواء!! واتلفتت علي احمد بكل غضب الدنيا وقبل ما تصلو استلموها المردة الشياطين!!!

وياداب كده ممكن يسيطرو عليها!!
احمد وقع علي ضهرو والوقوف غالبو وشايفها معلقة في الجو وبتصرخ وبتلاوي بس ما شايف الشياطين الماسكنها!! وبقول ليهم منار ما تأذوها!! ما تأذو منار!! لحدي ما ظهر ليه صاحب عم حسن بهيئة بشر وشكرو نيابة عن قادة عشائر الجن علي انقاذ البشرية والجن من شرها!!
وطلب منو يطلب العايزو ومهما كان الطلب حيتنفذ!! بس طلب منار!! ولانه الوحيد البقدر يستخدم الخنجر هو بنفسو الدمر باقي الجواهر الفي جبين منار وهي بتصرخ وملامحها بتتغير مره تكون منار ومره الشيطانة بنفس الاوصاف سابقة الذكر!! لحدي ما اتخلص منهم التلاتة وصرخت صرخة مدوية وفجأة غادرت جسد منار واستلمو طيفها الجن!! وما معروف المره دي حيسجنوها وين بس ان شاءالله تاني ما تقدر تتحرر ولو بعد عشرات ملاين السنوات!! واستلم الطفلة البريئة بين ايديهو!! وقال لصاحب عم حسن الكان لسسسه في هيئة بشري انو يرجعهم البيت!! ويقصد بالبيت بيت منار!! وده الحصل في غمضة عين وصلهم ولسسسه هي ما استعادت وعيها!! وامها لمن ظهرو ليها فجأة وقعت بكومة سكري!! اسعفوها هي ومنار!! والاتنين استعادو وعيهم في المستشفى!! منار فتحت وشافت امها جنبها وزوج امها!! وعاينت ليهم مسااافة وقالت معقولة اكون بحلم!!؟
امها بكت وحصنتها وبقت تنوح لمن الناس البرا من دكاترة ورجال شرطة جو داخلين عليهم وطلعو الام من بنتها بعد ما ضغطها ارتفع!! حمدو ليها السلامة وقالو ليها اخدي راحتك وبعدين حنحقق معاك!! قالت ليهم في شنو؟! وانا كنت وين عشان تحققو معاي!! قالو ليها ما متذكرة شي!! هزت راسها!! بقو يعاينو لبعض وطلعو منها محبطين!!؟
ومن قفلو الباب قالت لنادر زوج امها وينو احمد!!! ابوها ابتسم وقال ليها يعني طلعتي متذكرة بس حركات منك ساااي!! ابتسمت وقال ليها احمد مع اهلو برا امو واخوه بس حيجي!! ومن جابو سيرتو فتح الباب!!اتبادلو الابتسامات!! والباب قبل ما يقفل نادر حصلو وطلع خلاهم مع بعض!! قال ليها سيدة الشر اخيرا فاقت!! قالت ليه سيد التهور لسسه ماتاب! ! قال ليها حتى ولو كنت ذنب ما بقدر اتوب منه!! ابتسمت بخجل وغطت شفتها!! صر حاجبيه وقال ليه انا شفتك وانتي شيطانة معقولة خجلانة مني اسسه وتضاري في وشك مني!! قالت ليه لاني ما حلوه وانت زول قلبك ابيض وتستاهل كل الخير!! اتنهدت بصعوبة وابتسم وقال ليها انتي كل الخير!! وقال ليها حمدلله علي سلامتك واخدي راحتك لسسسه بيناتنا زمن طوييييل عشان نكسر تلج لبعض!! صحكت وشكرتو؟!! ابتسم وطلع!! هناك ناس وليد اتحركو علي الخرطوم هو وعم حسن ووليد من شدة ما متحمس لمن بجية احساس انه الباص بطي ولو نزل جرا بيصل اسرع!! وهمس لعم حسن قال ليه زولك داك وده احمد للقمر بغلبو يوينا الخرطوم!! عم حسن ضحك وقال ليه ما عندي مشكلة بناديهو بس انا بمشي معاه وانت خلي يجيب ليك ولدو الكديسة!! وليد اتوتر وقال ليه الزول ما يهظر معاك يعني!! وبقي يتلفت ويتحصن وعم حسن بيضحك لحدي ما وصلو الخرطوم!!!
وكان احلا لقاء بين الاصحاب وما خلت منو الدموع!! وبطريقة او بأخري قدرو ينقذو العالم بمساعدة الجن العياذ ب**** من ان يحضرون!! وشكر عم حسن علي وقفتو واتعاهدو انه الموضوع يفضل سر بيناتهم والمهم انهم انقذو البشرية!!
اما عصفورين الحب!! احمد جاب اهلو وطلب منار!! هي عملت حركات وقالت عايزة تقرا وقرب يدقها قدام اهلها بس بحمدلله تمت خطبتهم وهي مشت كلمتها وقالت ماف عرس الا بعد تخلص الثانوي وتقرا الجامعة!! احمد مشاها وما حب يجادلها بس شكلو بخطط لعرسو قريب!! بس المطموصة مغصت عليه الخطوبة وقالت عايزة تعمل عملية تجميلية قبل العرس عشان ما ظلمو!! شاكلها زيييين وقال ليها انا عايزك عشان مميزة عن غيرك!! اما اذا بقيتي عااادية حامشي اشوف غيرك!! الشافعة الساحرة الجواها الطبيعية قامت فيه فوق وخلتو هو ولد الثانوي وهي البت الواعية وماسكة زمام الامور ومسيطرة علي العلاقة الجميلة دي!! بس هي مصرة تعمل العملية ولم حواء السودانية تخت حاجة في راسها بتعملها بتعملها!! بس نقول **** يسعدهم ويتمم ليهم فرحتهم ويبعد عنهم شر خلقة من الانس والجان وغيرهم!!!

اعوذبالله من همزات الشياطين واعوذ ب**** من ان يحضرون

النهاية …………