مكتملة فانتازيا وخيال درامية رواية انتقام قرين (1 مشاهد)

[قيصر ميلفات]

وفي الجزء الأول من رواية انتقام قرين دعونا نبدأ معرفة كيف ستبدأ الأحداث وعن الشخصيات ؟ وكل ذلك في السطور التالية ، قراءة ممتعة بإذنه.

الجزء الأول من رواية انتقام قرين​

الليله جيت احكي ليكم مصييبة حصلت معاااي!!؟ اولا انا اسمي ليلى…عمري ٢٥سنة!! زوله طيبة وفرفوشة بس م بحب الحقارة وممكن عادي ادرح لمرا قدر امي لو م احترمت نفسها!! المهم كنت بدرس بس بسبب قفلة الجامعة مع سقوط النظام الفات والكورونا الاولى!! كسرت حنك القراية وبقيت قاعدة ف البيت معديها من جبنة لجبنة ومن لمه لمة واموري ظابطة!! من الطبيعي يكون عندكم هوايات!! بس انا هوايتي غريية شوية!! بحب بعشق بموت ف حاجة اسمها ودع وقراية فنجان!! بالجد انا مدمنه للحاجات دي!! وممكن اقعد اربعة ساعت مع الوداعية!! شيء غريب!! كيف تتنبأ بشيء لسسسه م حصل!! كيف تحكي لي عن المستقبل!!!؟ ياخ انا بعشق الحاجة دي…وف كل لمة بشيل فناجين صحباتي ونسوان جيرانا وبقرا ليهم ساالي من راسي!! وهم عارفني بكذب عليهم!! بس كلنا مبسوطين وبنضحك ودا المطلوب!! لحدي م ف يوم جات جارتنا وقالت صحبتها عندها فتح علبة!! قعدة ظااار لغير الناطقين بها!! المهم م صدقت وتستأذنت امي وم وريتهم انها قعدة ظاار وقلت ليهم جبنة عادية وم منعوني!! مشيت وانا طايرة من الفرح…مشينا وكانت قعدة ظاااابطة شديد اغلا الحلويات وبانواعها!! وضبيحة وبخور اشكال وانواع!! والنسوان قاشرات ومجيهات!! وست الظار لابسة فستان احمر!!ولابسة طربوش احمر وماشة حفيانة وملبوشة كدا وهايجة!! وبتحمر لينا!! ف الاول انا خفت بس جارتنا قالت لي نازلة اسه وم مستوعبة البحصل حولينها!! دا كلو انا م شاغل بالي ولا بأثر فيني!! بس بعداك جات الوداعية!! المرة دي م ودع!! كانت رمله!!! اااي الرملة الواحدة دي!! انا اول مره اشوف وداعية بتشتغل بالتراب!!! النسوان لمن!! وست الظار بخروها ونزلت وبقت تورجغ فينا!! م عرفت رطانة ولا شنو بس لغة غريبة كانت!!؟ المهم بعداك المرا طلبت مني اجيب صينية!! وانا م ست البيت!! المهم قمت ومشيت ع المطبخ!! اقرب صينية اتنتولتها وجيت جري!! قالت لي امشي جيبي لي فيها رملة!! اجي ي القدر دا!!؟ اجيب ليها رملة من وين؟؟! والجماعة ديل بيتهم بلاط!! وريت جارتنا وسألت ست البيت!! قالت لي اطلعي الشارع جيرانا عندهم بناء!! جيبي حبة بس!! امتعضت الحكاية!! انا ضيفة ترسلوني ف الحر دي اسرق رملة من الجيران!! المهم قمت وقلت ليها اجيبها ليكم ف شنو؟؟ المرا البتشوف الودع ولا الرمالية اسمها!! مدت لي الصينية وقالت لي جيبيهو هنا!! وفعلا مشيت جبتو!! وقعدت ملهوفة اشوف المره دي بتسوي ف شنو!!؟ المرا تطرح الرملة ف الصينية وتبتخطط فيها وبكشحها يمين وشمال!!؟ وانا مزهولة من كلامها للنسوان!! وكلهم مصدومات بكلامها وقالو صاااح!! وتعالو شوفو الطلبات!! العندها حلق راح عايزه تعرف الشالو منو!! والحاسة راجلها بخونها وعابزة تعرف مع منو!! والعايزة العرس بتسأل الحيجيها كيف ومواصفاتو شنو!! وانا مزهولة!! وهي تشيل وتعاين لي!! اولا انا عايزة يشوفو لي بس م جايبة معاي قروش!! وهي عايزة بياض!! وغير كدا النسوان م مديني فرصة!! اي واحدة حاجزة دور ومنتظرة!! ولم نظراتها لي كترت!! قالت لي جماعتي رادوك!! مع انك م رميتي بياضك ليهم بس شوفي معظمو ليك!! انا م رديت واكتفيت بالابتسامة!! رجعت تشوف للحريم!! بعداك قالت ليهم انا فترت!! وقدر م حنسوها ابت شوف ليهم وقالت جماعتي مشو خلاص!! بعدا كان شفت الا كان اقطع ليكم كلام من رأسي!! المهم اقتنعو!! وقالت لي تعالي كبي لي جبنة!! انا قلت المرا دي عايزة مني شنو؟؟! المهم قمت كبيت ليها وبدون م اسألها كبيت سكر!!؟ عاينت لي مساافة!! وقالت لي امشي حافلة المطبخ الدرج التاني ف فنجان ابونجمة واحدة جيبيهو!! انا افتكرت انها ختتو بنفسها!! بس ست البيت بقت تضحك وقالت ليها جماعتك شايفين شغلهم لكن!! بعداك انا عرفت انها م حصل جات البيت دا قبل المره ولا دخلت المطبخ ولا عارفة الفيهو شنو؟؟ طيب عرفت كيف مكان الفنجان وبالمواصفات دي!! انا بقيت ماشة ع المطبخ ورجولي بيرجفو!! بعد لقيتو ف نفس المكان جبتو ليها وقالت لي كبي بدون سكر!! فعلا كبيت وانا خايفة منها!! شربت وبقت تتجشأ بصوت عالي شديد!! المره دي قريب التلاثة دقائق بتترع وم وقفت!! وست الظار بقت تبخر فيها!! وشغلو الجهاز اغاني ظار!! وانا قلبي بقي يضرب شديد والبخور عامل ضباب!! وكلهم متلبشين ومعظمهم نازلين!! الرمالية قالت لي مالك مستغربة كدا م عندك جماعة ولا م عندهم طلبات!! انا نططت عيوني وقلت ليها بري!! بحب القعدات بس م عندي شيء!! ضحكت بفجور!! وكأنها بتتريق ع ردي!! قالت لي القروش الخاتها تحت الجزم حوليها ف زول راصد ليها وحتتشال!! صدقوني انا صبت فيني مطرة!! عرفت كيف ف قروش معاي وماسكاها!! وناس البيت م عارفين انا خاتها وين!!؟ هي كيف عرفت!! قلت ليها حيشيلهم منو!! ضحكت وقالت لي بس غيري مكانهم!؟ ف سري قلت مالي ومال المحن م حقاتي ممسكني ليهم اخوي عايز يشتري عربية ولسه المبلغ م اكتمل!! من م امشي ح ارجعهم ليه!! قلت ليها انتي بتشوفي كيف!! من قمتي لقيتي نفسك كدا!!؟ ولا اتعلمتي!! ضحكت وقالت لي ماف حاجة بيلدو بيها!! انا استغربت وقلت ليها بدهشة ممكن ف يوم انا اتعلم!!؟ قالت لي لو عايزة بعلمك!!؟ انا طرت من الفرح وم صدقت!! واخيرا لقيت زول حيحقق لي رغبتي!! وقلت ليها عليك **** علميني؟! قالت لي بعد بكرة تعاليني ف بيتي!! ووصفت لي المكان!!؟ وياريتني م جيت وياريتني م لاقيتها وياريتني متا قبل م اخش عالم الدجل والشعوذة…وانتظرت اليومين بفارق الصبر ومشيت لنفس العنوان الوصفتو لي!!؟

نواصل بعدين
يتبع ………

الجزء الثاني من رواية انتقام قرين​

وصلت البيت!! كان شكلو حلو؟! وف منطقة راقية!! استغربت الصراحة!! بس اتوكلت وضغطت ع الجرس! وف ثواني جات فتحت لي مرا عاااتية كدا واللهم لا شماتة شكلها زي الرجال!! ف اللحظة دي انا خفت!! واول حاجة خطرت ع بالي اني م كلمت اهلي وقلت ليهم جاية للمره دي واصلا هم م بعرفوها!!؟ فزاد خوفي!!؟ بس انا وصلت لحتة صعب الرجوع منها!! وهي بتسأل فيني عايزة منو!! انا من الخلعة نسيت اسم المرة!! وقلت ليها عايزة الرمالية!! البتشوف للناس ديك!! عاينت لي مسااافة وقالت لي اسمك منو!!؟ وريتها ومشت تتمرحك وخلتني واقفة!! وانا قربت امسك عبايتي واقوم جارية!! بس هي مشت بطريق وفجأة ظهرت لي من ورا الباب لمن صرخت!! ابتسمت!! وسنونها كانو صُفر!! وشكلهم بشع استغفرالله العظيم!! قالت لي ادخلي!! انا لسسه قلبي بيضرب ودخلت!! وقالت لي ع هناك!! وكانت بتأشر ع غرفة!! مشيت وقلت ليها هي قاعدة!! م ردت علي!! قلت ليها طيب براها ولا معاها زول!! حمرت لي وقبل م ترد!! سمعت صوت ضحكات جاية من جوووه!! قلت بركة المعاها ناس!! وسريع انزغمت فيهم!! واتفاجأت لم لقيتها براااها!! انا رجولي بقو يرجفو!! وصدقوني حاولت اقوم جارية بس رجولي فقدت السيطرة عليهم!!؟ قالت لي م تخافي وتعالي قريب!! انا بقيت اتلفت وافتش بعيوني وكنت متمنية اشوف لي زول!! علشان م اظلم اضاني!! قالت لي بطلي شمارات وتعالي اقعدي هنا!! بيني وبين نفسي قلت انا رميت نفسي ف شنو؟؟! قالت لي انتي عايزة تتعلمي شنو بالضبط!!؟ بصراحة خفت شديد!! وقلت ليها ولا شيء!؟ بقت تضحك!! المره القبيل جات داخلة!! ورمت حاجة كدا ف المبخر!! وفجأة عم السكون!! والغرفة كتمت لمن بقيت اكح!! قالت لي انتي عايزة تتعلمي شنو؟؟ قلت ليها وانا بتمتم!! كنت عايزة اتعلم قراية الفنجان؟؟! قالت لي والغير رايك شنو؟؟ م قدرت اجاوب!! بس بالجد انا خفت شديد!!!؟ قالت لي م تخافي!! والطريق دا م عايز ليه زول جبان وقلبو ضعيف!! قلت ليها ياتو طريق؟؟ تاني ضحكت!! وقالت لي انتي مفتكرة انا ح انزل ليك الوصفة ف فلاش وحترجعي بيه بيتكم!! جيت قايمة وقلت ليها طيب حتعملي لي شنو؟! قالت لي شيء بسيط!! بس حتقدري تشوفي الحاجات البسيطة البتحصل للغيرك!! وحتفتحي ليك باب رزق!!؟ قلت ليها انا م عايزة قروش!!؟ قالت لي انا م بجبرك علي شيء!! لازم تكوني مقتنعة بالشيء دا!!
قلت ليها من الاخر كدا!! حتجيبي لي جنون وشياطين اعوذبالله!! ابتسمت بخبث!! وقالت لي انتي شايفاني مجنونة!! قلت ليها يعني بخش ف شرك مع ****!! قالت لي انا م بقول ليك م تصلي ولا تصومي!! بالعكس م بأثر ف معاملاتك وعباداتك!!؟ شوية ونسة وفرفشة بس مع صحباتك وجاراتك!! واتزكرت صحبتنا ف الجامعة!! كانت طبيعية وبتقراء لينا فناجينا ف الجامعة مع ستات الشاي!! فقلت م ظنيت الموضوع يكون اكتر من كدا!! قلت ليها فالنفترض اني وافقت المطلوب مني شنو!!؟ قالت لي ولا شيء!! بس جيبي يدك الشمال واديني وريدك!! استغربت!! وقلت ليها حتعملي شنو!! قالت لي انا م متعودة اتسأل الاسئلة دى كلها!! بس انتي مبتدئة ولازم اصبر عليك!!؟ كلنا ف الاول كنا كدا!! قلت ليها طيب اخر سؤال!!؟ اذا انا اديتك يدي وعملتي العايزة تعمليه!!؟ المقابل حيكون شنو؟؟ سكتت مسافة!! وقالت لي طلبات عادية!! تلبسي شيء معين ف يوم معين؟؟ تشتهي شيء معين!! قاطعتها وقلت ليها زي ستات الظاار!!؟ قالت لي بالضبط كدا!! بس م بنفس الكيفية!!؟ انتي طلباتك اقله!!؟ قلت البيطلب مني منو؟؟ نهرتني وقالت لي م قلتي اخر سؤال؟؟! خفت وقلت ليها دي اخر حاجة!! قالت لي الجماعة البخلوك تشوفي!!؟ قلت ليها جن!!!؟ قامت ع حيلها وقالت لي وقتك انتهي انتي زولة م جادة!!؟ وقبل م تطلع تخليني ف الغرفة قالت لي حصل شغتي ليك وداعية مجنونة!! واتزكرت مره جيرانا طوالي!!؟ كانت طبيعية وبتصلي معانا كمان؟؟! قلت ليها خلاص انتظري!! موافقة!!؟ وقفت جنب الباب!!؟ وقالت لي ماف رجعة قلنا!! قلت ليها ااي موافقة!!؟ جات قعدت وفتحت صندوق كدا مرقت منو حاجة تشبه الاعشاب!! بس ريحتها كريها زي الجلد المحروق!! ومسكت يدي!!؟ ورفعت كم العباية فووووق وخبطت ع وريدي زي العايزة تسحب مني دم؟؟! م اكذب عليكم الخوف الجواي راح!!؟ م قادرة اشرح ليكم احساسي بس دا الحصل كنت مسترخية؟!! كانت بتهمم ولا بتتكلم؟ بس انا م سامعها!! وبس شايفة حركة شفايفها!! بعد شوية الغرفة ضلمت شوية!!؟ كأنو الشمس بره غطتها غيمة!! واثرت ف اضاءة الغرفة!!؟ وكانت مغمضة وانا بديت اتوتر!!؟ بعد شوية احس بحركة ف يدي!!؟ قلت يمكن يكون بسبب ضغطتها عليها!! بس دقيقة!! الحركة جواها!!؟ انا ف اللحظة دي اتخلعت بالجد!! ولمن قلبي بقي يضرب!! وبقيت احس بشيء ماشي ولا سارح لي جوووه يدي!!؟ حاولت اسحبها منها بس بدون فائدة!! كانت ماسكاني شديد!! كوركت فيها وقلت! يدي وجعتني ف شيء ماشي لي فيها وبقيت اكابس ودخلت اليد التانية علشان افك من قبضة المرة بس كأنو عشرة رجال ماسكني!! م قدرت نهائي وهي ف عالم تاني ومغمضة!! بعداك بقت ترجف وتشهق!!؟ وانا بدون اشعر بقيت اكورك!!؟ بالجد كنت خايفة!!؟ بعداك هي صدمت ولا ماتت م بعرفها!! وجات المره العاتية القبيل ع حس ضرخاتي!!؟ ولا اشتغلت بي!!؟ بركت ف الارض وبقت تتكلم مع الرمالية ف اضانها!! وشالت شيء من الصندوق القبيل رمتو ف النار!!؟ وديك بقت تفرفر!! زي الحمامة المضبوحة!!؟ انا قمت جارية ولا اتلفت وراي!!؟ طلعت من البيت وانا دايشة وشوف م قادرة اشوف ولا مركزة!! وجسمي كلو مشوك!!؟ وقلبي بيضرب!! ف عمارة ف بداية الشارع خاتة كولر برا!! من الخلعة م شلت الكوز!! فتحتو وبقيت اشرب مباشرتاً واغسل ف وشي!!؟ كنت عطشانة شديد!!؟ بعداك حسيت بحكة ف يدي!! رفعت كم العباية!! م كان ف شيء ظاهر!! يعني يدي طبيعية!! حمدت ***!! وقلت تاني توبة!! محال اجيها تاني!!؟ ورجعت بيتنا وجسمي واجعني وحاسة بفتور!! وكأني شايله حمل ع ضهري!!؟ واول حاجة عملتها صليت عااادي زي المعتاد وم كان ف شيء غريب!! وصدقوني حسيت براحة م بعدها راحة!! واخدت لي نومة!!؟ بس شفت حلم مخيف!! كنت جااارية والارض بتتشق وبتبلعني!! وبسقط ف باطنها بقوة!! وفجأة بلقي نفسيف حته تانية ونفس الحكاية بتتكرر الارض بتتشق وبغطس جواها!! قمت مخلوعة!! وعرقي بتصبب!! ولمن نفسي قايم!! واول حاجة خطرت ع بالي قلت دا بكون حلم عادي!! ولا اشارة ع غضب **** علي!!؟ وحاولت اشيل الافكار البشعة دي من راسي وقمت ع شغلي المعتاد وجهزت لناس البيت الغداء والموضوع عدى ع كدا!!؟ المساء م قدرت انوم وفضلت مقلقة!! قلت ي ليلى م تكبري الحكاية بكون لاني نمت بالنهار!! النوم طار مني اسسسه!! وتقريبا لنص الليل انا عيني لاجة! وم غمضت!! وفجأة احس بجسمي تقللل!! والحركة غلبتني!! وقلت بيني وبين نفسي!! معقولة اب كباس يمسكني وانا صاحية!!؟ عايزة اتقلب الجنبة التانية بس جسمي شبه مشلول!! ويدي الشمال بقت توجعني شدييييد!! وقدر م حاولت ارفعها من السرير غلبتني!!؟ والحركة الجواها زادت شديييد وفكيت الكواريك!!؟
نواصل بعدين
يتبع ………..

الجزء الثالث من رواية انتقام قرين​

ف اللحظة ديك انا حسيت بشيء غريب!!؟ كأنو وجهي بيتقسم ع اتنين؟! وانا بصرخ بكل م املك من طاقة!! بس حسيت بخشمي بتعوج!! ياربي اكون انشليت؟؟! وفجأة اشوف اخواتي واقفين ف راسي وبصحو فيني؟ مفتكرني نايمة!! وامي واخواني جو جارين ع حس كواريكي!! حضنت اختي الكبيرة وانا راقدة!! م قدرت اقوم! وهم بسألو فيني ف شنو؟؟ وبعد صعوبة حتى قدرت اخد نفسي!! وبكيت!! امي قالت لاخواني بتكون م صلت العشاء وبقت تكوبس!! لمياء قالت لي الحصل ليك شنو؟؟ اتنهدت بصعوبة!! وم عرفت اقول ليهم شنو؟؟ اذا قلت اني صاحية ماف زول حيصدقني!! لمست خشمي لقيتو ف حتتو!! قلت ليهم مسكني اب كباس!! بعداك ماف زول نام الاذان الاول اذن وابوي معود اخواني انهم يصلو كم ركعة قبل صلاة الصبح!!؟ انا كنت راقدة ف سريري وجسمي كلو واجعني وعاينت ليدي كانت طبيعية!! وسألت نفسي!! دا شنو الانا عملتو ف نفسي دا!! واقول لناس البيت شنو؟؟ ابوي لو عرف الحصل حيروح فيها!!؟ واخواتي نادوني كذا مره وزكروني الصلاة!! بس صدقوني جسمي كان شبه مشلول!! وبعد محاولات كتييرة حتي قدرت اقوم اصلي!! واكتفيت بس بالصبح تخيلو الرقيبة م صليتها!! لاول مرة من اكتر من عشرة سنوات لورا تقريباً!! اخواتي احتارو ف امري بس م اتكلمو معاي!! ورجعت نمت لاني اصلا م كنت نايمة!! بعد الواطا كشفت قمت لقيت لمياء مشت الشغل!! شغالة محاسبة ف جامعة… لينا مشت المدرسة وكالعادة خلو لي البيت مقلوب!! قمت بجرجر ف رجولي اتسوكت وشربت الشاي براي!! لانو امي بعملو بدري لاخواني لانو عندهم جزارة وبيطلعو بعد الصبح مباشرتا!! وابوي زمان كان ماسك الشغل براه بس بعد اخواني كبرو استلمو المحل!! وابوي مره بعد مره بمشي يطلهم!!؟ المهم نضفت البيت وامي مشت السوق تجيب الخضار!! انا فتحت التلفزيون وبحضر ف اعادة مسلسلي المتابعاه!! لانو كهربتنا كالعادة كانت قاطعة امس بليل!! حسيت بزول ختم ع المطبخ!! انا قاعدة ف البرندة المطله ع المطبخ!! قلت بتكون امي جات!! وم مشيت عليها!! وبعداك حسيت بزول وراي!! وانا بحضر ابتسمت!! وقلت امي من متين بتهزر معاي كدا!! وقلت بكون بسبب كواريك امس عايزة تخوفني!! ابيت التفت عليها!! بس كنت مستعدة!! بس م خلعتني!! والضل واقف!! والشي الخلعني انو تلفزيونا قاعد غرب وفتحات البرندة بتخلي الشمس تدخل وتعكس فيه!! بس الزول الواقف وراي وف راسي حجب عني ضل الشمس!! يعني اكيد ف زول واقف وانا م بتهيأ ساي!! وجسمي كششه شديد وقلبي بقي يضرب!!؟ وحاولت اتلفت بس رقبتي كانت شامطة! وم قدرت احركها!! وقلت امي!! ماف زول ردا!! انا قربت اكورك!! بس **** انقذني بأمي فعلا!! جات داخلة فجأة وقالت لي بنادي فيك وين انتي!! شيلي مية جنية من تحت المخدة اديها لبتاع الركشة واقف!! انا بعاين ليها وانا مصدومة!! ياداب قدرت اتحكم ف رقبتي!! وبقيت اتلفت!! نهرتني وقالت بتفتشي ف شنو قومي!!؟ انا رجولي كانو بيرجفو!! الواقف منو!! ومشى وين؟! قمت وشلت القروش!! وانا ماشة ع باب الشارع وبتلفت وراي!! اديت الزول قروشو وفات!! انا قفلت باب الشارع وقلت ي ليلى حصلي نفسك عايزة تجني انتي!!؟ ارجع للرمالية ولا اسوي شنو انا!!؟ امي نادتني وقالت لي تعالي دخلي الخدار دا التلاجة!! وانا واقفة وساندة نفسي ع الباب!!؟ وامي انفعلت!! مالك م بتسمعي الكلام!! انا اتقطع ليكم!! جبتو ليكم كمان غالبك تلميهو!! وكلام كتييير!! ومشيت عليها!! بديت افرز ف الحاجات الجابتهم وبدخل ف التلاجة!! كانت بتعاين لي ساااي!! بعداك جهزت الفطور وانا ساعدتها كالعادة!! وابوي جا ف مواعيدو من الجزارة!! لازم يجي يفطر مع امي!! اديتو غسل وقال لي امس مالك!! وكان بيتبسم!! ضحكت وقلت ليه وروك!!؟ قال لي وروني شنو!! ناس الجامع سألو عن الحصل شنو ف بيتنا!! كواريك صحت الحلة كلها!! وبقينا نضحك!! امي قالت ليه عدم تحصين بس!! اليوم كلو قدام التلفزيون والتلفون!! والصلاة الا بالدفر!!؟ ابوي ابتسم وقال كالعادة النقاش م بيحلى الا وقت الاكل!! ضحكت وقعدت جنب ابوي بريدو شديد واكتر من ماتتصورو!!؟ **** يحفظو لي!؟ المهم فطرنا وعملت ليهم الشاي!! وجيت ماشة ع غرفتنا قال لي ليلى!! جيت راجعة عليه وقلت نعم ابوي!! قال لي ارقي نفسك!! ابتسمت وقلت حاضر!! ومشيت ع الغرفة!! رقدت ف سريري!! ولاول مرة م احس بالراحة!! وجاتني خوفة فجأة!! قمت متلبه من السرير!! وعايزة اشيل مصحف لمياء من التربيزة!! بس اتزكرت اني م طاهره!! طلعت اتوضيت!! جيت راجعة ومسكتو بحذر!! وبديت من الفاتحة ولم دخلت سورة البقرة انا نمت كيف م عارفة!! م صحيت الا ع صوت لينا وهي جاية من المدرسة!! لقيت المصحف جنبي ف السرير!! ختيتو ف التربيزة وشفت الساعة لقيتها اتنين ظهر!! قلت معقولة نمت الوقت دا كلو!! قمت ولسسه نعسانة!! استحميت وصليت الظهر!! وامي قالت لي صحيتك بس ياتو يوم انتي سمعتي كلامي!! منبطحة زي العجل!! الصلاة البتلعبي بيها دي بعدين بتتحاسبي بيها!! قلت ليها و**** م سمعتك!!؟ المهم قعدت معاها شوية ولقيتها ورقت الخدرة!! قلت ليها عملتيها براك!! قالت لي جاتنا خالتك فاطمة!! شربت معاي الجبنة وورقتها معاي!! وشلتها وديتها المطبخ علشان اشد الغداء!! لقيت عدة الفطور ف المغسلة!! نسيت م غسلتها قبيل!! لينا دخلت علي ف المطبخ وبتسأل عن الفطور!! لم قلت ليها فول مطبوخ وسلطة!! جاطت وقالت لي اول مرة اشوف بيت جزارين بياكلو فول!! كرهتونا الفول زاتو!! وضحكنا وطلعت!! مدت راسها وقالت لي م وريتني امش شفتي شنو باليل قمتي تكوركي!! وبقت تضحك!! شترتها بليفة العدة!! غسلت عدتي وخنيت ملاحي!! وصلحت لامي العجين علشان تجي تعوس!! ورجعت الغرفة لقيت لينا نامت!! رقدت ف سريري!! وبعاين للسقف!! وقلت ان شاءالله يكون البيحصل معاي دا هلوسات ساي بسبب الخوفة الدخلتها فيني الرمالية!! وم تستغربو تاني نعست بس امي حلفت كان تخليني انوم!! قالت ماشة لمرة فلان وضعت وم بتقدر تعوس!! طنطنت وقلت ليهم كرهتوني اليوم الاتعلمت فيه العواسة!! لمياء اكبر مني بتلاتة سنوات م بتعرف تعوس!! بس انا عاملني خادم ف البيت دا!! قالت لي م قاعدة ساااي لاشغل ولا مشغلة!! تعوسي وتفركي وتعملي اي شيء!! قلت ليها ان شاءالله يجيني عريس علشان ارتاح منكم!! ضحكت وقالت لي متين متين ي ****!! علشان ننفك منك!! ومشت خلتني!! بالجد فترانة!! مع اني قاعدة عاطلة بس ياخ شغل البيت دا متعب خلاص!! وفكرت ارجع لجامعتي!! بس انا بقراء لغات!! والانجليزي ولا التكتح م عندي!! علشان كدا حيكون دراستي عبارة عن ضياع زمن وقروش!! وصدقوني كرهتي ف الدنيا شحطة المواصلات والمدافرة!! مشيت عستا وانا برفع ف حاجاتي!! سمعت زول قال ليلى!! الصوت كان مألوف بس م عرفتو منو!! قلت بكون ديل اخواني حسن ولا حسين!!؟ طلعت برا!! م لقيت زول!! دخلت ع البرندة قلت بكون هناك!! بس برضو م لقيت زول!! ابتسمت وقلت بقول امي بكون ناداني سعدي!! ويايت يكون فعلا سعدي هو الناداني؟؟! بعداك صليت العصر ولمياء جات داخلة!! قلت للينا سوي السلطة وختي الغداء انا كفاني!! تاني ولا ملعقة م بهبشها!!؟ ومشيت رقدت!! لمياء بتغير ف ملابسها وبقول لي امس كان بيسلخو فيك حية ولا شنو!!؟ وكانت بتضحك!! صريت وجهي!! وبعداك ابتسمت!!؟ قالت لي دقات قلبك حسيتها ف صدري امس!! وعرقت ينتف!! مالك الحصل عليك شنو!!؟ قررت اني اوريها!! اختي الكبيرة وزوله واعية وماشاءالله فاهمة شديد واكيد حتحل لي مشكلتي!! بس خايفة من ردة فعلها حتكون كيف!!؟ قلت ليها ح احكي ليك بعد تتغدو!! قالت لي وانتي م عابزة!! قلت ليها شبعانة!! هي جنب الباب وبتتكلم معاي!! وحسن سمعها!! قال لازم تكون شبعانة م زي العتوت!! ٢٤ساعة ف المطبخ وبتسفسف!! قلت ليه م اكتر منك!! وطلعت خلتني راقدة!! غمضت عيوني!! وعارفة المغرب قرب والوقت م مناسب للنوم بس النعاس غلبني!! غمضت عيوني!! اسمع صوت ضب بجغجغ ساااي!! افتح الصوت يقيف!! اغمض تاني الصوت يطلع!! وقلت الشي دا قاصدني ولا شنو!!؟ قعدت ف نص السرير واتلفتت يمين شمال وكل زوايا البيت م شفتو!!؟ تاني رجعت رقدت وقبل م اصلح راسي ف المخدة!! اشوف الشي طااااير وطاااخ يقع لي ف وشيء!!!!!؟

نواصل بعدين
يتبع …………

الجزء الرابع من رواية انتقام قرين​

انتو قادرين تتخيلو ضب!!؟ يقع فيني!! اكبر مخاوفي يهجم علي؟! انا والمخدة والملاية لاشعورياً لقيت نفسي جاراهم وراي وبكورك!!؟ المره زودتها ع حسب وجهة نظر ناس البيت!!؟ جريت نص الحوش وهم قامو من الاكل مخلوعين جارين علي!!؟ جسمي كلو بيرجف وقلت ليهم وقع فيني!! وقع ف وجهي!! وبقيت اتنفض وبالجد خشيت ف حاله م يعلم بيها الا ****!! ابوي قال لي قولي بسم ****!! واخواني بسألو فيني الوقع فيك شنو؟؟ قلت ليهم بخلعة ضب!! كبيير غطى وجهي كلو!! حسن بقي يضحك وحسين شاكلني!! وقال الكواريك دي كلها علشان ضب!! وحلف لو لقاه الا يختو فيني تاني!! وقال لي ابقي مره وكوركي علشان اكسر ليك قدومك دا!! لمياء قالت ليه طيب ف ضفضعة ف البلاعة امشي طلعها لي!! حمر ليها وخلت اخواني بيضحكو فيه!! لانو ممكن يمشي يواجه اسد ولا يقرب من ضفضع!! ابوي قال لي امشي اتوضي وانتظريني ف الصالون!!؟ امي قالت ليه بتك دي مشوطنة!! عندها عوارض!!؟ فعلا اتوضيت وانتظرتو!! وهم كملو غداهم وجاني!! قال لي اخر مره قريتي فيها سورة البقرة متين!!؟ قلت ليه امس بديتها لكن نمت!! اول حاجة صلى ليه ركعتين وقال لي اقعدي هنا!!؟ قعدني ف الصلاية وهو ف السرير!! وبقي يرقي فيني!! وكل م يقول تف!! انا بجي ناطة ويدي الشمال تتزارقني!!؟ وصدري ضاق شديييد وبقيت ابكي!!؟ وابوي انفعل اكتر ف القراية!! وانا بعداك م مستوعبة الحصل شنو ولا متزكرة!! ابوي نادى لمياء وحسن سندوني وقال ليهم ودوها غرفتها وسأل امي عن تلفونو!!؟ اتصل ع اصحابو مشايخ كدا بلاقيهم ف حلقات الجامع!! وفعلا بعد العشاء جونا ف البيت!! انا كنت طبيعية!! ولمياء قالت لي شكلو بسبب خوفة امس ولا قبيل دخلك عارض واليعاذبالله!! وبقت تسأل فيني حاسة بشنو!! وف شيء واجعك!!؟ اما لينا خافت مني والغرفة م دخلتها!! وانا لقيتها فرصة!! معذباني البت دي!! خلوني ارعبها شويتين!! وكل م اشوفها احمر ليها وهي تكورك بصوت م عالي وتجري تلبد ورا امي!! وانا بضحك؟؟ لمياء اظنها انتبهت لي!! وقالت عايزة تجننيها ولا شنو؟؟ ولا عجبك الدور!! ابتسمت وقلت ليها خليها تتأدب شوية!! وقبل م ترد علي…جا حسن و قال لي عايزنك ف الصالون… قمت اتنفضت وقلت ليها الموت منتظرني!! ابتسمت وقالت لي م تفضحينا قدام الناس!! ضحكت!! وجيت طالعة!! قالت لي انتظري!! حسن اتلفت!! قالت ليه حتحصلك!! طوالي جا ماشي!! قالت لي لبستي شدادك الطويل!! ضحكت وقلت ليها هم ماشين يشلعوني!! قالت لي جادة معاك!! هزيت ليها راسي وقلت ليها لا!! بس الاندر!! قالت لي ارجعي انستري م معروف البيحصل هناك شنو!!؟ قلت ليها حاضر ي امي!! ابتسمت وفعلا فتشتو ف دولابي ولبستو ومشيت عليهم!! وكل واحد دقنو اكبر من حقت التاني!! سلمت عليهم و ابوي قال ليهم ياها بتي الحكيت ليكم عنها!! طبعا م بصافحو!! وقالو لي اقعدي ف الفرشة!! كانت ف نص الصالون!! وعملو حلقة كدا وانا ف نصهم!! واحد قال لي طاهرة!! م عرفتو يقصد طهارة وضو ولا طمث!! بس قلت ااااي!! وبدأو ف التلاوة!! الفاتحة ،وبداية البقرة ،وم اكفر سليمان، واية الكرسي،ولم بدو بقرو سورة الصافات انا تعبت شديد!! وبقيت اناهج ولمن راسي بيمشي يمين وشمال!! وبقين انييين بس م ببكي!! وواحد بقي يقول اخرج ي عدو ****!! اخرج ي لعين!!؟ وانا بقيت احمر ليه شديييد!! غير انو بكورك كان ببزغ فيني عديل يااخ!!؟ وانا ركزت يديني ف الارض زي الغوريلا الغضبانة وبعاين ليهم واحد ورا التاني! وبقيت اصدراصوات غريبة!! ومره اضحك واقول كلام م مفهوم!!؟ وكلهم بقو يقرو بصوت واحد!! وانا ارفس ف الواطا وانسك!! والحمدلله لمياء نصحتني ولبست شدادي!!؟ لانو بالجد كانت حالتي صعبة وتعبتهم معاي!! م قدرو يمسكوني!! وحسين اخوي ماشاءالله بصارع التور!! وممكن يمسكو من قرونو ويرميهو الارض علشان يضبحو!! بس انا غلبتو قالو!! يمسكني من يديني اتقلب بيه واخليه تحتي!! يمسك رجولي ارفسو لمن يقع ع ضهرو!!؟ وبعد اكتر من ساعتين وفترت معاي الجماعة حتى انا هديت!! بسألوني اخرج منها!! انا بقول ليهم خرجت!! بقولو بوين!! انا بقول بالاصبع الصغير!! انا الكلام دا قالو لي ابوي ومستحيل يكذب!! قالو اصبعي لونو ببقي شديد السواد وبتفدع لمن يصل ضهر اليد!! وانا اغمى علي!! بعد فتحت لقيتهم لسسه بقرو!! وبقولو لي انت منو اقول ليهم انا ليلى!! القبيل البتفتف داك قال لي انت م ليلى انت منو!! وكان بيخنق فيني وانا بكورك وبنادى ف ابوي وبقول ليه الحقني ي ابوي عايز يقتلني!! وانا بالجد نفسي كتم وقربت اموت من شدة قبضتو ع رقبتي!!؟ ف واحد كدا **** اذقذني بيه وقال ليه فكها خلاص!!؟ وانا لمن شهقت بعد فكاني وبقيت اكح!!؟ حسين شالني من الفرشة ووداني غرفتنا!! واكيد كواريكي لمت الحلة كلها!! وبيتنا اتملى شماراتيه!! رقدت ونمممت!! وخليت ناس امي يشرحو ويفسرو ليهم!! صحوني قبل الصبح وسألوني عن صحتي وقلت ليهم كويسة!! ابوي قال لي اتوضي!! وكان واقف ف راسي لحدي م خلصت وضو وساقني معاه الصالون ركع وقال لي رقبي!! فعلا صليت الرقيبة واخواني ع غير العادة مشو الجامع براهم!! ابوي فضل معاي!! صلى بينا انا وامي واخواتي!! وبعداك فتحنا المصاحف وقرينا جماعة!! بعداك ابوي قال لي واصلي انتي!!؟ وفعلا قريت عااادي!!؟ حتى ابوي اطمئن!! وقال لي ارقي نفسك يوميا وواظبي ع الاذكار وصلاتك ف مواعيدها!! ووصى امي تراقبني!! ولو داخلة الحمام سااي امي بتزكرني اللبس الطرحة!! كنت حاسة بنفسي كويسة!! وقلت الحمد*** **** نجاني من موضوع الشعوذة داك!! وحمدت **** اني م طلعت خارجيات وذكرت موضوعي مع الرمالية قدام الشيوخ واخجل والدي قدام اصحابو…بعد كم يوم وانا مقفولة ف البيت اتصلت علي صحبتي!! قالت لي الليلة الجبنة عند ناس مروة لازم تجي!! وريت امي قلت ليها عايزة اغير جو مليت من قعدة البيت!! اول اترددت بس وافقت وقالت لي م تتأخري!! مشيت وانا مبسوطة وكانت النظرات متجه علي!! وشايفاهم بيتهامسو فيني!! بس م اشتغلت بيهم كتير والمس م حاجة بتنبز بيها!! المهم القعدة كانت ظااابطة وصحباتي م قصرو فرفشو معاي وغيرو لي مودي!!؟ لحدي م جارتنا سكينة الوداعية المشهوررة ف المنطقة والمناطق المجاورة بدت ترمي ليهم ف الودع!! وكلهم قعدو جنبها وبسألو فيها تشوف ليهم!! ومن بدت كدا!! اتصل عليها راجلها وقال جوها ضيوف ف البيت!!؟ استأذنت من مروة وطلعت!! ونست ودعها!! انا كنت بعيييدة ومتابعاهم بعيوني بس!! ونادوني اشرب التِنى حق الجبنة!! وفعلا جيت وف اثنا م بشرب عيني وقعت ع الودع!! شفت مروة ف الودع!! م تسألوني كيف!!؟ بس دا الحصل شايفة صورتها ف الودع وكأني بحضر ف تلفزيون؟؟! اتخلعت لمن القهوة شرقتني!! ختيت الفنجان ورفعت الودع عاينت ليه مسافة!!! شفتو ودع عادي والصورة اختفت!! لمن شلت نفسي وختيتو وقلت شكلي رجعت اهلوس تاني!! مروة قالت لي عايزة ترمي لينا زي كل مرة!! صحكت وقلت ليها لالا م عندي مزاج اكضب عليكم!! وبقو يضحكو!! ورميت الودع ف التربيزة!! كشحتو بس بطريقة عفوية م اقصد شيء!!؟ وشفت ناس بعرفهم حق المعرفة ف الودع!! ومن الخلعة جيت قايمة!!؟


يتبع ………

الجزء الخامس من رواية انتقام قرين​

انا ف اللحظة ديك فقدت المنطق!! هل انا بقيت وداعية!! يعني انا لسسه ممسوسة!! ولا البحصل دا شنو؟؟ قالو لي مالك مخلوعة!! م عرفت اقول ليهم شنو!! قلت ليهم راجعة بيتنا!!؟ م اصرو علي!! بل حسيت بيهم خافو مني!!؟ وافتكرو الحالة رجعت لي تاني!!؟ رجعت البيت وانا بفكر ف الحصل!! اكيد انا م بتوهم!! وفعلا دا الحاصل!! المرة الاولى مروة!! والتانية مصعب!! ومعاه حسن اخوي؟ وشكلهم غضبانين شدييد!! دا معناه شنو!! دخلت غرفتي!! وكنت خايفة!! واتزكرت شغفي وتعلقي بالودع واني اكون وداعية ولا قارئة فنجان!! بس بعد حصل لشنو حاسة بضيق ف صدري؟! لشنو م فرحانة!! رغم اني وصلت للانا عايزاه!!؟ وكمان انا شفت بس صور!! هل ياترى الوداعيات بشوفو نفس الشيء!! ولا ف اصوات بسمعوها ولا كيف بالضبط!! والف سؤال بطرحو نفسهم!! قمت اتوضيت وصليت الظهر!! وقلت اتصل ع مصعب!! دا خطيبي!! خطوبة بالاسم سااي م متواصلين!! ودعمي الكبير!! كان مغترب لم كنت انا ف الاساس!! ورجع السودان اسس ليه شغل م بطال!! وخطوبتنا كانت تقليدية ولدرجة انو ابائنا م شاورونا ولا اخدو رآينا ف الموضوع!! بس م رفضنا!! ومره بعد كم شهر بيتصل يسلم ع ناس البيت ومرات كدا بدوني اتكلم معاه!! المهم اتصلت!! وكالعادة م ردا انتظر لمن الجرس انتهى ورجع لي!! سلمت عليه وسألتو عن ناس البيت واخبارو!! قال لي كلهم بخير وسألني نفس السؤال!! والكلام رااح!! م بنعرف نتكلم مع بعض!!؟ بس قال لي اليومين دي مضغوط ف الشغل وعندي مشاكل بسيطة كدا ادعي لي تتحل!! انا قلبي وجعني!! وقلت معناه الصورة الشفتها ف الودع بتكون بسبب الموضوع دا ولا ف شيء خطير لسسه م حصل!!؟ قال لي مشيتي وين؟؟ قلت ليه معاك!! دعيت ليه بالفرج ووطيبت خاطرو بكم كلمة وقفلت منو!!؟ واخدت لي غفوه صغيييرة لينا صحتني!! قالت لي امشي اعملي الجبنة لناس ابوي!! نهرتها وقلت انتي م بتعرفي تعمليها!! ومصحياني لشنو!!؟ مسكت لي طرف قميصها حق المدرسة!! وقالت لي لبسي م قلعتو اخش المطبخ!! وبعدين انا من متين بعرف اسوي جبنة!! ياخ شميتها شم!! وكرهت البيت دا زاتو!! م عايزين ليكم حبشية!!؟ لاني شغالة لناس البيت وماف زول شاكرني ولا مقدر البعملو!! قمت وانا زهجانة وصارة وشيء!! بصراحة كلفتها ليهم سريع بس الغريبة قالو طلعت سمحة!! اسسه لو عملتها بنفس م كان ظبطت!!؟ المهم بعد كبيت ليهم امي لانو عندها سكري!! مبتشرب سكر!! وفضلت الجبنة العكره ف اخر الفنجان! الفضول قتلني!! وقلت جدي اجرب اشوف هل ح اقدر اقرا فنجان امي!!؟ شلت العدة من قدامهم ودخلت المطبخ!! حركت الفنجان بحركة دائرية!! وكفيتو ف الصينية!! زي م قاعدة اشوف الجماعة البيقرو فناجينا بيعملو!! وغسلت عدة الجبنة ورجعت للفنجان بعاين ليه قريب الدقيقتين م شايفة إلا سيايل الجبنة فيه!! بعداك غسلتو ورجعت غرفتي بس النومة طارت!! سامعة امي قالت ماشة تعمل الغداء!! وحسين قال ليها خلي ليلى تعملو انتي م تدخلي المطبخ ف السخانة دي بكيك هبوط!! ف سري قلت اي خادمتكم دي م مصفحة!!؟ وعملت نفسي نايمة!! ناداني بس ولا رديت؟! وخليتهم يتصرفو براهم!! المهم اليوم عدى ع كدا وم حصل لي اااي شيء الحمد*** لمدة اسبوع انا بنوم وبصحي وبصلي وباكل وبهزر وماف اي شيء غريب!!؟ لحدي م جارتنا بالحيطة اسمها حنان!! كانت لمه الصندوق عليها!! يلا انا خاشة معاهم!! كان كل اسبوع ف بيت واحدة بس بسبب الاشغال عملناها كل اسبوعين!! وبنات بسسس! والمتزوجات بكونو الفي اعمارنا!! يعني م معانا نسوان كبااار!! بس بنات الحي!؟ مشيت ليها من بدري قبل م يجو عليها البقية وساعدتها ف ترتيب البيت!! ورميت معاها اللقيمات وهي عملت الشاي والجبنة والبوشار!! المهم القعدة كانت ظابطة زي كل مرة والونسة حلوة وضحكاتنا تجيب الرايح وبخورنا فوووق!! بعداك عملنا الشيء المعتاد وبقو يقرو فناجين بعض!! بس ماف ودع!! لانو سكينة الوداعية م معانا ف اللمة وبتجي بالمزاجات والا صحبة القعدة تعزمها وتلح عليها حتى توافق انها تجي… علشان تحلي قعدتها اكتر… المهم انا مترددة بس محاولاتهم وكذبهم لبعض شداني يااخ وقلت احاول!! وفعلا شلت فنجان حنان!! وبقيت اعاين!! م شايفة صورة شيء!! وبرضو خطوط الجبنة بس!! وقالو لي عارفنك م بتشوفي بس كضبي لينا ساي!! وفعلا عايزة األف ليهم من راسي بس ف حاجة غريبة حصلت!! م شفت صورة بس نفسي كلمتني!!! اااي كلمتني!! مشش اسسه كلنا بنتكلم ف سرنا!! وبنخاطب نفسنا!! بس دا الحصل معاي!! وف حاجة جواي ولا شنو م عارفة قالت لي اسأليها عن الشبط الجديد!! وفعلا قلت ليها مبروك الجديد تلبسيهو بالعافية!! اتصدمت!! وقالت لي شنو!! عايزة تتأكد!! قلت ليها الشبط!! وانا بتبسم!! وهم مستغربين!! قامت ع حيلها وقالت لي انتي صحي بتشوفي!!؟ انا راجلي م كلمتو بيهو!! اصلا ماف زول شافو!! انا ابتسمت!! مروة قالت بتكون صدفة هاك شوفي لي انا!!؟ ضحكت وشلت فنجناها!! ونفس الشيء اتكرر!! جاني سؤال ف عقلي!! وقلت ليها المره القصيرة الشفقانة عندك معاها شنو!! لمن فتحت خشمها!! وقالت ليهم و**** م بتكذب!! دي عنايات الدلالية عندي عندها فرن!! وكل شوية بتتصل للقصد!!؟ وشوفو وابل الاسئلة!! من متين بتشوفي وم وريتينا وف العاتبني وف الخاف مني لانو عارفين موضوع المس!!؟ ولمو فيني زي سكينة الوداعية!! وانا بضحك!! بقيت مشهورة خلاص!!؟ ودا الحصل!! يوميا عازمني جبنة بس امي م بترضي لي اطلع يومي فبقو يجوني ف البيت!! وانا من شدة م ادمنتا الحكاية بقيت اعمل جبنة بدون سبب وم بكون ف زول عايز يشرب من ناس البيت!! بس علشان اشوف الفنجان بقول شنو!!؟ كان هوس حماكم ****!!؟ واشتهرت ف الحلة وصحبات صحباتي بقو يرسلو لي صور فناجينهم بالواتس والفيس علشان اقراها ليهم!! كنت خاتة الموضوع كهواية!! بس بقو يرسلو لي رصيد!! ومرات بختو لي بياض!! مع اني برفض و****!! بس بقولو لي دا م ليك!! دا حق طلبات الجماعة!! وهنا انا اتزكرت حاجة!! طلبات؟؟ طلبات شنو؟؟ لحدي الان م ظهر لي شي!! ولا انطلب مني شيء!! المهم وقفتهم من انهم يجوني ف البيت علشان اهلي م يحسو بشيء!! وابوي لو عرف حتجيهو زبحة لاسمح **** واممي حتقتلني!!؟ واموري كانت ظابطة وعلشان م يشكو ف امري!! قلت ليهم اشتغلت مع شركة بتاعة تسويق إلكتروني!! م بحتاج لطلعة ونزلة بس شغلي بالتلفون!! وم اعترضو!! وانا اليوم كلو بقرا ليهم ف الفناجين ومرات مرات الودع!! لكن بقيت م بحبذو!! لاني بشوف صور بس وانا براي استنتج الاحداث!! وم كل مرة بكون تحليلي ف محلو!! لحدي م لاحظت اني ف الفترة الاخيرة م بقدر انوم ولو نمت بصحي بفتور وجسمي كلو واجعني!! وقلت دا بكون بسبب الارهاق ومسكة التلفون البإستمرار!! بس حصلت حاجة غريبة!! والخوفني اكتر انها اتكررت لمدة اسبوع!! انا م متزوجة ولا حتى متواصلة مع خطيبي علشان نقول دا بسبب كلامي معاه!! ولا حتى ميالة للامور الجنسية وثقافتي عنها زيرو!! طيب لشنو انا بحلم يوميا اني ف جماع مع زول م بعرفو ولا حتى بشوف ملامحو كويس!! بالجد الموضوع دا زعجني وبقيت بكره زاتو اني اخت راسي ف المخدة!! علشان الحلم البشع م يتكرر!! لاني بالجد بكون ف حالة مزرية!! وشيء فظيع م بقدر احكيهو ليكم بس بالجد انا متألمة!!؟ لم الموضوع زاد عن حدو!! وقفت الودع وقراية االفناجين!! وقفلت تلفوني!! وبقيت م بمشي ع الجبنات!! ولا بستقبلهم ف بيتنا!! وانا صحتي ماشة تتدهور!! لحدي م في يوم حصل الشيء المامتوقع!!؟

نواصل بعدين
يتبع ………

الجزء السادس من رواية انتقام قرين​

راقدة ف سريري وبفكر!! انا عيانة بس متأكدة انو مرضي م عضوي!؟ يعني الدكتور م حيفيدني ف شيء!! وحتى ناس البيت لاحظو!! لوني شاااحب وعيوني عاملة هالات سوداء!! وجسمي هزيل!! يقولو لي لو واجعك شيء نمش الدكتور!! بس بصر ع اني كويسة!! وقلت ليهم دي بتكون جرسومة المعدة م طلعت من جسمي!! لانها ف الغالب بتاخد غرابة السنتين ف المعدة!! المهم اخدت لي نومة…وحملت بزول طويييييل شديد كان لوني اسمر فااتح؟! شكلي كنت ضايعة!! وبسأل فيه انا وين!! وجيت هنا كيف؟؟ وانت منو؟؟ وهو واقف بعاين لي!! انا كل م اجري منو بلقاه ف وشي!! لحدي م قال لي!! طِيِعي تُطَاعي!! قلت ليه انت منو وعايز مني شنو!! واطيع منو!!؟ مسك يدي الشمال ونتلها عليه لمن لوح كتفي طقة!! وقال لي انا شريكك ف الجسد!!؟ وجا ماشي!! قلت ليه انت شيطان يعني!! فجأة بقى سرااب واتلاشي كأنو دُخااان!! انا صحيت مخلوعة وكان عندي زمة!! والنفس غالبني!! ناديت ع لينا وصوتي اتبحَ وهي نااايمة م سامعني!! وم كنت قادرة اعلي صوتي بالجد جاتني كتمة!! وطقشتا التربيزة الجنبي م عارفة الفيها شنو!! بس لم وقع لمياء حست بالكركبة وصحت!! لم شافتني بشهق!! وبأشر ليها بيدي تلبت من السرير ولمن عوقت ركبتها!! وجاتني مخلوعة!! وبتقول لي مالك مخنوقة!! وبقت تدعك ع صدري وضهري!! وصحت لينا!! وقالت ليها اجري نادي حسين!! والغبيانة ديك قامت تكورك!! بدل تنادي اخواني لمت فينا الجيران!!؟ ازعفوني والدكتور عمل اكتر من عشرة فحوصات وكلها نضيفة!! وقال عندها اعراض زبحة!! بس **** لطف بيها!! حسين قال للدكتور يعني ترجع البيت؟؟! قال ليهم ااي م عندها شيء!! واداني بخاخ قال م تستخدمو الا ف حالة الضرورة القصوى!! حسن قال للدكتور م تطلعوها دي م زبحة كتمة النفس دي بتكون كورونا!! الدكتور بقي يضحك!! قال ليه م تخاف عملنا الفحص وطلع سلبي!! حسن قال لي بتكون عندك لكن لايوقة زيك م بتظهر طوالي!! ضحكت وقلت ليه رجعوني البيت ي الفقر!! انا وحسن لانو مولودين ورا بعض مشاكلنا كتيرة ومناقراتنا اكتر؟! فربنا يحفظو وكل الاخوان ****!! رجعنا البيت كان صباح اليوم التاني من الكتمة!! والحلة كلها جاية تكفر ليلى رقدوها ليلى رقدوها!! هي كلها كم ساعة بس!!؟ وانا زهجانة منهم ومن نفسي وف حاجة جواي بتقول لي شيلي السكين دي وقومي عليهم من طرف!!؟ بس بلعن الشيطان وبعمل فيها نايمة علشان م اسلم ع زول!!؟ النهارية كدا اتزكرت الحلم!! وسألت لمياء قلت ليها شريك الجسد دا شنو؟؟! ضحكت!! وقالت لي القال ليك كدا منو!!؟ ابتسمت وقلت ليها قريت منشور ف الفيس واستوقفتني الكلمات دي!! قالت لي ي ستي شريك الجسد ع حد علمي واحد من تلاتة!! ي الزوج!! وم تسأليني بشاركك كيف!! بقينا نضحك!! قلت ليها وتاني!! قالت لي ولا المس الشيطاني حمانا ****!! انا قلبي وجعني وقلت خلاص معناها انا لسسه ممسوسة!! واكتفيت بكدة!! وسألتها سؤال تاني…قلت ليها طيب كيف اعرف نفسي اذا كنت ممسوسة!! كانت ماسكة تلفونها!! ختتو من يدها وقالت لي انتي رجعتي حسيتي بشيء!! قلت لالا!! قالت لي نوري ابوي نمشي لمحل رقية!! قلت ليها و**** انا كويسة!! بس عايزة اعرف علشان اراغب نفسي!! قالت لي اعراض كتيرة!! انك تكوني بتحبي العزلة! وم عايزة تخطلتي بالناس!! انك تشوفي احلام مخيفة زي انك واقعة من مكان عالي ولا طاردك كلب او ثعبان او حمار اوجمل!! واعراض كتيرة!! واهمها انك تبعدي عن المصحف!! وتلعبي بصلاتك!! انا تلاتة ارباع الحاجات الزكرتهم حاصلة معاي؟؟! قلت ليها والحل!!؟ جات قعدت جنبي ومسكتني من كتفي وقالت لي تقربي من ****!! صلي صلواتك الخمسة ف وقتها واقري قرأن كتيييير وخلي يومي يكون عندك وِرد!! ان شاءالله صفحة واحدة!! وقبل م تنومي لازم لازم تتحصني وتقولي اذكار المساء!! ولازم تواظبي عليها!! وصدقيني إبليس زاتو م حيقدر عليك تاني!! بس خلي ايمانك قوى بربنا واكيد حيقيف معاك!! اتنهدت بصوت مسموع وقلت ان شاءالله!! قالت لي يلا قومي صلي!! العصر اذن!! وطلعت وبعد اقل من تلاتة ثواني مدت راسها وقالت لي الشريك التالت والاخير القرين؟؟! ومشت تتوضي!! وانا بيني وبين نفسي!! قلت م ظنيت يكون قريني!! اصلاً نحنا م حنتلاقي إلا ف الاخرة!! وم سمعت قبل المرة عن شخص اتكلم ولا شاف قرينو!!؟ ف استبعدت الفكرة!!؟ وقمت صليت!!

المساء كدا جونا ناس عمي يسلمو علينا وكان جايبهم مصعب!! كفر لي!! وقال مالك ي زوله!! م شايفة حالتك دي ولا م قاعدة تعايني للمرايا!! عاينت ليه ب استغراب!! اول مره يهزر معاي!! قلت ليه بحالتي دي احسن منك!! بقي يضحك وقال لي مالي انا؟؟ قلت ليه عامل زي الضب!! خشن وشين!!؟ ضحك بطريقة هسيريا!!!؟ ولمن لفت انظار اهلنا لينا!! انا بقول ليه **** يفضحك اسكت!! حسين بقتلني الليلة!! قام ع حيلو وقال لي تستاهلي يقتلوك!! ومشا خلاني بضحك!! طلعو مننا قبل م يصلو بيتهم عملو حادث!! بس **** لطف وجات خفيفة وماف زول اتأذى!! اليوم التاني حسين ف الجزارة بيسلخ ف العجل!! وجرا السكين ف يدو التانية!! ونزف لمن اغمي عليه وربطوها ليه قريب العشرين عقدة!! والعوارض متتالية!! امي شغالة ف المطبخ وشادة كوارع ولا شنو م عارفة!! فقومي ي حلة البريستو طيري فوق وانفجري!! بركة الامي كانت جنب الباب!! قامت جارية بس برضو بعض من الحلة طار ف ضهرها لمن ف حتتات عملت بقاق!! بالجد كان شيء بحير!! شنو البيحصل!! م تكون اصابتنا عين؟؟ والبيت بقي جايط امي راقدة طبيعي ع بطنها واخوي يدو معطلاهو وراقد ولمن عاملة ليه حمة!! والناس داخلة ومارقة!! وبقينا م فاهمين اي حاجة!! لحدي بعد اليومين الطوال ديل عدو كنت نايمة!! واشوف نفس الزول الطويل داك!! بس م كنت ف خلا ولا ف مكان مجهول بالنسبة لي!! كنت ف بيتنا وف سريري بالتحديد!! لم شفتو اتخلعت وف الحلم اتزكرتو وقلت انت؟؟ عايز مني شنو!! ودخلت هنا كيف!!؟ جا علي وكا طوييل شديد حاني ضهرو شدييد وبرضو قريب طول السقف!! قال لي حتطيعيِ ولا حتقبلي التضحية بأهلك!! قمت ناطة من السرير وقلت اهلي مالهم دخلك معاهم شنو؟؟ انت مش ماسيني انا!! قال لي طيعي تطاعي!! وقبل م ارد اختفي!! وقلت طيباطيع منو!! والمطلوب مني شنو!!؟ وبشهقة قمت مخلوعة قلبي بضرب!! قعدت كم دقيقة ف نص السرير بستوعب ف الشي الحصل!!؟ وقلت لو دا م كان حلم!! وكانت رؤى!! هل معناها انو اسرتي ف خطر بسببي!! وخفت شدييد وبقيت ابكي!! جات لينا قالت لي مالك ف شنو؟؟ قلت ليها ماف شيء!! قالت لي م تخافي ع حسين ماشاءالله اخونا فارس وبستحمل اي شيء!! وامي زاتها كويسة!! بس مع السكري الحريق دا بياخد زمن!! م تخافي ببقو طيبين!! قلت ليها ان شاءالله!! وجيت قايمة!! ولم وصلت عتبة الباب قالت لي ولا تكوني بتبكي بسبب زولك داك وانا جيت داخلة غلط!! انا ابتسمت وهزيت راسي وجيت طالعة!! كان قصدها مصعب!! هو كلام م بنتكلم مع بعض!! معقولة لمن يزعلني كمان!! طلعت اتوضيت وكانت الصدمة!! م قدرت اتوضي!! ارفع الابريق من الارض الموية م بتتكب كأنو فاضي!! انا خفت وبقيت ارجف!! وبعد كم محاولة فاشلة لينا جات ماره قلت ليها تعالي كبي لي!! قالت لي اها ي حسين التاني!! وقالت حسين بعذرو بس انتي مالك يدك محننة!! لمن صوتي بحا وقربت ابكي واترجيتها تجي تكب لي!! استغربت من اسلوبي!! وجات رفعت الابريق!! وبقت تكب!! انا بغسل ف يديني وم عرفت تاني اعمل شنو!! نسيت الوضو كيف!! قالت لي انتي بتستهبلي مشش!! انتي عايزه تتوضي ولا عايزة تغسلي يدك!! قلت ليها اتوضى!! حمرت لي وقالت خلصينا طيب انا ماشة اكل!! قلت ليها بعد الايدين اغسل شنو؟؟ ضحكت وختت الابريق ف الارض ومشت قالت لي حركاتك دي اعمليها للمياء!! وخلتني ببكي بحرقة!! لمن غلبتني الحيلة مشيت صليت من دون وضو! م بعرف اذا **** حيقبلها مني بس هو علمان بأنو الوضو غلبني!! وبرضو علمان بأني عصيتو ومشيت اتعلم امور دجل وشعوذة!! ياربي دا عقاب منو لي!!؟ لم جات لقتني ف الصلاية بدعي!! قالت لي اها العلمك الوضو منو!! وبقت تتريق علي وطلعت!! لو كان لاحظت لرجولي كانت حتعرف اني ثليت بدون وضوء….ف نفس اليوم المساء كنت عايزة اوري لمياء بس خفت من رده فعلها!؟ واسئلتها الكتيرة!!! وقلت اصبر شوية لبكرة!! شلت لوشني وبقيت اتمسح قبل م انوم!! وانا بمسح ف يدي حسيت بحاجة قوووية زي العود جو جريدة يدي الشمال!! اتخلعت وبقيت اتحسس ف الشيء القوي!! فجأة الشيء بقي يتحرك ولمن شايفاه بعيوني زي الثعبان ماشي ف يدي!!؟
نواصل بعدين
يتبع ………

الجزء السابع من رواية انتقام قرين​

انا م قدرت اصدق عيوني!! وشايفة الشي بتحرك تحت جلدي!! صرخت بكل قوتي ومبعدة مني يدي!! ولو كان جنبي آله حادة كنت قطعتها وم اترددت؟! اخوانتي جو جارين علي!! وبسمع مالك وف شنو من كل الاتجاهات!! وبقيت م واعية بنفسي!! بس بقول ليهم يدي!! اقطعو يدي!!؟ لمياء حضنتني عليها!! وانا لا شعورياً بقيت اضرب فيها واحاول ابعادها عني!! وتاني م وعيت بشيء!! لم فتحت لقيت افراد اسرتي كلهم معاي ف الغرفة!! اتخلعت وم عرفت اقول شنو!! ولا ارد ع اسئلتهم كيف؟ ابوي قال لي رجعتي تشوفي حاجات تاني مشش!! قلت ليه م عارفة ي ابوي بس بتك م طبيعية!! وبقيت ابكي!! امي قالت لي دا عدم التحصين!! ابوك يعمل ليك شنو اكتر من كدا!! قلت ليها بس اقيفي معاي امي!! م تخليني اضيع!! وبقيت ابكي!! امي ملامحها بقت م بتتفسر!! وقالت لي ف شنو! مالك؟؟ هزيت راسي بمعني لا ماف شيء!!؟ حسين قال لي شفتي شنو بالضبط!؟ قلت ليهم ف حاجة كانت سارحة فيني!! م قلت ليهم جووا يدي!! قال لي يمكن يكون خيط من طرحتك ولا اي مصيبة زمان وانتي كبرتي الموضوع!! قلت ليه احتمال!! لمياء قالت ليهم بس الحالة الكانت فيها!! والخوفة الدخلتها م حقت حاجة بسيطة!! انا بقترح نوديها مركز رقية ابوي!! ابوي جا قايم وقال ليها بفكر ف الموضوع!! وطلع وحصلوه اخواني!! امي قالت لي مشكلتك شنو! لي كم يوم حاسة بيك متغيرة!!؟ قلت ليها م علي شيء!! بس حاسة بجسمي مرهق شديد!! قالت لي اتحصني!! قلت ليها ادعي لي!! قالت م محتاجة يوصوني!! بس برضو انتو ارفعو يدينكم لربنا وادعو براكم!! طلعت خلتنا!! لينا شكلها نعسانا بس كانت مجاملانا وبتغالب ف النوم!! ومن طلعو رقدت ف سريرها!! لمياء جات قعدت جنبي!! زحيت ليها شوية.! علشان تاخد راحتها ف القعدة!! قالت لي انا اختك؟ واذا م صارحتيني م بقدر اساعدك ف شيء!! فعايزاك تحكي لي!!؟ قلت ليها احكي شنو!! قالت لي الكلام الواقف ليك ف حلقك وكل مرة بتأجليهو!! اتنهدت وقلبي بقي يضرب!! لو كلمتها حتحتقرني ويمكن تضربني!! واسقط ف نظرها!! المهم اتشجعت وقلت ليها انا حاصلة معاي مشاكل!! عقدت حواجبها!! وقالت لي احكيها علشان اقدر احلها!! قلت ليها صعب انها تتحل!! وخايفة اورطك معاي!! قالت لي م تخوفيني ي ليلى ف شنو؟؟ قلت ليها انا م بقدر احكي الموضوع من اولو!! بس انا بشوف حاجات!! وحاسة بأنو البيحصل مع ناس البيت دا من مصائب بسببي!! قالت لي دا كلام شنو!!؟ كيف يعني!!؟ اتنهدت وقلت ليها انا بحلم احلام وبحس بيها حقيقة وبتتكرر كنير!! واتذكر فيها انو البيحصل والهيحصل ف اسرتي بسببي!! ابتسمت وقالت اضغاث احلام حبيبتي!! والحاجة دي مسطرة ومكتوبة من رب العالمين نحنا م لينا ف دخل!! بس الخلاك تعتقدي كدا شنو؟؟ سكتت وم رديت!! اعادت لي السؤال بصيغة تانية!! وقالت لشنو مفتكرة انو البيحصل دا بسببك!!؟ قلت ليها م عارفة بس احساس!! قالت لي لانك اتمسيتي قبل كدا ومفتكرة انو عايز ينتقم منك ومن اسرتك!! قلت ليها احتمال!!؟ قالت لي بإبتسامة ان كيد الشيطان ضعيفَ…م تخافي نحنا مؤمنين برب العالمين واقوى منو!! وم حيقدر يصيبنا بشيء!! إلا الكاتبو لينا ****!! قلت ليها ونعم ب****!! بس ادعي لي ي لموو!! قالت لي من عيوني!! وغطت نصي بالملاية وقالت لي نومي وم تفكري بأي شيء!! وم تنسي تتحصني!! قلت ليها حاضر…وتصبحي ع خير!! قالت تلاقي الخير ومشت ع سريرها!! بيني وبين نفسي قلت معقولة نحنا اخوات!! اختلاف الليل عن النهار!! **** تهديني وكل عاصي ****…!
ونمت صحيت الصبح وصليت مع اخواتي وتاني النوم ابا يجيني!! ولحدي الواطا م كشفت انا صاحية!! بعداك قمت نضفت البيت ومشيت لامي السوق!! لانو بعد الحريق بقت م بطلع من البيت لانو لبس التوب مع الجلباب بسخن معاها!! وبتحاكك مع جروحها!! المهم مشيت السوق اشتريت الحاجات القالت لي جيبيهم!! وقبل م اطلع من السوق!! ف مرا مغطية وجهها بالتوب!! متبلمة؟ قالت لي ضمنتي جماعتك ونسيتينا!! انا الصوت م غريب علي!! اتلفتت عليها بس م قدرت اعرف عيونها!! قلت ليها معليش شكلك مشبهاني!! ضحكت!! وقالت لقيتك نكارة جميل ي ليلى!! انا استغربت! معناه بتعرفني!! قلت ليها يمكن يكون بسبب التوب المغطية بيه وشك دا!! مسكت يدي الشمال شديييد وضغطت عليها!! انا اتوكرت القبضة دي!!! اي يااها دي نفس القبضة حقت الرمالية!! دقيقة!! نفس العيون!! عيوني رقرقو وقلت ليها انتي!! لشنو عملتي فيني كدا!! لشنو غشيتيني!! انا حياتي اتحولت لجحيم بسببك!! ضحكت!! وده الشيء الاستفزاني اكتر!! وقالت لي بطلي دراما!! واتصلي علي بعدين وجات ماشة!! وقفتها بس ابت تقيف!! حسن جا علي وكان زعلان!! قال لي مالك واقفة ف نص السوق!! قلت ليه عاجاباني الوقفة يعني!! م اشتريت ليكم الخدار!! قال لي طيري البيت!! قلت ليه واللحمة!! قال لي بديها لابوي!! امشي انتي!! وانا ماشة عيوني بتفتش فيها بس م لقيتها وكأنها اختفت ولا خشت ليها بزقاق!! رجعت البيت وانا بفكر ف الموضوع!! وقررت اتصل واشوف البيحصل معاي دا شنو!! بس اتزكرت اني م عارفة ليها رقم!! طلعت الورقة الادتني ليها قبل فترة ديك وكان فيها العنوان بس!! بدون رقم تلفون!! وقلت مستحيل انا راجع البيت داك تاني!! سويت الفطور وفطرت مع والديني!! ومشيت غرفتي اخد لي غفوة!! وقبل م انوم عقلي قال لي كدي جربي الودع ولا اي حاجة ممكن توصلك ليها!! بس تاني اتراجعت، وقلت انا بطلت الامور دي!! وم برجع ليها مهما حصل!! وخطرت ع بالي فكرة!! اتصلت ع ريان صحبتي!! الكان مشيت معاها لست الظار والبي سببها اتعرفت ع الرمالية!! وقلت يمكن القي عندها الرقم!! فعلا اتصلت ومعطتني لشنو وقفتي!! وانتي متخلفة وقفلتي ع نفسك باب رزق!! وكل البعرفهم بيسألو عنك وعايزنك تقري ليهم فناجينهم!! وحنستني علشان ارجع بس انا مصرة ع قراري!! وقلت ليها حتديني الرقم ولا اقفل!!؟ بعد الكلام الكتير دا كله!! طلع الرقم م عندها بس قالت بتتأكد من واخدة وبترجع لي!! قلت ليها م ترجعي بس رسليهو لي ف رساله!! سكتت مساافة وقالت لي خير ي زولة!! وقفلت!! اظنها زعلت!!بس بالجد كلامها كتير وانا بقيت عصبية خلاص وم بستحمل اي كلمة!! وببعد اقل من ربع ساعة رسلت لي الرقم!! استجمعت قواي واتصلت!! م ردت طوالي!! بعد مددة تاني اتصلت!! ردت!! وسلمت والغربية عرفت صوتي!! وقالت لي كنت منتظرة اتصالك دا من زمان!! قلت ليها انتي عملتي فيني شنو!! اموري كلها اتلخبطت!!؟ انا عايشة ف كابوس!! وجماعتك بحذروني واني اذا م اطعتهم بيأذو اهلي!! عايزين مني شنو!! وانتي لشنو م قلتي لي الكلام دا زمان!! قالت لي اسسسه ارد ع ياتو سؤال!! اخدي ليك نفس واهدي ي بت الناس!! وم تنسي زي م قال نيوتن لكل فعل رده فعل!! قلت ليها م تتفلزلكي لي!! وجاوبي ع قدر سؤالي!! عايزين مني شنو!! قالت لي اولا م تعلي صوتك علي ودي مشيتها ليك بس تاني م تعيديها ولا حنبقي عليك انا والجماعة!! سكت وم رديت!! اخدت ليها صنننة كدا! واتنهدت!! قالت لي انا م عارفة المشكلة شنو علشان اديك ليها حل!! ي تحكي الحصل بالتفصيل ي تخليني اعرفو بطريقتي!! قلت ليها احكي ليك!! بس احرجتني وقالت لي م فاضية اسمع قصتك!! خليني بتصرف وبحلها ليك!! وقفلت مني!! وقلت فعلا!! التسويه بإيدك يغلب اجاويدك؟؟! جدعت التلفون ف التربيزة ونمت!!حلمت بنفسي مجنونة وبكورك ف الشارع والناس دي كلها بتتفرج علي!! وماف زول حاول يقرب علي ولا حتى اهلي!! صحيت وقلت اللهم اجعلو خير!! بس برضه افضل من الاحلام البشعة الكنت بشوفها ديك!! والمساء كدا اتصلت علي الوداعية!! رديت بلهفة!! وقلت ليها اها شفتي حاجة!! سكتت مساافة وقلت الوو! انتي سامعاني!! قالت لي جماعتي وروني الحصل!! قلت ليها يعني عرفتي مشكلتي!! قالت ايواا!! قلت ليها طيب الحل شنو!!؟ قالت لي م عندي ليك حل!!؟ الحل بإيدك انتي!! قلت كيف!!؟ قالت لي الجماعة ديل م طلبو منك شيء!! لا قال ليك اشربي دم ولا نجسي مصحف!! قلت شنو؟؟ قالت لي اقصد م طلبو شيء مستحيل ولا صعب!! اعملي الجبنة ف اليوم الفلاني!! والبسي فستان مواصفاتو كدا!! قلت ليها الكلام دا ماف زول قالو لي!! ضحكت وقالت لي ماف زول بقولو ليك ولا حتى هم!! بس بتجيك الرغببة الشديدة ف الشيء دا وانتي لازم تحققي رغباتك!! قلت ليها يعني من فترة انا كنت بتكف ليحة السجائر ولمن بحس بنفسي صدعت لم الهواء يجيب لي ريحتها! معناها اقوم اشرب انا زاتي!!؟ قالت لي ممكن!!؟ قلت شنو؟؟ انا!! انتي عايزة ابوي يقتلني!!قالت لي يعني انتي خايفة من ابوك بس!!! قلت ليها م كدا!! لكن انا م بحب القرف دا وف الرجال بطني بطم منو!! واستغربت كيف اشتهيهو!! لكن مستحيل اشربو!! قالت لي براحتك!! قلت ليها وثواني!! علشان م لبست ليهم الفستان الاحمر ولا شربت سجائر يقومو يأذو اسرتي!! قالت لي متأكدة بس دا العملتيهو!! استغربت وقلت م سويت شيء تاني!! قالت لي بعدتيهم عنك ووقفتي الودع وحتى ف الاحلام بقو م بيقدرو بستمتعو بيك!! قلت ليها دقيقة دقيقة كيف يعني يستمتعو بي!!؟

نواصل بعدين
يتبع ………..

الجزء الثامن من رواية انتقام قرين​

انا بكل سزاجة سلمت نفسي للشيطان حفظكم **** وحماكم…معقولة علشان حاجة تافهه وم تسوى اعصى ***!!؟ طيب تأنيب الضمير دا بيجي متأخر لشنو؟؟ لشنو من البداية ضميري م بوقفني وبقول لي انتي ماشية ف سكة غلط!!؟
سألت الرمالية عن قصدها ف الاستمتاع بي!! تقصد بيه شنو؟؟ قالت لي م تخافي كلها احلام وم حقيقة!! قلت ليها شنو هو! قالت لي اللحظات الحميمية الكنتي بتحلمي بيها!؟ قلت ليها وانا منطره عيوني يعني تقصدي الاحلام البشعة ديك هم وراها!! هم كانو بستغلو جسدي!! قالت لي م بالمعنى الاتبادر لذهنك!! انا بكيت!! بالجد انا استاهل!! قلت ليها واذا رفضت طلباتهم وقطعت اي شيء بربطني بيهم!! قالت لي بعداك تستحملي العواقب!! قلت ليها م ظنيت حصل شيء اكتر من كده!! قالت لي انتي لسسه م شفتي حاجة!! قلت ليها بإستنكار!! انتي بتهدديني!! قالت لي بحذرك!! بعداك قفلت منها!! وصلت معاها لطريق مسدود!! مستحيل استجيب لكلامها!! والبيحصل يحصل!! اليوم التاني من صباح الرحمن ابوي قال لي اجهزي!! قلت ليه ماشين وين!! قال لي دار رقية!! قلت ليه انا كويسة ابوي!! قال لي اسمعي الكلام!! فعلا نضفت البيت وجهزت وطلعنا!! انا وهو بس!! لم وصلنا الدار لقيت لمياء منتظرانا!! وقالت لشنو اتأخرتو!! حضنتها وبالجد فرحت لشوفتها!! واطمئنيت شوية!! ابوي قال ليها وريتها من الصبح بس اظنها م عايزة تجي!! تخش بيجاي وتمرق بهناك!! ابتسمت ومسكتو من يدو ودخلنا!! ومن عتبت الباب قلبي فححححا!! وشعر جسمي قام؟! اترددت بس لمياء مسكتني وقالت انا معاك!! دخلنا الجزئية المخصصة للحريم وخلينا ابوي بيتكلم مع الشيخ!! وكان ف قريب ال١٥ حرمة!! من بنات لمتزوجات!! قعدنا معاهم ف السجاد ومنتظرين!! بعداك جا شيخ وماسك مايكرفون!! اول سلم علينا وردينا السلام!! ودعى لينا بالشفاء وانو **** يصرف عننا العوارض والمصائب!! وبدأ يقراء!! ويقول ف ادعية!! وصوتو على شديد!! وف نسوان بقو يصرخو ويرفسو ف الارض!! وانا متضايقة!! م من التلاوة!! من كواريك النسوان ومن صوتو كان مزعج شدييد ولمن اضاني بتصن منو!!؟ وم ابديت اااي رده فعل بسبب الرقية!! وقال دي الجماعية؟ ف الفردية وكانت معاي لمياء وشكلها صدعت من الجوطة!! بس انا زاتي حمدت بيها **** علشان ابعد من الكواريك دي!! والمرة دي كانو شيخين وانا زي م انا ماف اي تجاوب معاهم!! لمياء اتنفست الصعداء!! وفرحت اكتر مني! لاني ظاهريا كدا طبيعية!! وبعد الرقية دي لو ف شيء كان حيظهر!! ولا حتظهر علي اعراض مسس!! بس الحمد*** ماف شيء!! وحتى الشيخ اكد ليهم اني طبيعية وم عندي مشكلة بس دعى لي بالتوفيق والهداية وطلعنا ع البيت!! ووريتهم اني عارفة نفسي كويسة بس هم الكانو مصرين ع العكس؟! وامي كانت قلقانة طمناها انو الامور بخير!! واني كويسة!! اليوم عدا عااادي!! بس الليل لم جا انا اتغيرت!! بقيت اتخلع برااي!! لو باب الغرفة حركو الهواء انا بجي ناطة وبشهق عديل من شده الخوف وقلبي نبضاتو متسارعة!! شغلت التلفون قرءان ونمت!! ونفس الكوابيس ونفس الثعابين المطارداني!! كلعادة صحيت مخلوعة وبناهج!!
لمياء قالت لي نفس الاحلام!! هزيت ليها راسي بمعنى ااي!! قالت لي اتحصني!! اتحصنت ورجعت رقدت!! اليوم التاني اتصل علي مصعب قال لي اذا م عندك مانع عايز اعمل عرسنا بعد ٣شهور!! بالجد فاجأني!! قلت ليه الجد شنو؟ قال لي ف الفترة الاخيرة حاسي بشيء غريب!! كأني ح اموت!! قلت ليه عمرك طويل ****!! بس دا م سبب!! قال لي عايز اكمل ديني!! وخلاص بعدا عايز اسوقك من ناس عمي عتتي معاهم!! قلت ليه خلاص اشاور ناس البيت!! قال لي انتي م عندك مشكلة!! قلت ليه م عندي مانع صاح الزمن ضيق!! بس اصلا انا سممممحة ونضيفة م محتاجة لاجتهاد!؟ ضحك وقال لي خلاص كلمي خالتي وبعد توربني رايها ف الموضوع حتى انا بتصل ع عمي واحدد الزمن!! قلت ليه خير وقفلت منو!! وريت اخواتي وفرحو لي شديد!! واتمنو لي السعادة!! كنت متمنية انو لمياء تتزوج قبلي بحكم انها اكبر مني!! بس ف النهاية اي زول بقسمتو!! و**** يخفف سعدها ويجيب ليها ودالحلال البستحقها!! امي م صدقت زاتو اني عايزة اتخارج!! وضحكت وقلت ليها بعد امشي داك ببقي ليك بنمبي وتقولي ي حليل بتي!! المهم بعد كم يوم اتصل ع ابوي وحددو الزمن!! بس انا اموري جاطت!! بالجد كانت حالتي صعبة!! لوني قلب!! وجسمي بقي عضام بس!! وبقيت اسمع هلوسات!! نهاراً جهاراً!! بحاول اتجاهلها وبقول انا كويسة ولسسسه م جنيت!! طالما انو اهلي طيبين!! وانا م لقطت اكياس الشارع دي براها نعمة!! وكنا متواعدين يجيبو شيلتي بعد اسبوعين من بس فجأة مصعب قطع اخبارو!! ولمدة تلاتة اسابيع م جا ولا اعتذر!! وبتجنب اتصالاتي!! رسلت ليه رسالة طويلة عريضة مستفسرة عن الشيء البيحصل دا!!
ردا لي برسالة تخيلو!! وقال لي بعتذر ي بت اعمي ماف قسمة بيناتنا!!؟

نواصل بعدين
يتبع ………

الجزء التاسع من رواية انتقام قرين​

انا قدر م قريت الرسالة وعدتها وحاولت اغير النص قلت يمكن يكون غلط ف حرف حرفين غيرو المعني!! بس كانت كلمات صريحة وواضحة!! قلبي وجعني شديييد!! م لانو حينفصل عني!!؟ بس انا ليلى يخليني بالطريقة المستفزة دي!! اتصال ساااي مستخسرو فيني!!؟ تلبت من سريري وجريت ع لمياء ومديت ليها التلفون!! مسكتو بإستغراب وقالت لي ف شنو!! وانا سااكتة!! شافت الرسالة!! وضحكت!! قالت لي شكلها كذبة ابريل ي غبية!! ومتأكدة الكلام دا م بكون كاتبو مصعب!! قلت ليها بغطرسة!! حتى وان كاتبو م فارق معاي!! قالت لي اتصلي كدي استفسري منو!! وم تنفعلي يمكن يكون بهزر معاك!! انا بعرفك سليطة لسان!! ابتسمت ورجعت سريري وتلبت فيهو تتلب!! وخلفت رجولي وشبكت يديني ورا رقبتي وبقيت بفكر ف الرسالة التافهة دي!! وقلت و**** م اتصل!! وفعلا قريب المساء كدا اتصل علي!! رديت عادي!! بس الكلام واقف لي ف طرف لساني!! اولا اعتذر ع الاسلوب!! وانو م كانت موضوع حساس زي دا يفتحو بالطريقة دي!! بيني وبين نفسي قلت يعني الموضوع جدي!! قال لي انتي معاي!! قلت ليه ايووا!! شال نفس سخخخن! وقال لي م حابة تعرفي السبب!! قلت ليه لو م كان مقنع اكيد انت م حتتخذ قرار زي دا!! قال لي *** يشهد ي ليلى انا عمري م لعبت بمشاعر بنت!! ولا دخلت ف علاقة م جاادة!! مع ااي واحدة! فما بالك انتي بت عمي!! قلبي وجعني ولمن حلقي اتبرط!! قال لي انا لاخر لحظة كنت عايزك ومتمسك بيك!! بس ف شيء غريب!! **** م رايدنا لبعض؟! ابتسمت بإستهتار!! وقلت عرفت كيف؟؟ قال لي انا كل م اقول جايكم تحصل لي مصيبة!! مصيبة بمعني الكلمة!! وبدأ يعد لي من يوم مشي يشتري الشيلة!! صاحبو الكان معاه رجعت فيه العربية!! اخوة مشى يجيب حاجات العقد لاقوه حرامية ضربوه وشالو القروش!! امو كل م تحدد يوم للجية تصبح عيانة!! وقال حتى شغلو اتدهور وبسبب حاجة تافهه قربو يفصلوه من شغلو!! وقال لي دا خير الاحلام البشعة البشوفها وانتي معاي!! ف الاول قلت يمكن يكون صدفة!! بس الحكاية اتكررت كتير وانا استخرت ***!! واليوم الاتخذت فيه قراري دا نمت مرتاح!! وحلم زاتو م حلمت!! انا ضحكت!! وقلت ليه تقصد اني فال نحس عليك!! ولا زواجنا حيجيب ليك الحظ السيء!!؟ قال لي يمكن يكون كلامي م منطقي ولا تقولي الزول دا عايز يتخارج بأي طريقة!! لكن صدقيني دا الحصل!! وليسسه ف حاجات م قلتها ليك؟ قلت ليه بما انك متخذ قراراك ما بهتمني تبريراتك!! وامش شوف قسمتك وين والبتجيب ليك السعادة وجالبة الحظ!! يمكن يتوقف الحوادث والامراض!! ولو محظوظ تمنع الموت م يجيك!!؟ قال لي م تستهتري!! قلت ليه لازم لانو كلامك فاضي!! بس ي سيدي بركة الما اتعمقت معاك ف العلاقة دي!! واكيد قسمتي قاااعدة!! وحلاقي الافضل منك!! قال لي بتمنى!! وقبل م يتم كلامو قفلت الخط!! وانا مخنوقة بس يمييين م ابكي!! انا ابكي علشان ولد؟؟! اتنفست بصعبة ودعكت رقبتي لانها خانقاني شديد!! ولمياء شكلها مركزة معاي!! قالت لي الموضوع جدي يعني!! وحكيت ليها كل القالو!! سرحت مساافة وقالت لي مصعب مستحيل يكون بيلعب بمشاعرك!! قالت لي اصلا انتو م عشتو قصة حب!! وهو المتضرر الوحيد لانو ادى كلمة وحتصغرو قدام الاهل وبالذات ابوه!! يعني اكيد الموضوع اكبر من كداا!!؟ قلت ليها م بهمني اصلا انا وافقت لانو بنعرفو من زمان وزول طيب م فيه عيب!! بس قلبي م دقة ليه لسسسه!! ابتسمت وقالت لي احمدي *** طيب!! قلت ليها بس مصعب الشين الخشن يرفضني انا!!؟ ضحكت وقالت لي طولة لسانك دي توقعك ف راجل يكرهك العافية ويخليك تندمي لليوم الاتولدي فيه وتقولي يحليل مصعب!! ضحكت وقلت ليها بتحلمي!! رجعت سريرها!! وقالت لي حتكلمي ناس البيت متين!! قلت ليها وانا مالي ومالو!! مش هو الخلاني يوريهم هو ويواجهم!! علشان يبقى قدر النملة!! وانا ح اعمل فيها المظلومة المقهورة!! وح امسح بكرامتو الارض اصبري لي بس!! قالت لي ماف شي بغلبك!! مسكت تلفوني وكنت بسمع ف اغاني وفجأة نمت!! وانا ف الحلم كنت نايمة وبحلم برضو بأنو قاعدة ف بداية الشارعنا ومنتظرة المواصلات ولا شنو م عارفة!! وجا مصعب كان سايق ليه عربية م بعرف حقت منو!! وقال لي اركبي!! لم جيت اركب!! الباب ابا يفتح!! انا بحاول!! وهو بحاول من جوة يفتح لي التأمين بس ماف فائدة!! بعداك بقي يضحك ويقول لي تركبي ورا ولا امشي اخليك!! وانا بضحك وبهزر معاه!! جا الزول الطويل الكنت بشوفو ف الحلم داك!! ومسكني من يدي وقال لي ارح!! انا بقيت اصرخ واستغيث بمصعب بس هو م قادر يطلع من العربية واتأمنت عليه!! وبقول ليه فكها انت منو!! الزول بقول ليه دي حقتنا قرب منها وحتموت!! ورددتها كذا مره!! وسايقني غصب وانا بكورك ف الشارع بس ماف زول ينجدني!! وعربية مصعب دخنت وفجأة شبت فيها ناار!! وانا من الصدمة لمن قمت مخلوعة!! والكلام دا كلو حلم داخل حلم!! بعداك بقيت اتلفت ولقيت نفسي ف سريري ولمن اتنفست بصعوبة وحمدت *** انو كان حلم!! سمعت حركة اتلفتت شايفة واحدة لابسة توب لمياء حق الصلاة!! بس كانت اطول منها!! وفاتحة ضلفة الدولاب وبتفررفر ف الملابس!! قلت ليها لموو!! م اتلفتت قلبي اكلني!! قلت لمياء!! الحركة وقفت واتلفت علي ببطء وكانت ملامح بشعة خلاص والابشع منها انو كانت شايله رأس مصعب وبتحاول تخبية بين الملابس!! انا صرخة وااااحدة م سكت لا ع صوت لمياء!! وهي بتقول لي قولي بسم **** مالك!! انا لقيت نفسي متلبة من السرير!! بقيت بحبي وبتلفت يمين وشمال وبناهج وبقول ليهم مشت وين!! المره الكانت واقفة هنا مشت وين؟؟ لمياء قالت لي استعيذي ب**** من الشيطان الرجيم!! شكلك بتهلوسي ماف مره هنا! امي جات جارية وقالت شنو الحكاية!! يوميا فاضحانا مع الجيران!! اتحصني ياخ!! ولا اقفلي خشمك دا بلصاق ونومي!! لمياء ساعدتني اقوم من الارض!! وقالت لي نفس الاحلام البشعة!! هزيت ليها رأسي! حضنتني عليها وقالت لي م تديه فرصة يرعبك!! عايز يشوفك ف لحظة خوفة شديييدة علشان يتملكك م تديهو فرصة!! اتحصني اختي!! فضلت حاضناها مساافة! بعداك رجعت سريري!! وهي كمان! وطفت اللمبة!! لينا ولا قامت علي!! شكلها زهجت مني يومياخالعاهم!! رقدت والرقاد غلبني!! انا مفتحة وبحس كأنو ف وش زول مقاصد وشي!! ومن شدة الخوفة لمن بقي يتهيأ لي انو ف نفس سخنن بلامس خدودي!! انا جسمي مات!! وقلبي من شدة م بيضرب لمن بقى يطعني!! وجسمي يكشش ولمن مشوك!! بصعوبة قلت لمياء ولعي اللمبة!! قامت متلبة ولعتها!! ولقتني بنفس الحالة!! ولمن مساماتي بارزة من شدة م جسمي كاااشي!! والجو عادي وعرقي مبالغ فيهو!! قالت لي مالك!! بقيت ابكي بس م عرفت اقول ليها شنو!! اتناولت مصحفها من التربيزة وبقت تقراء لي لحدي م نمت!! م عارفة رجعت سريرها متين!! م قمت للصباح لم صحيت لقيتها طلعت!! الترحيل بجيها بدري!! **** يحفظ اخواتي وكل الاخوات!!؟

قمت لبنامجي اليومي!! وانا بغسل ف العدة!! قلت معقولة كوابيس امس دي حقيقة!! معقولة يكون الزول البجيني ف الحلم هو السبب ف انو مصعب يخليني!! ياربي بكون عملو فيه شنو!! وخفت!! م حتصدقو الشفتو!! وانا واقفة ف المغسلة حقت العده!! لا معاي ودع ولا فنجان علشان اشوف!! بس انا شفت ف الحيطة!!؟ انا خلاص جنيت!! شايفة بررركة دم!! بقيت اقش بيدي ح حيطة المطبخ ولسسسه المنظر قدام عيوني!! وف زول غرقان فيهو!! انا مصدومة من الشايفاه!! وكأني بحضر ف تلفزيون!! وفجأة طلع من بركة الدم رأس!! كان مغطى بالدم!! م عرفتو!! بس قال ليلى ساعديني!!؟ كان صوت مصعب!! انا من الخلعة رميت الصحن من يدي وكسرتو!!؟ امي جات علي مالك!! انا مخلوعة وبعاين ليها بطريقة غريبة!! وملامحي م بتتفسر!! عاينت ع الحيطة شفتها عادية والصورة اختفت!! امي قالت لي **** يهديك!! لمي الكسرتيهو دا!! وتعالي مصعب واخوه جو علينا وابوك عايزك!!
انا زاد خوفي!! طلعت خلتني!! لميت القزاز بيدي لمن اجرحت!! وقلت الولد جابو يومو!! ياربي حيموت بسببي!! بالجد اتوترت شديد!! وبقيت ماشة وجاية م المطبخ وامسك دا وافك دا وم مركزة!! جاتني امي تاني!! وين انتي منتظرنك!! قلت ليها جااية!! قالت لي بتعملي ف شنو!! م رديت!! عاينت لي بأستغراب وهزت راسها وطلعت!! لبست توبي وطلعت وراها!! ف صوت همس ف اضاني وقال لي حتقتليه!! اتلفت وراي م شفت شيء!! وجا هواء عالي قريب للعصار!! لمن ضرب باب الشارع بقوة!! وخلا قلبي يضرب اقوى!! وسلمت عليهم ودخلت!!؟
نواصل بعدين
يتبع ………

الجزء العاشر من رواية انتقام قرين​

كل الانظار كانت موجهة علي!! سلمت من بعيد وم صافحت!! ف استغربو!! قعدت جنب امي!!؟ محمد اخو مصعب سألني عن اخباري وشغل البيت والتعب!! قلت ليه كويسة!! وانا مدنقرة وحاسة بنفسي بشوف طشااش!!؟ ابوي قال لي ودعمك دا قال عايزنا ف موضوع وم حيتكلم الا ف وجودك!!؟ اهاا بما انها جات ورينا الموضوع شنو؟ مصعب كان باين عليه مكسوف ولمن وشو ضاالي!! وبعاين لي وبدنقر!! ابوي قال ليه خير ان شاءالله ف اي مشكلة!!؟ مصعب اتنفس بصوت مسموع وقال و**** ي عمي م عارف ابدا ليكم من وين!! بس انا محرج شديد!!؟ ابوي قال ليه **** يجيب العواقب سليمة بس ولا يهمك احكي!! مصعب قال ليه ف الفترة الاخيرة حصلت مشاكل كتييرة!! امي قاطعتو وقالت بينك وبين ليلى!!؟ قال ليها لا ي خالتي ليلى عمرها م علت صوتها علي ولا غلطت ف حقي!! ابوي قال ليه مشاكل شنو طيب؟؟! سكت!! محمد قال بخصوص زواجو من ليلى!! يوميا بتحصل مصيبة!! وكأنها اشارة من **** انهم م مناسبين لبعض؟؟ ابوي بانت عليه ملامح الغضب!! وقال ليه تقصد شنو بكلامك دا!! بتي م بتناسبكم يعني!! مصعب قام ع حيلو وقعد جنب ابوي ومسك يدو وقال ابدا ابدا ي عمي!! و**** انا اكبر خاسر ونادم ع ضياع ليلى مني!! بس انا م قادر اوصل ليكم الحصل!! حسين انفعل وقال ليه!! ف زول جبرك عليها!! مش انت من شهر دقيت صدرك اتصلت واديت كلمة رجال وقلت جااي!! اسسه وكت الجد عايز تبقي ولِيد؟؟ محمد قال ليه اليوم الكنا جاين امي تعبت! حددنا يوم تاني!! ف ليلة اليوم المحددنو مصعب شاف حلم بشع ومضمون الحلم انو اذا مشي حيحصل لامنا كذا كذا!! حسين ضحك!! وقال ليه قلت لي شفت حلم!! ايوواااا!!؟ مصعب قال ليه يمكن يكون كلامي م منطقي!! ولا تقولو مصعب م جادي وبكذب!! بس صدقوني دا الحصل!! وانا زاتي قلت دا كابوس عادي وم ربطتو مع الاحداث الحصلت قبليه!! بس اتفاجأت الصباح انو امي وقعت ف الحمام بنفس الطريقة الانا شفتها ف الحلم!! وكأنو شريط فيديو مصور!! بالجد انا خفت عليها!! وجاني احساس قوي اننا اذا اصرينا ع الجية باقي الحلم حيتحقق وح اخسر امي!! ابوي قال ليه يعني عايز تخلي بت عمك بعد م حددت عرسك علشان حلمت بأمك اصابها مكروة!!؟ مصعب اتنهد وم ردا ع ابوي!! حسين قال ليه ولييد باطل ذي دا نحنا زاتنا م بنديه اختنا!! خلي كان تبقي ودعمها!! و**** كان عاقد عليها م نتبعها ليه!! ابوي قال لحسين اهداا!! وعاين لمصعب وقال ليه انت عايز شنو بالضبط!! محمد ردا نيابة عن اخوه وقال مصعب من يوم قرر يفركش الحكاية والامور رجعت طبيعية!! وخجلان منكم ي عمي ف انو يفسخ!! عشان كدا جاين نعرف رأي ليلى!! هل حتوافق ع الفسخ!! ولا موافقة ع مصعب حتى بعد الاحداث الحصلت معاه!! والبتقولو يمشي علينا!! ونحنا رضيانين!! لو قالت نعقد بكرة م عندنا مانع!! حسين بقي يضحك!! وشال طاقيتو من طرف السرير وطلع!! وقال امور النسوان دي م بنتفع معاي!! ابوي عاين لي!! انا كنت خاتة ف بالي اني اذل مصعب واهينو قدام اهلي واهلو!! بس بعد السمعتو دا اتأكدت انو جماعتي هم السبب!! واكيد حيأذوه واهلو بسببي!! فقررت اسحب كرتي!!؟ وقلت لابوي انا موافقة قرار مصعب!! واصلا دا كان قرارنا الاتينين!!!؟ خليتو مصدوم من كلامي وعيونو دمعو!! وقال لي اسف ي بت عمي!! اتنهدت وجيت قايمة واستأذنت وجيت طالعة!! امي قالت لي تعالي وهو الزواج لعبة!! دا شنو الكلام الفاضي دا؟؟ خليتو بشرح ليها وانا طلعت!! م عارفة اذا اتصرفت صااح بس متأكدة اني ورا البيحصل دا!! ولو اصاب مصعب اي مكروه ولا اهلو مستحيل اسامح نفسي!! دخلت غرفتي ورقدت ف سريري وبكيت!! م علي مصعب!! لاني مستحيل انزل دموعي ف ولد!!؟ بس بكيت ع العملتو ف نفسي!! ع المصائب الوقعت فيها وجريتها ع اهلي!!؟ معقولة انا جاهلة للدرجة دي!! ف زول بشيل اصبعو وبقد بيهو عينو؟؟! واريتو لو كان اصبعي!! انا استعنت بشيطان علشان اللهو وامرح!! اااخ ي ليلى من العملتيهو ف نفسك!! وف اثناء م انا بعاتب وبلوم ف نفسي ف زول اتكلم معاي!! لاول مره احس بوجودي الحقيقي!! كنت بحلم بيه بس!! ولا شفت هلوسات زي الدم الفي الحيطة!! بس المرة دي ظهر لي!! وانا راقدة ف الاول سمعت صوت طالع من تحت السرير!! لم البلاستك يكون مشدود شدييد وانت راقد ف السرير بتحس بتكتكة كدا وكأنو ف زول بمرر اصبعو ع السرير ودا شيء طبيعي!! بس الما طبيعي انو الصوت عمل ايقاع!! وكأنو ف زول بيعزف!! انا جسمي مات بالجد اتشليت وم قادرة اتحرك!!؟ الغرفة ضلمت علي!! وكل شوية جسمي بيتقل اكتر لمن بقيت حاسة انو ف صخرة خاتنها فيني!! حاولت اقوم بس م قدرت رأسي بس البترفع!! باقي جسمي مشلول!! انا بنادي ع امي وبكورك بس صوتي م طالع!!؟ بعداك استسلمت!! وقلت اواجه مصيري!! وانا منتظرة شيء يظهر لي ولا اشوف منظر بشع!! بس دا كلو م حصل!! كان بيرعب فيني!! والغرفة من شدة م صانة اذا سامعة صوت عقرب الساعة بتاعة الحيطة!! وكان واضح شديد!! وبعداك الملاية الانا راقدة عليها الهواء بقى يقلبها علي!! بس م بالطريقة دي!! الجنبة اليمين كلها تقلبت فوق لي!! والشمال بفوق ليها!! وبقيت زي المكفنة!! وقلت خلاص الليلة حموت!! بحاول اقراء والسور ف راسي بس الايات م عايزه تتنطق ع لساني!! بالجد كنت ف حالة يرثى ليها؟؟ وبعداك احس بحركة تحتي!! لالا لا دقيقة دا شنو!! ف حاجة ماشية تحتي وانا راقدة!! بالجد اكتر لحظة مرعبة انا عشتها!! حاسة بشي لين!!لزج!! داافي!! ريحتو غريبة!! م كريها ولا طيبة!! وانفاسي اتسارعت وقلبي بيضرب بقوة!! وانا مقيدة م قادرة اتحرك!! ولا قادرة اشوف الشي التحتي دا شنو!! بس حاسة بالنفس!! وكاني راقدة ف بطن زول ونفسو طالع ونازل؟؟ انا اتمنيت الموت!! بالجد اتمنيت الموت!! بكييت!! وقلت عايزين مني شنو؟؟ ف صوت فحييح همس ف اضاني!! معقولة ثعبان!! انا راقدة ف ثعبان!! وتاني كوركت بس الصوت مابي يطلع!! وللان بتزكر سخونة لسانو ع اضاني ورقبتي!! للان متزكرة قسمةلسانو الشايفاها زي السيوف موجهة ع عيوني!! واتلف حول رقبتي!! وقال لي اطلبي!! انا ببكي وبقول خلوني ف حالي انا م بأذيكم!! ونفس الكلمة اطلبي!! قلت طلب شنو!! قال طيعي تطاعي!!اطلبي!! قلت امشو مني وخلوني ف حالي دا طلبي!! الثعبان الاسود العندو عقد ع رقبتو وللان بتزكر شكل عيونو!! م شفت اسود منهم!! م كان سواد عادي!! ولا بتقارن مع احلك الليالي!! قرب لوجهي شديييد؟؟ وكان حجم رأسو قريب لحجم رأسي من شدة م كبير ومخيف!! دعك راسو ف وشي وانا شكلي غمرت!! من شدة الخوفة!! لم فتحت لقيت نفسي ع نفس الهيئة ديك بس هو كان ماف!! والقومة قلبتني!! وكنت متقيدة بالملاية بصعوبة حتى حررت نفسي منها!! وجسمي لسسسه خدران!! بس تلبت من السرير وحبيت ف الارض علشان اطلع من الغرفة!! وناديت ع امي بس شكلها مع ابوي ف الصالون وم سمعتني!! حلقي كان مخنوق!! وحسي مقروش!! وجسمي كلو بيرجف وبقيت اتلفت حوليني علشان الثعبان م يكون قريب مني ولا يهجم علي تاني!! ولم وصلت عتبة الباب غلبني اتخطاها كانت عالية لكن الخوفة خلتني اتغافل عن علوها!! ورميت نفسي برا الغرفة!! وحسن شافني من هناك كان جاي من برا وقبل م يقفل باب الشارع جا جاري علي وبقول لي مالك!! مسكتو من رجلو وفكيت ف البكاء لمن غمرت تاني!! الرفعني منو ورجعني غرفتي م عارفة!! بس وانا غائبة عن الوعي وف حالة اللاوعي شفت الزول الطويل واقف قصادي وانا متمددة ف الارض!! قال لي اطعتينا ورفضتيه!! اطلبي!! قلت م عايزة منكم شيء بس خلوني ف حالي!! قال لي تحت البرميل المكسور تلقي امانتك!! واختفي!!! فتحت عيوني القى امي وابوي وحسن قاعدين حوليني!! حاولت اقوم بس م قدرت!! ابوي قال لي الموضوع زاد عن حدو!! حنمش الدكتور لو قال م عندك حاجة ح اوديك خلاوي الشيخ فلان ويعالجك!! امي قالت لي مالك الحصل ليك شنو!! قلت ليهم جيت قايمة وراسي لفى!! دا كل الحصل م تكبرو الموضوع!! امي قالت لي نكبر الموضوع شنو وركبك كلها مظلطة!!؟ قلت ليهم حاجة بسيطة م تشغلو بالكم!! خلوني ارتاح وقريب العصر كدا قمت اتوضى اصلي الظهر والعصر مع بعض!! وانا ماشة ع الحمام اتزكرت الحلم!!؟ مشيت ع الزقاق!! ووقفت جنب برميلنا المكسور!! عاينت جواه كان فاضي!! جيت ماشة!! خطوتين م تميتهم رجعت زحيتو شوية كدا ف حاجة عكست ع وشيء بتلمع!! وانا نططت عيوني من الخلعة!! دا كلو دهب!!؟

نواصل بعدين
يتبع ……….

الجزء الحادي عشر من رواية انتقام قرين​

المال والمجوهرات فائدتها شنو اذا صاحبها عايش ف رعب!! والسؤال الاهم جات كيف!! اقول للناس اداني ليها جن او شيطان وليعاذبالله!! هل ح اصرفها وانا مبسوطة!! هل ح اعيش ف نعيم!! اكيد لا؟ انا عايشة ف جحيم صدقوني!! لم شفت المنظر زهلت!! ولمن قلبي بقي يضرب بقوة!! واتلفت يمين شمال اتأكد انو ماف زول شايفني!! قلت يمكن اكون بهلوس!! وعلشان اتأكد اكتر دنقرت ولمستو!! بالجد ذهب!! ولمن عندو بريق!! وكأنو مطلي وجمر!!؟ يدي رجفت!! ورجعت كم خطوة للخلف!! بس نظري عليه!! وقلت معقولة دا لي انا!! واعمل بيه شنو واوديهو وين!! كيف اقدر اخبيهو من ناس البيت!!؟ بس بعداك راجعت نفسي!! وقلت انا لشنو اشيلو!!؟ اذا اطعتهم م حيخلوني ف حالي!!؟ وكمان اذا الرعب العشتو قبيل دا كلللو كان عبارة عن تلبيه لرغباتي وهدية لرفضي مصعب!! طيب انتقامهم كيف!! دا كان وُدَهُم بالطريقة المخيفة دي!! خليتو ف مكانو وصلحت فيه البرميل كويس!! بس ف خاتم طلع برا البرميل!! بالجد سحرني جمالو!! مستحيل اقدر اوصف شكلو!! اصلا م عندو شبيه!! فيه جوهرة!! م قدرت امنع يدي من انها تصلو!! رفعتو من الارض وبقيت اتأملو ولمن قلبي بفححح!! والشيء الشداني ليه اكتر؟! لم اغطي الشمس عنو الجوهرة ببقي لونها اعمر فااتح ولمن فيها لمعة!! ولم اعكسو ف الشمس بكون لونها اسود غامق بيخطف القلوب قبل الانظار!! فضلت بتأمل فيه بإعجاب شديد!! وقبل اجربو ع يدي!! اسمع صوت لينا وراي!!دسيتو منها!! وقالت لي بتعملي شنو ف الخرابة دي!! قلت اشوف البت دي بتكون نامت ف الحمام!! ابتسمت واتلفت عليها!! قلت عايزة لي جردل ولا علبة كبيرة اخت فيها شتلة!! قالت لي وينها شتلتك!! لا شعوريا قلت ليها جاياني بعدين!! وشالت الابريق من يدي ودخلت ع الحمام!! خلتني واقفة!! عاينت للخاتم وم لبستو!! وماف طريقة ازح البرميل وارجعو لانها قد تجي طالعة وتشوفني ولا تسمع الحركة وتكشف امري!! شلتو معاي!! اتوضيت وختيتو تحت مخدتي!! حتى صليت والغريبة وانا بصلي كل تركيزي كان معاه!! كأني شايفاه قدام عيوني!! حاولت كتير ارجع اركز ف صلاتي بس بدون احس القى نفسي بفكر ف شيء تاني!!؟ بعداك مشيت ع المطبخ كنت جيعانة شديد!! اكلت وقعدت اتونس مع ناس البيت!! وفجأة اتزكرت الخاتم!! قمت ومشيت ع الغرفة ورفعت تحت المخدة علشان اشيلو!! بس م لقيتو!! انا اتخلعت!! بقيت اقلب واقول اسسه كان هنا!! ورفعت الملاية وشفت تحت الارض!! وم خليت حته!! وناديت لينا بإنفعال!! التقول مشترياه بقروشي ولا طاقيني فيه حجر دغش ع قول كبارنا!!؟ جاتني ملهوفة ف شنو قالت لي!! قلت ليها انتي شلتي الخاتم مشش!! صرت لي وشها وقالت قولي بسم ****!!؟ خاتم شنو الانا شلتو!! قلت ليها خاتاه تحت المخدة ومتأكدة م حولتو!! اها البشيلو شنو!! جاطت فيني وقالت انتي عايزة ليك مشاكل بس!! ولو عاملة فيها مجنونة اتجنني بعيد انا م ناقصاك!! شكلها كانت جادة وم شافتو فعلاً!! طيب مشى وين!!؟ ولمياء لسسه م جات!! واخواني م بيدخلو غرفتنا!! وان دخلو مستحيل يفتشوها!! وانا اتوترت ورجعت افتش تاني!! بس بدون فائدة!! بعد يئست منو!! قعدت ف الارض وسندت ضهري ع سريري ومحتارة!! لمياء جات من الشغل!! شافتني بقت تضحك!! قالت لي لقيتي قعدة الارض احسن ليك ولا شنو!! سلمت عليها ببرود وكنت مدبرسة وصارة وشيء!! قالت لي مالك! قلت ماف شيء!! ف اثناء م بتغير ملابسها شهقت!! اتلفت عليها بخلعة عايزة اشوفها مالها!! لقيتها مركزة ف يدي وقالت لي دا جبتيهو من وين!! قلت شنو!!؟ البت اتبكمت وبقت بتعاين بإندهاش واعجاب !! لم شفت يدي!! لقيت الخاتم ف صباعي!! انا من الخلعة قمت بسرعة وبقيت اعاين ليدي!! قالت لي جبتيهو من وين والاداك ليه منو!! طلعيهو خليني تجربو!! انت انصدمت!! متأكدة ٢٠٠٠%اني ختيتو تحت المخدة وصل يدي كيف!!؟ وقلت الدهب دا بكون ملعون!! قالت لي سرحانة وين!! جيبيه اجربو قلنا!!’ خفت تلبسو ويحصل ليها شي!! قلت ليها دا حق مروة!! جربتو قبيل وابا يطلع من يدي!! زكرتيني امشي اطلعو بصابون!! قالت لي ماشاءالله رهيب لكن!! وم تنسي بعد يطلع اديني اجربو!! قلت كويس!! وطلعت خليتها!! مشيت الزقاق وطلعتو من يدي ورجعتو تخت البرميل وف فرشات مشمشة كدا ختيتهم حوليه!! وقلت شيلو دهبكم م عايزة منكم شيء وجيت ماشة!!؟ المساء كدا جات جارتنا بالحيطة اسمها كوثر!! كانت شايلة حاجة كدة ف يديها!! لانو الواطا ظلام م شفتها كويس!! اتونست شوية ورفعت الكيس من الارض!! قالت خالها عندو اشترى شتل وكانت ف شتلة عنب زايدة!! اداها ليها بس هي حوشها ضيق وكمان بلاط ماف طريقة تزرعها!! فجابتها لينا اذا عايزنها!! انا انصدمت!! لينا قالت لي دي الشتلة الكنتي بتفتشي ليها ف جردل!! كوثر قالت جردل شنو!! انا ياداب جابوها لي العصر دا!! انا سالت نفسي كيف عرفت انو حتجينا شتلة!! وانا اصلا كذبت للينا سااي!! معقولة الجماعة ديل رجعو يتحكمو فيني!!؟ بعداك اليوم مشى عادي!! ولكم يوم انا كنت طبيعية!! بس ف ليلة كده كنت متضايقة وحاسة بخنقة!! وروحي مشحتفة!! وحسيت بنفسي م طبيعية!! بس اتجاهلت الموضوع!! لحدي المساء كدا وانا راقدة وبتونس مع اخواتي!! الكهرباء قطعت!! ولانو الجو بارد م طلعنا ع الحوش وفضلنا ف غرفتنا!! سمعت صوت واحدة اتكلمت!! قلت ليها لمياء قلتي شيء!! م ردت علي!! ناديت لينا برضو م ردت!! ضحكت وقلت انتو عافني متسبله!! اسسسه بكورك ليكم كان خوفتوني!!؟ بس برضو م ردو علي!! وسمعت اصوات مشي جاية علي!! وقلبي بقي يضرب وجسمي كشششة!! وقلت لينا م تهزري!! و**** اكلم ليك ابوي!! ومع الضلام داك بقيت اتخيل كم ضل واقف قدامي!! وحركة الشباك ساي بتخليني اشهق من الخوفة!! قمت متلبة من السرير وعايزة اقوم جارية!! بس ف شيء مسكني من يدي!! ووحتى المسكة كانت غريبة!! وكأنو اليد بتخربش فيني ولا بتداعب م عارفة!! بس متأكدة من اني حاسة بالاظافر ع يدي!! ولم الصراخ غلبني وصوتي ابا يطلع وجيت واقعة مغمى علي!! فتحت ع اصوات اخواتي!! وهم بصحو فيني!! تخليو انا للصبح مرمية ع الارض وماف زول جايب لي خبر!! ولم صحو للصلاة اتفاجأو بي واقعة!!م عرفت اقول ليهم شنوبس وريتهم اني م متزكرة!! وللان م عارفة الشي داك كان شنو!! اليوم التاني مشيت الزقاق وزحيت البرميل ليقت الذهب ف محلو!! رجعت البرميل حتتو ومشيت!! وبسأل ف نفسي لشنو م شالوه وعايزين مني شنو!! مشيت المطبخ وكنت برتب فيه!! ف حاجة لمعت ف الشباك !! شبهتها للخاتم داك!! بس طلع ماف شيء!! وشكلي بتخيل!! وبقيت اكلم نفسي!! حيقعد لمتين ف الزقاق!! ولو زول شافو ولا شالو!! وطوالي ف زول ردا لي بلساني انا قادرين تستوعبو كلامي!! يعني انا سألت نفسي السؤال!! والاجابة طلعت مني بس بطريقة قريبة وكأنو شخص تاني بيتكلم م انا!! وقال دا ملكنا!! ولو اتصرف فيه غيرك!! حيهلك!! انا خفت!! وبقيت اتكلم بصوت مسموع واتوترت وبقول شيلوه م عايزاه!! م تأذو اهلي!! شيلو دهبكم!! امي جات مهرولة!! ودخلت علي!! مالك ف شنو!! بتشاكلي ف منو!! وبقت تتلفت م شافت زول!! قالت لي بتتكلمي بالتلفون!! بس م كنت شايله تلفون!! قالت لي بسسسم ****!! **** يجيب العواقب سليمة!! قالت لي م تتكلمي براك بتجني!! قلت ليها ادعي لي ي امي!! وبقيت ابكي!! حضنتها!! ربتت ع كتفي!! وقالت لي ارجعي لربك وصلي صلاتك ف مواعيدها!! وشوفي جان حصل ليك شى!! قلت ليها سمح!! طلعت خلتني واصلت شغلي وجهزت ليهم الفطور!! بس حسين طلع قريب قالو حينتظروه!! انا مشيت غرفتي ونمت!! شفت ناس بتتشاكل وجايطة!! والزول الطويل داك ف نصهم!! حمر لي!! انا ادسيت منو علشان م يشوفني!! وبحاول اعرف سبب المشكلة شنو بس كانت جوطة سااي الكلام م واضح!! وف اثناء م انا مدسية منو!! ظهر لي من حيث لا ادري!! وقال لي ابوك لو لمس حاجتنا حنقتلو!! وقمت مخلوعة!! وبقيت اقول ابوي!! وقمت متلبة!! طلعت ملهوفة وبنادي ف امي ابوي وين!!؟ قالت لي م شفتي الحصل!! انا رجولي ماتو ولمن اطرافي ارتعشت!! وقلت ابوي مالو! قالت لي ابوك كويس!! الا لقى حرامي ملبد ليه دهب ف بيتنا! انا دموعي جات نازلة وقلت ابوي وين!! قالت لي شال الدهب ومشى القسم!! قالت لي م شفتي الدهب لكن يرد الروح!! ولا حلق م خلاه!! وقال م عايز حق الحرام!! انا لفحت توبي وجريت!! بتوقف فيني بس ولا اتلفتت!! وكل حواسي بتدعي انو ابوي م يصيبو مكروة!! ووصلت قسم الشرطة!!؟

نواصل بعدين
يتبع ……….

الجزء الثاني عشر من رواية انتقام قرين​

م تتخيلو انا متوترة ومرعوبة ع ابوي قدر شنو؟!واتمنيت الموت ولا اسمع عنو خبر محزن!! وصلت القسم وبقيت اتلفت!! ف عسكري شافني متوترة وبتلفت يمين وشمال!! قال لي مالك؟؟ وسآلتو عن ابوي!! قلت ليه ف راجل ستيني؟! جاكم هنا وجاب…وقبل م اكمل كلامي!! قاطعني وقال لي عمك بتاع الدهب!! قلت ليه ايواا وينو!! قال لي مع المتحري بياخدو اقوالو!! قلت ليه ممكن اشوفو!!؟ قال لي انتظريه برا!! وقعدت والقعاد غلبني وبقيت اململ!! وقلبي بضرب!! اقول لابوي شنو!! كيف ارجع الدهب!! واقول ليهم حق منو وجبتو كيف؟؟ ولشنو م وريتهم!! وانا اطرافي بردت شديييد ولمن قلبي بقي يرجف من الخوف!! ابوي شفتو طالع من مكتب المتحري!! جريت عليه! لم شافني استغرب!! وانا حاضناه وبقول لي الجابك شنو؟؟ م عرفت اقول شنو!! قال لي مالك خايفة الموضوع بسيط!! قلت ليه الحصل جوه شنو!! قال لي نرجع البيت اول!! بس انا م بقدر اصبر!! ونحنا بنتكلم طلعنا من القسم!! قل ليه لقيت دهب امي قالت لي!! قال لي ف حرامي ودكلب عايز يجيب لينا كفوه!!؟ انا قلبي وجعني وقلت الحصل شنو امي م فهمتني الحصل! قال لي كنت ماشي ع الحمام وشفت منظر البرميل المكسور داك!! قلت اهااا! قال لي شايف مغطينو من تحت بالفرشات المقطعة!! فشكيت! مغطينو لشنو!! بعد طلعت من الحمام ومشيت!! تاني جيت راجع اتأكد من الشيء دا!! ومن زحيت الفرشات والبرميل طلع مهوي كدا واظاهر انو ف شيء تحتو! بس م اتوقعت انو يكون ذهب وبالكمية دي!! بس المحيرني كيف يجي زول من برا ولا حرامي يلبدو ف بيتنا!! وف زقاقنا!! وكأنو حرامي من الجيران ولا من ناس البيت!! انا قلبي بقي يضرب اكتر!! وقلت ليه اخواني م بسرقو!! عاين لي وقال متأكد من كدا!! علشان كدا جبتو القسم!! تخيلو نحنا البنات ولا جاب سيرتنا ف الموضوع!! لانو مستبعد حكاية انو واحدة فينا يكون ليها دخل بالموضوع!! ودا صعب علي الموضوع اكتر!! كيف اقدر اصارحهم!! كيف اقدر ارجع الذهب للجماعة!! قال لي بس انتي الجابك شنو! قلت ليه خفت عليك!! ابتسم!! وقال لي طالما م ماشي ف السليم وبخاف ***!! م تشيلو لي هم!! بكيت وقلت ليه **** يحفظك لينا وم يحرمنا منك ابوي!! ابتسم بس م ردا!! وكأنو كان بيدعو ف سرو!! لانو عيونو قالت لي كدا!! نزلنا من الركشة وقفل م افتح باب الشارع!! قال لي الليلة حسين بيضبحك!! ابتسمت وقلت مخييير بقول انت اتصلت علي وقلت لي تعالي!! بقي يضحك وقال لي بت الهرمة!! ودخلنا!! امي اتلقتنا واستفسرت ابوي عن الحصل معاه ف القسم!! وحكى ليها نفس القالو لي!! وخلاهو ف عهدة الشرطة وقالو حيعممو مواصفاتو ف الصحف وسوق الصاغة!! عس ولعلى يلقو ليه سيد!! ولا حيؤؤل لخزينة الدولة!!؟ سألت امي عن اخواتي!! نهرتني وقالت لي حسابك عندي بعدين!! بنادي فيك تطلعي تخليني!! م بتسمعي كلامي!! وهرجت!! ابوي قال ليها اجلديها طوالي!! شينة منها الشينة!! وكان بتبسم!! كآنو بحرش علي امي!! جيت عليها وعايزة احضنها بس دفرتني منها!! وقالت زحي مني!! انتي كلامي م بتسمعيه تجي اسسسه تتبلبصي!!؟اعتذرت وقلت كنت خايفة ع ابوي!! قالت لي ايي ابوك بتخافي عليه!! لكن انا كانت ضغطي ارتفع ولا انشليت م بهمك!! ابوي قال بطلو مشاكل! وختو لي اكل جيعاااان!!؟ مشيت ع المطبخ!؟ ختيت الاكل!! وناس لمياء ولينا جو داخلين!! قلت ليهم مشيتو ع وين!! لينا قالت لي مشينا نسأل ف الحلة لو ف زول رايح منو دهب!! وبقو يضحكو!! عرفت بعداك انهم مشو الترزي!! وهم بيتغدو سمعت لمياء بتسأل ف ابوي عن الدهب ووزنتو طلعت كم!!؟ وشكلو كيف!! وابوي يوصف وامي تتم ليه باقي كلامو!! والجلسة كلها كانت عن الدهب!! وانا اكيد م عندي نفس اكل وفضلت بسمع ف كلامهم!! وبعداك لينا رفعت الصينية!! ولمياء جات قايمة تعمل الشاي!! امي قالت ليه م وجعني الا الخاتم اب فاروصة سوداء!! نفسي دخلت فيه!! لمياء اتلفتت عاينت لي مسااافة!! وقالت لامي ياتو خاتم!! امي قالت ليها اللقاه ابوك مع الدهب!! لمياء مشت ع المطبخ!! وانا م انتبهت ليها لانو الفيني مكفي!! ومشيت غرفتنا!! رقدت وراسي حينفجرمن شدة التفكير!! كيف اتصرف!! كيف ارجع الدهب من القسم وبياتو حجة؟؟! لينا جات قالت لي كالعادة!! الانطوائية قاعدة براها وسرحانة!! ابتسمت وقلت ليها ي عواليق لم تطيري المدرسة م بتخلي غيارك نصو ف السرير والباقي ف الارض!! البلمو ليك منو غير الانطوائية!! يطويك ف ملاية مليانة شطة!! ونحنا بنتناقر!! لمياء قالت للينا امشي غسلي عدة الغداء عليك ****!! بالعادة بنغسلها بالتناوب!! بس الظاهر انه لمياء عايزة تخارج لينا!! لكن لشنو انا م عارفة!! وفعلا ديك طنطنت وطلعت!! لمياء جات قعدت جنبي وف سري قلت دي مالها!!؟ مسكت يدي وقالت لي ليلى انا اختك وسندك وداعماك وف اي موقف وان كان بشع حنفضل مع بعض ونتجاوزو سوا!! قلت ليها ف شنو ي بت!! م تخوفيني!! قالت لي الخاتم الكنتي لابساه امس وينو!! انا ف حاجة جواي عملت دددددل!! ولمن اضني صنو!! نسيت موضوع الخاتم!! قلت ليها رجعتو لستو!! قالت لي علاقتو شنو بالدهب اللقاه ابوي!! اتهجمت!! وقلت ليها ماف اي علاقة بيناتهم!! قالت لي طيب الوصف القالتو امي للخاتم العجبها نفس وصف الخاتم الامس!! قلت ليها بتكون صدفة بس!!عاينت لي مسافة وقالت بتمنى تكوني صادقة معاي!! علشان لو ف مشكلة نحلها من بدري!! ابتسمت بخوف!! وقلت ليها م تكبري الموضوع!! ماف شيء!!؟ قالت لي بتمنى!! ولينا جات داخلة!! قالت بتوشوشو ف شنو من وراي!! ضحكنا وبقينا نتونس!! بعداك كل واحدة ف سريرها!! ومن طفينا اللمبة الخوفة جاات!! والتوتر زاد!! وبقيت احس بالسرير بترفع بي فووووق!! بس م متأكدة اذا دا فعلا حصل وانا بتخيل!!وللحظة حسيت بأني خارج نطاق الجاذبية!! ف ثقل كدا ف جسمي! ولمن راسي لفى!! وف ألم فظيع ف يدي كأنو بنشرو فيها!! وفجأة انا خنقت نفسي!! اااي انا بكل م املك من قوة!! ضغطت بيديني الاتنين ع رقبتي!! وكتمت نفس!! بس م قادرة اكورك ولا حتى افك نفسي!!؟ وكأني ف غرفة معتزولة!! ماف زول جايب لي خبر!! بقيت اتنفس بصعوبة وبشهق!! ولمن حسيت بالدم محجوز ف راسي وعامل لي زنننة ف دماغي!! وبعداكف صوت جوااي بقول لي ترجعي امانتنا ولا تخسري الضيعها!!؟ انا غالبني الكلام!! وبناهج!! وعايزة اقول ابوي م ليه دخل بالموضوع بس كأنو سمعني!! وقال لي اتصرف ف حقنا!! وبكيت وقلت ف نفسي بس انتو قلتو لي هدية!! قلتو لي اطلبي!! انا م طلبت شيء!!؟ ماف زول ردا علي تاني!! وفكيت رقبتي لمن كحيت وطلعت دم من حلقي!! وبقيت اكح بقوة وبناهج!! اخواتي صحو!! وولعو اللمبة!! ولقوني ف حالة تانية وم قادرة اتنفس!! قالو لي ضيق نفس تاني!! هزيت راسي!! لينا جرت طلعت البخاخ الكان اداني ليه الدكتور وقال م استخدمو الا ف حالة الضرورة!! بعداك انا قدرت اتنفس شوية!! بس كان ف الم فظيع ف رقبتي!! م كترو معاي ف الكلام!! ادوني موية اشرب بس م قدرت ابلعها!! وفضلو معاي شوية!! لم لقوني اتحسنت حتى رجعو سرايرهم!!بعداك النوم م جاني وعيني فضلت لاجة للصباح!! وخوفي زاد ع ابوي!! وعارفة انو الجماعة ديل م بهزرو!! ولو م رجعت حقهم بيأذو ابوي!! قررت اصارح لمياء علشان تساعدني ونصل لحل لانو فضيحتي اهون علي من خسارة ابوي!! ومن الصباح!! وقبل م تطلع الشغل قلت ليها عايزاك ف موضوع!!؟ قالت لي خير!! م بتأجل لبعدين!! لانو الترحيل قرب!! قلت ليها مسألة حياة او موت!!؟ قالت لي خوفتيني!! ف شنو؟

قلت ليها بخصوص ابوي والذهب!!؟
نواصل بعدين..
يتبع ……..

الجزء الثالث عشر من رواية انتقام قرين​

فترت من الكذب والتلفيق!! لازم اخت التقاط ع الحروف واخبر زول بالمصيبة الانا عملتها!! ولا تسلسل الاحداث السيئة م حيقيف!؟ لمياء كانت بتعاين لي بإستغراب!! وعايزاني احكي سرييع لانه وراها شغل!! بس انا م عرفت ابدأ ليها من وين!! قالت لي يابت م تخوفيني!! قلت ليها انا حاسة بأنو ف مصيبة حتحصل بسببي!! قالت لي اللهم اجعلو خير؟! مصيبة شنو كمان!! بكيت وقلت ليها جماعتي حيقتلو ابوي!! لمياء كانت قاعدة!! قامت ع حيلها مخلوعة وقالت لي منو حيقتل ابوي!! بقيت اتنهف!! وقلت ليها انا لسسه ممسوسة!! لمياء قعدت بقوة ع السرير!! وكأنو رجولها م قدرو يشيلو جسمها!! وقالت لي جبتي الكلام دا من وين!! وكمان الشيخ قال انتي بقيتي كويسة!! وابوي دخلو شنو بالموضوع!! وانا اتخنقت وم قدرت اتكلم!! مسكتني من اكتافي وقالت لي انا بتكلم معاك!! جاوبي!!؟
الترحيل جا وضرب بوري!! طلعت اعتذرت منهم ورجعت!! ابت تمشي الشغل!! وكلفت زميلتها تشتغل ليها!!؟ وكانت متوترة شديد!! لدرجة انو امي بتستفسر منها لشنو غيرت رايها وم مشت!! وهي بتلخبط ف الكلام وم مركزة!! وم فضل ليها الا تطلع امي من الغرفة بالقوة علشان تسمع مني القصة!!؟ وفعلا امي طلعت!! جات قعدت جنبي وقالت لي انتي واعية بالكلام البتقوليهو دا!!؟ وم جاوبتي ع اسئلتي!! قلت ليها انا بسمع اصوات ومرات بشوف تهيُأت!! قاطعتني وقالت انتي جادة!! هزيت راسي…قالت لي وبرهبة شديدة بانت ع ملامحها!! لشنو م كلمتي واحد مننا!! قلت ليها كنت خايفة!! قالت لي خايفة من شنو بالضبط!! غلبني اتكلم!! بالجد كنت ف موقف محرج خلاص!! بس انا كان لازم احسب حساب يوم زي دا!! وكان لازم اتوقعو!! بس م كنت مفتكره صعب للدرجة دي!!
اقول ليها انا مشيت لمشعوذة لعلشان يجوني!! بالجد م قدرت!! قالت لي سرحانة وين انا بتكلم معاك!! قلت ليها ف الاول كانو بهددوني! بس اليوم التهديد طالكم لانكم تدخلتو ف شؤنهم!! قالت لي انت واعية بالكلام البتقوليهو دا!! و**** تكوني بتستهبلي علي ولا بتعملي فيني مقلب م اخليك!! قشيت دمعتي وقلت ليها دي حالة زول بكذب!! قالت لي ابوي دخلو شنو!! قلت ليها شال الدهب حقهم!! ختت يدها ف راسها وقالت لي الدهب طلع مسكون ويعاذبالله!! اومأت براسي!! قالت لي بتبالغي ي ليلى!! كيف تخبي عننا موضوع زي دا!! انتي عارفة الخطر الحتعرضي ليه الاسرة كلها بسبب التصرف دا!! وبعدين انتي كيف تسمحي ليهم يتواصلو معاك!!؟ انا م قلت ليك اتحصني وارقي نفسك!! وم توقفي سورة البقرة لاي سبب من الاسباب!! لشنو كذبتي علي!! قلت ليها بظهرو فجأة وبدون اي مقدمات!! مرات بظهرو لي ف الحمام!! قالت لي والدهب ادوك ليه سااي كدا بدون اي مقابل!! وم قالو ليك اي حاجة!! سكت مسافة وقلت لا!! قالت لي بتكلمو معاك كيف زينا كدا وبالعربي!! انا ف عز حزني داك ابتسمت!! بالجد كانت مرعوبة وم عارفة هي بتقول ف شنو!! بتخاف من حاجة اسمها اشباح وجنون حفظكم ****!! لدرجة انو افلام الرعب العادييية دي م بتحضرها!! قالت لي و**** قلبك ميت!! الفرحانة ليها شنو وانتي قلتي ابوي ف خطر!! قلت ليها وريتك علشان تشوفي لي حل!! قالت لي علشان نتخلص منهم لازم نعرف هم دخلو حياتك كيف!! والثغرة اللقوها فيك لازم نتخلص منها علشان م نفتح ليهم مجال للرجعة!! وانا خلاص قلبي بقي يضرب!! لازم اوريها!! واليحصل يحصل!! قالت لي م زكرو ليك دخلو حياتك كيف!! استجمعت قواي واتنفست بصعوبة!! وعايزة اقول ليها انا الطلبتهم!! بس سمعنا امي بتكورك!! قمنا جارين عليها مخلوعين!! كانت واقعة ف الارض وبتحاول تطلع من المطبخ!! بالجد منظر مؤلم خلاص!! من الخلعة غلبنا نقومها!! بنقول ليها امي مالك وجسمها مهبط وبيرجف!! وبصعوبة حتى قدرنا نسندها!! لانو جسمها تقل وزي العايزة تغمر!! لمياء ختت يد امي ورا رقبتها!! وجات قايمة بيها وبتقول لي ساعديني نرفعها!! حاولت بس امي كانت تقيلة ماشاءالله وم قدرت اشيلها مع لمياء لحدي م ود جيرانا سمع الجوطة ولم امي كوركت شكلو كان بيستحم!! طلع وهو لابس بنطلونو بس وتلب لينا بالحيطة!! وسند امي!! دخلها البرندا!! وامي كانت بترجف!! ولسسه مهبطة!! بقول لينا مالها الحصل معاها شنو!! قلنا م عارفين بس سمعنا الصراخ!! طلع يجيب ركشة من الشارع!! ولمياء بتحاول تتكلم معاها امي انتي كويسة امي ردي علي!! يمة انتي سامعني!!؟ امي عيونها طاحو وشخرت!! وبقت تتنفس بصعوبة!! وانا بقيت اصرخ ولمياء بتتشهد بصوت عالي!! وبتقول ليها امي خليك معاي!! امي اصحي!! وبترشها بالموية!! لحدي م ود جيرانا لقى عربية واحد من حلتنا جو جارين الاتنين شالو امي وكان مغمى عليها وطلعنا ع المستشفي!!؟ امي ليها ساعتين بينعشو فيها!! والمستشفي اتملت بالاهل والجيران!! بالجد كنا خايفين عليها شديد!! والممرضين م طمنونا!! ف البقول زبحة وف البقول جلطة وكل واحد بخمن براه!! لحدي م قابلنا الدكتور!! وقال تقعد٤٨ساعة ف العناية المكثفة!! لم سألناه عن الاصابها شنو!! قال الضغط ارتفع شديييد لدرجة انو عمل نزيف ف المخ!! بس انتو ادعو ليها تتجاوز مرحلة الخطر!! اتبهدلنا شديد انا ولينا!! لمياء شوية كانت صابرة!! واخواني رجعونا البيت بالغصب!! اول ابينا!! بس ابوي ايدهم وقال لو قعدتو م حتشوفوها ف العناية ارجعو البيت وادعو ليها!! وانا كل شوية بتصل اطمنكم!! انا قلت م ماشة ترجع لينا مع حسن!! وهي زاتها حلفت م بتمشي!! بس حسين شاكلنا وابوي اتكلم معاه وبعداك اقنعنا بالرجعة!! وقال يوم بكرة هو ولمياء حيرجعو وحنفضل معاها نحنا!! رجعنا البيت والبكاء كملناه!! وماف واحدة فينا دخلت ع المطبخ كانو معانا جيرنا وللمساء كدا رجعو بيوتهم ونحنا مشينا ع غرفتنا!! اتكلمنا مع لمياء بتقول لينا كويسة!! نقول ليها فتحت!! تقعد تبكي وتبكينا معاها!! لنص الليل نحنا مساهرين ونتكلم عنها وندعي ليها!! وبعداك باغتني النعاس!! نمت! م عارفة قدر شنو بس اشوف امي شانقنها ف شجرة!! انا بقيت اكورك وجريت عليها!! كانو رجولها مدلدله!! ثبتها بكل قوتي!! وبكورك وبرفع فيها لفوق وبقول ليها امي العمل فيك كدا منو!! امي الربطك ف الشجرة منو!! وانا بكورك وهي بتكحومخنوقة وقالت كلمة واحدة خلتني اصحي مخلوعة!! قالت جماعتك!!؟ انا شهقتا وقمت متلبة من السرير!! وبقول امي!! وبقيت اتلفت!! الحمد*** طلع حلم!! بس كيف يعني جماعتك!! امي دخلها شنو!! بقيت اتكلم بصوت عالي وبتلفت !! وبقول امي عملت ليكم شنو!! بتأذو ف امي لشنو!! خلو امي ف حالها عايزين منها شنو!!؟ لينا قامت مخلوعة وبتقول لي قولي بسم **** انتي بتهلوسي!!! دفرتها مني وقلت ليها زحي مني!! انتو عايزني انا!! اقتلوني انا بس م تقربو من اهلي!! حضنتني عليها وبقت تبكي!! وقالت لي اهدي ليلى!! ماف زول هنا انتي بتحلمي!! امي حتطيب!! ارح نتوضي ونجي ندعي ليها!! طلعت خلتني قعدت ف طرف السرير وببكي!! قلت لشنو بحصل مع كدا!! انا لا اول وداعية ولا اخر واحدة!! لشنو المصائب دي كلها بتحصل لي!! وبكيت بحرقة!! لينا جات لقتني ف حتتي!! ربتت ع كتفي وقالت لي اصبري!! امي محتاجة لدعواتنا!! قومي اتوضي!! جرجرت رجولي وطلعت!! وانا ف الوضاية!! حسيت بزول واقف وراي! عايزة اتلفت بس جسمي اتشل وانا واقفة!! ورقبتي م قدرت الفتها عليه!! عرفت ديل منو!! قلت ابعدو عن امي وم تأذوها!! هي م عملت ليكم شيء!! م سمعت صوت!! بس عقلي الباطن اتكلم معاي! وكأني بخاطب ف نفسي!! وكنت انا بقول لنفسي!! بس هي بادرت وكانت حتأاذينا!! والبقيف ف طريقنا مصيرو الموت!! انا بقيت اقول عملت شنو!! حاولت تأذيكم كيف!!؟ وبعداك شهقت!! زي الكنت كاتمة نفس ولا ف حالة لا وعي!! اتلفت اشوف كديسة نطت بحيطة الجيران!! قعدت ف الوضاية وبكيت!! بعداك اتوضيت وصليت لي ركعتين ودعيت ليها!! ورقدت ف سريري!! قلت امي اذتهم ولا حاولت تأذيهم كيف!! امي عملت شنو!! وبقيت افكر ف الموضوع!! اليوم التاني من الصبح اتصلنا ع لمياء!! قالت الدكتور حيمر عليها اول بعداك تورينا المستجدات!! قمنا ننضف ف البيت ولينا م مشت المدرسة!! وطلعت غيارها الحتمشي بيه المستشفي!! انا استحميت وقلت اشوف المطبخ ماف عدة وسخانة ماف زول استخدم ملعقة سااي من امس!! بس دخلت وفعلا كان نضيف ومرتب!! والعدة مغسلة ومطبقة!! وانا طالعة منو!! شفت حافظة شكلها غريب!! وظاهر عليها م حقتنا!! فتحتها كانت فيها موية عادية!! سألت لينا اذا جابوها اخواني ولا الجيران امس!!؟ قالت م عارفة واول مرة تشوفها!! خليتها ف مكانها وطلعنا ع المستشفي!! قريب الساعة عشرة صباحا الدكتور مره ع امي وقال وضعها استقر وطلعوها الغرفة!! بس كانت م مركزة!! نسلم عليها ونحضنها ونحاول نضاري الدموع عنها!! لانو الدكتور حذرنا من اي صدمات ولا انفعالات!! بس كانت زاكرتها بتطش!! شوية تسلم علينا وتقول لينا انا كويسة!! وشوية تعاين لينا بإستغراب كأنها م بتعرفنا!!؟ الدكتور قال دا شي طبيعي بعد النزيف الحصل ف الدماغ بأثر ع زاكرتها!! بس مع العلاج حتطيب وتبقي كويسة!! لحدي العصر كدا والدكتور مانع عنها الزيارة!! ولو جونا ناس بننزل ليهم تحت ف الاستقبال!! وبتفضل معاها واحدة ف الغرفة!! قريب العصر كدا!! حسين قال لينا ارجعو!! انا ولينا بصوت واحد قلنا الليلة يوم لمياء وابوي!! نحنا حنبيت معاها!! ابوي وافق يرجع البيت بس لمياء نظام انا البت الكبيرة!! ابت تمش واتراجعت عن كلامها الامس!! المهم بعد تعب وتحانيس!! رجعو لينا مع ابوي! وفضلت انا ولمياء وحسين!! لحدي بعد المغرب كدا طلع يشرب ليه قهوة!!؟ وخلانا معاها!! فتحت عاينت لينا وقالت امشو البيت انا كويسة! ابتسمنا ولمياء قالت ليها الحجل بالرجل!!! معاك سوووا!! قالت لينا لينا وين!! قلنا ليها رجعت البيت مع ابوي!! اتنرفزت ربقت تناهج ولمن ظهرها بترفع عن السرير!! وكأنها كتمت نفس!! لمياء قالت لي اجري نادي الدكتور!! ومن فتحت الباب شفت ممرض ف وشي!! قلت ليه امي تعبت!! جرا وراي!! وامي كانت بتقول لينا م تمشو البيت!! م تدخلو البيت!! وري ابوك ولينا يطلعو منو!! والممرض ختى ليها الاوكسجين…واداها حقنة!! شوية كدا هدت!! وانا ولمياء بقينا نعاين لبعض!!؟

قريب الساعة ٩حسين جاب لينا عشاء!! بس ماف واحدة فينا عندها نفس تاكل!! وامي فتحت بس طلعت ناسية انها اتكلمت عن البيت!! ولا قالت م تدخلو ليه!!لمياء كانت شاكة بأنو انا لي دخل ف الموضوع! بس انا كنت متأكدة من كدة!! بعداك نمنا!! وانا راقدة م عارفة نفسي بحلم ولا صاحية!!قلبي بقي يضرب شديد وجسمي كشششه!! ولمن بحس بظل زول قدامي!! ،ونفسي قالت لي المويةالفي المطبخ كبيها ف الحمام!!؟ وفتحت عيوني مخلوعة!!
نواصل بعدين
يتبع …….

الجزء الرابع عشر من رواية انتقام قرين​

الاية الكريمة بتقول..(ولو يؤاخد **** الناس بما كسبوا ماترك علي ظهرها من دآبة)صدق **** العظيم…! بس انا لشنو حاسة بأنو **** بعاقب فيني!! ومعجل لي بعذابي!! انا ف الدنيا وعايشة ف جحيم الاخرة!! وم قادرة اتصرف!! و**** تبت!! و**** شلت موضوع الودع والقرف دا من راسي بس المصائب لاحقاني!! ادعو لي **** يخفف علي ويبعد عني شر خلقه..فتحت وانا ريقي غالبني ابلعو!! اكيد دا م حلم!! انا لازم ارجع البيت واشوف موضوع الحافظة دا شنو!! وكمان امي كانت حتأذيهم كيف!!؟ ولشنو اكبها ف الحمام!! والنوم طار مني وفضلت صاحية للصباح!! وكل مره اعاين لامي اتحسر ع العملتو ف نفسي!! والصباح بعد اطمئنيت ع امي وكانت كويسة!! وحتى اتونست معانا وقالت راجعة البيت!! بس وريناها انو الدكتور قال م تطلع الا يتأكد من فحوصاتها الاخيرة!! قلت ليهم انا راجعة البيت اجيب ليكم معاي شنو!!؟ امي قالت لي اتحصني!! وكلمي ابوك يحصن البيت!! لمياء قالت ليها ف شنو ي امي وم عايزة تكلمينا!! الحصل معاك شنو!! اظنها خايفة اذا كلمتنا بالشافتو تدخل الرعب لقلوبنا وتكرهنا البيت!! فما قالت شيء!! بس سرحت بعيييد ولمن جسمها كششه!! قبلتها ع جبينها وكان زي التلج!! هبطت!! قلت ليها بخلعة كويسة ي امي!! ف شيء واجعك!! ابتسمت وقالت طيبة الحمد***!! طلعت منهم وانا م عارفة قصة الموية الفي الحافظة شنو؟؟! وصلت البيت ولقيت لينا ف المدرسة!! وابوي معاه راجل جيرانا وحسن مشي يفتح الجزارة لانو حسين مع ناس امي!! سلمت عليهم وطمنتهم علي امي!! ومشيت الغرفة غيرت ملابسي!! كان بيتنا كئيب!! وزي المهجور كدا!! وم عارفة كانو ف طاقة سلبية بتتفجر منو!! دا م بيتنا!! زي المقبرة!! نضفت وبخرت!! وفرشت ملايات بالاوان فرايحية!! وشوية اديتو منظر!! بس الاحساس لسسه موجود!! مشيت المطبخ لقيت الحافظة خاتنها ف مغسلة العدة بس ب مويتها!! مشيت الصالون لقيت جارنا طلع من ابوي!! قعدت جنبو ومسكت يدو!! قال لي م تتجرسي!! امكم كويييسة وانا بعرفها كويس!! تكتلنا كلنا وتقعد!! بقيت اضحك!! قال لي ابقي مره ووريها علشان اطردك من بيتي!! ابتسمت وقلت سرك ف بئر!! قال لي الدكتور قال شنو!! وريتو بالعارفاه وقلت الدكتور طمنا عليها!! وقبل م يجي قايم!! قلت ليه ابوي ف حافظة ف المطبخ م عارف حقت منو ولا جاتنا كيف!!؟ قال لي اييييك!! نسيت و****!! دي موية رقية ب موية زمزم!! جايبنها من خلاوي الشيخ البرعي!! وخاتمين فيها القرأن اكتر من مية مره!! دا غير الادعية والرقية الشرعية!! انا قلبي بقي يضرب واتزكرت كلمة كبيها ف الحمام!!؟ قلت ليه امي جابتها من وين!! قال لي م جابتها امك!!؟ جبتها انا اداني ليها شيخ احمد ف الجامع!! وانا جاي من صلاة الصبح!! وقلت لامك تشرب منها وتديكم وتكبوها ف موية تستحمو بيها بس م في الحمام!! قلت ليه اديتها لامي متين!! قال لي يوم الحادثة الحصلت معاها!! الصباح!! انا دمعتي جات نازلة!! قال لي مالك؟؟ قلت ليه ماف شيء!! بس اتزكرت الحصل؟ قال لي م تخافي المؤمن مصاب!! وقدر اخفى من قدر!! وامك طيبة الحمد***!!؟ طلع خلاني قاعدة ف سريرو!! ولطمت خدودي..وقلت دا شنو العملتيه دا ي ليلى!! واتصرف كيف مع المصيبة دي!! قمت ومشيت ع المطبخ!! واتجهت ع الحافظة!! ومديت عليها يدي بقت ترجف!! وبتموت تتدريجياً!! ولاول مره اشوف الثعبان الفي يدي الشمال!! كان حقيقي وكل تفاصيلو!! انا نسيت موضوع الموية وبقيت بعاين ليدي!! هدا ثعبان ماشي تحت جلدي واكاد اشوف عيونو!! من شدة م اني مزهولة!! فقدت القدرة ع الإستيعاب!! وبقيت متجمدة ف حتتي وبعاين!! وبسأل نفسي!! اكورك!! الم الناس!! بس اذا شافو يدي اقول ليهم دا شنو!! دا ثعبان جبتو يسكن جواي بإرادتي!!؟ ابوي نظرتو لي حتكون كيف؟؟ وف اللحظة ديك حسيت بغشاوة ف عيوني وف حاجة لفحتني ولا ضربتني م عارفة بس لمن اترتعت لورا!! متأكدة ف شيء لامس وجهي!! وقلبي بقي يضرب!! بس م خفت!! لازم انهي الموضوع دا!! واخلص نفسي واهلي من العذاب العايشنو دا!! وقلت عايزين مني شنو انتو!! سمعت همس ف اضاني طيعي تطاعي!! جسمي كششششة وقلبي بضرب بقوة وبقيت ارجع؟؟ صدقوني م كنت خايفة!! بس الجماعة ديل حضورهم قوي!! وم بقدر استحملو!! وجسمي بيضعف!!؟ وقلت اطيعكم ف شنو!! وانا م عايزة منكم شيء!! بس خلوني ف حالي!! وفجأة ارتسمت قدامي صورة امي ف المستشفي!! وف رجال طوووال سووود واقفين ف راسها!! وتاني الصوت همس لي طيعي تطاعي!! قلت امي م عندها دخل م تأذوها!! عليكم….عليكم!! وصعقت لم لقيت نفسي م بقدر اللفظ لفظ الجلالة!! انا م بقدر اقول ****!! ي **** من العذاب الانا فيه!! حتى كلمة ****!! انا محرومة منها!!؟ كنت بعفوية عايزة اقول عليك **** م تأذو امي!! بس غلتني!! الكلمة ف لساني بس م بتطلع!! وططت عيوني وبقيت ابكي!! قلت المطلوب شنو!!؟ بس المرة دي م سمعت صوت!! نظري اتجه ع الحافظة!! ونفسي قالت لي ادفقيها ف الحمام!! انا صرخت!! وجسمي كلو بقي يرجف!! كيف ارتكب معصية زي دي!! كيف اعمل كدا!! ابوي جا جاري قال لي ف شنو!! حضنتو وقلت ماف شيء!! قال لي امك كويسة!! وانا ببكي!! قال لي حاصل شيء لامك!! قلت ليه لا بس….وسكت م عرفت اقول شنو!! فترت من الكذب!! قال لي الحاصل عليك شنو!! تاني رجعتي تتخلعي!! اتنهدت بصعوبة وقلت ليه معليش!! عاين لي مسافة وقال لي خليك قوية وم تضعفي!! وطلع خلاني!! قعدت ف الواطا!! وبقيت ابكي!! غطيت خشمي بالطرحة علشان صوتي م يجيب ابوي تاني!! وقلت م بقدر!! م بعصي *** عشان ارضيكم!! كفاية العملتو لحدي الان!! وقبل م اتم كلامي!! جسمي كله بقي يوجعني!! بقيت اتلوى ف الارض!! وكأنو بينشرو ف جسمي!!؟ وكنت متألمة شديييد وكانو ف زول بيضرب فيني!! وانا بتدردق ف الارض من شدة الالم!! وف اللحظة ديك وف حالة لا وعي!! شفت امي فصلو منها الاوكسجين!! وكانت م قادرة تتنفس!! وبتكابس ب يدها!! والزول الطويييل البشوفو ف الحلم كان واقف جنبها وبعاين لي!! انا بصرخ بس م بقدر اصلها!! وتقريبا كنت ف نفس الهيئة دي!! وواقعة ف الارض وم قادرة اصل لامي ف سريرها!! ومادة يدي عليها وبصرخ!! وتاني م وعيت بشيء!!م بعرف فضلت قدر شنو راقدة ف الارض بس لم فتحت قمت مخلوعة!! وهرولت ع الغرفة وشلت التلفون اتصلت ع لمياء م ردت علي!! وع حسين م ردا!! وتاني رجعت للمياء برضو م ردت!! قلبي وجعني وبقول ياربي م تعاقبني ف امي!! **** اللطف بيها!! **** اصرفهم عنها واحميها منهم!! اتصلت ع حسن ردا علي بعد كم جرس!! وكان صوتو متغير!! قلت ليه بلهفة امي مالها!! سكت مسافة!! قلت ليه حسن بتكلم معاك امي مالها!! قال لي امي تعبت شوية!! وبيعملو ليها ف صدمات كهربائية!! رئتيها م بتستقبل الاوكسجين!! انا صرخت!! قال لي انا م وريتك عشان تتبهدلي!! ادعي ليها امي محتاجة لينا!! وقفل خلاني منهارة!! خطفت عبايتي ولبستها ف نص الحوش!! وانا جارية ع ابوي!! نفسي قالت لي ادفقي الموية ف الحمام!! وانقذي امك!!؟

انا اتجمدت!! وم قدرت اصل الصالون!! واتلفت ع المطبخ!! ودخلت وانا برجف!! وكل ثانية بضيعها محسوبة ع امي!! وكل م امد يدي ع الحافظة يدي ترجف!! كيف اشيل موية زمزم برقية وخاتمين فيها كتاب **** واكبها ف الحمام!؟ كيف ارتكب معصية زي دي…بس امي!! امي محتاجة لي!! اعمل شنو انا اتصرف كيف!! انجدوني!! امي ولا الموية!!؟
نواصل بعدين
يتبع ……….

الجزء الخامس عشر من رواية انتقام قرين​

صاح **** غفوررحيم!! ولكن شديد العقاب!! وانا امي غالية علي!! بس كيف بعدين اقيف قدام ***!! كيف ابرر المعاصي الارتكبتها ف حق نفسي!!
اتنهدت بصعوبة!! واتمنيت تكون اخر شهقة لي وروحي تطلع معاها!! اتقدمت خطوتين لقدام وكانت اثقل خطوة اخطوها ف حياتي!! ودمعتي ع خدي شلت الحافظة!! وطلعت من المطبخ!! واتجهت ع الحمام!…عقلي كل حواسي حسيت بيها بقول لي لا!! ورجولي متثاقلة!! وكأنها رافضة تتحرك!! بس قلبي مع امي!! انا ممكن اتقبل جهنم وسخط **** علي!! بس مستحيل استحمل شوفة امي بتموت بسببي!!؟ دفرت الباب بيدي وقبل م ادخل هجمتني طيرة طالعة من جوا!! انا شهقت لمن جاتني طعنة!! وتبعتها بنظري!! شغتها قعدت ف الحيطة الجنب الحمام!! وكأنها بتعاين لي ولا بتعاتبني!! ولا محتقراني!! المهم حسيت انها بتتكلم معاي!! ولكننا م علمنا منطق الطير!! وبركة الما فهمت كلامها!!؟ وف لحظة استجمعت قواي!! واتخذت خطوة غير مدروسة ومجهولة العواقب!!؟ ومسكت الحافظة احكمت عليها قبضتي وقزفتها بقوة فوق الحيطة!!! لمن الطيرة فرت هاربة!! وختيت يديني ف ركبي وبقيت اتنفس بصعوبة!! وف سري قلت **** م تعاقبني ف امي!! **** استودعتك امي!!؟ وفضلت ف الحالة دي لوهلة!! وابوي شافني!! جا علي ملهوف!! ختى الابريق من يدو وقال لي انتي كويسة!! هزيت راسي بمعني لا!! وحضنتو وبكيت!! قال لي مالك ي بتي م تخوفيني!! الحاصل عليك شنو!! قلت ليه امي!! اتخلع وقال لي مالها!! قلت ليه اتصل لي عليها ضروري!!؟ ابوي اتهجم!! طلع تلفونو من جيب العراقي!! واتصل!! وكان بعاين لي!! رده عليه حسين وقال ليه امك كيف!! انا قلبي بقي يضرب بقوة!! وبقول **** ام تمتحنا ف امي!! حسين شكلو م ردا!! ابوي اعاد ليه السؤال بنهرة المرة دي!! وانا رجولي رجفو ولمن بقو م شايلني!!؟ حسين قال ليه تعبت شدييد والدكتور فقد الامل منها!! بس مشيئة **** انقذتها!! واتحسنت شوية!! ابوي فتح لي الاسبيكر وقال ليه يعني امك كويسة!! حسين اكد ليه!! وقال و**** اتجاوزت مرحلة الخطر!! واذا مركبين ليها الاوكسجين وادوها حقنة مهدئة!! انا حضنت ابوي شديد وبكيت بحرقة!! وحمدت *** انو م حرمني من امي!! ابوي قال لي استغفري وابعدي من الحمام!!! ف عوارض بتدخلنا ف حالة الحزن الشديد!! اتنهدت!! وخليتو شال ابريقو داخل ع الحمام!! وانا رجعت غرفتي!! وجيت جنب الدولاب عايزة اشيل لي توب امشي الشارع اجيب الحافظة!! لانو لو سألوني منها م بقدر اوريهم بالعملتو!! وقبل م يدي تتمد للتوب وفجأة اترميت ف السرير!!؟ وكأنو ايدج المصارع اداني الفنش بتاع الرمح حقو داك!! وحسيت بألم فظيع ف بطني وكأنو احشائي بتتقطع!! وبقيت اتلوي ف السرير!! وغالبني حتى اني اقول اااه!! بعداك حسيت بزول ضاغطني مع السرير!! وكأنو مقيد اطرافي ف زواية السرير!! وانا الحركة غالباني!! وحتى النفس بصعوبة بالغة…ف سري بقول **** شيل روحي وريحني من العذاب دا!! واحس بنفس سخخخن وكريه ف وجهي!! وكأنو ف ثور هائج بنفث فيني!! وانا بتلفت يمين وشمال من شدة سخونة النفس وعفانته؟! وف صوت جواي!! بس م كان صوتي!! وكأنو ف زول بخاطب فيني!! وقال لي قلت ف الحمام م في الشارع!! حاولت اقاوم بس بدون فائدة!!! لسسسه مقيدة!! ولساني ميت!! بس ف سري قلت مالك م تدفقها انت!!؟ وحسيت بألم فظيييع ف يدي الشمال!!! لمن سمعتها طقت!! وكأنها اتخلعت من مكانها!! وانا بعد كل الالم دا ووواي م قادرة اقولها!! وقال لي استحملي الحيحصل عليك!! وانا ممددة ف السرير!! بس حاسة بنفسي معلقة ف الهواء!! وبقيت اشوف طشاااش!! وفقدت الوعي!! لم فتحت لقيت نفسي ف المستشفي!! ويدي مجبصة!! استغربت وفتحت بصعوبة وقلت ليهم الحصل شنو!! حسن قال لي انتي كلمينا!! وقعتي كيف!!؟ انا بكيت!! هم فتكرني وقعت!! وم عارفين الحصل علي!! لمياء قالت ليهم معقولة لقيتوها مرمية ع الارض!! زماف زول شافها ولا سمع ليها صوت!! معقولة ليلى يدها تتكسر وكواريكها م تجيب ناس الحلة كلهم!!؟ ف شيء غريب!! انا بقيت ابكي!! جات قعدت جنبي وقالت لي براحة كدا!! ف شيء ليه دخل بالموضوع!! هزيت ليها رأسي بمعني ااااي!! حضنتني عليها!! وطلعت برا لابوي وخلتني مع حسن!! زحسين كان بكمل ف إجراءات خروج امي…وكلهم بقو يتسألو عن العارض الاصابنا!! لم حسين جا علينا كان شايل كرت الخروج!! قال لي كسرتي يدك كيف!! والرماك شنو!!؟ قلت ليه كنت جارية مستعجلة اتزلقت ف البلاط!! وم متزكرة تاني الحصل شنو!!؟ قال لي ويدك دي مركبنها ليك تركيية علشان تتكسر تلاتة كسرات!!؟
م رديت بس ف سري قلت بعد الالم الحسيتو قبيل دا لو قالو لي اتكسرت عشرة كسرات م بستغرب؟؟! طلعنا من المستشفي!! وامي كانت خايفة ترجع وقالت لي رجعنا كلنا حنتأذي!! ابوي بقي يتكلم معاها براحة بس م سمعنا حديثهم!! رجعنا البيت والجيران يحمدولامي السلامة ويكفرو لي!!؟ والبيت اتملي ناس!! لقريب المغرب كدا!! جات جارتنا وشايله الحافظة القبيل!! قالت لامي دي لقيناها واقعة جنب حيطتكم برا الشارع!! تابعة ليكم ولا خلاها زول!!؟ وامي اتبشتنت!! بقت تقول كنت عارفة!! انها حتدفق!! ف شيطان ف البيت دا!! وقامت مخلوعة!! واخواني بسكتو فيها!! وبقنعوها انو دا وهم منها ساي وماف شيء من البتقولو دا حاصل!!؟ لمياء كانت ف المطبخ بتسوي ف غدا!! بالرغم من انها تعبانة وكانت ممارضة امي ف المستشفي!! وقبل م تاخد راحة نزلت المطبخ! جات علينا وقالت اصواتكم واصلة هناك ف شنو!! خسن ابتسم وقال ليها عندها موية عزيمة قالت ف زول دفقها ليها!! قالت ليه رقية م عزيمة!! قال ليها كلو واحد ي حاجة؟؟ وطلع خلانا!! لمياء بقت تعاين لي!!بعداك اليوم عدى ع كدا!! وانا ع مشارف النوم!! جات لمياء منهكة ولم قعدت ف سريها! بقت تنين!!اتلقت عليها وقلت اعفي لينا! ابتسمت وقالت لي انتي لسسه صاحية!! ابتسمت وقلت ليها شخير لينا م مخليني انوم!! قالت لي اضربي ليها السرير!! قلت ليها رمة م بتحس!! ضحكنا!! وقالت لي كلمت ابوي!! قمت مخلوعة!! وقلت بشنو!!؟ قالت لي بموضوعك!! قلت ليها وقال شنو!! قالت لي لو م كسرة يدك دي كان بكره حيودوك زريبة الشيخ البرعي!!؟ قلت ليها بتعالج يعني!! قالت لي برحمة رب العالمين!! اكيد حتتعالجي!! رقدت وهمي زاد!! الغريبة م فرحت!!! بل جاني احساس انو القادم حيكون اسواء!!؟

نواصل بعدين
يتبع ……..

الجزء السادس عشر من رواية انتقام قرين​

معقولة المصيية دي حتمر ع كدا!! معقولة انا اتعالج واطيب والجماعة ديل يخلوني ف حالي بعد كل الحصل دا!!؟ كل التساؤلات دي واكتر بتدور ف رأسي وحامياني النوم!! اخواتي نايمات وانا عينة لااجة!! ماف شيء قرب علي بس حاسة بوجود شيء معانا ف الغرفة!! ف حاجة بتتحرك!! بل بقيت اسمع صوت مشي!! وقلبي بيضرب وجسمي كااااشي!! مره اشوف الظل ع الدولاب!! مره جنب الباب!! مره جنب اسِرة اخواتي!! واخر مرة كان فوق لي!! مقاصد وجهي!! اول خفتت شدييييد وغمضت!! وانا مغمضة حاسة بوجودو!! وفجأة الجو كتم!! وجسمي عرق!! فتحت عيوني!! م شافة شيء!! بالجد كنت مرعوبة!! وقلبي بوجعني!! بالجد قلبي من شدة م بيضرب لمن بيطعني!! وكأنهم عايزين يجننوني!! ولا يموتوني بالبطئ؟!
بعداك م حسيت بشي!! ونمت كيف انا م عارفة!! بس صحوني اصلي الصبح!! بسبب الجبيرة م قدرت اتوضي وحتى التيمم غلبني!! بس لموو **** يديها ع حسب نيتها ساعدتني!! وقفت اصلي بس م قدرت!! م نسيت كيف اقيم الصلاة بس لساني تقيل!! اقولها بقلبي!! بحس بنفسي بجر الكلمة والتانية بتقلبني ونفسي بضيق!! اتلفت وعاينت للينا قلت ليها صلي بي!!؟ لمياء جات داخلة وقالت انا بصلي بيكم!!! اقامت ونحنا معاها وبدت!! بالرغم من انو قرائتها سرية!! وم عرفنا بتقرا ف سورة شنو!؟ بس انا تضايقت!! وبقيت اتنفس بصعوبة وببكي بدون سبب؟؟! دموعي م عايزة تقيف!! ولو م مسكت نفسي بالقوة!! كان قمت جارية من الصلاية!! وهي ف السلام شافتني بيمينها ف حالة تانية!! سلمت سريع!! وقالت لي مالك!! انا وقعت ف ركتفها!!؟ لينا صرخت!! م غمرت!! بس كان رأسي لافي وموجوعة شديد!! وايدي آلمها زاد كأنها اتكسرت تاني!! لينا جرت لابوي!! لقتو ف الجامع لسسه م جا!! ساعدوني رقدت ف سريري وعيوني م قادرة افتحها!! م بعرف دا نعاس ولا آلم ولا شيء تاني!! اختلط علي الشعور!! لينا جات طالعة من الغرفة مستعجلة!! لمياء قالت ليها م تكلمي امي!! لينا بإستغراب قالت لشنو!!؟ لينا قالت ليها وضعها الصحي م بستحمل اي ضغوط ولا صدمات!! وف اثناء كلامهم داك ابوي واخواني جو داخلين!! طلعت عليهم لمياء!! وم بعرف القالتو ليهم شنو!! بس ف اقل من دقيقتين جو داخلين علي!! ابوي قعد جنب راسي وانا بعاين ليه بصعوبة ومسحبة عيوني!! دمعتي جات نازلة وم قدرت انطق بكلمة!! حسين قال نوديها المستشفي!! ابوي قال ليه لا!! وعاين للمياء قال ليها جهزي ليها غيارين نحنا مسافرين!! حسين قال لابوي بإستنكار!! ماشين وين!!؟ قال ليه الموضوع الناقشتو معاك قبيل!! قال ليه بس قلنا بعد تبقي كويسة!! وامي تسترد عافيتها!! ابوي قال ليه شوف حالتها بتستحمل!! حسين عاين لي وسكت!! جا طالع وقال حشوف لينا عربية!! لمياء طلعت لينا غيارات!! ابوي قال ليها غيارين بس!! قالت ليه ااي اتنين؟؟ انا وهي!! ابوي قال ليها لا انتي م معانا!! لموو اتخلعت وانا اكتر منها!! وقالت كيف يعني؟؟ حيمشي معاكم منو!! قال ليها م حنحتاجك خليك مع امك!! لينا براها م بتقدر!! قالت ليه وليلى!! قال ليها **** معاها!! وانا وم بقصر…قالت ليه ونعم ب****!! بس ي ابوي شوف حالتها!! لازم ترافقكم مرا!! قال ليها الموضوع انتهي م حيمشي معانا زول!! جا قايم وقال ليها جهزيها!! وطلع مننا!! قلت ليها وانا لساني تقيييل!! لمووو م تخليني امشي برااي!! انا محتاجاك!!؟ بكت وحضنتني وقالت ابوي مصر!! م تخافي بحاول اقنعو!! ولو م قدرت متأكدة انو م حيقصر منك!! وان شاءالله حتتعافي!!
دخلوني الحمام وحممتني وانا ساندة راسي ع الحيطة وسامعة صوتها بس الشخصية البتحمم فيني م كانت لمياء!!؟ دي م ملامح اختي!! وانا اغرود ف عيوني!! اغمض اسمع صوتها افتح اشوف الشخصية دي!! م ابديت اي رده فعل وقلت بيني وبين نفسي يمكن اكون بهلوس!! بعداك لم طلعنا اتضح انو ابوي كلم امي بالموضوع!! كانت بتبكي ومصرة انها تمشي معاي!! وقلت ليه الجماعة ديل كان م كتلونا م بيرتاحو!!؟ ارح نمش كلنا يربطونا منو!!؟ ابوي قال ليها استغفري واستهدي ب****!! لن يصيبنا الا م كتب **** لنا…وبعد تحانيس حتى خلتنا طلعنا!! اجرو لينا عربية لانو حالتي م بتسمح لي اسافر بباص! طول الطريق انا نايمة ف رجلين ابوي!! وبتخلع!! لو غمضت ساااي بهلوس!! وصلت لدرجة اني بشوف عربيتنا عملت حادث!! لمن بصرخ!! ابوي بمسكني وبقول لي استعيذي ب**** من الشيطان الرجيم!! وطلع مصحف وبقول لي اقري!! بس انا م قادرة اثبت رقبتي!! فمستحيل اقدر امسك المصحف!! فبتاع العربية شغل mb3العربية قرأن!! بس انا ق دنيا تانية!! وابوي خاتي يدو ف راسي وبعزم لي!! وكان ف ضجيج ف راسي وبسمع كذا صوت ف آناً واحد!! بس م قادرة اعرف مضمون الكلام شنو!!؟ وشوية كدا وكان راسي حينفجر!! والطريق بقى لي طويل خلاص!!بس ف الاخر وصلنا لم سمعت بالزريبة افتكرنها زي زريبة البهائم!! لانو الاسم بيوحي ب كدا؟! بس كانت مدينة عديل!! ومجموعة كبيرة شديد من الناس!! وحسيت بنفسي ف وسط حوش الخليفة ف قفلة المولد!! وبقى علي ضجيجين!! ف راسي وف المحيط الحولي!! وحتى ابوي ظاهر عليه كان ضايع!! وم عارف يقبل ع وين؟! واظنو م اتوقع يلا امة محمد(صل **** عليه وسلم) كلها هناك!! ماسكني من يدي وانا رجولي متثاقلة والمشي غالبني!! لحدي م لمينا لينا ف درويش؟!كان لابس جلابية خضراء مرقعة بالابيض والاحمر!! وبارم شعرو زي البوب ولابس سبح كتيرة شديد!! وم مهذب دقنو!! وسلم ع ابوي!! وبقول في انشاد عن الشيخ البرعي وبمدح فيه!! وسأل ابوي عن وجهتنا!! ابوي قال ليه م بعرف لي زول هنا بس جيت اعالج بتي!! قال ليه وصلت تب!! ابوي الشيخ بركتو واصلة!! وم بترجع خائب باإذن ****!! وقال ارح معاي!! اوديكم لحوار الشيخ!! وكان ماشي بهروله ومدنقر ف الارض!! وبتصرف بغرابة!! ابوي بعاين لي وقال م تخافي!! قلت م خايفة بس تعبانة!! مسكني شديد وتبعنى الراجل الدرويش!! وكل م نمشي خطوتين بقيف يسلم ع زول ويمدح!! لحدي م وصلنا حوش كبييير كدا!! والحركة كانت قليلة وف نار تقابة شيبة مطفية وهناك ف مجموعة صبيان قاعدين ف حلقة بس م معاهم شيخ!! وانا خلاص وقفت ولا خطوة زيادة م بقدر اخطوها!! ابوي قال لي تعبتي!!هزيت راسي بمعني ااااي!! الدرويش قال لابوي وصلنا خلاص!! ارح نخش للشيخ!! قلت لابوي و**** م قادرة احرك رجولي!! وبقيت ابكي!! الدرويش كان بيتكلم بعجالة!! قال لابوي عارضها قوي!! ارح نكلم ابونا الشيخ!! ابوي قال لي م تتحركي من هنا انا م بتأخر!!؟ قلت حاضر!! ابوي دخل معا الراجل وخلوني واقفة!! اخدو ليهم قريب الربع ساعة انا منتظراهم!! بعداك جا طالع الدرويش مهرول وبأشر علي وبقول ليه ياها ديك ي ابونا الشيخ!! وكان من وراه ابوي!! حتى ظهر لي زول لابس نضيف لابس جلابية بيضاء وخاتي ملفعة خضراء وشايل سبحة وكان ماشي حفيان!! انا قلبي رجف وانفاسي اتسارعت!! واول حاجة خطرت ف بالي انو ابوي حيعرف بعملتي العملتها!! وحأصغرو قدام الناس!!؟ لحدي م استغرو قدامي وقال السلام عليكم!! رديت السلام!! اوالدرويش قال لي قبلي يد الشيخ!! عاينت لي بإستغراب!! وابوي كان ساكت!! بس الشيخ قال لينا اتفضلو ع بيت الضيافة!! ابوي قال ليه نحنا جاين من بعيد!! وخايف ع بتي!! الشيخ قال ليه عارف!! بس خليها ترتاح وتدخل لابونا الشيخ جاهزة!! انا بيني وبين نفسي قلت هم كم شيخ اصلو!! اتخلعت لم نفسي ردت علي وقلت مهما كترو م حيفيدو ابوك بشيء!! انتي بقيتي ملكي!!

انا من الخلعة ادسيت ورا ابوي وبقيت اتلفت!! الشيخ ادى ليه شافع وقال ليه وديها لحاجة مريم تجهزها!! قلت لابوي موديني وين؟؟! واجهز لشنو؟؟ الشيخ ردا نيابة عن ابوي! وقال لي م حتدخلي للشيخ لا وانتي طاهرة!! اغتسلي واخدي راحتك وابونا الشيخ لم يفضى ح ندخلك ليه!!؟
ابوي هز لي راسو وقال لي امشي معاه!! كنت مترددة بس مشيت!!
نواصل بعدين
يتبع ……..

الجزء السابع عشر من رواية انتقام قرين​

كذبتي طالت واليوم المستور حيتكشف للعلن!!؟ والمصيبة انو معاي ابوي!! بس نقول **** يجيب العواقب سليمة!!؟ مشيت مع الشافع ودخلنا بكم ممر!! لغاية م وصلنا حوش كبييييير كدا مفصول عن الرجال!! وكلو ***** وحريم بمختلف الاعمار!!؟ ف كم مره كانو مركزين معاي!! بس انا م وقفت واكتفيت بالسلام من بعيد!! وتابعة الولد لحدي م دخل برندة كبييييرة كدا معروشة بزنك!! واشر لي بيدو قال لي هديييك حاجة مريم!! كان عندو نخناخة ف صوتو الطفولي الحلو داك!! لو كنت ف وضع غير الانا فيه دا كنت هريتو كلام وونسة!!؟ جيت عليها وهو من بعيد قال ليها دي من طرف ابوي الشيخ فلان!! قال ليك جهزيها!! سلمت علي وكأنها بتعرفني!!؟ كانت طيبة شديد!! وف ثواني قدرت تمتص خوفي!! بل حسيت وكأني بتكلم مع امي!! دخلت معاها وسألتني عن قصتي والحصل معاي!! وقلت جزء من الحصل بس مستحيل احكي عن السبب الرئيسي!!؟ قالت لي **** يعفاك ويشفاك!! العين والعارض وعدم التخصين كلها اسباب للمس الشيطاني!! (حفظكم ****) بس انتي اجتهدي ف ايمانياتك وقربي من **** علشان يبعد عنك الشيطان!! اعوذبالله منه….دردشت معاها ووصفت لي الحمام! **** يكرمكم…وشددت علي ف موضوع الغسل!! ولدرجة انها واقفة لي برا!! وبتزكر فيني!! غسلي شقك الايمن!! خللي شعرك ومابين اصابعك العشرين! م تنسي؟! زكرتني امي ف مرحلة معينة من عمري كانت بتقول لي نفس الشيء!! وسبحان **** بتقيف نفس وقفة حاجة مريم دي!! بس بتها نست تعاليمها وتابعت الفارغة ولهو الدنيا!!؟ بعداك طلعت!! وساقتني غدتني مع مجموعة ظاهر عليهم انهم ضيوف زي وجاين من بعيد!! وبقو يتونسو وانا بسمع فيهم م قادرة اخد وادي معاهم بالجد تفكيري مشتت!! وبعد شربو الشاي وبعض منهم مشو وفضلت انا ومعاي كم واحدة!! واحدة منهم قالت لي خبارك م شربتي الشاي بكون برد!! ابتسمت وقلت ليها بشرب بارد انا!! ورفعت كبايتي عن التربيزة وبديت اشرب!! سكت شوية وقالت لي عندكم زول عيان!! قلت ليها انا!!؟ بحنية كدا قالت لي واا شريري!! م تستاهلي ي السمحة!! لا الناس بقت م بتقول ماشاءالله!! ف سري قلت ياريتها لو كانت عين!! بس قلت ليها **** يلطف بينا ويشفي كل مريض!! قالت لي يامين!! قالت لي لحظة ولا شنو!! قلت ليها ب استنكار!! كيف يعني لحظة!! واحدة ضحكت وقالت تقصدلك هبشة هبشة!! انا ابتسمت وقلت عني شنو هبشة!!؟ حاجة مريم قالت لي يقصدو انو زول سحرك ف حاجة واتمسيتي بسببها!! قلت ايواااا!! م عارفةوالله بس احتمال!! وبقو يتكلمو عن السحر وم السحر!! والفضول انتابني!! قلت ليها وانتي جاية عافية!! قالت لي ي بت امي الجاتنا تجي للعدو!! قلت ليها خير ان شاءالله!! مالك؟؟! قالت لي اخوي!!! وفكت ف البكاء!! بعد تعب حتى سكتناها!! بس لم عرفنا قصتو بالجد كلنا اتأثرنا!! تخيلو كان مترجم ف لندن!! وماخد الجنسية البريطانية!! وعمرو ف اواخر التلاتينات!! وجا راجع السودان بعد غياب دام لاكتر من ستة سنة!! واهلو اصرو عليه انو يتزوج!! لانو العمر ماشي!! وغير كدا عايزين يربطوه بالبلد علشان لم يعمل ليه بيت اكيد حيرجع وحتى لو ساقها معاه مصيرو يرجعها تشوف اهلها وهم بكونو مطمئنين عليه اكتر!! وكأنو حاسي بأنو حيصيبو مكروة!! بس قدرو يقنعوه!! وخطبو ليه بت اهلو وحددو العرس ف زمن قصير!! ومع حس الاغتراب والراحة كان ماشاءالله يضوي زي الدهب!! صبحية حنتو لاقاه زول من حلتنا!! كان صاحي من النوم!! وم لابس لا قميص! الا الفنيلة الداخلية!!؟ وخبطو ف اكتافو بيدينو الاتنين!! وقال ليه عليك النبي العروس انت ولا هي!!!؟ والراجل باب البيت م حصلو اخوي جاتو زمة وبقت ليه بطعنا!! ويوم العرس نحنا راقدين معاه ف المستشفي!!؟ بس جاهو شلل!! اكتافو اتعسمن مع الرقبة وبقي مكُوتف!! ولا بقدر يلف يمين لا شمال!! الدكتور قال التهاب ف النخاع الشوكي!! واحتمال الجسم كلو ينشل!! والعرس طرشق والسفر اتنسي وبقينا جارين من دكتور لدكتور!! لحدي م لقينا زول وهدانا ع الزريبة!!! ومن اول جية اخوي بقي يقدر يحرك رقبتو بسييييط بس!! ومن الزمن داك نحنا كل مرة جايبنو الزيارة وحالو ماشة تتحسن الحمد***!! بالجد اتأثرت بقصة العريس!!؟ بس صدق **** **** الكريم لم قال العين بتدخل الجمل القدر!! وبني آدم القبر…بس انا م معيونة!! انا براي مشيت فتشت المصائب!! الونسة طالت والحكاوي المحزنة كترت!! وف منها ح اتناولو ف قصص قائمة ب زاتها…!؟
المهم المغرب اذن!! قمنا صلينا!! وانا ب جبيرتي ديك بليتها بالموية لم اغتسلت!! وشكلي ح اطلعها قريب ولا يبدلوها لي ب واحدة تانية!! لانها اتملت موية!! المهم صليت!! وصوت الطلبة الحفظة كان طاقي!! ولو عايز تتكلم مع زول جنبك الا تقرب تنوح!!؟ المهم جات حاجة مريم! وقالت لي ابونا الشيخ عايزك!! قلت ليها شنو!!؟ واعادت لي الجملة!! سمعتها بوضوح المره دي!! وقمت معاها!! وبعد مشوااار م طويل! وصلنا حجرة الشيخ!! سلمت وانا وراها وساااكتة!! ردا السلام!! وكانت الغرفة شبة مضلمة!! م فيها كهرباء!! شكلها قاطعة ولا م موصلين م عارفة!! بس ف فانوس شغال!! قال لينا تعالو لقدام!! وانا بقيت افتش ابوي بين الحاضرين!! صوتو جاني من وراي وقال لي انا موجود!! اتلفت بلهفة عاينت ليه!! ولم اتزكرت الممكن يحصل ابتسامتي اتكسرت!! والشيخ بيتكلم معاي وانا م جايبة خبر!! لحدي م حاجة مريم نبهتني!! واعادت لي الكلام!! حتى انا ركزت معاهم!! قال لي اقعدي!! قعدت ف الارض!! وهو كان قاعد ف كرسي ولا طين منحوت ع شكل كرسي م عارفة!! م انتبهت ليه!! مسك عصايتو وخبطني كم خبطة ع راسي! بس كانو خفاف!! وكأني بنضرب من *** صغير ولا ب عود كبريت طوييل!! المهم م وجعتني!! وفتح لي الكتاب!! عاين لي مسافة!! وقال لي اسمك منو!!؟ قلت ليه ليلى!!؟ بقى يقرأ ف سرو!! وبتهزى يمين شمال!! وتاني يقرا قراءن بصوت جميل خلاص!! ويدعي لي!! وانا ولا كأني هنا!! م حسيت بأي شيء!! وهو زاتو كان مركز معاي ومع تصرفاتي!! بس كنت بتسائب كتير ودموعي نازلة!!؟ الشيخ قال لي اول مره حسيتي بأنك م طبيعية متين!!؟ قلت ليه من شهرين تقريبا؟؟! قال لي والاعراض كانت شنو؟؟ وريتو الشيء بدأ كييف!! بس م زكرت موضوع الرمالية!! ولا حتى موضوع الثعبان الفي يدي!! وقلت ليهم بس الهلوسة والاحلام البشعة والحاجات الخفيفة خفيفة!! قال لي بس!!؟ قلت ليه ايواا! ابوي اتدخل وقال ليه وموضوع الدهب!! انا قلبي بقي يضرب!! وقلت خلاص ابوي حيخربها!! الشيخ قال لي باتو دهب!! ابوي وراهو الحاصل كما قالتو ليه لمياء!! وانو الدهب حق جماعتي!! الشيخ استغرب وقال لي اديتيهم دهب!!؟ انا خفت بس قلت ايوا!! الشيخ ختى عصايتو وقال لي والمقابل شنو؟؟ قلت م عارفة م طلبو شيء!! عاين لي مساااافة…وكأنو عرفني بكذب!! قال لي الموضوع معقد بس ببركة رب العالمين ختعالجي!! بس انتي اتعاوني معانا!! ونادي كم مساعد وحُوار ليه وبقو يقرو!! ومره هو براه ومره هم برددو معاه!! وانا شبه طبيعية!! بل نفسي بتقول لي!! حتشوفي الحيحصل؟؟! حتشوفي الحيحصل!! وانا خايفة وبقيت ارجف!! والشيخ انفعل شديد ف التلاوة!! وبضربني بالسبحة ع راسي وانا مع كل ضربة بشهق!! م بتكون حارة!! بس بتخلع منها!! بعداك الشيخ وقف!! واداني موية اشربها واتمسح بيها واكبها ف رأسي!! وفعلا عملت الطلبو مني!! وانا فجأة بقيت م بقدر ارفع عيوني من الارض!! ورقبتي كأنها مكسورة!! رامياها قدامي!! ولم رجعو يقرو تاني!! انا بياض عيوني اختفي وبقت عيني كلها سواد!! الكلام دا انا م متزكراه واصلا ف وقتها م كنت واعية ولا عارفة انا بسوي ف شنو!! بس ابوي كلمني لانو كان معاي!! والشيخ قام ع حيلو وبقي يلف فيني بيقرا وبيضرب بالسبحة وانا صرخت شدييييد ولمن الزبد طلع من خشمي!! واغمى علي!! بعد فتحت لقيت نفسي ف غرفة كدا وحاجة مريم كلمتني بالحصل!! وجابت لي موية شربت وساعدتني ف الوضوء!! وتاني رجعوني للشيخ!! كان عندو حلقة تلاوة!! بس شكلو كلمهم اني اذا فتحت يرجعوني ليه!!؟

وفعلا جا علينا ودخل الغرفة القبيل!! وقال لي اقعدي هنا!!؟ قعدت!! وشال موية كدا جنبو ف كرستالة برش فيني بنفسو وبيدعو بأدعية حقت سحر وحسد وكلام من دا!! وبيناتهم ايات قرأنية!! وانا رجعت لطبيعتي وكلامو م جاب معاي اااي نتيجة!! قعد ف كرسية وعاين لي مسافة!! وقال لي انتي ممسوسة بس دا م مس عادي!! انتي عملتي شنو؟؟!
وانا قلبي بقي يضرب واتلفت عاينت لابوي!!؟
نواصل بعدين
يتبع …….

الجزء الثامن عشر من رواية انتقام قرين​

اقول شنو؟ ابوي كيف حستقبل الصدمة دي!! ولسه بعاين ليه وم قادرة ابعد عنو نظري!! الشيخ اعاد لي السؤال!! وقال لي عملتي شنو ف نفسك!!؟ انا بلعثمة قلت ليه ولا شيء!!؟ قال لي المس بيطلع بالقراءن والتحصين بس انتي كلو م بجيب معاك نتيجة!!؟ اكيد ف حاجة نحنا م عارفنها!! ورينا ع شان نقدر نساعدك!!؟ اخدت نفس طوييييل وقلت ف سري كيف اوريهم!! بقيت اضحك؟؟ اي بقيت اضحك براي!! وقلت بصوت مسموع م عارفة تقولي ليهم عملتي شنو!!؟ انا بقيت ارجف واتبشتنتا!! م علشان الكلام القلتو غير ارادتي!؟ بس اذا تاني نطقت وقلت الحصل بالتفصيل!! ابوي كيف حتكون ردة فعلو؟! فغطيت خشمي بيديني الاتنين!! وابوي كان مخلوع من تصرفاتي!! افتكرني جنيت!! بس الشيخ عرف انو م انا الاتكلمت!! وقال لابوي بتك ف مراحل متأخرة!! ووصلت لدرجة انو يتكلم بلسانها؟! بس عملت فائدة بجيبتها لهنا!! وبإذن **** تطيب!! ابوي جا علي ملهوف ومسكني!! وقال لي انتي كويسة!! انا ضاغطة ع اسناني ع شان م اطلع خارجيات!! وف صوت جواي بقول لي ابعديه من هنا سريع وإلا!!؟ انا بعد وإلا دي!! دفرت ابوي مني م اقصد اذيتو!! بس اهون علي بعدو من يأذوه الجماعة ديل!!؟ لاول مره ف حياتي اشوف دمعة ابوي!! وبسببي!! ف عذاب اكبر من كدا!!؟ بعد تصرفي دا اتأكد من اني جنيت!! لانو عارف مكانتو جواي!! واني مستحيل ارفع صوتي عليه!! فما بالكم برفع يدي!! وياريتها كانت اتقطعت قبل م تتمد ع ابوي!!؟ الشيخ ساعد ابوي ع شان يقوم من الارض!! وانا م عايزة ارفع رأسي من الارض!! م لاني م قادرة بس مكسوفة من ابوي!!؟ الشيخ ساق ابوي وطلع بيه برا!! خلوني ببكي!! نفس الصوت قال لي حتتربطي هنا!! وانا ببكي بحرقة ع العملتو ف نفسي!! جا داخل الشيخ ومعاه كم واحد وقال ليهم ودوها!! انا اتخلعت وقلت سايقني وين؟! ابوي من بعيد قال لي م تخافي!! م بيأذوك انا معاك!! انا بقيت ارفس برجولي وبلاوي فيهم ع شان م امشي معاهم!! بس ساقوني غصب!! وبقيت انادي ف ابوي وضاع بين الزحام وم لمحتو تاني؟! دخلوني غرفة كانت مظلمة شدييييد!! ومخيفة!! وطلعو وقفلو الباب فيني!! بقيت اضرب واقول ليهم طلعوني من هنا!! بس ماف زول جاني!! وفضلت الليل كلو منطوية بطرف الحيطة وبشهق من شدة البكاء!!؟ والشيء كان راقد جنبي!! م شايفة ملامحو بس حاسة بوجودو!! حاسة بيهو قصاد وجهي!! وبسمع همس بس م قادرة افرز الكلمات!!؟ بس نفسي قالت لي حتفضلي اسيرتي!! للابد!!؟ انتي سلمتيني نفسك بنفسك!! انا بقيت اضرب جبيني ف الارض بقوة!! بس صدقوني م كنت متألمة!! وبغطي اضني ع شان م اسمع صوتو!! بس الصوت كان جواي!! والواطا بدت تتكشف!! والتشوه الفي الحيطة بدأ يظهر لي…فعرفت انو الصباح جا!! وانا لمن عيوني بتزغلل من شدة الصداع!! لم الشمس شرقت سمعت صوت ابوي بناديني وبقول لي ليلى انتي سامعاني!! كيف اصبحتي!! انا كنت ف حالة مزرية؟! وجسمي كلو واجعني…لم م رديت ابوي خاف علي!! ومشى ناداهم يفتحو لي الباب!! وكانت الصدمة!! لقو دمي مالي المكان!! بالجد م كنت واعية بنفسي ولا عارفة انا عملت شنو!! بس جبيني كان معوق شديد وجسمي كلو جروح!! كأني هاجم علي حيوان مفترس!!؟ ابوي جا جاري علي ملهوف!! وحضني وبقول لي دا شنو العملتيه ف نفسك دا ي بتي!! وعاين ليهم وقال بإنفعال؟! انا م قلت ليكم م تخلوها براها!! وشوية كدا وحوار الشيخ جا!! وطلب من الحفظة المعاه يجيبو مرا تساعدني!! وجاتني واحدة شفتها امس مع حاجة مريم! شالوني وقالت ليهم اتبعوني!! وودوني نفس البيت الكان اغتسلت فيه امس!! وحممتني وغسلتني!! وانا بعاين للكدمات وعلامات الجروح ف جسمي!! وقدر م حاولت اتزكر حصلت كيف م اتزكرت!؟ بعداك رجعوني لنفس الغرفة!! بقيت اصرخ واقول ليهم م عايزة ادخل ليها تاني حيقتلوني!!؟ ولمن برفع رجولي ف الحيطة وبرفض ادخل وهم شايلني ومدخلني غصب عني!! وياريت لو اكتفو بدخولي بس!! ربطوني ف اعمدة!!؟ اي انا اتربطت زي البهيمة ي جماعة!! وياريت لو جان جنزيز!! كان ح اقول بقيت مجنونة!! بس بحبال!! وكأني فعلا بهيمة خافنها تروح!!؟ وانا معلقة وايديني مقيدات بقيت اعاين لنفسي ودموعي بتتقطر قدامي!! وابتسمت وقلت معقولة دا الكنت عايزة تحصلي عليه…ف صوت راجل قال لي لسسسه م شفتي شيء!!؟ رفعت راسي بس م شفتو!! اتلفت بكل الاتجاهات م شايفة إلا الجدران المتشققة!!؟ كنت باركة ف الارض وايدي مربطة ف الاعمدة!! وبسبب رفعتهم الطويلة حسيتهم حبتخلعو من مكانهم!! اما يدي المكسورة بقيت م حاسة بيها!! اظنها اتشلت؟؟! حاولت اسجد لربنا واطلب مني يسامحني ويخفف عني العذاب دا!! بس حتى الارض رافضة جبيني!! وم قدرت اصل الارض!! بسبب ربطة الايدين!! شكلهم قاصدين يبعدو رأسي عن الارض ع شان م اضربو فيها تاني!! بس م عارفين هم ألموني قدر شنو!!؟ وفضلت ع الحالة دي لمدة طويلة م عارفة كم ساعة…بس كانت من اطول الساعات واصعبها!! بعداك دخل علي الشيخ وحيرانو!! قالو لي استخدمنا معاك اسلوب اللِين!! بس انت م راضي تطلع!! حنعذبك بالقرأن وبالإيلام الجسدي لمن تطلع!!؟ انا عاينت ليه ب احتقار!! وقلت انقذ بتك حواء من الموت اول!!؟ م عارفة انا قلت الكلام دا كيف؟؟ وحواء دي منو انا زاتي م بعرفها!!الشيخ خبطني ع رأسي بالسبحة!!؟ وقال لي لعنة **** عليك ي لعين!! وطلب من المعاه يمشي ينادي الخليفة فلان! والشيخ فلان!! وانا بقيت اضحك!! وبرفع عيوني بصعوبة!! وكل م احمر ليه بيضربني بالمسبحة ع جبيني!! وفعلا المشياخ جو!! والغرفة اتملت بيهم!! وكأنو بيهمسو همس ف حضرة الخليفة!! نظام ادب كلام وكدا!! وبقو يرقو فيني وبدو من سورة البقرة وانا طبيعية!! لحدي م بقى يقرا ف اية الكرسي وانا انفاسي اتسارعت!! وبقيت احس بنار باقة ف جسمي!! وعرقي بيتصبب!! بس كنت بقاوم فيهم!! لحدي م وصل لخواتيمها وانا خلاص بقيت م واعية بنفسي!! واكورك واطلع كلمات م مفهومة!! وهم بيضربو فيني وبيقرو!! وف ضجة مبالغ فيها ف دماغي! وفقدت الوعي!! وفضلت ع الحالة دي بعد كذا محاولة منهم!! بتعب وبكورك وبغمر وماف اي استجابة للتلاوة!! والشيء الجواي م عايز يطلع!! فالشيخ قال لابوي الشيطان الجواها داحيطلع اذا عرفنا هو دخل كيف؟؟! لانو لو كان عين ولا عارض كان من اول محاولة طلع وفارق الجسد!!؟ بس نحنا بنقرا وهو بيظهر وتاني بتخبى جواها وكأنو مشاركها شيء نحنا م عارفنو!! حاول ساعدنا ع شان نساعد بنتك!! ابوي اتصل ع ناس البيت وكلمهم بالحصل!! وكلهم م عارفين شيء!!؟ بس لمياء اتزكرت اني كنت عايزة احكي ليها شيء بخصوص الموضوع دا!! يوم امي كوركت الصباح داك!!!؟ وقالت لابوي انا جاية عليكم!!؟ رفض بس بحنكتها قدرت تقنعو وقالت ليلى محتاجة لواحدة فينا!! وابوي بعد الحصل معاي كان خايف علي افضل براي!! فوافق ف الاخر!! وجات علينا ف صباح اليوم التالي!!؟ لم شافتني صرخت وغمرت!! م اتخيلتني بالمنظر كدا! كان منظري بشع شديد!! وجهي مشوه بالكدمات وجسمي من ضرب المشايخ ورمان!! وعيوني من السهار ومانة وعاملة هالات سوداء!! وشعري شبه منكوش؟؟ بالجد كنت ف حالة يرثى لها!! لم شفتها م قدرت اتكلم بس حضنتني وبكت بصريخ!! وبتقول لابوي عملتو فيها شنو!! دا شنو ي ابوي!! كيف تسمح يعملو فيها كدا!! انا ح اشتكيهم كلهم!! واصابتها حالة هستيريا!! وقربت تفوت!! بس ابوي بعد تعب قدر يبعدها عني!! كانت حاضناني شديد!! وبعد م هدت وفهمها الحاصل!! جات راجعة لي تاني….وتاني حضنتني!! وقالت لي دا شنو الاصابك دا ي ليال!! م كنتي كويسة ي اختى!! وانا بين واعية وم واعية!! قلت ليها لموو!! وفكت ف الجعير!! المهم طلعوها وجوني حوار الشيخ ومعاهم مره حاولت تأكلني بس انا برفض!! وشربتني موية!! ومن تصل حلقي برجعها!! وكأنو حلقي م عايز يستقبلها!! م بعرف كابين فيها شنو!! المساء كدا لمياء دخلت علي تاني!! وكانت حالتها افضل من اول!! سلمت علي ف جبيني وسألتني عن صحتي!! وقالت لي انتي كويسة!! اؤمأت براسي!!؟ قالت لي احكي لي الحصل معاك ي ليلى ف شيء غريب بيحصل معاك وم لاقين ليه تفسير!! انتي عارفة السبب شنو؟؟! هزيت ليها رأسي بمعنى ايواا!! ظهرت ع ملامحها الخلعة!! وقالت لي زي شنو مثلا!!؟ م قدرت اتكلم بس عاينت ليدي الشمال!! م فهمتني!! وقالت لي احكي ع شان ينزلوك عارفة انك متألمة بس وريني!! تاني عاينت ليدي!! عاينت ل يدي بإستغراب!! وقالت لي مالها يدك!! واجعاك!! هزيت راسي بمعني لا!! قالت لي بإستنكار ليها علاقة بالموضوع دا!! انا دمعتي جات نازلة!! وأومأت ليها برأسي!! لمن فتحت خشمها من الخلعة!! وقالت لي كيف!! بكيت بحرقة!! كيف اوريها!! كيف اقول ليها مشيت لمشعوذة تعلمني السحر!!؟ قالت لي كيف ي ليلى!! بصعوبة قلت الاتفاق!! قالت لي شنو!! وكان صوتي خافت شديد وختت اضانها قدام وجهي ع شان تسمعني!! جاني احساس اني اقضم اضانها وم افكها الا وصيوان اذنها جوة خشمي!! وقربت اعضيها لمن فتحت خشمي!! بس هي زحت راسها وقالت لي م سامعة منك شيء!! عليك **** حاولي كلميني ع شان نقدر نساعدك!! انا اتنهدت بصعوبة وقلت الاتفاق!! كان صوتي شوية واضح!! قالت اتفاق شنو!! انا ربطو حلقي!! وبقيت م قادرة اطلع ولا كلمة!! وهي ملهوفة وبتستعجلني ع الكلام وبتقول لي واصلي!! بس صدقوني غالبني الكلام!!؟ وبقت تخمن براها!! وبتسألني عن نوع الاتفاق!! وبعد كذا تخمين وانا بهز ف راسي بمعنا لا!! سكتت مسافة وفتحت خشمها وقفلتو!! زي العايزة تقول شيء بس اتراجعت!! وجات طالعة!! وجنب الباب وهي ممسكة بضلفتو!! اتلفتت علي وقالت لي اتفاق بينك وبين الشيطان!!!؟ وانا مكسوفة وكلي ندم هزيت رأسي بمعنى ااااي!!؟
نواصل بعدين
يتبع …….

الجزء التاسع عشر من رواية انتقام قرين​

جا اليوم الماحسبت ليه حساب!! اودي وشي وين!!؟ ابرر بشنو؟! نظرتهم لي حتكون كيف!! **** اقتلني وريحني من العذاب والخوف الانا عايشاه دا!! لمياء م استوعبت كلامي!؟ ودعكت جبينها!! وقالت انا بهلوس!! وقبل م تجي طالعة!! سمعتني شهقت!! وكأنو روحي حتطلع!! جات جارية علي وبتقول ليلى مالك جاتك الكتمة تاني!! انا هزيت راسي بمعني لا!! حتى هي شالت نفسها وختتو!! وقالت لي ح اوري ابوي يوقفو المهزلة دي ويطلعوك من هنا انتي م مجنونة!! وجات ماشة!! قلت ليها الاتفاق!! اتجمدت ف محلها وم اتلفت علي لقرابة الدقيقة!! اظنها بتغالط ف نفسها!! وبتحاول تلملم شتات افكارها!! واتلفت علي بالبطىء!! وكان عيونها بدمعو!! وقالت لي انت فعلا قبل شوية قلتي لي اتفاق مع شيطان ولا انا كنت بهلوس!!؟ انا م جاوبت واكتفيت بالبكاء!! وصرخت بأعلى صوت لي!! وهي بركت ف الارض من واقع الصدمة!! البرا جو جارين!! وبسألو فيها عن سبب صريخي!! بس كانت داخلة ف حالة!! وكانها اتشلت!! ودموعها بتنزل وبتعاين لي بطريقة غريبة!! نظرة اول مرة اشوفها فيها!! محتقراني بتكون ولا شفقانة علي!! ولا بتتأسف ع الحالة الوصلت ليها من الجهل والتخلف!! ف بعض من الحاضرين جو يقرو لي وبضربو فيني بشالاتهم!!؟ وف واحد ساعد لمياء انها تقوم من الارض وطلعها برا!!؟ وانا بقيت افكر حتوري ابوي!! اكيد حتكلمو!! وحاجة زي دي مستحيل تتخبي!! بس اذا ابوي عرف حيحصل ليه شنو؟ اذا لمياء انهارت!! وقربت تخش ف حالة!!؟ جاني حوار الشيخ وبقي يتكلم معاي!! ساعدينا ونحنا عايزين مصلحتك!! وانتي م عايزة تطردي اللعين دا من جسدك!!؟ وانا بسمع ف كلامو!! وف سري بقول اذا انا م قادرة اساعد نفسي كيف انتو حتقدرو!! ودنقرت رأسي!! ولم م لقي استجابة مني طلع!! بعد ساعة تقريباً جات لمياء راجعة لي تاني ولمن وجهها ورمان من شدة البكاء!! لحدي م قعدت ف الارض جنبي انا م قدرت ارفع عيوني واعاين ليها من شدة م مكسوفة!!؟ بقت تبكي وتشهق!! وقالت لي قصرنا معاك ف شنو!! وختت يدها ع خشمها!! وقالت لي خلينا نحنا !! **** شنو الما اداك ليه!! ع شان تشركي معاه شيء!! وكمان شيطان!! المطرود من رحمة ****!! انتي واعية بالعملتيه دا!! زانفعلت شديد ومسكت كتفي وقالت لي!! كيف تسلمي نفسك ليه!! انا م قادرة استوعب!! ومن وين جبتي الجرأة دي!! ع شان تخشي ف اتفاقيات ومعاهدات!!؟ معقولة انتي ليلى!! معقولة رباك الراجل العمرو م فوت صلاة الجماعة!! معقولة تعملي ف نفسك كدا!! طيب نحنا ذنبنا شنو!!؟ انا اكتفيت بالبكاء!! قالت لي م تبكي!! كان لازم تحسبي حساب يوم زي دا؟؟ انت بقيتي مجنونة الا ربع!! بس صدقيني جنيني بحق وحقيقي لم سلمتي نفسك للشيطان!! بس الحسرة ف انو المجنون **** رفع عنو العقاب!! وانتي مجنونة وحتتعاقبي اشد العقاب!!؟ يعني حتى الجنون م حيفيدك!! قشت دموعها!! واتنفست بصعوبة واستغفرت ****!! وسكتت لكم ثانية!! وقالت لي حصل كيف ووين الاتفاق دا!! وسببو شنو الناقصك شنو!!؟ ومشيتي لشيطان يكملو ليك!!؟ انا م قدرت اجاوب!!؟ نهرتني وقالت اتزفتي وقولي!!؟ انا قلبي وجعني وكنت ندمانة شدييد!! ولكن حيث لا ينفع الندم!! قلت ليها بسبب الودع!! وقبل م اقفل خمشي لطشتني كف لمن رقبتي طقت!!وقالت لي بإستنكار واحتقار؟! عصيتي **** ع شان معصية!!؟ تتفقي مع شيطان ع شان ودع!! ودع ي ليلى!! انت نصيحة!! لالا اكيد م طبيعية!!؟ انتي مستحيل تكوني طبيعية!! م خجلانة من نفسك؟ رفعت راسي من ذقني!! وقالت لي م تبكي!! الببكيك شنو؟ مذ انتي عايزة كدا!! دا استهتارك وعدم جديتك وتخلفك وصلك للمرحلة دي!! وقامت ع حيلها وختت يد ف نصها والتانية ف راسها وقالت اخبر ابوي كيف!!؟ كيف حيتقبل حكاية انو بنتو تطلع دجالة ومشعوذة!! قلت ليها و**** انا م كنت قايلة الامور حتصل للمرحلة دي!! بس الامور طلعت عن السيطرة!! قالت لي بنهرة وكمان عندك عين تحكي!! وبتبرري لنفسك! انتي م حاسة بحجم المصيبة الوقعتينا فيها!!؟ وكمان مبسوطة بالدهب الجابوه ليك!! ومسغبيانة!! وتكذبي علي انا!! قلتي شنو!!؟ م عارفة ادوك ليه لشنو!! يخس عليك ي ليلى بالجد انا خجلانة اقول انك اختي!! بس حقيقة النار بتلدي الرماد!!؟ بكيت وقلت ليها م تكلمي ابوي!!؟ قالت لي بغضب لسسسه مصرة تكذبي!! لمتين؟؟ لمتين حتستغبيهم!! لمتين حتألفي قصص!! وهو انتي احتمال تموتي بين يوم وليلة ولا تجني!!؟ عايزاني استحمل عواقب موضوع زي دا!!؟ لازم ابوي يعرف!!؟ بس اول وريني كيف عقدتي الاتفاق دا!! ولقيتيهم وين وكيف؟؟! قلت ليها مشيت لرمالية!! قالت لي بإستنكار!! كيف يعني رمالية!! قلت ليها زي الوداعية بس بتشوف بالرملة!! لمياء بقت تتشهد وتستغفر!! وتضرب يد بالتانية!!؟ وقالت لي انتي جاية من اي كوكب!! انا م حذرتك قبل المرة من قعدة الوداعيات والكلام الفارغ داك!! معقولة تمشي لرمتالية ولا زفت معاك!!؟ انا دموعي نزلو!! قالت لي تبكي ع شنو!!؟ اتنهدت وقالت لي تاني حصل شنو؟؟ وريتها لاقيتها وين وكيف وسألتها اذا ممكن اتعلم قراية الفنجان!!؟ لمياء بقت تبكي!! بكت بحرقة!! وقالت لي انا خايفة عليك!! بعدين كيف حتواجهي ****!! كيف حتردي اذا سألك عن العملتيه دا!!؟ قالت لي بنبره حزينة انتي عارفة!! اذا قعدتي مع وداعية بس!! **** م حيقبل ليك صلاة اربعين ليلة!! انتي عارفة اذا صدقتي كلامهم معناه كذبتي الرسول(ص) بالجد انتي جاهلة ي ليلى!! ودا كلو حصل ونحنا معاك ف البيت وم جايبن خبر!!وبعد محاضرة طويلة قالت لي واصلي!!؟ قالت لي واصلي!! كيف الوداعية خلتك تتفقي معاه!! قلت ليها مشيت ليها ف بيتها!!؟ لمياء وقفت قصادي وبتعاين لي بصدمة!! وكأنها بتقول ف سرها مستحيل دي تكون اختي!! قالت لي مشيتي لمشعوذة ع شان تعلمك السحر!!؟ انا بكيت!! وانكسفت شديد!! قالت لا حولا ولاقوة الا ب**** العلي العظيم…اللهم لا نسألك رد القضاء ولكن اللطف فيه!!؟ انتي عملتي دا كلو ي ليلى!! هزيت ليها راسي بمعنى ايووا!! قالت لي صدقيني تستحقي الموت!!؟ موتك اصغر كفارة ممكن تكفري بيها عن ذنبك!! قلت ليها وانا اتمنيتو كمان!! بس **** بعاقب فيني وحتى الموت م عايز يجيني!!؟ قالت لي وكيف تمالاتفاق!! حكيت ليها من لم تخلت ع المرا ومسكت يدي والثعبان البقيت اشوفو ف يدي!! وكل الحاجات المهمة زكرتها!! لمياء بتسمع ف كلامي وم مصدقة!! ولمن بتفتح خشمها معاي!! ومرات تخت يديها ع راسها!! وبكت بحرقة!! قالت لي **** يتوب عليك!! بس انتي اتماديتي كتييير!! قالت لي طيب انتي م عارفة رده الفعل لتصرفك دا شنو!!؟ م عارفة انو ممكن يأذوك ويأذو عائلتك!!! قلت ليها هي قالت لي الموضوع عادي!! واذا نفذت طلباتهم الصغيرة البسيطة دي م حيأذوني وحينفذو طلباتي!! وح اقرا الفنجان لاي زول!! بس ف طلبات يمكن تكون بسيطة ف نظر الناس بس انا م قدرت اعملها!! م بقدر اخت حنة!! م بقدر اشرب سجائر ولا خَمرة!! م بقدر اسمح لي يمارس معاي الجماع ف المنام!! لمياء اتخلعت!! ولمن بقت ترجف!! قالت لي انتي منو!! انا دموعي نزلو وقلت ليلى!!؟ قالت لي لا انتي م اختى!! اختي م بتعمل كدا!!؟ بعد عرفت الحصل قالت لي عايزة رقم المره الرمالية!! بس انا م حافظاه!! طلبت مني اوصف ليها البيت!! وفعلا وصفتو ليها!! قبل م تطلع قالت لي ح اساعدك ع شان تتعالجي!! بس صلحي علاقتك مع **** وتوبي ليه واطلبي المغفرة!! يمكن تناليها!! وجات طالعة قلت ليها راجعة!!؟ م ردت علي!! طلعت وقفلت الباب وراها بقوة!! والصوت الجواي قال لي حتخسريهم واحد ورا التاني وحنفضل نحنا الاتنين بس!! وسمعت صوت ضحكات بس م قدرت احدد مصدرها جاية من اي اتجاة!! واحتمال كبير تكون جواي!!؟

بعداك اتضح انو لمياء كلمت حسين اخوي بكل الحصل!! وانصدم بالحقيقة زي لمياء واتوعدني بأنو حيقتلني بعد يشوفني!! وطلبت منو يقابل الرمالية وتوريه طريقة يطلعو بيها الشيء دا مني!!؟ بس كانت الفاجعة لم وصل البيت ولقاه مقفل!! سأل الجيران قالو ليه صاحبة البيت الرمالية لقوها مشنوقة ف غرفتها!! وكل الادلة بتدل ع انها انتحرت!!؟ بس انا مستحيل اصدق انها انتحرت!! م من النوع الضعيف!! اكيد ماف شيء بخليها تقدم ع الانتحار!! إلا اذا ف شيء قتلها ولا ارغمها ع الانتحار!! عرفتو اقصد منو صاح!!؟
نواصل بعدين
يتبع ……..

الجزء العشرون من رواية انتقام قرين​

بطبع النفس البشرية بتميل للامور الخارقة للعاادة!! وف الغالب الشيطان بزينها وبجملها لينا وبيغوينا ع شان نعملها!!وم بنعرف عظم الذنب الارتكبناه ف حق نفسنا الا بعد فوات الاوان؟! ودا بالضبط الشي الحصل معاي؟؟ انا م بغنط من رحمة **** لانها واااسعة!! وان شاءالله تبقى عظىوعبرة لي وللغير!! بس هل انا ح اقدر ا سامح نفسي!! هل حياتي حترجع طبيعيية زي م كانت!! اكيد لا؟!! بس ح احاول اتناسى الحصل وابدأ صفحة جديدة!! دا لو اتكتب لي عمر طويييل!! وم متا بسبب العملتو ف نفسي دا! مع اني استحق الموت!! لكن امنيتي الاخيرة انو **** يقبل توبتي قبل م اموت!!؟جو طلبة شكلهم!! كانو لابسين عراريق متدرجة البياض!! اتنين مسكو يديني واتنين بحلو ف الحبال الانا مربوطة فيها وواحد واقف ليهم جنب الباب!! والاخير بدا يقرا ف قران!! بس وقفوه وقالو ليه نحنا م عايزينو يحضر! اذا حضر حيقاوم!!! ونزلوني وانا حيل م فيني ع شان ارفع يدي ع واحد فيهم!! وبدون مبالغة حتى يديني م حاسة بيهم…م بعرفهم ساييقني ع وين…طلعوني من الغرفة الضلمة ديك ولمن الشمس جهرت عيوني!! ودخلوني ف حته شبيها بالمظلة!! ولا برندة كبيييييرة وبتفتح بالجهتين؟! رقدوني ف فرشة ف نص المظلة وهم قعدو ع الارض وكأنهم بستعدو ع شان ينتصرو ع شيطاني!!؟ والقبيل كان بيقرا ووقفوه قال ليهم ارح نبدا قبل الشيخ م يجي!! وكان متحمس شديييد!! ومن م قال بسم ****!! وقبل م يتم البسملة حسو ابى يطلع!!؟ وبقي يتحمحم ويدعك ف حنجرتو ولمن عيونو بقو حممممر! واظنو اتضايق!! وانا قلت ليهم امشو من هنا ولا حيقتللكم كلكم!! وكنت بحذر فيهم لاني سامعاه جواي بقول ف شنو!!؟ وكأني حمستهم زيادة وبقو يقرو مع بعض وبصوت واحد!! وانا راقدة وبسمع ف تلاوتهم!! وم اتجاوبت معاها!! لحدي م واحد خبطني ف يدي الشمال!! بسوط عنج تقريباً!! وانا راقدة ع بطني لفت راسي ناحيتو وحمرت ليه!! وقبل م يخت فيني التاني اتلفى حولين رقبتو!! ومهما م حاول يفك م قدر!!! ولمن بقي يرفس ف الارض بس م كورك!! وعيونو قربو يطلعو من مكانهم!! وانا م قادرة اوقفو!! كان بيتحكم فيني!! لحدي م مشايخ وطلبة جو جارين وكلهم بيد واحدة بقو يضربو فيني وبخاطبو ف الشي الجواي!! وبعد جهدا جهيد جتى قدرو يحررو الطالب من سيطرتي!! وانا اغمي علي!! لم فقت لقيت راسي ف رجول لمياء وكانت بتقرا لي ف قران!! وابوي ومعاه كم شيخ كانو معانا ف نفس الغرفة بس بعيدين شوية!! قمت من رجولها وقلت ليها زحي مني؟؟ ماف زول يقرب علي ح ااذيكم!؟ حضنتني عليها وقالت لي م حنخليك ليه!!؟ انا بكيت وقلت استحمل اي شي ولا شوفتكم بتتعذبو بسببي!!؟ انتو نقطة ضعفي وانا م بخاطر بيكم!! الشيخ اتدخل وقال لي كان تفكري ف كلامك دا قبل م تدخلي ف اتفاقات محرمة!! انا عاينت للمياء بدهشة!! يعني كلمتهم!!؟ قالت لي لازم يعرفو!! انا عاينت لابوي!!؟ كان ضاالي!! ولمن وجهه اسود وعيونو م ختاها علي!! كان بيتكلم مع الشيخ ومن م انا استعدت وعي طلع خلانا!! جيت قايمة!!؟ لمياء قالت لي م تحاولي!! انتي اخر زول ابوي حابي يشوفو؟! خليه يهدى شوية!! انا بكيت!! لاني كنت مكسوفة شدييد!! كيف ح اواجه ابوي تاني؟؟ كيف اقدر اقول ليه ي ابوي!! وهل حينظر لي نفس نظرة الحب والحنان ديك!! هل حيبتسم لي لم يشوفني جاية عليه!! بالجد انا ح اموت اذا ابوي م سامحني!! جا الشيخ قرب علي!! وقال لي علاجك عندنا بإذن ****…بعد م عرفنا سبب المس!! قال لي الشيطان لقاك ضعيفة ولعب ع عقلك!! واصلا دا عملو!! انا م بلومك لانو قسم برب العزة!! م يدخل النار براه!! بس انتي وغيرك كتيييير بسهل اغوائكم!!؟ بسبب رغباتكم الغبية!!؟ ان شاءالله حتتعالجي!! بس العترة بتصلح المشي!! وم تغلطي نفس الغلط!! ووعي غيرك ع شان م يرتكب مثلو!! وهدا انا بطبق ف وصيتو!! ويمكن اذا اتعلمتو من قصتي تتعظو بيها!! وتقربكم من **** اكتر!! وبكدة يمكن **** يتوب علي!! بسبب عملتي ديك….
الشيخ قال لي امشي اغتسلي واتوضي وتعالي!! سندتني لمياء وطلعنا!! ونحنا ماشين ع سكن الحريم كانت بتتكلم معاي!! قالت لي خجلتينا ي ليلى!!؟ وصدمتي ابوي!! بس انتي طيبي وكلو بهون!! م تخافي من حسين ولا تستسلمي للشيطان لانو اهلك حيتبرو منك!!؟ بالعكس! نحنا معاك وساندنك!! بس انتي خلي عندك اصرار ورغبة ف العلاج!! ع شان تساعدي ف طردو منك!!؟ بالجد كلماتة جات ف وقتها!! بالجد انا كنت متنية الموت!! وقلت اذا جنيت م مشكلة ع شان م اواجه اهلي بعد اطيب!! بس طمنتني بالجد! دخلنا ع الحمام بس حاجة مريم قالت لينا لا ادخلو الغرفة ديك!! ورسلت بت تجيب لينا موية من غرفة تانية!! وبتزكر كانو جردلين!! واحد قالت لينا استحم بيه عاادي والتاني اغتسل بيه بعد م ادفق الموية الاولى!! ودا الحصل فعلا!! من هناك اتوضيت وصليت ركعتين وانا جالسة ع الارض!! م بقدر اقيف ع طولي!! وسندتني لمياء ورجعنا للغرفة الكنا فيها اول!! ابوي كان برا لم شافنا جاين غير اتجاهو وادانا ضهرو!! ناديتو بس ابايقيف!! دخلنا الغرفة وانا دمعتي ف خدي!! ولموو داعماني!! لقيت شيخين بس التالت ماف!! واحد فيهم قال لي اقعدي ف الفرشة دي!! وانا مترددة وبعاين ل لمياء قعدت!! قال للمياء اطلعي برا!! انا قلت لا!! بنهرة كدا!! وقلت اختي م بتمشي لاي مكان!! الشيخ م اتكلم معاي!! وكان بخاطب ف لمياء وقال ليها لسلامتك اطلعي برا!! يمكن يأذيك ولا يطلع منها ويخش فيك!! فيستحسن انك تطلعي!! اول رفضت بس انا لم سمعت كلامو دا خفت عليها وقلت اذا انتي م طلعتي انا ح اطلع!! ولاني م بقدر امش حاولت احبي ف الارض!! بس ايدي المكسورة م قدرت اضغط عليها ف الارض!! فبقيت ازحف بمؤخرتي!! بس لمياء ثبتتني وقالت خلاص طالعة!! بركت لي ف الارض وكانت بتبكي وقالت لي كلنا معاك ومنتظرنك!! قاومي عشانا!! هزيت ليها راسي بمعني حاضر!! وبكينا ف بعض وطلعت!!؟ وفجأة الغرفة اتملت رجال!! ف منهم ظاهر عليهم انهم شيوخ!! وم بعرف البقية طلبة ولا حفظة!! المهم كانو اكتر من عشرة!! وانا خفت شديد!! وكان جزء منهم ماسكين مصاحفهم والبقية سبح وكرستالات م بعرف فيها شنو!!؟ وم خوفني الا ابو سوط داك!! ونظرتو لي كانت بتخلي جسمي يكش!! وسمعت الصوت الجواي بقول لي انتي حقتنا!! م بقدرو يشيلوك مننا!! كان بيتكلم بصيغة الجمع!! م بعرف هم منو!!؟ اول حاجة بدو ب دعاء!! حتى بدو يقرو قرأن من فاتحة الكتاب!! وانا مركزة معاهم وم حاسة بشيء!! وف اتنين منهم بدو سورة تانية م عرفتها سورة شنو؟! وانا مره اركز ومره اطش ومره اسمع صوتهم بعييييد!! وبقيت احس بضجيج جواي وكأنو ف قصف ع قرية واهاليها ف حالة زعر واطفالها ونسائها بصرخو!! وبقيت اقنت وانين واتنفس بصعوبة!! ومن الراجل الشكلو مخيف داك محطني بصوت العنج انا بقيت اجعر واصرخ!! واتدردق ف الارض وصدقوني تاني م وعيت بشيء ولا متزكرة انا قلت وعملت شنو؟؟ وم بسمع الا كلمة إن **** سيبطلة!! بس ع حسب الكلام السمعتو!! اني بقيت اتكلم بلسان راجل!! وبشتم وبسب فيهم!! وبنطط ليهم عيوني وبتكلم بجنون!! وبنفث زي الثور!! لحدي م مسكو يدي الشمال!! وربطوها بسبحة من إبطي وفصدوني كذا فصدة متفرقة بالموس ف يدي!! وبقو يغسلو فيها بمويتهم الفي الكرستالات ديك وبشربوني منها غصب!! وانا اصارع والاوي فيهم وبقول ليهم ح اقتلها!! ح اقتلها!! والموية اذا كبوها ف خشمي انا برشها ف الهواء زي النافورة!! وكل قطرة يرشوني بيها انا بتلوي منها وبتزل ع جسمي زي موية النار!! وهم بيقرو!! وامروه انو يطلع ويفارق جسدي!! بس قال ليهم انو قريني وم بفارقني الا بالموت!! والشيوخ يقولو ليه انت الحتتحرق وتموت!! ويجلدو فيني بالسوط ويرقو فيني!! ولم اغمر!! بخنقوني لحدي م افوق!! ونحنا ع الحالة لدي لاكتر من ساعتين!!؟ لحدي م بقى يصرخ بصوت غريب م معروف صوت انس ولا جان ولا حيوان!! بالجد صوت تقشعر منو الابدان!! وبقول ليهم بطلع بس باخد روحها معاي!! وانا بترفع فوووق من الارض!! وهم بيقرو لي وبقيدو فيني بالسبح!! وبقول ليهم سلمتنا روحها!! لحدي م احد المشايخ قال ليه انتو منو!!! انا بقيت اضحك بخبث!! وانا معلقة ف الهواء اتقلبت عليه وبقيت احمر ليه وقلت بصوت خافت!! عدوكم اللدوود!! واحد من الطلبة اغمى عليه!! والبقية بقو يدخلو حصى ف موية ويرجموني بية وبقولو اخرج ي عدو **** اخرج ي لعين!! وانا سقطت من الفوق ع الارض ع ضهري وظنو بأني متا!! لاني فقدت الحركة وكنت شبه جثة ملقية قدامهم!! وواحد منهم قرب علي!! ولكزني بعصايتو بس انا م استجبت ليه!! والتاني قرب علي!! وقاس نبضي قال ليهم نبضها ضعيف!! بس لسسسه عايشة!! فتحت ببطي وقلت ليه م بطلع منها!! وايدي اترفعت فووق والثعاب الفيها ظهر!! وشايفنو بعيونهم انو بيتحرك تحت جلدي!! واحد قال نقطع اليد!! الشيخ قال ليه عايزنا نقتلها!! وكل م يحاولو يقطعو اتجاه راسو ف يدي!! يختفي ويظهر ف حتة تانية!! ودمي ملى المكان!!؟ لحدي م واحد فيهم شال السوط وغمسو ف موية جنبهم بقي يقرا يقرا ويمحطني ف يدي وانا اصرح!! والثعبان الجواي يتحرقص!! ويهيج!! ويعيد الكرّة!! وانا ارفس ف الارض وهو يضرب بقوة ع يدي!! لحدي م قلت خلاص ح اطلع!! وقالو ليه حتطلع ب وين!!! ولسسسه هم بيقرو قالو شافو دخان زي السبيبة مارق من يدي الشمال وكان بتموج زي الثعبان ف الجو!! وهم لسسه بيضربو فيني وبيقرو!! لحدي م شهقت شهقة طوييييلة !! واغمي علي!! وهم م وقفو رقيتهم وتلاوتهم وم عارفني انا حية اوميتة لانهم انفعلو شدييد ف التلاوة وكأنهم دخلو ف حاله!! بعداك دخل عليهم واحد شكلو بيوحي انو من آل البرعي!! لمياء قالت لي كدا!! وسلم عليهم وقرب علي!! واظنو تحسس نبضي وطلب منهم ينقلوني لغرفة تانية واثنى عليهم وادعي ليهم بالرحمة والمغفرة والعتق من النار!! وطلع!! لمياء حبت تستغل فتحتهم للباب وتدخل تطمئن علي بس منعوها!! وطلعوني من الغرفة وانا دمي كابي!! لم لموو شافتني اغمي عليها!! وبعد حموني وبخروني بشيء م عارفة شنو!! فتحت وانا شايفة طشاش!! وكانو حولي نسوان كتار خلاص!! ولمن اتخلعت قايلة نفسي ميتة!! بس لم شفت لمياء جاتهابكة فيني وحسيت بسخونة دموعها ف جسمي ابتسمت وعرفت اني لسسه عايشة!! بس م بعرف الشيء الجواي طلع ولا لسسسه!!؟ بعداك حاولت اقوم بس جسمي شوييية واجعني!! وبقيت اسأل فيها حصل شنو!!؟ وهي بتبكي وبتقش ف دموعها وقالت لي بنبرة فرح!! حصل كل الخير!! خلاص ليال رجعت لينا!! انا بخلعة قلت ليها الشي الجواي طلع!! هزت لي راسها!! جات حاجة مريم وربطت لي شي ف يدي!! زي الحجاب!! لمياء قالت ليها دي تميمة!! استغربت لانها حررام شرعاً!! حاجة مريم قالت استغفر **** العظيم!! بري ي بتي!! شيخ فلان وصاني اربطها ليها!! عايزين يربطوها منو!! لمياء قالت ليها م ياهو حجاب!! ولو طلعتو حيرجع ليها تاني!! حاجة مريم ابتسمت وقالت ليها بربطوها شفاهتاً بالتلاوة والعزيمة بدوها تشربها!! بس لحدي م يجهزو ليها موية رقيتها!! لازم نحاول نبعدها عنو ع شان م يلقى طريقة يدخلها اسسه!! والربطة دي مباركة بأيات ****!! حتصرفو منها مؤقتاً!! وف كم مره بقو يمدحو ف شيخ فلان الزكرتو حاجة مريم وف يدو النافعة الشافية!! بس وقفتهم وقالت النافع والشافي ****!! وم هو الا خادم لرب العالمين وبساعد الناس!! بعداك قلت ل لمياء عايزة اشوف ابوي!! قالت لي م المسيد!! عندهم ندوة ولا شنو م عارفة!! ولم شفت يدي اتخلعت من منظرها!! كانت ورمانة شديييد وكلها كدمات وجروح!! بس الغريبة انها م واجعاني!! شكلي فقدت الاحساس!! بس الشيء الملفت للنظر اني قدرت اقوم من السرير بدون مساعدة لمياء!! بالرغم من التعب والضرب الاتعرضت عليه!! بس كنت حاسة بالعافية!! حاسة بأني ليلى الزمان!! وحتى الهواء كأنو اول مره استنشقو!! قمت وقبل م اطلع برا ادوني موية شربت واتوضيت وصليت ركعتين شكر لرب العالمين الشفاني وعافاني!! وبتمنى يغفر لي العملتو….وتاني رجعوني للشيخ طلب يشوفني!! لم دخلت عليه سلم علي وسألني كيف حاسة بنفسي!! وقال لي رددي معاي!! وكانت كم ايه قرأنية من كم سورة من القرأن!! وانا بردد وراه عادي!! واداني موية شربتها وغسلت منها وجهي!! وقال لي انتي بإتفاقك مع الشيطان اعوذبالله منه!! خليتي قرينك المغيضو ليك رب العالمين يتواصل معاك!! ومن الطبيعي انو كلنا لينا قرناء!! وبوسوسو ف صدورنا وبحثونا ع الباطل والمعاصي!! ونحنا بننساق خلف رغباتهم!! بس م بنتواصل معاهم بأي شكل كان!! ولا بنعرف عنهم شيء!! حتى الممات!! بس انتي ب عملتك دي خليتيه يتخاطب معاك ويشاركك جسدك!! ونحنا طردناه من الجسد!! بس م بنقدر نمنعو انو يوسوس ليك لانو **** جعل لكل منا قرين!! وتاني حيحاول يرجع ليك بكذا طريقة!! بس الخيار ف يدك المرة دي!! ونحنا العلينا سويناه والباقي عليك انتي!! قاطعتو وقلت مستحيل اسمح ليه يرجع حياتي تاني!! قال لي اشطر مما تتخيلي ولا بديك فرصة تفكري!! بس قربي من **** واكيد حتنتصري عليه!! قال لي نحنا ربطناه منك!! وم بيصل ليك لا برضاك!! ورجعتي زينا واحد!! عندك قرين!! بس كل منكم ف حالو!! وم حتجتمو الا يوم الموقف العظيم!! شكرتهم ع مساعدتهم لي!! وبكيت من الندم ع العملتو!! وقال لي انتي بت صغيرة ف العمر!! بس بتميزي الصاح من الغلط!! بتمنى م تقعي ف الغلط تاني!! وترشدي الغيرك!! ودعى لي بالهداية والبركة وقال لي امشي عافي ابوك!! طلعت منو وعيوني بتفتش لابوي!! لحدي م لمحتو بتكلم ف التلفون ولمياء ماشة عليه!! ومشيت عليهم مسرعة قبل م ينتبه لي ويمشي مني!! لحدي م وصلتو وبركت ليه ف الارض ومسكت رجولو وبقيت اقبل فيهم وببكي وبتأسف ع العملتو!! م اتوقعت رده فعلو!! ابوي بقي يبكي!! اريتني متا قبل اليوم دا!! ياريت اموت اسسسه بعد قهرت ابوي!! وصغرتو ونزلت دمعتو بسببي!! لمياء بقت تهدي فيه!! وجو طلبة اتكلمو معاه وبهدو فيه وقالو للمياء سوقيها بس انا رجولي ماتو وم قدرت اتحرك!! وبقيت انادي ف ابوي!! دخلوه ع الشيخ قال عايزو!! م بعرف القالو ليه شنو بس ابوي طلع شوية افضل!! وقال للمياء العربية بتكون وصلت ارحكم!! ودعنا الحريم الاتعودنا عليهم وحاجة مريم بكت فيني!! وقالت لي م تقطعي صلاتك وم تبعدي من ****!! وم نشوفك هنا تاني الا وجاية زيارة تسلمي علي الشيخ!! ابتسمت وطلعنا!! ركبنا وابوي راكب قدام وم فتحنا الموضوع قدام السواق!! وابوي كان ساكت!! لا بتكلم معاي ولا مع لمياء لحدي م وصلنا!! وكيييييف اواجه ناس البيت!! اولا حسين كان ماف!! حلف انو يقتلني!! امي كانت زعلانة شديد وسلمت لي برؤس اصابعينها وم خلتني احضنها وبعدتني عنها!! لينا جات ناطة ف رقبتي وحضنتني وبتبكي!! حسن سلم عادي وقال لي بأبتسامة ادبك بعدين بعد الضيوف يمشو!! والجيران كانو معانا من سمعو خبر رجعتنا!! واكيد كل واحد بيجي عايز يحكو ليه الحصل بالتفصيل الممل!! عرفو اني ممسوسة!! بس م قلنا ليهم السبب!! اذا ابتليتم فانسترو…واليوم عدا ع كدا!! المساء كدا حسين جا!! وانا راقدة ف غرفتنا من سمعت صوتو بسلم ع ابوي انا جريت ادسيت ورا لمياء!! قالت لي م تخافي!! وطلعت عليه!! وكان بقول وينها الكلبه!! ابوي نهرو وناداه ع الصالون!! والكلمة السمعتها الغلط م بعالجو بالغلط!! وتاني صوتهم م وصلني!! م بعرف القالوه شنو!! بس م جا علي ولا سلم!! حاولت اعافي امي!! بس كانت صعبة شديييد!! وم سامحتني وقالت بتي تطلع دجالة!! انا ماف كافر بقعد معاي!! ستفي شنطتك وامشي البلد ولا غوري لاي حتة!! ولمياء تتكلم معاها!! بس الغريبة م بتسمع من لمياء ولينا تأثيرها عليها اقوى!! وقالت لينا خلوها علي!! وحاولت معاها كذا مره وتهديها لحدي م بدت تتقبل الموضوع!! بس لسسسه م سامحتني لكن اتراجعت عن فكرة اني اسيب البيت!! وابوي قعد معاي اداني محاضرة طويلة!! وبداها لي ب انك خنتي ثقتي ي ليلى!! وختمها لي ب حتفضلي بتي بس صعب انك ترجعي للمكانة الكنت خاتيك فيها!! بس لاني والد والوالد موصى!! بدعي ليك **** يهديك ويتوب عليك!! وكلامو معاي بقي محدود!! انا حاولت ارجع لحياتي القديمة!! م اكذب عليكم بالرغم من انهم م كلهم واقفين معاي!! بس م بسمعوني كلام فارغ ولا بهينوني!! وبطريقة غير مباشرة كانو داعمني!! واكيد لو حصلت لي حاجة م حيرضو فيني!! وانا راقدة ف سريري وبفكر ف كل الحصل معاي!! قررت احكي قصتي علشان يستفيد منها غيري وم يقع ف نفس غلطي!! مع اني خفت بأني اتفضح!! بس خاطرت ومتأكدة بأنكم حتدعو بالهداية!! لي وليكم!! وف وسطت الكلام الكتير دا كلو اتصل علي مصعب ودعمي!! سلم علي وم عرف يكفر ولا يتحمدالسلامة!! وسكت مسافة وقال لي بما اننا عرفنا سبب الخلاف والحمدلله قضينا عليه!! لازم نمشي لقدام ونتجاوزو!! انا ضحكت وم خليتو يكمل كلامو!! وقلت اذا كنت واقف معاي كان اتجاوزناه مع بعض!! بس بما انك قررت تبعد!! والحمدلله م اتأذي زول من اسرتك خليك بعيد عني يكون افضل!! واذا بيناتنا قسمة **** حيجمعنا!! بس لحدي م دا يحصل اذا **** ارادو م عايزاك تكون جزء من حياتيالان!! اتقبل كلامي وواصل كلامو عادي وقال لي عشمي كبير ف رب العالمين وقفل ع كدا!! وفضلت هائمة ف افكاري!! اكتب قصتي واشارككم تجربتي مع عالم الشعوذة ولا اخليها عظه وعبرة لنفسي!! امي نادت لينا ولانها بتصلي جيت قايمة عليها انا!! وسمعت صوت حاجة وقعت من قدامي!! لم دنقرت اشوف دا شنو!! لقيتو دا الخاتم ابو لون اسود واحمر!! لم قلبي فحححى وبقي يضرب!! اترددت ارفعو ولا لا!! وبقيت اتلفت يمين وشمال وبلعت ريقي!! دخلت يدي جوا توبي وشلتو!! كنت حريصة ع انو م يلامس جسمي وجريت جري ع الحمام ورميتو جوووة البئر!! مستحيل اسمح ليه يرجع حياتي ويتحكم فيها…مشيت اتوضيت وصليت وافتح المفكرة ع شان اكتب تجربتي بس الكتابة لتغلبني وم بقدر اصيغ الكلام والحمدلله لقيت آلاء وساعدتني وشجعتني!! وبتمنى تكونو استفدتو من تجربتي!! وبترجاكم م تقعو ف نفس غلطي!! وتبعدو عن امور الدجل دي!! وان كنتو شايفين انو الموضوع عادي!! وم تنسي ي اختي اذا جالستي وداعية ولا اي منجم وصدقتي كلامو حتكوني بعدتي عن **** وكذبتي رسولنا الكريم!! وحتدي الشيطان حمانا **** واياكم ثغرة ف انو يخش فيكم!! فأسأل **** الهداية لي ولكم..وكان **** من وراء القصد.

النهاية …………………