مكتملة رومانسية درامية رواية معذبتي 1 (1 مشاهد)

[قيصر ميلفات]

وفي الجزء الأول من رواية معذبتي .. دعونا نبدأ في معرفة كيف ستبدأ الأحداث وعن شخصيات الرواية ؟ وكل ذلك في السطور التالية ، قراءة ممتعة وسعيدة .

الجزء الأول من رواية معذبتي​

صباااح الخير امي وببوسة خفيفة ع جبينها! وردت لي وابتسامتها البشوشة مجملة الكون ف عيوني..تلاقي الخير بتي السمحة..كان بودي اغذي روحي المرهقة بكلماتها الرصينة بس كنت مستعجلة وعاتبت امل اختي لانها م صحتني وبالرغم من اني نبهت عليها بس طالعة مطوفشة زي اختها!!؟
كالعادة صوتنا علا وضكاتنا وصلت الصالون لابوي وقبل م يجي علينا جريت عليه وقبلة اليد والابتسامة العريضة برضو م منعتو من انو ينبهني ع ضبط اصواتنا العالية داعبتو بكم كلمة وطلعت ع الجريدة عشان اعمل المعاينة وان شاءالله يشيلوني فيها؟!
حابين تعرفو انا منو؟؟ اصبرو شوية كلو بوقتو

…المواصلات ع قومتي المتاخرة تمت الناقصة ووصلت بعد ساعة من المواعيد المحددة!!؟ والمدير م قصر طبعا!! صاح م صرح بكلامو بس كانت تصرفاتو بتوحي بإستيائو وربع ساعة بيتكلم عن الاضباط والدقة ف المواعيد وكلام كتيييير!
استلم الcv بتاعتي واطلع عليها بعجالة وحسيت كانو م عايزني ف الجريدة وختى الفايل ف المكتب ومدى لي يدو وقال حنتصل عليك ي استاذة هيام؟! معناها اقطعي وشك..سلمت بإبتسامة وقلت اذا تم تعيني ف الجريدة حتكون اضافة حقيقية ليها وح اثبت كلامي…ظهرت تغطيبات جبينو وم عرفتو مستهتر ولا متعجب من جرأتي…وطلعت منو وكلي ثقة ف نفسي…رجعت البيت وحكيت ليهم الحصل؟؟ امل قامت على حيلها وبقت تردح لي انتي قايلة نفسك شنو؟؟ وانتي حتضيفي للجريدة المن سنة حبوبتي فتاة ولا هي الحترفعك ي رررمة ولا قايلة مجلة الاطفال القضيتي فيها الترينك حتفيدك بحاجة قدام الناس ديل…انا ضحكت بس؟ وابوي ردا عليها…انا اكبر منها بس بت لميضة وعادي بتشاكلني وبتعلي صوتها علي بس بتحبني لدرجة م بقدر اوصفها…م متأكدة من انهم حيقبلوني ف الجريدة بس واثقة بأنو **** معاي ويسهلها علي…مشت ع المطبخ اكل لي حاجة بس لقيت اكلة انا م بحبها!! صريت وشي وطلعت لي كم حبة بيض من الثلاجة وانا بسوي فيهو دمعتي جات نازلة ونفسي اتسدت منو؟! بقيت خاته قدامي وم قادرة اكل…لحدي م جات داخلة علي امل منطرة عيونها لشنو عيبي لي العصيدة دي اسسسي اتقول بتجيبي حاجة…بس انا كنت ف وادي تاني وملامحي اتجمدت وم عرفت اقول ليها شنو؟؟ لم عاينت لي ابتسامتها اتحولت لتكشيرة وعيونها لمعو حضنتني عليها وربتت ع ضهري وقالت لي اختي قوووية بس حساسة زيادة عن اللازم…وانا كأني قنبلة موقوتة وكلماتها كانت شفرة التفجير وفعلا انفجرت بالبكاء بكيت بحررقة… بس م اخبي عليكم حضن اختي الصغيرة بالجد بريحني وبزيل شوييية من المي…اتمالكت نفسي واتنهدت بصوت مسموع وجيت طالعة من المطبخ…وقفتني وقالت بصوت مخنوق البيض!!؟ ابتسمت وقلت ليها اطفحيهو ي اشعب ووصلت غرفتنا ورقدت وعيوني ع السقف!!! إتنهدت بصعوبة وصدري ضاق…بس انا م ضعيفة عشان انكسر مسحت دمعتي العنيدة واتناولت كتاب من التربيزة كنت بوهم نفسي اني بقراء بس انا فعلا بقراء وبقلب ف صفحاتو بس م مستوعبة ولا كلمة؟؟!
ختيت الكتاب ف صدري ومسكت تلفوني دخلت ع الملف الامن؟؟! م مؤمناه من زول؟ بل من نفسي عشان م اجدد احزاني؟!
بس ضعفت وم قدرت اقاوم رغبتي ف شوفتو وفعلا يدي بلهفة ضغطت ع الفايل وغلطت تلاتة مرات ف كلمة المرور من شدة اللهفة وشفتو!! وياريتني ان م شفتو؟ بدل م اخفف ع نفسي زدت العلي…وكأنو حسي بي ظهر اسمو ف الشاشة ووالله م كنت مفتكراه متصل وبحاول بقنع ف نفسي انو دا اسكرين ف الملف وم انتبهت لرنه التلفون ولا لحركة الشاشة..وبعد م الخط فصل وطلعت من التطبيقات شايفة مكالمة فائتة؟؟ اندهشت من الحالة الانا وصلت ليها؟! م رجعت ليه ولو اتصل الف مرة م حارد…م اخبي عليكم انا وضعي اصعب من وضعو بس احترامي لنفسي مانعني اني اذل نفسي ولو ع حساب سعادتي… دخلت تلفوني تحت مخدتي وغمضت عيوني…!

بعد كدا لازم تعرفوني؟ انا هيام محمد،ف منتصف العقد الثاني من العمر،افراد اسرتي عرفتوهم امي حبيبتي مريم وابوي سندي وامل مصدر سعادتي واخوي احمد مغترب من كم سنة…اتولدت واتربيت ف امدرمان كان حلمي اكون محامية بس نسبتي خذلتني بدرجتين بسس ودخلتني إعلام!! م كان رغبتي بس الحمد*** كنت موفقة فيهو وحبيتو الي حدآ ما!!! واموري ماشة تمام وراضية عن نفسي وم كان عندي شيء مميز كدا احكيهو ليكم ف الفترة دي لحدي م اتخرجت؟؟
ومن هنا حياتي بدت تتغير!!
انا بطبعي زولة هادئة ومملة شويتين وم بعرف اتعامل مع اولاد ادم او بالاصح م حصل اتعاملت معاهم وبيناتنا بس السلام.. والسبب انو ع نطاق الاسرة م بنطلع كتيير من البيت وحتى اهلنا بنلاقيهم بس ف المناسبات وجامعتي م مختلطة شان احتك بيهم وبيني وبينكم كنت بتجنب المعاملة معاهم يمكن اكون جبانة!!! لا بس م كنت قادرة احدد السبب!!؟ لحدي م يوم التخريج اتفقنا نطلع مع صحباتي نرفه بعد سنييين المرمطة وفعلا اتفقنا ع الجمعة البعد التخريج!!!؟ فقررنا نمشي الخرطوم اااي حتة م حددنا مكان معين!!؟
كلمت ناس البيت ولاني زولة م حصل مشيت رحلة ولا رفهت مع صحباتي ناس البيت م اعترضو رغم تحفظهم ع المواضيع دي…ومشينا وكان يوم م بيتنسي والجملو اكتر وخلاهو تاريخي بالنسبة لي؟! اني لاقيت فيهو سبب آلمي وبكاي!!؟
لحدي العصر نحنا حايمين من مواصلات للتانية ومبسوطين؟؟! لحدي م ريان صحبتي قالت نختمها ب عفراء مول!!! قلت ليهم انا اتأخرت ولو ناس البيت سمحو لي اطلع معاكم دا م يعني اني اتأخر بالرجعة؟؟ قالو لي ي جبانة كلنا معاك ف امدر واهلنا عارفين المواصلات صعبة م تخافي!! والشي الشجعني اكتر اني م حصل شفت المول ولا دخلتو فقلتا اخاطر بالزمن وامشي معاهم ودخلنا وياريتنا م دخلنا؟؟! بقيت اتبسم واقول ليهم نحنا دخلنا غلط ارح نطلع بكرامتنا قبل م نلفت انتباه الناس؟! بس ريان قوية وم بتخجل تضحك وتقول لي م عندنا حاجة لزول والبيعرفنا منو هنا!!؟ بطلي هوسك دا…واتشجعت وبقينا نتحاوم وبنشوف ف المنتجات وبتمسخر ع الاسعار المكتوبة وضحكاتنا فوق وفعلا بدينا نلفت الانظار وانا بتضارى بيهم لحدي م افترقنا ف محل الاكسسوارات!!؟ انا فضلت بتمنظر وهم طلعو ع طابق تاني م عارفاهم قاصدين يخلوني وراهم ولا نسوني؟؟بعداك انا عاينت يمين شمال م شفت واحدة فيهم طلعت ربيكتي ولمن رابطاها ب استكة واتصلت ع عبير قالت انهم طلعو ع الالعاب!! ووصفت لي الطابق الهم فيهو وانا جايطة فيها عشان خلوني وراهم ضحكت وقفلت فيني الخط…؟!
انا بغضب حشرت التلفون ف الشنطة وبفتش ف السلالم م شايفاها!!؟ وقلت دي مصيبة شنو دي؟؟ يلا اكون صريحة انا م متخلفة بس م عندي اتكيت يعني مربوشة بالدارجي كدا وم بعرف اتصرف…عارفة انو ف سلالم متحركة بس م شايفاها شغالة وم ظنيت خسرانة انا اسوي شنو؟؟ قلت اطلع بالاسانسير وهنا كانت الضربة الحضارية اضغط شنو ولا افتحو كيف؟؟ بالجد كنت ف موقف لا احسد عليه؟ كلو ازرار وم عرفت اضغط ياتو واحد شفت زر ع شكل مربع والباقي ارقام قلت دا بكون الزر البيفتح الباب!! ضغطت عليهو وعمل صوت غريب كدا لمن قلبي دقة وبديت افكر ف الغرامة قايلاه خسر

وبرضو م فتح؟؟! قلت اقوم هاربة وكان لقيت سلالم عادية بطلع ولا بستناهم تحت لحدي م يجو علي!! وقبل م اتحرك اشوف ولد كدا ف بداية التلاتينات شكلو خاتي التلفون ف اضانو وبعاين لي بطريقة غريبة؟؟ وانا بطني بقت تتكتك؟؟! جا علي مبتسم وقال لي طالعة الدور الكم!!
انا اتمنيت الارض تتشق وتبلعني…قلت ليهو لالا م طالعة وجيت ماشة!! وانا مدياهو ضهري هاربة سمعت نفس الصوت القبيل لم صغطت الزر اتلفت شايفة باب الاسانسير فاتح وهو دخل؟؟ وبتصرف غبي جيت جارية وانحشرت قبل م يقفل بالجد تصرف مخجل وانا واتي م عارفة عملت كدا لشنو؟؟ بس من الخجلة عيني م رفعتها من الارضية وهو شكلو بيتريق علي ف سرو؟؟ قال لي ماشة الطابق الكم؟؟! قلت الرابع! وانا عيني م رفعتها…قال لي اول مرة تجي هنا صاح؟؟! انا حسيت بالعبرة خنقتني وبإنفعال قلت ليه عشان موقف الباب!! ملامحو اتغيرت وقال لي بعتذر م اقصد اضايقك وتاني خشمو م فتحو؟؟ بعد شوية المصعد وقف وفتح الباب!! انا ف قلبي قلت بركة العايز يغور المستهتر…وهو بعاين لي؟؟ وانا اعجبكم اديتو نظرة تخوف ابتسم…وقال لي مش قلتي نازلة ف الدور الرابع؟؟! انا دي لمن رجولي بردو وخجلت لدرجة م بقدر اوصفها لمن حاسة بقلبي وجعني؟؟ طلعت وقلت شكرا بخجل كدا وم عارفة اقبل ع وين وبقيت انبز فيهم وبلعن ف اليوم الجيت معاهم…اتصلت ع عبير م ردت…رجعت لي ريان تضحك وقالت لي انتي وين…بالجد لو كانو قدامي وقعت فيهم لبع؟! ولمن بطني بقت ترجع من شدة التوتر والزعل وفجأة ظهرو لي ف وشي بيضحكو انا قربت ابكي وم جوطه وم طلعت مني غير تلاتة كلمات انا راجعة بيتنا!!!

وكنت جادة شديد وعم الهدوء واحترمو نفسهم ووافقو ع كلامي المصعد كان طالع وم انتظرنا نزلنا بالسلالم المتحركة والغريبة م بعرفها اسسسه اشتغلت كيف ولا كانت شريكة ف اذلالي م عارفة..
طلعنا ولا موية م اشتريناها لانو الموية بتعادل قروش مواصلاتنا ذهابآ وإيابآ..وع طلعتنا لقينا الود ف وشنا وبقي يتبسم وصاحبو مدا راسو من العربية وقال بكل وقاحة دي بت الاسانسير!!!؟
وانا النار ولعت فيني…وقبل م اردح ليه ركب سريع سريع ودورو عربيتهم وخلو صحباتي هاجمين علي عشان احكي ليهم الحصل شنو فوق والولد يقصد شنو!؟
وياريتني م وريتهم للان ذالني بيها..رجعنا البيت وهم ف المواصلات بعاينو لي وبيضحكو؟ وانا ح اطق من الزعل وف سري بدعي ع الود الغياظ الصواط وحمدت *** اني م بعرفو ولا اتمنيت اشوفو تاني وحرمت دخول اااي مول…بس م كنت عارفة القدر مخبي لي شنو؟؟!
نواصل بعدين
يتبع ………

الجزء الثاني من رواية معذبتي​

كلنا عندنا اهداف وطموحات وبنسعى عشان نحققها بنكافح وبنثابر!! مرات **** بحقق امانينا ومرت بيدينا اكتر من مماطلبنا وف بعض الاحيان بكون مؤخر لينا الافضل وان م حقق مطالبنا…ف شنو م نزعل ولا نتضايق ولا نبتئس لانو الدنيا م مستاهلة نزعل عشانها ولينا رب كريم علينا وعالم بحالنا فنفوضو امرنا يكون افضل!
وانا بفكر ف زولي والحصل معاي واتصالو المُفاجي داك وراسي بيضرب اخماس ف اسداس ونمت نومة عمييقة خلاص؟! سبحان **** صحيت وحسيت براحة م طبيعية زي فرحة اليوم العيد الصباحيييية ديك! قمت نشيطة واخدت لي دش وصليت العصر ودخلت ع امي السمحة ف المطبخ!! حضنتها شديييد! م تتخيلو انا بحب امي قدر شنو؟ م حصل عيوني وقعت عليها إلا واشوفها مبتسمة؟ مهما الدنيا قست علينا واختبرتنا بنلقي امي صامدة وداعمانا وساندة ابوي…قالت لي بتشمشمي فيني مالك؟؟ كان عايزة الارياح والحركات دي عرسي!!! انا ابتسامتي اتكسرت واتنهدت ليها ف كتفها وقلت ليها اقعد ليكم كدا بسسس م بفارقكم نهائييي!! ضحكت وقالت لي انا بموت خليني افرح بيك ي بتي!! مسكت منها السكين وبعدت الخضار منها ومسكتها من اكتافها وقلت ليها امي عليك **** م تقولي كدا انا ح انهار اذا انتي جاتك بس حممة…امي انا محتاجة ليك وحضنتها وبكينا مع معض؟؟! جا داخل علينا ابوي مخلوع مالكم المات ليكم منو؟
امي بتقش ف دمعتها وقالت يموت الشر قبل م يجيك!! ابوي اتبسم وجات ناطة امل بالشباك وقالت ليه دا المشهد المعتاد ي ابوي م تتفاجأ!! هيام عايزة تبقي ممثلة ويوميا بتعيد السيناريو فينا!! خلتنا نضحك وامي شترتها بقعر البصلة بس هي زاقت منها وقالت اوعي بالك دي اختك الكبيرة ولو زعلتيها م عافية عليك وزي الزعلتيني انا!! جات جارية بالباب وحضنت امي وقالت ليها يطول عمرك ****…ابوي قال لو خلصتو انا عايز لي كباية شاي!! ضحكنا ومسكت ابوي من يدو وجينا طالعين وقلت لامل سوي شاي مظبوط وغمزت ليها…جاطت بس م اشتغلت بيها لاني عارفها بتكرة تسواة الشاي وقطيع السلطة

…ابوي قال لي اها الحاصل معاك شنو؟؟ انا م بقدر اخبي علي ابوي شي وسبحان **** بيفهمني قبل م احكي؟! ابتسمت وقلت انت شايف شنو؟ ضحك وقال لي مبسوطة لقيتي ليك عريس ولا شنو؟؟ ضحكت وقلت شنو الحكاية كرهتوني ولا شنو!؟ ابوي ختي يدو ف راسي وضغتني شديييد!! اصلا دي حركتو معانا كلنا؟! قربت اصرخ وجيت قايمة وهو بيضحك لم قلبني حاولت اخنقو مداعبة وقلت م بفكك الا تفكني!!! وكانت لحظات حلوة شديد اتمنيتها م تخلص واتونسنا ووريتو انا بفكر ف شنو وحتي اقترح علي حاجات وانا ايدت كلامو…!!
يومي بقي يمر زي اي يوم ماف حاجة بنستحق انها تتزكر ف حين انو كل لحظة بقعدها مع اهلي م بتتقاس بشي ولو بيدي اوثقها عديل…بس اقول **** م يحرمني منهم ولا يدخل بيناتنا الشطان ف يوم…بكون كويسة ومبسوطة بس من يجي الليل بتتقلب علي المواجع والنوم بيغلني و**** انا م بقدر انوم مكتم البكاء بس حلقي كأنو بنحرو فيه! لو م الاستغفار والصلاة علي الرسول انا كان جنيت….صدقوني م عايزة ارجع للموضوع وامرض نفسي اكتر بس لازم اشاركم قصتي لازم افضفض لزول!!؟
وقفنا وين؟؟! اااي اتزكرت لم رجعنا من الرحلة، بما اني م جايني نوم احكي ليكم الحصل شنو بعداك؟ رجعنا البيت وكان المغرب اذن ورجولو بتطاقش من الخوفة وبقول احمد اخوي بيقتلني؟؟ ف الوقت داك كان م سافر!! وصلت ولسوء حظي كانو كلهم مجتمعين وف سيرتي!! ومن جيت داخلة استقبلني جاية من وين ولشنو قافلة التلفون؟؟ ابوي وقفو..سلمت عليهم وقلت بس المواصلات!! وقبل م اتم كلامي قاطعني احمد وقت انتي عارفة المواصلات ماف اتأخرتي لشنو؟ ابوي قال لي انبسطي!! ابتسمت بحذر خايفة احمد يلفخني كف…احمد هاج وقال ليه ابوي انت واقف معاها يعني!! انت م عارف الزمن بقي صعب!! ابوي قال ليه بس بتي مربية صاح وبتعمل حاجة تدنقر راسي!!
انا جاتني رغبة ف البكاء بس اتمالكت نفسي! احمد قام بتنفر وقال اقعد دلع فيهم كدا لحدي م الفاس دقع ف الرأس!! ابوي لم انفعل امي سكتت احمد وهي عارفاه غلطان بس عشان تهديهو شوية جاطت فيني ولدرجة انها قالت لي تاني مافي ليك اااي طلعة من البيت؟! قمت خليتهم واحمد طلع الشارع وامل لقيتها منتظراني ع احر من الجمر اها وريني حصل معاك شنو ومشيتو وين ولقيتي ليك زول خلطي معاه وستين الف سؤال ورا بعض وم ادتني فرصة ارد وبقيت اضحك..بتتكلم براحة عشان احمد وامي م يسمعوها وبتقرص وبتخبط فيني ومتحمسة شديد،حكيت ليها وتضحك ومبسوطة اكتر مني…وانا الهبلة حكيت ليها موضوع الاسانسير وفكت ضحكتها الحمارية ديك واحمد سمعها!! بتزكر لم سمعت صوتو منفعل قامت جارية وادست وراي ضرب لينا الباب وقال ليها مالك ي عفن!! وكلام كتير بس هي خشمها عندها بس امي نادتو اتكلمت معاه!!! يلا بالرغم من انو عصبي بس مهما كان غضبان لو امي قالت ي احمد بجيها جاري مبتسم بالجد بزل نفسو شدييد لامي وبقول انا براجل اي زول بس امي ممكن عادي انوم ف الارض واخليها تخت رجولها فيني..!كلنا بنحبها بس بصراحة م بنحصل احمد؟؟ المهم بعداك امي جات ادتنا حقنا وبكم نبزة كدا ونحنا بنضحك براحة عشان م يسمعنا…ومرت الايام بسلام لحدي م جاني تلفون من رقم غريب!! ردت وطلع من الجريدة

اتكلمت معاي المدير التنفيذي وقال لي تم قبولي وم بداية الاسبوع الجاي اجي اكمل الاجراءات واوقع العقد…كنت حطيير من الفرح بالرغم من اني واثقة من تعيني لكن الخبر كان مفرح!!؟ شاركت ناس البيت الفرحة،،يلا بما اني مبسوطة اوريكم اتعرفت ع سبب آلمي كيف؟ بعد اسبوعين من طلعتي مع صحباتي جاتني جارتنا بالحيطة وامها صاحبة امي شدييد وكأننا اسرة واحدة وبس فاصلنا سور!!! قالت لامي سايقاني معاها لعرس ودعمها….كان من المفترض تمشي امي بس كانت متحسسة شوية وكلفتني انا بالمشية وحتي احمد مشى العقد حقو!! كنت كسلانة لاني وريتكم سلفاً اني م بحب الطلعات والاختلاط مع ناس م بعرفهم بس خجلت ارفض!!! فعلاً جهزت فستاني الكحلي المورد وشبط السيراميك وكنت قاشرة!! وطلعنا مشينا وماشاءالله تبارك الرحمن من سماحة اهل العروس ومن رقيهم ولبسهم الالمهم رحبو بينا وغدونا وصاحبت منهم بنتين وقبل م نرجع العروس جاها انهيار عصبي ولا شنو م عارفة المهم غمرت وجاها هبوط واهلها تعالو شوفو الكواريك والهرجلة!! بس ابوها دكتور وفحصها قال م عليها شيء بس ارهاق وضغط نفسي حاد سبب ليها انهيار عصبي وطلب من اخوها يجيب درب وشنو كدا م بعرف من الصيدلية!! البنات القلت ليكم صاحبتهم واحدة فيهم صاحبة العروس وبت خالتها واصرت تسوقني معاهم الصيدلية وانها قريبة وماشين بعربية المهم امنية جارتنا قالت لي م تكسفيها امشي وفعلا طلعنا!! كنا تلاتة بنات وقدام السواق ومعاه اتنين شافع لمييض كدا والتاني م شفت وجه!!!

وبتكلمو عنها واخوه بقول دي مستهبلة ساي عايزة تدخل ف الناس شريحة!! وصحبتها خبطتو وشاكلتو وقالت كان دي خطيبتك كان جريت ليها جري!! وصوتهم كان عالي شديد وانا قاعدة مسكيييينة وبتلفت لحدي م اخو العروس انتبه لي وقال ليها م عرفتينا ع صحبتك!! قالت ليه دي قريبة العريس!!! هي م عارفاني جارتهم لكن مشيتها!! وقالت بس الليلة بقت صحبتي

عاين لي بالمرايا وانا طوالي نزلت عيوني…الراكب معاه داك كان منشغل مع الشافع بيتخابطو وبتخانقو وكواريهم فوق لحدي م ريم صحبتي الجديدة قالت لاخوها اقعد ساي ياااخ ازعجتونا اسسسه الشافع انت ولا هو!!
داك طوالي اتلفت علينا وعيونكم م تشوف الا النور؟!
ياهو زاااااتو بتاع الاسانسير شوفو الدنيا دي صغيرة كيف!! انا لمن شهقت!! هو كان بيضحك وبرد عليها بس لم شافني الكلام راااح ليه وابتسم واتلفت قداامو!!! انا بقيت ابكي من جواااي م بعرفكم فهمتوني ولا لا بس بهم إننننننننننننن بأن بس بدون صوت!! ف كارثة حصلت جواي وحاسة بالف شخص بيصرخو جواي ولمن جسمي برد!! وعرقي نزل!!! ريم عاينت لي وقالت انتي مسخنة!! والتكيف كان شغال؟ وانا متجمدة مكاني وسامعة صوتها بعييييد مسكت يدي لقتها زي التلج!! قالت ليهم الحقو البت عيت وف كلمتها ديك كان وصلو الصيدلية وسألوني عن حالتي قلت ليهم كويسة بس حاسة بدوخة انزلو انتو انا حنتظركم هنا؟؟ وفعلا نزلو وخلو معاي الشافع وردمني اسئلة!! تلفون اخو العروس دقة بس ولا هبشتو!! تاني تلفون ريم دقة شفت المتصل طلع ابو العروس قلبي اكلني وقلت بكونو عايزين حاجة من الصيدلية نزلت بجرجر ف رجليني وم عايزة عيني تلاقي العارض داك!! لم وقفت جنب باب الصيدلية اترددت اخش ولا لا وف اثناء م انا بفكر جا طالع الغياظ وقال لي دا بدفعوه باليد عادي م عايز اجتهاد!! وكان قاصد الباب!! قبل م ارد عليه جات طالعة ريم واديتها تلفونها!!!
وداك بيتبسم…بالجد استفزاني شديد بس سفهتو عشان م اطور الموضوع وافضح نفسي!!
رجعنا وركبو للعروس الدرب وادوها مسكن واخدت ليها غفوة ونحنا كنا طالعين ع البيت انا وامنية ولانو المغرب اذن والبيت ف الصحافة والمواصلات صعبة اصرو هل العروس م يخلونا نرجع برانا وكلفو واحد من اولادهم يوصلنا!! داك قال خييير بس العارض رفض وقال ليهم انا ح اوصلهم لانو عندو مشوار تاني ف امدرمان… وقربت اقول لا بس خفت الفضائح!!؟
طلعنا وكان راكبين معانا بنات اهلهم من امدر!!! وبعاين لي بالمراية وبتبسم!! ف واحدة قالت للتانية دا زي فستانك!! التانية قالت ليها القلتو شين داك!!! شوفو عليكم **** القصف دا كيف ف نومي ادوني كومي!! انا قاشرة ومظبطة ويقولو فستاني شين قدامي بدون م يراعو لمشاعري!! وقالت ليها حرمت لبستو وبقيت اكرهو واخيرا الغياظ نطق قال ليها الفستان سمح لكن الكلام الشماعة!! بكون بس فيك م جاااي!!!!
ااحيييي برد لي قلبي ولمن ابتسمت..نزلناهم وواصلنا ع بيتنا..!! ولسسه م عرفت اسمو منو!!؟
نواصل بعدين
يتبع ……..

الجزء الثالث من رواية معذبتي​

لم شافني بتبسم ركز معاي شديييد وكل م ارفع عيوني القاه مركز معاي بالمرايا!! والهدوء سيد الموقف! لحدي م امنية كسرت حاجز الصمت وقالت ليه معليش تعبناك معانا وبيتنا بعييد شوية!!؟
ابتسم وقال ليها عادي م تشغلي بالك اصلا انا ودامدر وبحبها شديييد!! وعاين لي وقال ليها اختك دي م بتتكلم!! كان قاصدني…ضحكت ضحكة باهتة وقالت ليه بطبعها هادئة وم بتتكلم كتير…وانا برضو خشمي عندي!؟
قال ليها العريس ودعمكم صاااح!!!؟
قالت لي ايواااا ود عمي؟؟! صر عويناتو وقال ليها والاخت؟؟! ضحكت وقالت ليه اختي وصحبتي وجارتي!! قال ليها ب****!!! كنت مفتكركم اخوات!! وبقو يتونسو وم خلو شيء الخوة والجيرة والصحبة النضيفة!!! وانا مرة اركز معاهم ومرة مع تلفوني!! لحدي م وصفت ليه شارعنا ووصلنا جينا نازلين وشكرناه وهي دخلت بيتهم ونحنا جيرانهم بالحيطة بس باب شارعهم بيفتح جنوب جغرافي لبيتنا ونحنا غرب!! لم جيت ماشة وقفني وقال لو بيتكم بعييد اوصلك!!! شكرتو واشرت ليه ع بيتنا ابتسم وقبل م اتحرك قال لي بعتذر لو ازعجتك؟؟ م اقصد شيء وم تشيلي ف خاطرك مني!!! م عارفة بس اتزكرت موقف المول واتغظت فجأة وملامحي اتغيرت؟! اخوي قال لي هيام؟؟! نا رجولي بردو وم قدرت اتلفت رقبتي شمطت!!!
الغياظ فتح باب العربية ونزل لاحمد واوووو احمد واخوي زاتو م قصر حسام!!؟ صحتك واخبارك واييييك سلام الاولاد داك!!! وانا مصدومة اخوي بعرفو من وين!! كل الحولي تطلعو بعرفوه إلا انا!! وقلت بيني وبين نفسي **** قاسم لي اتزل قدام ود الناس دا!!!
شكرتو تاني وخليت احمد بحلف فيهو يدخل البيت بس رفض وقال الزمن م مناسب بس حيجي يوم تاني!!! دخلت البيت وصوت ضحكاتهم واصلني!! واستلمتني امل ي صايعة وي شنو!! وكان تبيتي هناك …انا بضحك وسألت عن امي قالت لي بتصلي ف العشاء وابوي م سألت عنو لاني عارفة برنامجو؟! عندهم محاضرة يوميا ف الجامع بعد صلاة العشاء!!! وحصل الشي المعتاد البيحصل ف كل اسرة لم يجو من بيت مناسبة لابسين شنو ف بت عملت العروس سوت اهلها قالو!!! والضحكات عالية م خليت حاجة م حكيتها لامل إلا شوفة حسام وانو بتاع الموقف المحرج م قلتو ليها لانها حتستلمني للصباح وانا تعبانة!! امي بعد ركعت قالت لينا دي كلها ذنوب ناس شلتوها منهم!!! ابتسمت وتلبت من السرير وجريت عليها وحضنتها شدييييد وقلت ليها ادعي لي !!! ضحكت وقالت بالعرس ولا شنو!!؟ امل ردت نيابةً عني وقالت ليها شافت البنات والعروس جاتها نفسيات!!! والبورة قامت بيها…امي قالت ليها بتي تعرس عرسة!! البلد والبلدين يتكلمو عنها!!؟ وجا احمد داخل!! امي قالت ليه دا منو ولشنو م دخل البيت!!؟
قال ليها دا حسام ودخالة العروس لاقيتو يوم العقد والعوارض ديل م خلاهم يجو براهم!! امي دعت ليه!! وانا ابتسمت وقلت ف سري م شفتيهو عمل ف بتك شنو!!!؟
التفاصيل كتيييرة بس حوريكم الحاجات المهمة وم اكذب عليكم نفسي اتسدت وم بقدر اواصل!! خلوني افرح شوييية بتعيني ف اول وظيفة وافضل جريدة فيك ي بلد!!؟ جاتني امل مستغربة مالك بتتبسمي براك!! ضحكت وقلت ليها بخطط لمستقبلي!! ضحكت ولمن ختت يديها ف ركابيها وقالت هو الليلة ياداب شالوك ف الجريدة وبتخططي كمان!!! اهااا اتخيلتي نفس رئيس تحرير ولا المدير!!!؟ ضحكت وجدعتها بسفنجتي **** يكرمكم….وطلعت ع ناس البيت اتونس معاهم….الكهرباء قاطعة والجو حلووو وبخور امي عامل شغل!! اخدت يومين ومشيت بكل ثقة للجريدة!! لابسة عبايتي الجديدة وشبطي العاجبني وفايل ظريف كدا ف يدي!!! لم وصلت سلمت ع عمو حسين الحارس!! سبحان **** سلم علي بلهفة وكان بسألني ان شاءالله قبلوك!!! هزيت رأسي موافقة!!! م شفتو الفرحة الاترسمت عليه وكأني بنتو القربة لقلبو!!! ومسكني من اكتافي وقرب يحضني بس وقف!!! وبقي يدعو لي بالجد كلماتو اثرت فيني ودمعت عيوني ودعيت ليه دعوات حلوووات ف سري!! دخلت ع الجريدة وبقيت بتلفت!!! انا داخلة وين!! دي جريدة ولا محكمة!! م شفتو البدل والقشرات؟؟ انا الوحييييدة اللابسة عباية!! بقيت اتبسم!! مشيت لسكرتيرة المدير سلمت عليها ووريتها انهم اتصلو علي وفعلا رنت للمدير وقالت لي انتظري؟؟! ربع ساعة بالتمام حتي دخلت عليه ومن شافني ابتسم!! بدون م اعرف السبب!! واول مرة اتوتر؟؟! وانا داخلة المعاينة طبيعية ومسترخية وبعد م اتعينت معقولة اخاف!!!؟

اتربشت غايتو ودفرت الكرسي وسلمت عليه وجيت اقعد رميت فايلي واتبهدلت غايتو!! قال لي وين الثقة وشوفة النفس دييك؟؟! انا ضحكت وقلت ليه لانو ابتسامتك كانت ماكرة!!! كشر؟ انا بطني تكتكت وقلت ف سري انا قلت شنو؟؟! قال لي تقصدي انا مكاااار!!! ابتسمت بخوف وقلت ابدااا بس م قدرت افسرها صاااح!!! اتنهد وقال لي م تشغلي بالك خلينا ف المهم!! اعاد لي الكلام الفي التلفون وانهم وقبلوني وكلام من دا ووراني شروط الجريدة شفاهتا وقال لي حتلقيهم منصوص عليهم ف العقد اقريهو واذا حابة توقعي مرحب بيك بيناتنا!!! استلمت العقد وفعلا بديت اقراء فيهو!! ضحك وقال لي انتي جادة!! ضحكت وقلت ليهو يمكن يكون ف شروك جزائية!! ابتسم وحكي دقنو وقال لي شرطنا الجزائي واحد بس وهو انك م تشتغلي ولا تتعاوني مع اي جريدة تانية!! ابتسمت وقلت ع بركة **** ووقعت!!!
واخيرا بقيت موظفة وبالاصح صحفيييية!!! بالجد احلامي بدت تتحقق…!
طلعت ع السكرتيرة توريني مكتبنا ع وين!!! متأكدة من اني م حكون ف مكتب منفصل وانو حيكون معااااي شي غرابة العشرة صحفين بس بصراحة م اتوقعتو بنفس المنظر الشفتو!!! محللين بتوع كرة قدم متناقشين ولا لمه كشتينة متشاكلين ولا اجتماع اوليا امور اولادهم عاملين مصيبة ف المدرسة؟؟! حاجة كدا م مفهومة جوطة جوطة جوطة ترفع الضغط!! وزول اشتغل بي ماف ولا اصلا احظ وجودي!!!؟ جريت طالعة براحة!!! اسمع الصوت المستحيل يخفي علي!!! انتي؟؟! اتلفت مندهشة عبدالله؟؟! ابتسم وانا قلبي بقي يضرب!! صريت وشي وقلت ليه الجابك هنا شنو؟! ضحك وقال لي جريدة ابوك؟؟ م كلنا قدمنا زيك؟؟! قلت ليه وان شاءالله م يكون شالوك؟؟ صر حواجبينو وقال لي دا شنو الحقد دا؟؟!
اتأففت ومشيت خليتو…حصلني وكان بنادي بس اببيت اقيف ف ست شاااي حتى هي انيقة ومظبطة قالت ليه مالك مع بت الناس!!! م رد عليها لم وقف قدامي قلت ليه عايز مني شنو؟؟ قال لي مالك ي هيام نحنا اخوان واصحاب معقولة تزعلي مني!!!
عيوني دمعو وقلت ليه بس انت خنت ثقتي وكسرتني!! قال لي انتي جادة؟؟؟ انا برضو الكسرت قلبك؟؟ ولا….وقاطعتو قبل م يكمل كلامو وقلت ليه م عايزة اتكلم ف الموضوع دا بس خليك ف حدك واتجاهلني ولو اتلاقينا بس يكون بيناتنا السلام!!! قال لي راحتك ومشى خلامي واقفة؟؟ رجعت لست الجنبة طلع اسمها حنان! شربت شاي واتعرفت عليها وطلعت ظريفة وبقت مخبري!! حكت لي كل شي بحصل ف الجريدة وورتني الصحفين منو الطيب ومنو الخبيث ومنو الاستغلالي وم خلت لي شيء!!! وبعدا كلووو م شالت مني حق الشاي وقالت لي لانك جديدة دي ضيافتك بس م تتعودي!!! ضحكت وخليتها بتضحك واشهدت ورجعت المكتب!!! لازم اتعرف لي ع زول؟ لم دخلت لقيتو شبة فاضي شكلهم طلعو الفطور….ولقيت استاذة مريم وانا من اشد المعجبين بعمودها وسلمت عليها بالهفة ودرشت معاها…رحبت بي ووعدتني انها حتساعدني وقالت لي لو احتجتي لاي شي م تترددي!!!؟
وجا فينا عبدالله طوالي قمت خليتهم بعد م شكرتها ومشيت!!! لاقيت واحدة ظريفة كدا سلمت علي وشكلها جديدة زي بس مدردحة واتعرفنا ع بعض اسمها مروة وقالت لي الشغل جايط بس ح اتأقلم سريع!! وسألتني عن مشرفي منو؟؟ قلت ليها بإستغراب مشرف شنو؟؟! ضحكت وقالت لي لا انتي مفتكرة انك حتمسكي عمود طوالي!!! ابتسمت وقلت ليها ماف زول قال لي!! وصفت لي زول قاعد طرف ومكشر قالت لي اسأليهو بس ان شاءالله م تكوني ف فريقو!! مشيت وقفت ف راسو وسلمت!! رفع عينو عاين لي وردا السلام بطريقة غريبة!! زي المجبور عليه…قلت ليه انا جديدة…..وقبل م اتم كلامي قاطعني وقال لي اسمك منو!! قلت هيام محمد!! فتح دفتر كدا قدامو وقال لي ف قروب استاذ مرتضي!!! لمن شلت نفسي وقلت الحمد*** م حيكون المشرف بتاعي…وسألت عن مرتضي قال لي عندو مقابلة مع شخصية مرموقة وم حيجي الجريدة إلا بكرة….رجعت لمروة واتونسنا وطلعت ف قروب منفصل عنها بس ظاهر عليها طيوبة وع نياتها…طلعنا مع بعض وقفنا للمواصلات…عندهم ترحيل بس لسسسه اسمائنا م نزلت معاه وغير كدا قالت لي نادر م حنمشي معاه لانو معظم شغلنا بكون ميداني وخارج الجريدة…ركبت المواصلات وانا بفكر ف عبدالله سبحان **** خليت كل شيء وراي وبديت صفحة جديدة بس الماضي متابعني وم مخليني ف حالي!!! الزول الخرب حياتي واتسبب ف تعاستي القاهو ف وشي ويوميا حيجدد علي احزاني ويزكرني بالماضي الاليم…!!!؟

نواصل بعدين
يتبع ………

الجزء الرابع من رواية معذبتي​

رجعت البيت وكلهم منتظرني متشوقين لاول يوم لي ف الجريدة!! حاولت اخبي عليهم تعاستي وبقيت اوزع ابتسامت مصطنعة؟؟ كأني بغش ع نفسي لانهم حسو بحزني بس ماف واحد إتجرأ وواجهني…!؟
ابوي جابة لي ب فووق وقال لي دائما البدايات بتكون صعبة وحتواجهك عقبات ومن اول مرة الزول م بياخد انطباع عن المكان و**** يوفقك وشدي حيلك وكل كتييير حلو!! عيوني ادمعت وضاريتها ف حضنو!! اتنهدت بصعوبة وهو بربت ع ضهري!!؟ امل جات ناطة قالت لي اها سيناريو الاحضان عايزة تحوليهو بي جااي!! ابتسمت قشيت دمعتي وقلت ليهم انا جيعانة!! لقيت امي زاتها م فاطرة وقالت م عندها نفس!!؟ ياربي يكون قلبها حسسى بوجعي؟! مشيت جهزت الاكل وامل ساعدتني وجبتو لحدي عندها وحنستها بكذا طريقة وف الاخر جبرتها عديييل وبقيت ااكلها بيدي وهي تضحك!!؟**** م يحرم بيت من نعمة الام…بعداك فتشت شنطتي وطلعت رقم استاذ مرتضي ادوني ليه ف الجريدة اتصلت عليه م ردا اخدت نص ساعة وعاودت الاتصال فصل فيني الخط!!؟ وقلت سجمي م يطلع فقري!! بس جاتني رسالة نصية سوف اعاود الاتصال بك حتى اطمئنيت!!؟ رقدت وكنت تعبانة وجسمي مرهق بس النوم رفض يطلني!! فخلوني اقتنم الفرصة واواصل ليكم حكايتي عسى ولعلى بعداك ارتاح شوية واقدر انوم!؟ ونرجع بالزمن سنة تقريبا اللهو بعد عرس ودعم امنية ب اسبوعين!! كنت جارية ف موضوع استخراج الشهادة الجامعية وبفتش لجريدة اعمل معاهم الخدمة الوطنية بس كلهم بيرفضو؟؟! ف البقول عندهم متدربين وماف طريقة يزيدو العدد!! وف القالها لي بصراحة انو المتدربين ببوظو الشغل وشوهو سمعة كذا جريدة!! المهم بالرغم من الرفض المتكرر بس م استسلمت وحتى اني وسعت دائرة بحثي ودخلت المجلات كمان!!! بس دلاك طلعو صعبين شديييد وم بعينو الا ناس عاملين دراسات عليا!!! وماف مجال لاي متدرب!!! المهم يوم وانا راجعة زهجانة من السخانة وشحطة المواصلات اتصل علي رغم غريب!! قبل م ارد قلت يمكن بكون ف زول حنى علي ووافق يشغلني!!؟
فرديت بحماس الوووو!! واتفتح باب الشكل والعتاب والصوت بقي لي حنين شديييد وحلو الصراحة!! ابتسمت وقلت بما انها بتعرف اسمي معناها اكيييد بتعرفني وانا خجلت اقول ليها انتي منو!!؟ خفت اجرحها!! واكتفيت بالضحك والتبرير عن عدم الاتصال!! اعتذرت لانها م اتصلت اليوم داك عشان تطمن علي بس قالت لي انتي عارفة البيت كان كيف ولمممه الناس…وانا خلاص مخي شطب وم عرفتها بس **** انقذني لم قالت لي اها بقيتي كيف وم تكوني هبطتي تاني وم تقولي لي م مشيتي فحصتي!!!! وطق الموضوع وقع لييي….قلت ليها بدهشة ريييييم!!! ضحكت وقالت لي بنضم من الصباح وم عرفتيني؟؟! سلمت عليها تاني وقلت ليها مع زحمة المواصلات والجوطة م قدرت اميز الصوت واعذرت ليها…المهم اتونسنا وسألت عن امنية وناس بيتنا وعزمتني م رفضت بس قلت ليها ان شاءالله اذا **** رفع القدم ح اجيك!!! وانا متأكدة٢٠٠×ال١٠٠ م حقدر امشي ليها ياااخ بلدهم سفر واليوم كلو ح اعديهو مواصلات!! وقبل م تقفل قالت لي ف زول بسلم عليك وضحكت وانا صريت عويناتي وقلت ليها **** يسلمو بس منو!!؟ قالت لي بوريك بعد نتلاقى يلا بااي انا داخلة محاضرة بس م تقطعي اخبارك وسيفي معاك الرقم…بالجد مكالمتها عدلت مزاجي..!! ومن يومها ونحنا متواصلين وم بمر اسبوع وإلا واحدة فينا تكون اتصلت ع التانية وكل مره نقول نتلاقى و**** م يسهل لحدي م يوم فاجأتني!! وجات مع بت خالتها عروس ودعم امنية جوهم زيارة ونادتني امنية بالحيطة وم ورتني انو معاهم ناس ريم وقالت لي تعالي بالباب معانا ضيوف تعالي ساعديني!!؟ بتزكر كنت مكعكة شعري ولابسة توب امي حق الهزاز!! غسلت وشي ولفحت توبي ومشيت جريت السلك ودخلت!! سامعة جوطة رجال ف الصالون!! بس حسيت بالصوت مألوف وم اكذب عليكم جسمي كشششة!! دخلت ع البيت لانو الصالون منفصل بحوشو براهو!! ومن عتبت البرندة وجاتني رييم جارية بصرخة صغيييرة كدا كلها حب ولهفة وشوق!!! وانا فاتحة خشمي وم مصدقة!؟؟ سلمت عليهم وامنية تضحك وتقول لي رايك شنو ف المفاجأة دي!! اتونسنا ودخلت معانا المطبخ وجهزنا الاكل واصوات ضحكاتنا فوووق!! بعداك غديناهم وحلو وشربو الشاي وقالو طالعين!! اصريت ع ريم تمشي معاي البيت تسلم ع اهلي!!! وهي ولا اترددت طوالي تبعتني!! لاقتهم وكأنها بتعرفهم من زمان بالجد البت دي م ساهلة!! **** حفظها ويديها حسب نيتها!! شكلو احمد انبرش فيها وبقي يتكبكب وجرا جاب البارد!! والباب دقى مشت فتحت امل طلع حسااام اي ياهو زاتو!! بعد سلم قال ليها البت العبيطة دي لو م طردتوها م بتطلع من بيتكم!! ضحكت وحصلها احمد اووو حسام واتفضل ولو م كان وصلتنا كنت ح ازعل منك؟؟! والمهم فضلو ع الصالون بس حسام قال ليه مستعجلين والعرسان ديل ف العربية منتظرننا!! بس طلب منو بسلم ع ناس البيت لانو وعد احمد قبل اليوم انو حيخش يسلم علينا!! وفعلا سلم من بعيد ودخل واحمد قدامو نادى امي جنب البرندة سلم عليها وانا وامل ولحدي م دخل وطلع انا عيني م رفعتها من الارض و**** م قدرت اعاين ليه وبدون مبالغة لابس شنو م عارفة ولا شفت!!؟ وودعتهم وطلعت مع ريم لحدي العربية ورجعت البيت خليت احمد بعاتب ف معتز العريس وشغلها ليه لانو م جانا البيت ف حين انو كان بيجي بينوم ف صالونا وتقريباً مشو ع كدا!! اليوم التاني مباشرتا خش علي رقم غريب!! كنت بعيدة من التلفون م رديت وم كان عندي رصيد عشان ارجع ليه!! المغرب كدا تاني الرقم اتصل وياداب كنت بكبر للصلاة!! ردت امل وعرف صوتها وقال ليها بعد هيام تصلي خليها ترن لي!!! وفعلا كلمتني وتستفسر دا منو وفاكراني مخبية عنها شيء!! وانا احلف اني م بعرفو؟؟ وهو م وراها اسمه؟ المهم حولت لي جنيهين من تلفون الحاجة ورجعت ف الرقم ومع كل جرس قلبي دقاتو بتزيد!!! قفل فيني ورجع لي!! من قال الووو ابتسمت تلقائياً قلت مرحب!! سلم علي وسألني من ناس البيت…وقال لي سمعت انك صحفية وعايز اعمل تهنئة لصاحبي عريس!! رايك شنو اعملها ف جريدتكم!!!؟

انا ضحكت؟؟ قلت ليه القال ليك منو اني صحغية؟؟! واتربش!! قالي ب**** يعني ريم غلطانة!؟ قلت ليه من الاخر متصل لششنو!!!؟
قال لي عشان اسمع صوتك وانا من الخلعة قفلت فيه الخط!!! م اتوقعت يقول لي كدا!! وخلوه يقول عايز يقولو اصلا هو شايفني متخلفة وهبلة من يوم موقف الاسانسير؟؟! وحشرت التلفون تحت المخدة والقى المحقق امل مسهيه فيني وهزت لي كتفها وقالت دا منو ومعاها مده بوووز!! ابتسمت وقلت ليها صديق!! ضحكت وقالت لي انا م بعرفك ي عوقة!! غير احمد اخوي ف راجل بتصل عليك!!؟ يلا يلا سريع وريني ولشنو قفلتي قال ليك شنو!!؟ ونطت ف نص السرير م تقولي لي دا عريس!! بقيت اضحك ع عوارتها ووقفت لي ف حلقي لحدي م حكيت ليها!! بقت تتبسم وقالت لي الصراحة حسام وجيييه ويتحب امسكي فيهو قوي!!! بعد بورتك دي كلها **** جايب ليك عريس السرور!! انا بضحك ع سزاجتها!! قالت لي معناها كلام امي صاااح هيام بتعرس عرسة يتكلمو بيها البلد والبلدين!!! وقامت جارية قلت ليها اوعك تكلمي امي لا عريس ولا قرف م بعرفو عايز مني شنو!!؟ قالت لي امي ف عينك ماشة اجهز لستتتة الحاجات العايزاك تجيبيها لي لعرسك

طلعت وخلتني بضحك…بعداك طلعت التلفون واصلا ربيكتي متحججة حشرتها تحت المخدة ضغطت البطارية وقفلت التلفون!!! اسسه يقول البت المعاقة دي مالها!!
فتحتو وبعد مساااافة نزلت لي موبايلك غير متوفر!! وكنت مترددة اتصل ولا اكسر الحنك!!؟ ونسيت الموضوع…والايام مشت عادي وتاني م اتصل وانا ف رحلة البحث عن جريدة!! وقربت ايأس واشوف لي شغلة تانية ولا اقضي الخدمة ف مدرسة ولا خلوة!!! بس انا كنت عايزة الجريدة لانها حتضيف لي كتيير بس نقول **** غالب!!؟
لحدي م يوم **** سهلها علي واتصلت علي ريان قالت ف مجلة بتاعت ***** وافقت تخلينا نعمل الخدمة الوطنية معاها بس بدون قروش بس الترحيل عليهم!!!
م صدقت وطرت من الفرح واصلا انا عارفة حتي ف المؤسسات الكبيرة م بيدو قروش وان جاملوك ٣٠٠ م بزيدوها…المهم حددنا يوم عشان نمشي وفعلا اتلاقينا ف الشهداء ومن هناك موقع المجلة م بعيد برجولنا مشينا وكان مكتب صغييير وكلهم اربعة اساتذة كباااار شكلهم عايزين ليهم مساعدين لانو الحركة صعبة عليهم وطلوع السلالم!! المهم شلنا منهم خطابات ووديناها المنسقية بتاعة المقرن قالو لا إلا نمشي حقت شارع الستين وفعلا مشبنا وشلنا امر التحرك وامورنا ظابطة ونحنا راجعين قالت لي شارع الستين م بودينا العربي ارح نركب من شارع الصحافة البودينا ع المغتربين وانا م ناقشة حاجة بس قلت ليها محل م انتي ماشة انا معاك!!! وفعلا مشينا ووقفنا شوييية كدا وجات كريز بس فيها مقعد واحد فمشيناها!! ولسسه واقفين جات عربية مظللة بتضوي ماشاءالله والسواق نزل القزاز وفتح الباب الامامي وقال لينا اركبو!!!
طلع حساااام!!! وانا قلت انت؟؟! عبير اصلا انبرشت ف العربية قبل م تصلنا وقالت ان شاءالله يقيف نملح معاه وكأنو **** استجاب ليها

وقالت لي بتعرفيهو يعني!!! ولا كذبت طوالي فتحت الباب الخلفي وركبت وانا واقفة مهجومة وم عارفة اتصرف!!!؟
نواصل بعدين
يتبع ……..

الجزء الخامس من رواية معذبتي​

ف لحظات بتمر بينا بتكون نقطة تحول ف حياتنا!! قد م ننتبه ليها ف وقتها! س بيجي اليوم الحنزكرها فيه؟؟ إذا كان شي حلو اكيد الزكرة حتكون طيبة وحيكون يوم مميز بالنسبة لينا!! وإذا كانت العواقب وخيمة حنندم اشد الندم ع اللحظة المن المفترض نحنا نقول لا!!؟ وخاطرنا وعشناها؟!
وانا مترددة اركب ولا لا!! قلت اصلا هو واخد عني انطباع سيء!! وحيطلعني متخلفة بالجد اذا م ركبت وهناك عبير بتشجع فيني اركبي ولشنو مبومة!! اتنهدت وقفلت الباب الامامي الفتحو لي وركبت ورا مع عبير؟! همست لي وقالت دائما فاضحانا؟؟! اتحرك وسلم علينا تاني وقال لينا ان شاءالله عافية!! عبير لم شافتني ساكتة قالت ليه جينا المنسقية!! عاين لي وقال **** يوفقكم امر تحركم للتجاني الماحي ولا وين؟! عبير بقت تضحك وانا حمرت ليه ونزلت عيوني وم رديت!! وطوالي عبير بادرت وعرفت عن نفسها وسألتو بيعرفني من وين لانو م حصل شافتو ف بيتنا ولا لمحتو معانا!!؟ وبقو يتونسو…قال لي انتي مالك منكمشة مني انا زعلتك ف شيء!! عبير قالت ليه اصلا هي انطوائية ومتخلفة…صاح قالتها بعفوية وبهظاار بس اكلت معاي جنبة وف النهاية هي صحبتي من باب اولى تقيف معاي انا!!؟
بس قطعتها ليها ف راسها وقلت ليها اليومين دي البت لو م اتخففت واتلفتت بقولو عليها انطوائية….حسااام شعلل الفتنة بيني وبين صحبتي وبقي يضحك!! عاين لي بالمرايا وقال امرك غريب…وتاني م فتح خشمو..لحدي م قطعنا الكبري وهو ساكت!! م بعرف اذا عبير اضايقت من كلامي ولا فعلا عندها مرسلنها ولا عايزانا ناخد راحتنا انا وحسام ف الكلام!! قالت ليه وقف لي هنا مرسلة من ناس البيت!! كنا ف الموردة قلت ليها متين بقيتو تاكلو سمك!! نظام افرفش معاها واراضيها!! ابتسمت وعاينت لي ونفس النظهرة الخبيثة ديك لحسام وقالت لي شكلو ح اشبع منو قريب!! ضحكنا ونزلت وراها قلت ليها م تكوني زعلتي ي هبلة!!؟
ضحكت وقالت لي بالجد انتي مافي منك!! البزعلني شنو ي عويرة انا و**** مرسلاني فاطمة مرة اخوي عايزة حاجات من الدنقلاوي…قلت ليها خلاص نمشي مع بعض!! قالت لي لو اخلي المشية م بسوقك معاي الجنا دا شكلو معجب بيك ظبطيهو اليوم ولا حتثبتي لينا انك متخلفة ودلاها وجزمة كمان….ضحكنا وقلت ليها اتصرف كيف!!؟ قالت لي خليك ع طبيعتك!! وجات ماشة وقبل م اركب اتلفتت وقالت لي لا طبيعتك صعبة خليك ظريفة شوية!!! وضحكنا وقطعت الظلط…! جيت اركب ورا لقيتو أمن الباب!! وم فتح معاي وفتح لي الامامي اترددت بس قلت اكيد م حيقل ادبو معاي وركبت!!؟ قالي م عارف اسادي عبير بشنو وبقي يضحك!! انا بوزت وصريت وشي قلت ليه نزلني!! قال لي خلاص خلاص انا اسف!! حقك علي هيامي!! عملت نفسي م سامعة بس قال هيامي؟؟! انا ناقصة عولاق كمان!! حس بي سرحت ف كلمتو وعشان ينتشلني من افكاري قال لي اهاا احكي لي عن نفسك شوية!! قلت ليه عرفت متين ان شاءالله!! ابتسم وشبه هداء العربية وعاين لي مسااافة قلبي بقي يضرب وبلعت ريقي وقال لي اسسسه والان وف اللحظة دي حابي اتعرف عليك!! بالجد جهجة افكاري وغلبني الرد!! وكل الطلع معاي قلت ليه عايز تعرف شنو؟؟! استنو استنو حنواصل باقي حكايتنا بعدين متصل علي استاذ مرتضى!!! الوووو واسمع الصوت الرزين!! لو م اكدو لي انو خمسيني كان اقول دا صوت شاب ف اواخر العشرينات!! بتكلم معاه وتعابير وشي م بتتفسر ومندهشة من الرُقي والهداوة والكلام السلس!!! لم عرف انا منو رحب بي ف فريقو وقال لي اكيييد حتكون تجربة حلوة لي وشوفو التواضع!! قال لي اكيييد الجريدة حتستفاد منكم كتيييير وانتو ثمرة جهدها وحتستلمو زمام الامور من بعدنا وكلام تحفيزي كتيييير خلاني اشتهي الشغل ف اللحظة دي!!! بالجد الكلمة الطيبة بلسم!! فما تبخلو بيها؟!

قفلت منو وانا مبسوطة!! فما عارفة اواصل ليكم ولا انوم!!! وجااات امل ناطة كعادتها دا منو؟؟! ضحكت وقلت ليها انتي بتجسسي علي؟؟ ولا الشمارات دي بدوك فيها حاجة….؟ ضحكت وخبطتني بالمخدة قالت لي ي هبلة انا خايفة عليك وعايزة مصلحتك؟؟! تخيلو الكلام دا طالع من اختي الاصغر مني؟! تبتسمت واديتها ضهري وقاصدت الحيطة…كدي خلونا نواصل قبل م انوم!!! يلا حسام قالي م اكذب عليك عايز اعرف كل شيء عنك عايزك تتكلمي وتطلعي كل الجواك بالجد انا مشتهي الونسة معاك!! قلت ليه دقيقة دقيقة مالك مدفع كدا!! اصبر شوية وكمان لشنو عايز دا كلو بتعرفني من وين ولا عايز تفتش لي حاجة تذلني بيها تاني!!؟ بركن العربية ف شارع النيل امدرمان!! كنا ماشين بالبحر؟ قلت ليه خير ان شاءالله عاوز تشتري شيء!! لانو شايفة ف ناس فارشين فواكه وخضار!! قال لي لو م جننتيني م بترتاحي!! انتي لشنو م عايزة تديني فرصة!! لشنو بتصديني منك؟! قلت ليه دا طبعي كدا!! قال لي طبعك غريب لكن!!؟ زعلت وقلت م مجبور تستحملو وحاولت انزل…! قال لي اصبري ثواني وم تخليك انفعالية…قلت ليه بس انت اضبط كلماتك!! ابتسم وقال لي بعتذر حقك علي!!؟ قلت ليه مشينا!! حكى دقنو الخفيفة وقال لي اصبري شوية م ح اخطفك!! ابتسمت!! عضى رف سبابتو وقال لي بعد الابتسامة دي ممكن عادي ادقش الترتوار دا وارمي العربية ف البحر!!! ضحكت وقلت ليه خليني انزل اول!! صر حواجبينو وقال لي م خايفة علي!! حمرت وقبل م ارد….قاطعني وقال لي و**** بهزر م تنزعجي!! اها احكي لي عنك؟ قلت ليه انا م بعرف اتكلم عن نفسي او بالاصح ماف زول سألني قبل كدا عشان كدا م بقدر اتكلم بس ممكن انت تسأل وانا ح اجاوب؟! قال لي صحفية وم بتعرفي تتكلمي وعن نفسك كمان!! ي حليلك ي بلد!! ابتسمت وقلت بالمناسبة انت مجالك شنو؟؟! ابتسم وقال لي حرامي!!! واضح انو بهزر بس فعلا سرق اغلى شيء فيني؟؟!
قال لي هم تلاتة اسئلة بهموني!!
عاينت ليه بإستغراب وقلت شنو؟!
قال لي مرتبطة!!؟ ابتسمت وقلت دا البهمك؟! قال لي جاوبي ع قدر السؤال!! قلت لا!! ابتسم ولمن شال نفسو وختاه!!؟ قال لي اذا اتقدم ليك زول قد يكون مناسب بتوافقي!! انا قلبي بقي يرجف وجسمي برد!! قالي منتظر جوابك؟!
قلت ليه ع حسب الزول يمكن يكون مناسب لغيري بس م لي!!!
ضحك وقال لي وكمان مفترية!! ابتسمت…شال نفسوبصوت مسموع وقال لي اذا ف شاب راكبة معاه وواقف جنب البحر والجو شاعري وقال ليك انا بحبك قبل م اتعرف عليك بتصدقيهو؟؟؟! وهنا انا اتكهربت وجاني احساس اني افتح الباب واقوم جارية…!!
نواصل بعدين.
يتبع ………

الجزء السادس من رواية معذبتي​

الحب بتولد معانا!! بنبداهو مع امهاتنا ونحنا شفع ف الفراشة والدائرة بتوسع بيدخل الاب والاخوان وكل زول قلبك ارتاح ليه!! فماف زول يقول انا م بحب؟؟! قد ننصدم فيه ونخاف نقرب منو!! وقد نضيعو!! واحياناً نتجاهلو!! وحاجات كتيييرة بتقيف عائق بينا وبينو؟!بس دا م يعني اننا ننكر وجودو او نداريهو وكأنو شيء عيب ولا حرااام!! نصيحة ليكم عيشو الحب بكل تفاصيلو…بس بما يرضي **** علشان لو انصدمنا فيهو **** يقيف معانا ويعوضنا بالافضل…!
حسااام كان جادي وصادق معاي وصرح عن مشاعرو بدون م يتوجس من قراري!! بصراحة خفتت شديد!! عمري ف الوقت داك كان٢٤ م حصل ارتبط ب شاب!! ولا سمعت كلمة بحبك من زول!! وفجأة وبدون مقدمات حسام يصدمني!! والف سؤال فرضو نفسهم؟! هل فعلا بحبني؟؟ طيب بحب فيني شنو ولا بيعرف عني شيء؟؟ طيب متين حباني؟! ياخ انا رأسي كان حينفجر من شدة التفكيير؟! وهو ساكت م قال شيء!! اكيد م حوافق بس م قادرة ارفض؟! ولا قادرة اقول ليه انا ولا بحبك ولا حتى فكرت ف الارتباط بيك؟؟ دور العربية والهدوء عامي المكان!! قرابة الربع ساعة وكانت اطول ربع ساعة ممكن تمر بيكم!! وماف واحد فينا قال للتاني حاجة!! لحدي م وصلني البيت لم جيت نازلة مسك اطراف اصابعي وقال لي انا م عايز اضغط عليك ولو اي بت ف محلك حتكون دي ردة فعلها!! فكري ع مهلتك واستخيري واذا شايفة انو ممكن ثنائيتنا تظبط..بشريني بموافقتك واذا رفضتي م تدخلي ف اي حرج وخليك صريحة وح افتكرك م من نصيبي ويارب تكوني من نصيبي!! قلت ان شاءالله الفيها خير **** يسوق عليها!! ونزلت ولمن رجولي بيرجو والمشي غلبني وبعد تخلت البيت حتى اتحرك….دخلت والغربية نسيت اسلم ع ناس البيت وطوالي مشيت ع غرفتي!!؟ امي استغربت وقالت لامل اجري شوفي اختك مالها؟؟! اللهم اجعلو خير….جاتني الشمارة ملهوفة مالك ي كريها!! م رديت عليها وبعاين ليها جووووه عيونها!! انا م عارفة الحصل لي شنو؟! بس خشيت ف حالة الوعي والا وعي وبقيت م مركزة!! قعدت جنبي ونطرت عيونها وقالت لي مالك!! حضنتها شدييييد وخجلت منها وقلت ليها ماف شيء!! ضحكت وقالت لي اييييييييك يادابك ف البدايات!! اتجاوزنا مرحلتك دي زمااان! اها وريني منو؟! اتخلعت وقلت ليها متين كبرتي كدا ي امل!! ضحكت وقالت لي كلنا كبرنا بس انتي مسكينة!! اها قولي!!! حكيت ليها الحصل!!؟ قالت لي انبراش الهنا اريتو زولي!! ابتسمت وقلت ليها اقول ليهو شنو!!قرصتني من انفي وقالت لي انتي حاسة بشنو!! والبقولو ليك اقلبك اعمليهو!! بس الصراحة عريس م بتفوت ولا بيتعوض!! وغير كدا طولتي معانا ياخ امشي مننا كرهناك زاتو!! وقبل م ارد عليها اتصلت عبير!! يلا وريني قال ليك شنو واتخأرتو لشنو ومشيتو وين وانا بالمواصلات جيت قبالك!! ضحكت وقلت ليها انتو مراقبني ب gps متييين شفيني جيييت!!؟ ضحكت وقالت لي احكي قلت ليك…قلت ليهابرجع ليك بعدين ماشة اسلم ع امي واصلي العصر!!! بس امل خطفت التلفون من يدي وم خلت ليها حاجة م قالتها!! ضحكت عليهم ومشيت ع تاج راسي!!! م قادرة اواصل لاني نعست خلوني انوم ع الزكريات الجميلة دي ونواصل مرة تانية!!؟ وقبل م اغمض كويس اتصل علي أ/مرتضى اتخلعت ورديت بإستغراب؟! قال لي اسف اذا ازعجتك!؟ وعارف الزمن م مناسب..! بس بعدا بقيتي صحفية لازم تحت اي لحظة تكوني متاحة!! وضحك…انا ابتسمت وقلت خير ان شاءالله؟! قال لي لازم بكرة امشي السوق المركزي واستطلع ارآء التجار والمواطنين عن الاسعار!!؟ لانو اليوم ضاعفو السعر ف كل الاسواق…وبعداك تكتبي مقال ظريف عنهم وعن الغلاء الحصل!!؟ يلا انا حسيت بزنننة ف راسي!! ولمن اضنيني صنو!! وقال لي الوو انتي معاي!! م عرفت اقول شنو؟ ولا ولا يوم م اشتغلت ومن اول يوم امشي برااي وكمان اكتب مقال!!؟ ضحك وكأنو سمع كلامي مع نفسي!!! وقال لي م تخافي انتي قدرها وبالطريقة دي حتتعلمي وم تخافي مرسل معاك زميلك حيلاقيك ف المركزي!! حرسل ليك حاجة بسيطة مشي بيها يومك ولمواصلاتك…قلت ليه لا م بيحتاج!! ضحك وقال لي انت اول زول يقول لي لا!! عندك عربية خاصة؟؟ ولا قروشك من كثرتها م عارفة تصرفيها وين!! ابتسمت بس م رديت!! قال لي م تخجلي كلنا عارفين البئر وغطايتها!! ودا حقك بالمناسبة ف كل تقرير ميداني تعديهو عندك حافز والاهم انو اكيد م حتتوصلي من جيبك ولا اخر الشهر حتطلعي مطالبة ومرتبك م بحلك صدقيني!! المهم شرح لي بطريقة موجزة عن التقرير بيتعد كيف والاسئلة بكون شكلها كيف…وقال لي حيساعدك زميلك ح اديهو رقمك يتواصل معاك الصباح وقفل مني!!؟ بالجد طير النومة من عيني!! امل شافتني شاردة وكانت مركزة ف قرايتها م انتبهت لكلامي بس عينها وقعت علي!! شترتني بالقلم وقالت لي نومي وم تفكري ف ولادة الغربة؟!! ضحكنا وقلت ليها اتلمي…وبطني لمن لوتني من شدة التوتر!! وم قدرت انوم ولا تفكرو انو اواصل ليكم قصتي براي الفيني مكفيني

الصباح جاا وانا كل م الوقت يمر بتوتر اكتر!! من **** م لقني م شفت السوق المركزي ولا عارفة بيركبو ليهو شنو؟! وكمان انا لو زول سألني م برد؟! خلي امششي واتظارف واسألهم انا كمان….دي مصيبة شنو دي؟؟ المهم احمد وصف لي وقال اركب العربي ومن هناك للمركزي وفعلا شلت منو مصاريف ورفض يخليني احول ليه الرصيد وقال لي خليهو بتحتاجي ليه!! وامي وابوي حصننوني بدعواتهم ورافقتني…وطلعت لم وصلت المركزي اتصلت ع أ/مرتضى وسألتو عن الصحفي اللحيلاقيني وقال لي من المفترض يكون منتظرك ثواني ارسل ليك رقمو!!؟ شوية كدا والرسالة جات!! وانا بسجل ف الرقم ع جهات الاتصال حسيت بيهو مألوف!! بس اتصلت ومع الزحمة والجوطة م سمعت كويس!! لحدي م استقر وراي ولفتني من كتفي!! اتلفت عليهو واللقاهو زفت الطين عبدالله!! قلت ليه انت؟! قال لي م عايزين فضائح وشوشرة يستحسن نتجنب مشاكلنا الشخصية وم نخلطها بالشغل عشان م نتسبب ف طرد بعض من اول وظيفة لينا!! قلت ليه م ح اشتغل معاك!! قال لي خلاص نتصل ع أ/مرتضى!!؟ اترددت بس قلت اتصل؟! وردا عليهو وسألو اذا لاقاني!! وقبل م عبدالله يوريهو اني رفضت الشغل معاه قال ليه خلي بالك منها والسوق فيهالصالح وفيه الطالح!! م تسمح يحصل شيء يسيء ليها ولا لجريدتنا ولازم تنجزو لي التقرير اليوم لاني معتمد عليكم ولو واجهتكم اي مشكلة ارجعو لي!! يلا انا مشغول…وقبل م يقفل قال ليه ولا كنت عايز تقول حاجة!! عبدالله قال لا وقفل…قال لي سمعتي كلامو افتكر!! من ناحيتي انتي كنتي وحتغضلي صديقتي المقربة…بسس!! وقبل م يتم كلامو قلت خلينا ف الشغل يكون احسن!! وبدينا ف مهمتنا!! وانا لافة ف المركزي جاني احساس انو حساام قريب مني واتمنيت م يكون قريب!! عشان م يفهمني غلط ويثبت الفي راسو!!؟

خلصنا الاستطلاع وقعدنا عشان نرتب افكارنا ونصيغ التقرير بطريقة كويسة وقعدنا مع ست شاي لاني رفضت امشي معاه اي حتة…بس جوطة الناس حولينا منعتنا من التركيز واصر علي انو نقعد ف حته هادئة وف كافتيريا م بعيدة اقترح انو نقعد فيها!! وبعد إلحاح ولمن الانظار اتجهت علينا مشيت معاه وياريتني م مشيت!!
ع دخلتنا طلب لينا عصير وختينا ورقنا بنرتب فيهو اشوف زول واقف ف راسي وجسمي تقل وم قدرت ارفع راسي اشوف دا منو؟؟؟!
نواصل بعدين
يتبع ……….

الجزء السابع من رواية معذبتي​

لقدر دائماً بفاجئني!!؟ وبتحصل لي حاجات م مناسبة ف وقت م مناسب؟! بس اكيد لحكمة يعلمها ****!!
انا اتجاهلت الزول الواقف قصادي وم رفعت عيني اشوفو؟! بس عبدالله قال ليه خيير عايز حاجة؟؟
داك بكل وقاحة قال لي الفيك اتعرفت وكلامي طلع ف محلو!!! عرفت دا م حساااام ورفعت رأسي ولقيتو اباذز الخسيس!! قمت ع حيلي وسبقني عبدالله ووقف ليه ف وشو قال ليه لو عايز مشاكل اطلع لي برا بس م تقل ادبك هنا؟! انا تدخلت وقلت لعبدالله م تشتغل بيه دا واحد نزعاتو الشيطانية طاغية عليه…ف جرسون جا علينا وقال خير ان شاءالله ف شيء!!! انا قلت لعبدالله ارح نطلع من هنا!! قال لي بنهرة لو م شربت عصيري وكتبت تقريري م طالع!! وكان بحمر ل اباذر!! وهو واقف بيتبسم وقال لي مبروك ابقو اعزمنونا العرس!! ومشى خلانا!!! انا دسيت وشي بين يديني!!؟ وقلبي وجعني وقلت ياريت لو كان شافني حسااام اكيد م حيفهم غلط!! بس اباذر اكيد حيعقد الامور؟؟! اكيد حيقول لحسااام حاجات م حصلت؟؟ حوريكم اباذر دا منو بس قصتو طويلة ودا م وقتها بس بإختصار كدا الزول الملى لحسام راسو وجاب ليه معلومات مغلوطة وعارية عن الصحة بخصوص علاقتي ب عبدالله!! ياهو اباذر!! وسبحان **** الليلة يشوفني وكمان مع نفس الشخص النقل اخبارو لحسام؟؟! م عارفة افسر ليه كيف!! بس دقيقة؟! لشنو افسر؟؟ ولشنو اشغل بالي بحسام!! مش نحنا منغصلين!! ولا ارتباطنا روحي؟!
وانا سرحانة اتكلم معاي عبدالله بهدي فيني!! وصدقوني اخر زول حابة اسمع صوتو!! استغفرت وشربت حبة موية وقلت ليه نواصل!!!
طلع ورقو وقال نكتب منو التقرير!! عاينت ليه بإستحقار!! وقلت ليه تقريري اعملو مِحاية!! ابتسم وقال لي دا مقبول اكتر!! واصلا انتي م استطلعتي غير راي تلاتة اربعة اشخاص!! قلت ليه عشان م نخش ف مشكلة اي واحد يكتب تقريرو البنلاقو كويس نعتمدو!! لانو واثق ف نفسو زيادة عن اللازم وافق ومباشرتا بدأ يعد ف تقريرو….وانا اتنهدت وبديت افكر واربط الاراء عشان الخصهم ف مقال معتبر…والزمن سرقنا وقريب الساعة ونص ولا ساعتين نحنا بنكتب!! وبعد خلصنا هو قراء لي تقريرو وبالجد كان حلو شديييد ومنمق لابعد حد!! بصراحة خجلت زاتو اقراء ليهو حقي!! بس اتشجعت وقريتو وهو بداري ف الضحك وبتبسم زي الزول الكذاب وانا بقراء ومتغايظة!! قال لي بإفترا اهااا نعتمد وينو!!! خطفت شنطتي وجيت قايمة وقلت ليه قدم حقك!! وجريت ع مواصلاتي!!
طول الطريق بحاول اشغل نفسي عن التفكير ف ردة فعل حساام لم اباذر يوصل ليه الشافو بطريقتو الخاصة!! واتوترت م خليت يافطة م قريتها لوحات العربات م قصرت معاها وكل م عيني تقع ع شيء بزكرني اكتر بموضوعي!! وصلت البيت وانا مدبرسة!!! ابوي قال لي اها وريني مقالك ولو عجبني بعمل منو نسخة وحتفظ بيها!! ضحكت وقلت انت الوحيد الماحتشمت فيني؟! واديتو قراهو!! عاين لي مسااافة وقال لي م بطال!! بس رجعي لي قروش الحبر الكتبتي بيهو مش دا قلمي!! ضحكت وقلت حتي انت ي ابوي وكبستو ف السرير!!! واصوات ضحكاتنا جابت امي من المطبخ!! قالت لينا فايقين ورايقين وانا باقية فسيخ من سخانة المطبخ!! قمت وحضنتها وقلت ارتاحي انا حواصل ليك الحلة!!؟ قالت لي بطلي فصاحة واها وريني ان شاءالله اتوفقتي!! قلت ليها الحمد*** بس شكلك الليلة وانتي بتدعي لي كان بالك مشغول ف شيء تاني!!! ضحكت وقالت ليي خربتي الشغل ي البومة!! ضحكت وقلت ليها ابوي حيوريك وطلعت خليتهم بيضحكو؟!
لقيت امل م جات من الجامعة رغم جنونة بس البيت ماليهو طعم من دونها ياااخ دي الدينمو البحرك سعادة البيت!! صليت الظهر والعصر مع بعض ونفسي قافلة من الاكل!! وقلت اتصل ع ريم اسلم عليها واعرف منها شيء!!! لانو حسااام لو لاقي اباذر هي بتكون عارفة!! بس بحاول اصبر ف نفسي شوية واتقل فيها!! المساء كدا اتصل علي أ/مرتضي وقال لي لو م تصلت م بقولو نعبر الاستاذ ونوريهو كيف كان الشغل!! ضحكت وهو جاملني واعتذرت منو وقلت لقيت الوقت م مناسب!!! قال لي ي بتي ف عالم الصحافة والاعلام ماف حاجة اسمها الوقت م مناسب!! لو جاكم حرامي لاسمح **** ممكن تتصلي الساعة١صباحا ودينا الخبر ويكون متصدر عناوين منواعاتنا ف الجريدة ف صباح اليوم التاني!! يعني ٢٤ساعة لازم تكوني متوفرة وتحت الخدمة فهمتي!! كشرت وبإبتسامة طفيفة قلت ليه يعني ممكن تطلبوني بالمساء!!! ضحك وقال لي شكلك خوافة ولا بتحبي النوم!! ي ستي بنحاول نبعد السيدات عن الدوام المسائي بس ف حالة الضرورة القصوى ممكن نستعين بيكم!!! حتي شلت نفسي لانو مستحييييل ناس البيت يخلوني اطلع ف انصاص الليالي عشان شغل؟؟! المهم قفلت منو وقلت لازم اتصل لريم خلاص فاض بي وم قادرة اصبر…وفعلا اتصلت وبعد كذا جرس حتي ردت!!؟ كان صوتها متغير!!! وكأنها بتبكي!!؟ قلبي قبضني؟! وسلمت علي بفتور!! ونبرة صوتها كلها حزن وعتاب…قلت ليها عافية ان شاءالله صوتك م عاجبني…!؟اتنهدت وقالت كويسة م ليها عوجة! برضو م طمنتني؟! وسألتها عن ناس البيت!؟ انا بقصد حساااام؟! قالت طيبين وفجأة انفجرت ف البكاء؟! انا اعصابي باظت ويدي بقت ترجف!! وبتأتأ قلت ليها ف شنو ريم؟! وهي بتحاول تخبي زعلها ف قلبها قالت لي ماف شيء برجع ليك تمام!! قاطعتها وحلفتها م تقفل!! سكتت مساااافة؟! قلت ليها اباذر جالكم!!؟ بنبرة حااادة قالت لي يعني عارفة السبب؟! انا دمعتي جات جارية!!؟ قلت ليها حسااام قال شنو؟!

قالت لي و**** حرااام عليك ي هيام؟! عليك اغلا م عندك لشنو بتعذبي ف اخوي!! غلط معاك فشنو ي صحبتي!! بقيت ابكي معاها!! قلت ليها يعني صدق كلام اباذر!! قالت لي انا م عارفة اباذر قال ليهو شنو بالضبط خلا اخوي يخش ف حالة تانية!! بس حسااام ماسك التلفون وبعاين لصورتك انتي وواحد كدا قاعدين ف كافيتيريا؟! انا بكيت بحرقة!! قلت ليها يعني صدق اباذر!! قالت لي م عارفة اباذر قال شنو قلت ليك؟؟ بس اخوي صدق الشافو بعيونو؟! قلت ليها وانتي رأيك شنو!! اتنهدت ولسسه بتتنهف وقالت لي انا بعرفك بس م اكتر من اخوي لكن بثق فيك ي هيام ومتأكدة انو ف سوء تفاهم حاصل!! وانتي مستحيل تخدعي اخوي!! بكيت بحرقة وقلت ليها صاح م بتعرفيني ااكتر من اخوك بس للاسف بتثقي فيني اكتر منو؟؟! ودا الشيء الواجع قلبي!! وعدينا باقي المكالمة بكاء!! امل كانت راقدة وع مشارف النوم بس لم سمعت بكاي وشافت حالتي قامت وشالت مني التلفون وم عارفة قالت لريم شنو!! بس انا غطيت راسي بالمخدة وم عارفة النوم جاني فجأة ولا اغمى علي!!؟
صحيت اليوم التاني راسي تقيييل وصداع حااد قايم علي…بس ابيت ارقد وقلت لو اتغيبت يمكن استاذ مرتضي يقول انا م جادة ف الشغل وبرضو يفهم تغيبي غلط….جهزت وطلعت…وصلت الجريدة وانا شوف م بشوف لقيت الزملاء قاعدين بيتونسو وسألوني عن اول تقرير لي بس اختصرتهم لاني م قادرة حتى اردد اسمي!!! مشيت لحنان ست الشاي وشربت منها قهوة وحتتها كانت هادئة شوية و**** يديها الصحة والعافية ادتني مسكن من بلعتو شوية كدا وجسمي لمن عرق!! م بعرف من الجبنة ولا المسكن !!بس حسيت بنفسي افضل!!؟ جاا أ/مرتضى داخل سلم علينا من بعيييد وبعد م دخل مكتبو وبعد عشرة دقائق حتى مشيت عليه!!؟ وكأنو عبدالله كان مترصدني طوالي جا داخل وراي!! سلم علينا تاني وبإبتسامة عريضة قال لينا اها وينو تقريركم!! عبدالله لانو واثق من نفسو! قال ليه من المفترض كان نعد التقرير مع بعض بس شكلها استاذة هيام رافضة لفكرة العمل الجماعي واصرت انو نعد تقارير منفصلة والافضل نقدمو للجريدة وف الاخر ثبتنا ع تقريري!! وطلعو بكل فخر وشوفة نفس من شنطتو واداهو للاستاذ وكان رافع نخرتو شديد!! وانا ولا فارق معاي اصلا امور حياتي كلها مدهورة فما وقفت ع التقرير دا؟؟! أ/مرتضي حكي راسو وكان بعاين لي بإستغراب؟ بس انا نزلت عيوني ومنتظرة البهدلة ولا الكلام البسم البدن داك!!؟ بعد اتطلع عليه بعجالة كدا…! قال لعبدالله اكتر من ممتاز ماشاءالله عليك..وزولكم بعجبكم ف التملق وكسير التلج!! والتفت علي وقال م اتوقعتها منك صراحتا ي استاذتنا الصغيرة بس يمكن يكون عندك مبرر!! قلت ليه بعتذر بس ثنائيتي مع استاذ عبدالله م ظابطة ممكن تغصلنا عن بعض استاذ!! عبدالله اتنرفز وعايز يجوط فيني بس مرتضي وقفو وقال ليه اهدى ودا رايها الشخصي ولازم نتقبلو!! خير ان شاءالله ح ادرس طلبك وح اديك خبر؟! بس عبدالله شاب طموح ومجتهد وحتستفيدو من بعض كتييير!!؟ شكرتو وجيت طالعة قال لي انتظري جارية وين!! ابتسمت وقلت اسفة ف شيء!! قال لي وينو تقريرك!! ضحكت وقلت م حياكل عيش مع تقرير أ/عبدالله!! حكى دقنو وقال لي بإمتعاض كدا انا البقيمو م انتي!!! والدرب راح لي ف الموية!! احرجني ياااخ وخلى عبدالله يتبسم ساااي…! طلعتو من شنطتي!! مابعرف كان نقط فيهو اللوشن ولا ريحتي التركيبة!!! بس كلو كان بقع زيت ولا شنو م عارفة!! عاين ليهو مسااافة وقال لي لفيتو بيه شاندوتش طعمية ولا شنو؟؟! والتلاتة بقينا نضحك!! قال لي اتفضلي! واشر ع الكرسي وقعدت!! برضو قلب صفحاتو بتمعن وملامحو اتغيرت!! وبقت م بتتفسر؟ قلت خلاص بيطردني من الجريدة!!! ختاه ف التربيزة وبقي يعاين لينا!! وانا ببلع ف ريقي ومتوترة!! قال شغلكم ممتاز!! وم اتفاجأت بتقريرك ي هيام لاني كنت واثق فيك!! انا بيني وبين نفسي قلت الاستاذ دا شارب شنو؟!! عبدالله صر حواجبو وقال تقصد انو تقريرها كويس؟؟! أ/مرتضي ابتسم وقال انا اخترتكم مع بعض علشان تطلعو تقرير نموزجي!! بس انتو عاندو بعض وطلعتو تقارير ممتازة فقط!! نناقشو معاكم؟ انت اسم تقريرك غلاء اسعار الخضروات هل زيادة مبررة ام جشع تجار؟ مش دا عنوانك؟ عبدالله وافقو!! عاين لي وقال اما الساندريلا كان عنوانها خبز وقود دواء والان خضار؟؟ ثم ماذا بعد!!
بصراحة عنوان هيام اثارني اكتر وحسيتو مناسب اكتر لانو الغلاء عااام وشامل كل الاساسيات المعيشية…عبدالله ظهرت تغطيبات جبينو وانا بتكشم ساااي… قال اما من خلال المضمون فعبدالله ابدعت ف صياغة الاسئلة وطرحها للتجار والمواطنين بدل ع انك متمكن بالفطرة!!! ياداب حتي زولنا شال نفسو ورجعت ليه نظرة الازدراء!! قال بس هيام كسرت الروتين بحاجة جديدة م مألوفة ف الجريدة وكل الجرائد!! انا وعبدالله فتحنا خشومنا منتظرين الحاجة شنو؟! قال لي لو رجعتي لاف عدد مطبوع حتلاقي كل التقارير بنفس السياق وماف جديد!! نفس الكلام ونفس الاسئلة بس الاسماء والتواريخ هي البتتغير!!؟ لكن الحاجة الابتكرتيها ي استاذتنا الصاعدة انك استخدمتي اسلوب قصصي!! سردك كان بسيط وبعيد عن التنمق الزائد؟ كل صحفي وع رأسهم انا بنخاف ندخل العامية الدارجية ف تقاريرنا وكأنها بتنقص من مكانتنا ولا بتعكس للقاريء اننا م متمكنين ف اللغة العربية!! بس انتي جازفتي ودمجتي العامية بالفصى والعجبني اكتر بتنزلي كلام الشخص بحزافيرو وانتي بين قوسين بترجمي معاني الكلمات الاصلا هي معروفة للعامة!! وعلشان تسكتي النقاد بتسألي باللغة العربية الفصحي!! فدا إن دل فإنما يدل ع انك صحفية متمكنة!! وصدقوني انا لا فكرت كدا ولا خططت بس الجاني ف راسي كتبتو!! اصلا م كنت عارفة اكتبو كيف؟؟ عبدالله قال ليه يعني اسلوبي م كويس؟؟ مرتضي قال ليه بالعكس دا المطلوب! بس هيام ابتكرت وم قلدت!! دا الصحفي الناجح!! المهما كان موضوعو عادي بيقدر يوصلو للقاريء ويشدو لمتابعتو!!؟ انا الفرحة م سايعاني!! وعبدالله ظاهر عليه انو بقي يشوفني عشرة عشرة!!! لم مرتضي حسى بأنو الجو اتوتر بيناتنا قال لينا انا لم طابتكم مع بعض م كان عن فراغ!! شيلو التقريرين ديل وادمجوهن ف تقرير واحد بنفس الملاحظات الانا قلتها وسلموه لرئيس التحرير!! وزمنكم انتهي وكان بيتبسم!! انا ابتسامتي للضرس وعبدالله عيونو اجتمو مع خشمو من شدة م صاري!! وطلعنا من المكتب! وقلت ليه يلا عدل تقريرك واهم شيء يكون العنوان بتاعي واضح وظاااهر!! كنت قاصدة انكد عليه ومشيت ع مروة مبسوطة وبضحك!!؟

اليوم عدى ع خير ومنتظرة متين ارجع البيت عشان يعرفو بالحصل معاي وبالزات ابوي لانو اول مرة يتريق علي

…المهم رجعت البيت ووريتهم الحصل بس كانو ضالين كدا وزي المخبين علي شيء!! حتي امل الشمارة م كانت ع طبيعتها!!؟ قلت اللهم اجعلو خير!! ومشيت ع غرفتي!! بغير ف ملابسي تلفوني رنا م شفت المتصل منو بعد م غيرت حتي لقيتها دي ريم!! رجعت ليها بالهفة وم عرفتها!!؟ لاول مره م اعرف صوتها حيلي برد وقلت ليها ف شنو؟! قالت لي حسااااام وسكتت!! حلقي اتربط والكلام ابى يطلع!! عايزة اقول مالو بس صوتي راح!! قالت لي نحنا ف المستشفي ووضعو م مستقر!!!؟
نواصل بعدين
يتبع ……….

الجزء الثامن من رواية معذبتي​

ياربي ريحني من العذاب والمعاناة الانا عايشاها لاني بالجد تعبت وحيلي مات!!!؟ انا صبرت كتيييير وكل م اقول بكرة افضل بإذن ****! القي الخيبات تقول لي وانا؟! م حسبتي لي حسااب!!؟ انا بعد سمعت كلام ريم التلفون وقع من اضاني وم قادرة استوعب!! يمكن اكون بحلم!! حسام جنني؟ ولا شوقي وخوفي عليه اثر ع عقليتي؟! امل دخلت علي وبركت ف الارض ومسكت رجولي وختت راسها فيهم وبقت تبكي!!! انا م قدرت اربط الاحداث!! عقلبي بقي م مجمع؟ ياربي امل مالها؟! قالت لي ع قدر طيبة قلبك **** بيمتحنك بس اختي قووية!! دموعي نزلو عليها وقلت ليها ف شنو؟! شكلها حست بي انا م واعية!! قامت حيلها م بعرف شممتني شنو بس انا عيوني زغللو وحاسة بالسرير لافي بي!! بعداك م وعيت ع نفسي!! بعد فتحت لقيتها هي وامي جنب رأسي!! حضنت امي وقلت ليها انا عملت شنو غلط ف حياتي عشان دا كلو يحصل معاي!!! امي حصل انا اغضبتك ف يوم ولا نمتي وقلبك مغموص مني!! اتلفتت ع امل حصل يوم انا رفعت يدي عليك ولا جرحتك بكلمة!! نادو ابوي وينو ابوي حصل انا عصيت كلمتو!! وجيت قايمة امي مسكتني حضنتني عليها وبكت معاي!! قلت ليها طيب لشنو بيحصل معاي كدا!!؟
بكيت بحرقة!! اتضح انو حسااام بعد م اتكلمت مع ريم داك مشت عليه ف الصالون ع شان تخبرو بأنو اباذر زيف الحقائق…! بس لقتو راكب عربيتو طلع وهي بتنادي عليه وم وقف؟؟! وكان منفعل شديد!! ربع سااااعة م تماها عمل حادث ف شارع المطار!!؟ واسعفوه بس وضعو م مستقر!!؟ مهما حصل معاه انا السبب انا الملام الاكبر!! لو هو فهم غلط بس برضو انا لي دور كبير ف الحادث دا!!! **** م تحصل ليه حاجة **** الطف بيه!! **** طمئن قلوبنا عليه!!؟ قلت لامي انا ماشة اشوفو كلمي ابوي!! امي قالت لي كلنا حنمش؟؟ واذا **** م جعل قسمة بيناتكم دا م يعني ننسي العشرة ودخلة اهلو بيتنا!!؟ بكيت فيها بحرقة… وفعلا ربع ساعة كدا وجانا امير ودجيرانا! اخو امنية!! ومشينا وبصعوبة حتى قدرت اسيطر ع نفسي قدام ابوي!! وصلنا المستشفي!! ورفضو يدخلونا قالو م مواعيد زيارة وغير كدا هو ف العناية المكثفة؟؟! م بخلو زول يدخل عليه!! لاقينا اهلو كلهم برا واختو الكبيرة ابت تسلم علي وجاطت بس عمها شاكلها!!؟ وكفرنا ليهم وبكيت مع ريم!! قالت لبتاع الامن دي خطيبتو خلوها تشوفو ببرا بس!! اول رفض بس انهرت وبقيت ابكي بطريقة هستيريا!! واحنس فيه!! ف الاخر وافق بس قال خمس دقائق ولا حيتسأل هو!! شكرتو وجرينا ريم قدامي وانا وراها!! وم استنينا الاسانسير جرينا بالسلالم لمن وصلنا قسم العناية المشددة!! وقاصدنا الغرفة الهو فيها!! **** م تشوفو المنظر دا ف حبيب ياربي م تقطع قلب زول ف مريودو زي م حصل معاي!! اشوف صدرو مجرد من الملابس وجسمو كلو اجهزة ولا حركة ماف!! انا وقعت!! وبقول **** م تعاقبني ف حسااام **** شيل روحي وخليهو وريم بتبكي وبتحاول تهدي فيني عشان م ينتبهو لتواجدنا!! قالت لي ف الحالة دي من امس ي هياام وماف اي استجابة للعلاج!! انا صرخت!! وم وعيت بنفسي ألا وانا برا ف الطواريء والاصابات!! لم فتحت قلت ليها وين حسام!! قالت لي طلعونا لانو اصلا م مسموح لينا بالدخول…بس هو ف حالتو ماف جديد!!؟ ادعي ليه ي هياام!!!
ابوي قال لامي عملنا الواجب يلا نمشي!! ف قلبي بقول ي ابوي وانا!! كيف افوتو وهو ف الحالة دي؟! انا كيف اقدر اصل البيت بسلامة بعد ماقلبي اتقطع!! زول يكلم ابوي!!؟ امي قالت لينا ارح ونجي مره تانية نشوفو!! اعتذرت لنفسي لاني حرمتها من شوفة محبوبها!! ولاني خذلتها وم خليتها تقيف معاه!! ونحنا ف الطريق صورتو م فارقتني!! ضحكتو صداها ف اضاني!! وحسيت بشحتفة روح وكل حاسة ف جسمي بتشجعني على الصريخ!! ومسكت امل وبقيت ابكي وامي بتحاول تتكلم مع ابوي عشان م ينتبه لي وامير لو عاين لي بالمرايا بتخيلو حسااام وكمان بشاغل فيني…**** م عيشكم يوم زي دا!!؟ والبيت بقي لي بعيد خلاص وبجيني احساس اني ح اموت قبل م اصل!! بالجد دا احساسي!!؟ بعد وصلنا وجيت ماشة ع غرفتي ابوي وقفني!!؟ عليك **** ي ابوي م تتكلم معاي وخليني مع احزاني!! قال لي تعالي!! وساقني معاه ع الصالون!!؟ وقعدت بقي يعاين لي وانا الصراحة م قدرت اخبي دموعي!! وبضاري فيها؟؟ قال لي ابكي وطلعي كل الالم الجواك دا حقك!!؟ وانا م صدقت قال لي كدا حضنتو وفكيت ف الجعير!! كملت بكيتي ف ابوي!! وفعلا قلبي برد شوية!! بالجد انا كنت ف حالة صعبة شدييد!! ابوي قال لي غسلي وشك وتعالي!! طلعت من الصالون اقرب ابريق غسلت بيه وجهي ورجعت ليه …قال لي بعدا ممكن اتكلم معاك؟! قلت ليه اتفضل ابوي!! قال لي بغض النظر عن اي شيء حصل حساام زول طيب و**** والحصل معاه دا مؤثر فينا كلنا!! ف انتي ليك حق تعملي اكتر من كدا!! صااح م حصلت بيناتكم قسمة!! ولاخر لحظة حسام كان متمسك بيك بس انتي رفضتي!! قلت ليه بس دا دخلو شنو ي ابوي!! قال لي انا ماعايزك تحملي نفسك ذنب اي شيء!!؟ كلو مقدر ومكتوب!!! واذا **** قسم الحادث دا حتي لو انتي معاه بيحصل!!؟ قلت ليه بس زعل بسببي انا ي ابوي!!؟ قال لي ع حد علمي انتو منفصلين لاكتر من ستة شهور!! الجد شنو ف الموضوع؟! حكيت ليه الشافو اباذر والبكون وصلو لحسام شنو؟؟! استعاذ ب**** وردد الحوقلة كذا مرة…وقال لي برضو مسطر ومكتوب!! وانتي مسكينة وع نياتك ماعايزك تحملي نفسك ذنب غيرك!! قلت ليه صاااح فسخت خطوبتي منو بس يابوي ماقادرة اتقبل الشي الحصل ليه!!؟ لو م كنت انا السبب م كان اتهور وساق عربيتو ف مسار غلط؟! وبتمنى من كل قلبي يتعافي ويرجع لحياتو الطبيعية!! ولا سمح **** اذا اصابو اي مكروة انا م حسامح نفسي!! واستأذنت منو وجيت قايمة!!؟ م وقفني ورجعت غرفتي وتميت بكاي…!

كانت اطول ساعات واصعب احساس..وف كل لحظة قلبي يفر ويدق وبسأل نفسي بكون وضعو كيف!!؟ بتصل ع ريم تلفونها مغلق!! وانا للصباح قاعدة ف السرير الرقاد ساي غلبني!! ومن الفجر استحميت ولبست عبايتي وطلعت!! قالو لي ع وين؟! قلت ليهم عندي شغل…شكلهم عرفو بس م ضغطو علي…امي قالت لي م تنسي ي بتي الولد دا بقي م خطيبك؟ فما تزلي نفسك قدام اهلو!! بكيت وقلت ليهاالبيناتنا اكبر من دبلة ومحبس ي امي!! وحضنتها وقلت ليها اديني خاطرك وطلعت!! ركبت الخرطوم ومشيت ع المستشفي!! الواطا ياداب كشفت!! لم جيت داخلة بتاع الامن الامس لقيت مناوبتو انتهت وسلم واحد تاني!! لم شافني قال لي انتي!! قلت ليه ممكن ادخل!! قال لي لسسه بدري ماف زيارة اسسسه!! بس قال لزميلو دي بت اهلي اتمشي معاها عليك ****!! وطلع خلاني ف الريسبشن!! زميلو قال لي المرقد ليك منو!! قلت ليه خطيبي!! ودموعي نزلو!! قال لي اسمو منو!!؟ قلت حسام فتشو ف الكمبيوتر وقال لي اسمو ثلاثي قلت ليه اااي هو!!؟ عاين لي مساااافة وقال لي **** يقومو ليكم بالسلامة!! قال لي معاه مرافقين…بس اكراماً ليك ولحالتك ح اديك كرت مرافقة!! م عشان تبيتي؟! بس اذا جيتي ف اي وقت ممكن تدخلي!! بكيت وشكرتو اداني كرت وكتب فيهو بياناتي وختمو لي وقال لي عارفة العناية وين؟! هزيت راسي بمعني ايوا وجيت ماشة!!؟ كانت المستشفي شبه فاضية الطاقم الطبي م شايفة لي واحد حايم والمرافقين بكونو نايمين ف الغرف الا عمال النضافة بس متواجدين!!؟ لم جيت طالعة شفت العامل فتح الاسانسير وقال لي تعالي!! قبل م يطلع!!؟ اتزكرت اول يوم الاقي فيهو حسااام وقعدت ف الارض وبقيت ابكي!! لمن حيرت العامل وطلع خلاني…طلعت بالسلالم ووصلت العناية وكلها غرف!! امس م كنت مركزة وم عارفاه ف اي غرفة وحمتهم واحدة ورا التانية وبعاين بالقزاز لحدي م شفتو!!؟ ف نفس الحالة الامس!! ختيت جبيني القزاز وبكيت!! قلت ليه حسام دي انا هيامك!! معقولة م عايز تشوفني!!؟ مش قلت لي لو انا قريبة منك بتحس بي قبل م تشوفني!!؟ هدي انا جنبك فتح عيونك!! بتقول لي انتي بتعذبيني بس انت اتجاوزت التعذيب بمراحل!! وانفعلت شديييد ودقيت ليه ع القزاز وم عارفة بقول ف شنو بس ع امل انو يحس بي ولا يتجاوب معاي!! بس ماف شيء؟! راقد زي الملاك؟ وانا م قادرة اصلو بتزكر كان قال لي انا لو لمستك ولو بالصدفة بتكهرب!!؟ يمكن اذا لمستو يفيق!! وبقيت اكابس ف باب العناية عايزة ادخل!! وشافني ممرض ولا دكتور م عارفة جاني جاري وبتعملي ف شنو؟؟ وانتي منو؟؟ ودخلتي هنا كيف؟؟! وانا ببكي وبقول ليهو خليني المسو و**** هو بيستهبل علي!! عايز ينتقم مني لاني خليتو؟؟ هو بطبعو هزارو سغيل!!؟
اتعاطف معاي ومسكني وانا حيلي م شايلني وسندني ونزل معاي ع صالة ف الطابق التاني قعدني ف مقعد وطلب من عامل يجيب لي موية!! ومسك يدي قال لي انتي مش مؤمنة!! هزيت راسي مؤيدة!! قال لي طيب هو محتاج لدعواتك م بكاك!!! نحنا م بنقصر منو بس دعواتكم يمكن تكون استجابتها اسرع عند رب العالمين من عقاقيرنا الطبيبة دي!!؟ فشدي حيلك واصبري وصبري امو ياااخ م شفتي حالتها!!؟ قلت ليه بخلعة مالها!!؟ قال لي ف الغرفة رقم ٢٧٠ شوفيها!! وشدي حيلك ومشي خلاني!! اتصلت ع ريم!! علشان اشوف خالتو مالها قالت انها ف البيت م خلوها تبيت وشكلها م عارفة انو امها تعبت وانا م وريتها وقالت لي بعد اصل عليهم ح اطمنك!! وقفلت منها!! مشيت ع الغرفة لقيتها نايمة ومعاها ولدها الاكبر من حسام اسمو خالد وبتها روعة الاكبر من ريم!! ومن شافتني مسكتني من يدي وطلعت بي برا الغرفة!! قالت لي عايزة مننا شنو؟؟ اصلا السماح ليك تدخلي منو؟! م كفاية الحصل بسببك!! شوفي من دخلتي اسرتنا الحصل فيها شنو؟؟! بكت وقالت لي عليك **** انا بترجاك خليك بعيدة عننا!!؟ ياخ مش انتي خليتي اخوي بإرداتك!!؟ تاني لشنو راجعة دفرتني لمن قربت اقع وقالت لي م عايزة اشوفك هنا فاهمة ولا لا!! ودخلت الغرفة وقفلتها وراها!! خلتني قاعدة ع امشاط رجولي ومخبية راسي بين افخاذي وببكي!!؟ وكأني ناقصة هموم!!! بس ليها حق انا راجعة لشنو؟؟ بس دا حسااام كيف م اقيف معاه!!؟ قعدت ف حتتي ديك منتظرة لحدي م الدكتور مره عليها وقال لي خير مالك ي ماما قاعدة كدا!! انا م كنت قايلاه دكتور م لابس اللابكوت ولا شايل سماعة!! قلت ليه ي عمو عايزة اطمئن ع خالتو بس م عارفة اسأل منو؟! قال لي بس كدا!! مسكني وقومني من الارض وقال لي كويسة بس الضغط ارتفع والسكري انخفض بس **** لطف بيها الان كويسسسة وانا ع امر عليها واطمنك رايك شنو؟! ابتسم!! انا بعاين ليه بإستغراب واستاذني ودخل عليها!! اقل من خمس دقائق طلع ومعاه خالد واتفاجأ لم شافني!! بس شكر الدكتور والدكتور طمني ع حالتها وقال ليه حرام تخلو القمر دا منتظر جمب الباب!!؟ خلوها تطمئن ع الوالدة!! خالد قال ليه اكيد ماف زول مانعها وكان بعاين لي بإستغراب!! هو كان نايم لم روعة طردتني!! الدكتور ربت ع كتفي ومشي!! خالد قال لي جيتي متين!! قلت ليه انا م مهمة حسااام وضعو كيف الدكتور قال شنو!!؟ قال لي ماف جديد للاسف بس عشمنا كبير ف رب العالمين!! بعتذر م تزعلي مني بس لو شافتك روعة حتعمل مشاكل ونحنا خايفين ع صحة امي م عايزينها تنتكس تاني فبعتذر مرة تانية امشي وانا بوعدك اطمنك بالتلفون!! بكيت وقلت ليه وانا كمان بعتذر م ح امشي اخلي حسام بس بحاول م اتلاقي روعة وافضل بعيدة عنها!! عاين لي مسافة واتنهد ودخل!! جرجرت رجولي ومشيت علي الاستراحة!! وجبت رقم أ/مرتضي ف الشاشة علشان اوريهو اني م بقدر اجي اليوم!! بس اشوف خالد جاري ولمن طقش ليه ممرضة وم انتظر المصعد وجرى بالسلالم!! انا رميت التلفون وجريت وراهو!!؟

نواصل بعدين
يتبع ……….

الجزء التاسع من رواية معذبتي​

وانا جارية وقلبي واجعني وبدعي **** م يختبر صبري ف حسااام، وصلت بعد خالد بثواني!! وكانت العناية مليانة دكاترة!!؟ ومنزعجين وبحاولو بينعشو ف حسااام وخالد حاول يكسر الباب ويدخل عليهم وكان متجرس شدييد؟! انا كأني بحضر ف فلم!! ولا ف حلم بشع وبقنع ف نفسي! انو م حقيقي؟! وبحاول ارفع رجلي من الارض واحصل خالد بس كنت مجمدة؟؟ ورجولي م بيتحركو!! وبعداك ف واحد من الطاقم نزل ستارة شفافة كدا ع الباب وبقينا م شايفين شيء!! خالد قعد ف الارض وبقي يبكي؟! بهمهم بكلام بس انا بقيت اشوفو اتنين والكلام بقي لي تقيييل وبعييييد وتاني م وعيت بشيء؟؟! لم صحيت لقيت نفسي ف غرفة برااي وم معاي زول؟ فكيت الدرب من يدي وطلعت ملهوفة!! م عارفة انا وين ولا ف اي طابق!! سألت مرة وقلت ليها وين العناية!!؟ قالت لي انزلي طابق!! وقبل م تكمل قمت جارية!! وبقول **** جيب العواقب سليمة **** طمئن قلبي!!؟ فعلا وصلت العناية وجريت ع الغرفة!! لقيتها فاضية؟ رجعت للجنبها قلت يمكن يكون لخبطت ف الغرف!! بس طلعت ياها!! بقيت اصرخ بأعلي صوت لي!! وبنادي ع اسمو!! جاني زول جاري م بعرف كان شنو بس لابس لبس عمليات!!؟ مسكت يدو بيديني الاتنين وبسأل فيه بهستيريا!! حسام وين وديتوه وين؟! وهو بقول اهدي حسام منو!! م متزكرة عملت شنو بس شكلي رفعت يدي عليه وبقيت اخبط بدون تركيز واخر صرخة لي ضمت الدنيا ف عيوني!! لم وعيت لقيت راسي ف رجول ريم!! فتحت عيوني بصعوبة وجيت قايمة وقلت ليها ريم وينو حساااام!!؟ وكنت ببكي!! قالت لي اهدي!! حسام كويس!!؟ حضنتها وبكييييت بحرقة وكنت بحمد ف *** انو م حصل ليه شيء اسوأ!!؟ قالت لي الانفعال م كويس هدي اعصابك وادعي ليه؟ محتاج دعواتنا!! قلت ليها ودوه وين؟؟! قالت لي تعب شديييد بس **** لطف بيه ودخلوه عملية مستعجلة طلع كان عندو نزيف داخلي وفجأة حصل ليه ضيق ف الشراين!! بس اسسه اتجاوز مرحلة الخطر!! قاطعتها قلت ليها عايزة اشوفو؟؟! قالت لي كلنا م شفناه بس طمنونا عليه!! وقالت ف العناية!! قلت ليها م لقيتو هناك!! قالت لي واحدة تانية حقت العمليات!! قمت ملهوفة وقلت ليها خلاص نشوفو بالقزاز بس؟! قامت ومسكتنيمن يدي قالت لي ماف طريقة ممنوع حتي نطلع ع الطابق داك!! إلا الطاقم الطبي بس!!؟ قلبي وجعني وقلت ليها م يكون تعبان وم عايزة توريني!! حضنتني وقالت لي حاجة زي دي م بتتخبي ي هيام بس و**** قالو وضعو افضل من اول بمراحل؟! بكيت وقلت ليها الف حمد وشكر ليك ****!! وجيت طالعة!! قالت لي اعملي حسابك الدكتور قال جسمك ضعيف وممكن تنهاري تاني!! م تمشي بعيد!! هزيت ليها راسي!! وقالت لي م تمشي تضربي ليك جراح تاني!!؟ م كنت عارفة هي بتتكلم عن شنو؟ بس متأكدة من اني عملت لي مصيبة!!؟ طلعت ولقيت خالد ف وشي!! قال لي اسسسه حاسة بنفسك افضل!! قلت ليهو ايواا وسألتو تاني عن حساام وبرضو طمني!! قال لي لو سمحتي م تمشي ع ناس الحاجة لانو روعة متنرفزة شوية وموقفك مع الدكتور زاد الطين بله؟! قلت ليه بإستغراب عملت شنو؟! ف الحالة الفيهو ديك ابتسم!! وقال لي الدكتور قدر وضعك وم حيتخذ ضدك اي اجراء بس من باب الادب انك تعتذري ليه!! وعرفت الزول القبيل داك بكون اتجاوزت حدي معاه!! قلت ليه وين القاه!! وصف لي مكتب الاشراف ومشيت عليه!! لقيتو بيشرب ف قهوة!! جا قايم وقال لي عليك **** م تدفقيها فيني براي شين وتاني ماف بت بترضى تعرسني!! ابتسمت؟ واعتذرت عن التصرف البدر عني!! وقاطعني وقال لي م تشغلي بالك عادي بتحصل ودي عندنا اسمها الشنو كدا م عارفة وبقي يشرح لي!! لم شافني م مركزة معاه ضحك وقال لي اسف كترت الكلام!!؟ بس ع كلاً اعتذارك مقبول و**** يواليه بالعافية ويطمئن قلوبكم عليه!! وشال قهوتو وطلع بيها!!
الساعة كانت١٢ ظهر تقريبا!! وتلفوني م عارفة جدعتو وين!!؟ رجعت ل ريم م لقيتها ف الغرفة وم عايزة امشي عليهم ف الغرفة التانية علشان نخش ف نقاشاات!! طلعت من المستشفي وكنت مخنوقة! شميت هواء وف مسطبة حقت نافورة قعدت فيها ولا عارفة اعمل شنو؟؟! م قادرة اشوف حسام ولا حتى اتواصل مع اهلي ولا عارفة اتصرف كيف وتلفوني تم الناقصة!! جات علي ريم وانا قاعدة ف حتتي!! قالت لي افتكرتك طلعتي!! قلت! م رديت عليها…قالت لي ارجعي البيت وانا كل رأس ساعة ح اتصل عليك اطمنك!! قلت ليها وحسام!! قالت لي حتى نحنا لمدة ٢٤ ساعة ممنوعين من شوفتو!! قلت ليها خلاص ح اقعد شوية وح امشي!!؟ قالت لي انا م طارداك؟ بس ماف زول حيقعد معاك؟! ولا حتقدري تمشي ع ناس امي!! ولا حتى حتشوفي حسام!! وم تنسي المواصلات كل م اتأخرتي م ف صالحك!!؟ والصراحة انا خايفة عليك وم عايزاك تتعبي ف الطريق!! قلت ليها **** م يحرمني منك!! قالت لي لو حسام كان صاحي كان حيصر انو يوصلك بنفسو!! وبقت تبكي!؟ وبكينا سوا!! قلت ليها بس ضيعت تلفوني قبيل!! قالت لي ارح ع الاستقبال!! وفعلا سألنا اذا جابو تلفون ضائع!! وطوالي ادونا ليه!! قدمتني شوية ورجعت ع المستشفي!! انا لم وصلت موقف المواصلات كانت الساعة١ وحاجة!! وفعلا اتصعبت علي ووقفت مسااافة!! حتى ركبت؟ مشيت البيت وحالتي كانت م بتسر؟ امي لم شافتني قالت لي اها حالتو كيف؟؟ قلت ليها ماشي ف تحسن الحمد***!! قالت لي **** يعجل ليه بالشفاء ويقومو لاهلو بالسلامة!! بس تاني ماف ليك مشية وكانت جادة شديد!!؟ قلت ليها حاضر ودمعتي جرت ومشيت خليتهم..خشيت الحمام وفتحت الدش وبكيت بحرقة! وطلعت صليت واخدت لي رقدة!! تعبانة شديييد بس عيوني اذا غمضتهم بشوفو ف المنظر الصعب بتاع قبيل!! وقلبي بيضرب! والنوم ابا يجيني!! وبقيت اتزكر ف ايامنا المضت!!؟

الوقت م مناسب بس لازم تعرفو حساام بيعني لي شنو؟ وكيف تمت خطبتنا وكلام كتيير!! عسى ولعلى تشاركوني وجعي!!
م متزكرة وقفنا وين بالتحديد بس بعد سألني يوم مشيت المنسقية وكان منتظر ردي!! نهااائي م اتصل ولا ازعجني ولدرجة اني قلت الزول دا م جادي بكون قال كلامو ف لحظة ونسة!! بس م اكذب عليكم فكرت ف الموضوع؟! بس م اتخذت قراري!! وبعد اكتر من اسبوعين اتصلت علي ريم بتزكر!! وكانت منفعلة شدييد!! وضحكتني شديييد ف يومها!! ومن كلماتها! تفتريع اخووووي!! ومالك قال رافعة قزازك بكرة دي نعرس ليه ستك!! وضحكنا؟ قالت لي اول مرة اشوف اخوي متوتر كدا!! و**** اكل م بياكل زي الناس!! ولو جاتو رسالة ساي بقوم جاري وملهوف ع التلفون ع امل انك ترسلي ولا تردي!!؟ قلت ليها هو وراكم يعني؟؟! قالت لي من يوم جيتو العرس هو فتح الموضوع مع امي!! انا خجلت وقلت ليها بس هو م اتصل؟ قالت لي حساس شويتين وم عايز يضغط عليك!! قلت ليها بس اخوك فيهو شنو مميز علشان اوافق بيه!! قالت لي بإنفعال وانتي فيك شنو علشان يعاين ليك اصلاً؟! ضحكنا وقلت ليها انتي معاي ولا مع اخوك!! قالت لي انا مع الحق!! وبالجد اخوي زول م ساهل والف بت تتمناه وانتي كمان ماشاءالله عليك…من شفتك حبيتك!! وضحكت قالت لي مجننا البت واخوها!! عملتي لينا شنو؟ قفلت منها مبسوطة وكل م اتزكر كلامها قلبي يدق وبخجل براي!! فاتحت امي وامل ف الموضوع وامل قالت لي لو م وافقتي و**** وتالله م تلقي زول زيو تاني!! وهو انتي لاقية زول زي حساام يعبرك ولا يعاين ليك!! بس بكون عندو مشكلة ف نظرو!! اتشاكلنا كالمعتاد!! بس امي قالت لي انا بحاول اسأل عنو احمد بطريقة غير مباشرة!! وانتي استخيري وم تستعجلي للعرس وكان تقعدي دهر بيت ابوك بشيلك!! بعداك بكم يوم امي اكدت لي انو زول كويس وخلوق وم فيهو عيب! وجات اللحظة الحاسمة!! كيف اتصل!!؟ واقول شنو!! ولو فتح الخط وسمعت صوتو ح اقدر اتكلم ولا ح اتعولق!!؟ وف النهاية وصلت لحل ورسلت ليه رسالة وكان مضمونها…سلمت عليه وقلت بالنسبة للموضوع الطرحتو م عندي مشكلة اخاطر بحياتي!!؟ واذا جادي تعال لابوي!!؟ بسبب الرسالة دي انا اتجلدت جنس جلد!! وع يد منو!! امل! ااي امل اختي!! تضرب فيني وشغالة لي فضحتينا وشرطي عينا! دي رسالة بتكتبها بت جامعية؟؟ وكمان اعلامية!! انتي ي بت نصيحة!! وانا العوقة بضحك!! قلت ليها دا الطلع معاي!!؟ قالت لي خلاص وقت عارفة نفسك متخلفة كان تديني اكتبها ليك!! وف عز الشكلة الحلوة دي اتصل!! وانا الرد غلبني!!! يدي بقت ترجف!! وهي تقول لي ردي اسمعي التريقة عليك!! دا لو م قال ليك مع السلامة واعتبري ماف قسمة!!؟ ووترتني اكتر الزفوتة دي!! وختتني امام الامر الواقع وفتحت الخط وختتو ف اضاني!!؟ ومن قال الوووو!! انا قفلت الخط!!؟
نواصل بعدين
يتبع ……….

الجزء العاشر من رواية معذبتي​

ف احساس حلووو م بنقدر نوصفو بالكلمات!! تقدرو تقولو عنو حاجة كدا بتشرح القلب وبظهر ف الملامح!! قد تكون دي السعادة الكلنا بنحلم بيها وبننشدها!! بس كل زول بتتجسد ليه ف شيء معين!! انا شخصياً قد اكون لقيتها ف زول!! مع انو من الغباء اننا نربط سعادتنا بشخص معين؟! بس صدقوني الاحساس الحلووو دا بيجي فجأة وقبل م نحكم عقولنا ولا نقول م نتعلق اكتر من اللازم بنلقي الموضوع طلع عن السطرة وع قدر تعلقنا بكون مقدار آلمنا!!
امل لم شافتني قفلت الخط اتمحنت وغلبتها الحيلة معاي!! امتعضت تصرفي ومصت العرديب بالدارجي كدا!! وطلعت خلتني!! وافكاري جاطت وقبل م الملمها!! وافتش لي مبرر لقفلتي الخط! تاني اتصل؟ بعد مسافة حتى فتحت الخط!؟ وم اتكلمت…!
وهو ف الاول يقول الووو!! لم م لقي استجابة سكت شويية كدا وشال نفسو بصوت مسموع انا لم سمعتو..! قلبي دقاتو عملت إيقاع عديل!! والمصيية اني بقيت اناهج!! زي الكنت جارية وصوت انفاسي لمصيبتي كان واااضح!! بعدت التلفون من اضاني شان م يسمعني!! بقي يضحك السجمان! وسمعتو اتكلم بس لاني مبعدة التلفون م قدرت افرز كلامو!!؟ رجعت التلفون ع اضاني وقلت معليش الشبكة بتقطع قلت شنو؟؟! تاني ضحك وقال لي نفسك انتي الاتقطع قومي اشربي ليك موية واهدي!!؟ انا من الخجلة عضيت شفتي شديييد وبدون مبالغة لمن قرضتها!! وم حسيت إلا بطعم الدم!! ف خشمي…وان م اعتذر مباشرتاً كنت ح اقفل الخط تاني!!؟ قال لي اخبارك شنو؟ قلت ليه كويسة وانت!! اتنهد بنفس الطريقة البتجهجة ام حبوبتي ديك!! وقال لي بعد سماع صوتك بقيت كويس!! عقدت حواجبني وقلت بإستنكار كدا!! وقبل م تتكلم معاي كان عندك شنو!!؟ بقي يضحك وقال لي خليني اكسر ليك تلج يمكن تحني علي شوية!! بس لقيتك ناشفة يااخ القروشة آلييين منك!!؟ انا ابتسمت وهو بيضحك؟! قال لي مع اني حابي اخليك براحتك وتطلعي الجواك! وتديني قرارك ف موضوعنا!! قاطعتو وقلت موضوعك براك!! ضحك ليه ضحكة مجاملة كدا…وقال لي خلاص ي ستي تديني قرارك ف موضوعي!! بس شايفك خجولة زيادة عن اللازم ولبكرة م حتتكلمي!! ولو اتكلمتي اكيييد حتجوطيها!! وبيضحك؟ بصراحة ضحكتو بتنرفزني اكتر من كلامو!! قلت ليه بإنفعال ادام انا م بعرف اتكلم وبجوط الدنيا! عايزني لشنو؟! قال لي براااحة وبصوت حنيين خلاص شفتي شفتي اها جطيها ولا ولا؟!! انا ضحكت!! بعداك هو سكت مسااافة!! وانا بقول الووو م برد!! قلت ليه صدمتا ولا شنو؟ ضحك وقال لي م تتخيلي منتظر اللحظة دي من متين!! اخيرا سمعت ضحكتك!! بسحان **** طلعتي بشر مننا وبتعرفي تضحكي وتفرفشي!! انا اتغظت وابتسمت ف اناً واحد…م رديت ولا فتحت خشمي!! قال لي يلا نكون واضحين من بدري انا زول فرفوش كدا! وبحب التشغيلات!! فعليك **** م تزعلي مني ف يوم!! قلت لي دي م فرفشة دي قلة ادب بس م اكتر!! ضحك وقال لي انتي لسانك متبري منك؟! وكلامك بترميهو زي الحجار؟! **** يصبرني عليك!! قلت لي وهو متييين انا قلت ليك موافقة!!؟ اتأفف وقال لي ح ازعل بس ف النهاية الشغلة قسمة وانا راضي بالبقسمو لي رب العالمين!! وم معروف يمكن يكون قاسم لي افضل منك!! ولم م جاملتو ف الضحك!! قطع الضحكة،! وقال لي بنهرة كدا م تكوني زعلتي!! قلت ليه بإنفعال واضح!! ازعل لشنو وبيربطني بيك شنو اصلا علشان ازعل!! زيك زي اي زول!! قال لي بإستغراب!! انتي جاادة!! اصلا طبعك كدا؟! من اي شي وابسط شيء بتزعلي!!؟ م رديت!! قال لي خلاص ي السمحة نكون جادين انا بعتذر و**** م اقصد شيء! ووريتك اني بقول كلامي بعفوية!؟ قلت ليه حصل خير!! قال لي طيب ممكن توريني رايك شنو بالارتباط بي!!؟ انا خجلت بس قلت ف نفسي اكون جادة عشان م يقول حابي ليه شافعة!!؟ قلت ليه بما انك فتحت الموضوع ف انا حابة اسألك كم سؤال كدا؟! ضحك وقال لي انا سألتك وعايزة تردي لي ب اسئلة!! ابتسمت وقلت دا م ردي بس اجاباتك حتكون تمهيد للرد بتاعي!! شال نفسو بصوت مسموع وقال لي اتفضلي طيب! وفوضت وامري ل ****!! قلت ليه لشنو اخترتني انا من دوووون باقي البنات!! قال لي بنهرة كدا وانتي لشنو تقللي من شأنك!! انتي اذا م افضل منهم اكيد م حتكوني اقلة!! وبعدين ي ستي انتي العجبتبني!! انتي اللفتي نظري!! انتي الدخلتي قلبي ي هيامي!! خجلت وجسمي برد!! الولد دا برمي لي ف الكلام السمح وانا لا متعودة عليه ولا بعرف ارد عليه!!؟ قال لي انتي معاااي!! قلت ااام!! قال لي من الاخر كدا اخترتك لاني شفتك مميزة!! م تسألي وتقولي المميز فيني شنو لاني م عارف وح اكذب ليك لو عصرتي علي!! انا ضحكت بخجل!! قلت ليه السؤال التاني!! ضغط ع الكلمات وقال لي قوووولي!! ابتسمت وقلت يمكن يكون عرفت طبعي!! هل حتقدر تتقبلني زي م انا بمزاجي المتقلب وزعلي السريع وكل حاجة م حلوة فيني!! قال لي اولا ماف زول كامل وانا م ببحث عن الكمال!! لانو *** عز وجل!! انا شايف انك بتكملي نقصي!! وانا بحاول اكملك!! ولو غلبتيني بدقك!! ومدااا كلمة بدققققك!! انا ضحكت وقلت الا اكسر ليك ايدينك!! قال لي يعني موافقة!؟ خجلت بس قلت ليه م عندي مشكلة!! صااح م بقول ليك حبيتك بس ف شوييية اعجاب!! قال لي شوييية خاااالص!! قلت ليهو ايييوا!! قال لي م مشكلة قدر دماغك وبكفيني!!وبقي يضحك!! قلت ليهو بزعل كدا و**** م تخلي مكاواتك لي دي اخليك!! ضحك وقال لي متين لميت فيك علشان تخليني!!؟ واتونسنا قرابة الساعة!! ف شوية خجل بس م بالصورة الاولى ديك!! وبقيت اخد وادي معاه ف الكلام!! وبسألني عن نفسي وعن حاجات كتيرة!! ولد نضااام خلاص وم بيفتر من الكلام؟ بس زودها معاي لم زكرني موضوع الاسانسير وانا ولا كذبت طوالي قفلت الخط ف وشو!! وقدر مااتصل م رديت عليه!! عشان يبطل قلة ادب!!؟ بعداك امورنا مشت بشكل طبيعي وبيتصل كذا مره بس انا م برد عليه غير مره واحدة ف اليوم!! وان ضغطني وحلفني وحنيت عليه!! برد مرتين وف الغالب بكونو صباح ومساء!! هو بقول علي مفترية!! بس دا طبعي وماشة بمقولة كترة الطلة بتمسخ خلق ****!! وشهر م تميناه فاجأني بجيتهم لبيتنا وطلب يدي!! كان براه وم معاه اهلو!! تقريباً جاب صاحبو بس!! فاتح ابوي واحمد ف موضووع زواجنا وابوي قال ليه عندنا شورة!! وانا الفرحة م سايعاني!! و اصعب موقف انا اتختيت فيه!! يوم ابوي قعدني وسألني عن رأي ف حسااام!! اقسم ب**** انا اتمنيت الارض تتشق وتبلعني!! بس ابوي م ضغط علي ومن خجلي وتكشمي وعوارتي عرفني موافقة!!؟ وامي اكدت ليه موافقتي!! واتصل عليه وقال ليه موافقين جيب اهلك وتعال!! يااااا كانت ايام سمحة خلاص!! انا قلبي وجعني؟ اكتر من كدا م حقدر اواصل بس حوريكم حصل شنو ف اوقات قادمة!! النعاس غلبني واخدت لي غفوة!! وربع ساعة م تميتها اتصلت علي رييم!! قمت مخلوعة ورديت بالهفة!! قالت لي معليش لو خضيتك!! بس حبيت اطمئن وصلتي كيف!! قلت ليها انا طيبة! انتي طمنيني حسام كيف!! قالت لي الدكتور مرا عليه قبل شوية وقال بكرة ان شاءالله اذا حالتو فضلت مستقرة حيحولوه الغرفة!! انا بكيت!! بس صدقوني دموع فرحة!! قفلت منها وجريت وريت امي!! عاينت لي مساافة وقالت حمدلله ع سلامتو و**** يتم ليه العافية!! ومشت خلتني واقفة!! لم رجعت ع غرفتي لقيت مكالمتين من عبدالله!! ابيت ارجع ليه!! وتاني تلفوني رنا قلت اقفل فيه الخط عشان يحرد وتاني م يتصل!! سبحان **** مين كان يتخيل انو هيام وعبدالله بكونو اعداء!! بس بالجد الدنيا دي غريبة!! وعااادي البتقول عليه اخوك وصديقك يخذلك!!؟ وانا منفعلة ختيت يدي ع الزر علشان افصل فيهو!! بس اشوف ليكم الاسم أ/مرتضي!!؟ من الخلعة لمن قمت من السريير!! نسيت م اتصلت عليه؟؟ رديت بمسكنة كدا وكان ظاهر عليه الغضب!!؟ وقال لي وينك ي استاذة!!؟ ولا حتجي ع كيفك!! م كنت متخيلك بعدم الجدية دي!! اعتذرت وكررت اعتذاري وقلت ليه كنت ف المستشفي!! قال لي نحنا م عندنا مشكلة ف مكانك الانتي فيهو!! ان شاءالله تكوني نايمة ف بيتكم!! بس ف حاجة اسمها انضباط!! وانا بصفتي المشرف عليك من حقي اعرف تلميذتي وين!! وع الاقل كان تتصلي تاخدي اذن!! حاولت اشرح ليه بس اختصرني وقال لي دي عدت بس تاني اذا كررتيها حتتعرضي لمُسائلة!!؟ وقفل ع كدا!!! ياااخ الشغل طاير!! معقولة اخلي حسام ف حالة زي دي وامشي اشتغل!! هو خلى فيني بال علشان اشتغل بيه!!؟ إتأففت وجدعت التلفون ف السرير ومشيت اتوضي مع الكلام الكتير فوت صلاتي!! اليوم التاني من الصباح اتصلت ع ريم ف زول قفل فيني الخط!! عرفتها منو بس تاني محاولت!! وجهزت ومشيت ع شغلي!! لقيت مروة زاتها متشاكلة مع المشرف بتاعها!! واتبادلنا اطراف الحديث وم اشتغلنا بيهم كتييير!! وسألتني عن صحتي!! قالت لي مالك انتي عيانة!! قلت ليها مرهقة بس!! مسكتني من كتفي وقالت لي ي بت شدي حيلك وشوفي نفسك!! وم تضغطي نفسك اكتر من اللازم!! الدنيا دي م مستاهلة يدوها اكتر مما بتستحق! ولا حنضيع!!

المهم شكرتها ع اهتمامها وقلت ليها بحاول القى حل!! ومشيت ع مكتب أ/مرتضي!! كان بيتكلم بالتلفون لم شافني عقد حواجبو وواصل كلامو عادي!! ولا كأني هنا!! وم ابتسم لي كعادتو!! بس انا غلطانة لازم استحمل!! بعد خلص! قال لي اخيراً شرفتي؟؟ خير ان شاءالله!! م كذبت عليه وحكيت ليه الحصل بدون م ادخل ف التفاصيل!! وبدون م اشعر ملامحي اتغيرت وعيوني اتملو دموع!! قام من كرسيهو وجا قصادي!! قال لي معليش م تزعلي نفسك وعتذر اذا عنفتك؟! بس برضو انا ف مقام والدك!! وياداب ابتسامتو رجعت!! ودعى لحسااام وقال لي اذا عايزة ممكن اديك اورنيك مرضي لمدة ٣ يوم!! رفضت وقلت م بيحتاج!! وجددت اعتذاري وطلعت!! م عارفة عبدالله شافني بي وين وجاني بيضحك وبقل ف ادبو!! قال لي بكيتي ليه علشان يسامحك!! م اتوقعتها منك!! م كنتي بتبكي الرجال!!؟ الليلة بكيتي!! عاينت ليه مسااافة وم رديت؟! اصلا هو عايز مشاكل!! وجيت ماشة!!؟ قال لي زولك مات ولا لسسسه!!؟ يلا عبدالله وقع وم سمى!! وقبلت ليكم عليه…؟؟!
نواصل بعدين
يتبع ………

الجزء الحادي عشر من رواية معذبتي​

معقولة ف شخص طبيعي وعندو قلب بينبض!!بتفرح لآلم غيرو وحزنو!!؟ معقولة الناس دي قلوبها وسخااانة للدرجة دي! نقول ليهم شنو غير **** يهديهم!! عبدالله شمتان ع حالة حساام؟! لشنو عمل ليه شنو علشان يتمنى ليه الموت!! بالعكس هو كان عامل رئيسي ف تدمير حياتنا!! وبرضو حسام م اعارو اااي اهتمام ولا سأل عنو حتى!! وف اللحظات دي بالزات ببين معدن الناس!! واعوذ ب**** من شماتة الاعداء!!؟
وقفت قدامو وعيوني كأنها بتولع شرار من شدة الغضب!! وبقيت اضغط بسبابتي ع صدرو وقلت بإستياء انت اوسخ شخص ف الوجود وانا بشمئز لم بسمع اسم حسام ع لسانك لاني بخاف تتدنسو بوساختك؟! واذا مرض ولا عمل حادث ولا مات لاسمح **** دي م حاجة الزول بجيبها بنفسو ولا ليه دخل فيها!! لانها مسطرة ومكتوبة ي جاهل!! ولو العافية بيشتروها صدقني الف شخص واكتر حيتسابقو علشان يجيبوها لحساام!! لكن دعواتنا معاه وكلامك دا م بسوي شيء غير انز بصغرك ف نظري..!! ابتسم وقال لي الفارة بقت كديسة وكمان بتعرف تخربش!!؟ انجزتي و****!!
انا قدر م اقول اغض النظر عن افعالو واقوالو المستفزة م بقدر!!؟ وهو عايز يصغرني قدام زملائي وعايز يبين ليهم اني تافه زيو!! وبتصيد المشاكل!! ولو م عم حسين القفير اتدخل كنت سمطو كف لمن عقلو يرجع لراسو!!
عمو مسكني من يدي وقال لي تعالي عايزك ي بتي!! وانا منفعلة شديد وعيوني م قادرة اصرفها عن زفت الطين المتخلف دا؟!
بس جراااني عديييل ومشيت معاه!! ولمن قلبي وجعني!! عندو مكتب صغيير جنب الباب ولا غرفة معيشتو م عارفة!!؟ لاني سمعت انو عايش ف الجريدة وم عندو اولاد!! المهم طلب مني ادخل معاه بس رفضت وقعدنا ف كراااسي كدا منو والبوابة!! قال لي اهدي وم تتطرطشي!! ابتسمت وقلت اها ي ابوي التاني!! ضحك وقال لي ابوك برضو عارفك مطرطشة!! انا ضحكت!! قال لي اااي خليك كدا!! واي مشكلة ولا عقبة واجهتك ف حياتك اضحكي ليها!!؟ والحاسدين كتاااار وانك تكوني مبسوطة م كل الناس بيستحملوها!؟ فما تشتغلي بيهم كتييير!!؟ قلت ليه بس عبدالله مستفز!! قال لي الولد دا محترم و**** بس مالو معاك؟! ومشكلتو معاك شنو؟؟! قلت ليه الموضوع طويييل بحكيهو ليك مره تانية!! ابتسم وقال لي وعد!! هزيت راسي مؤيدة وقلت وعععد!! وجيت قايمة قلت ليه عندي مقابلة مدير عام مصلحة الاراضي!! بسبب الارتفاع الخيااالي ف اسعار الاراضي السكنية!! لكن خايفة اتلخبط وم اقدر اسألو!!؟ ضحك وقال لي بتقدري بس شكلك خوافة!! وم ظنيت أ/ مرتضى يخليك تمشي براك!! قلت ليه خلاص امشي اشوف منو معاي!! فعلا جيت ماشة وخليتو بيدعي لي بالتوفيق!! شوفو الفرق بين دعوة عبدالله وعم حسين!!؟
المهم لقيت الاستاذ وزعني مع ريان دي استاذة جديدة زييي واحد!! ويمكن اكون انا افضل منها!!! وشغالة لي طول الطريق نقول شنو نسأل كيف!! وحنخاف ولا نتلخبط!! وشخبطت ورقة اسئلتها كلها!!؟ وانا ماشة ع مقابلتي وبالي مع حسااام!! وقبل م ادخل ع المبنى!! اتصلت ع ريم والحمدلله طمنتني ع حساام وقالت منتظرين مرور الدكتور الاخير علشان ينقلوه من العناية للغرفة!!؟ دخلنا ورحبو بينا واتفاجأو لانو من خلال التلفون كانو مفتكرننا استاذات كبااار!! وحتى المدير امتعض جيتنا وشكلو بينو وبين نفسو افتكر انو الجريدة هانتو لم رسلت ليه بنتين صغار يعملو المقابلة!! وف البداية كان بيتكلم بفتور كدا!! وبيبدا كلام وم بيتمو ومرة يتكلم سريع ومرة يتكلم بالتلفون!! ونظام انتو م مالين عيني وانا مستهتر بيكم!! انا اتوترت واتغظت شديييد؟! وريان اتربشت وبقت تعاين لي!!؟ انا شلت ورقي وقلمي دخلتهم الشنطة وقلت ليه اها بدينا!!؟ بإذراء واضح وضحكة مستهترة!! قال لي من قبيل دا كان احماء ولا شنو؟؟! ابتسمت وقلت كنا عايزين نطلع بتقرير موزون بس الظاهر م حنقدر نكتب كلام حضرتك لانك بتطلع خارج الموضوع وبترجع بموضوع تاني!! جا قايم وقال لي تقصدي شنو!! انا م بعرف اتكلم ولا بتهرب من الكلام!! اعتذرت وقلت ليه انت ادري بنواياك سيادتك!! وانا مستحيييل افكر ف حاجة زي دي!! بس كان قصدي انك عايز تمكنا من كم موضوع وعايزنا نطلع بكذا معلومة!! علشان م نضيع كلماتك الغالية الثمينة حنسجل اللقاء وحنمشي نستخرج اهم النقاط وبإذن **** حيكون مقال ناجح!! بفضلك اكيد!! اداني نظرة خبيثة خلاص وكأنو بقول البيت المحتالة دي بتحاول تستغباني!! بس عمل حسابو وياداب بقي ياخد ويدي ف الكلام بكل رصانة واتزان…وعملنا مقابلتنا وطلعنا وريان مخلوعة وتسأل فيني جبت الجرأة دي من وين!! يمكن اكون صحافية بالفطرة بس حسااام ليه اثر كبير الموضوع!! رجعت البيت وخليت التسجيل مع ريان علشان ترسلو لاستاذ مرتضى بالواتس … لقيت امي نايمة وابوي مشى لعمي عيان وامل ف الجامعة!! م متزكرة اخر مرة اكلت متين!! بس متأكدة انو لاكتر من٢٤ساعة معدتي م دخلتها الا الموية والقهوة!!؟ بس حسيت لي بجوعة ومشيت المطبخ!! لقيت امي **** يديها الصحة والعافية حتى الغدا مجهزاه!! حشيت لي نص عيشة ب بطاطس وشلت لي موية ومشيت ع غرفتي!!؟ اكلت وراقدت وبعاين للسقف وبفكر ف حياتي مشت كيف ووصلت وين والممكن يحصل تاني شنو!!؟ وقبل م اخد لي غمضة جاتني رساله من عبدالله!! ف سري سبيتو!! وقلت المتخلف دا كترها!! ولازم اضع ليه حد!!؟ اتجاهلت الرسالة لكم دقيقة!!؟ بس الفضول حيقتلني وقلت اشوفو المرة دي دعاني انا ولا فهمو شنو؟! وفعلا فتحتها واتفاجأت لم لقيتو اعتذر!! المسج فيهو بس كلمتين؟! انا اسف!! استغربت جدعت التلفون ف السرير التاني وقلت ياربي دي لعبة من الاعيبو ولا شنو؟!؟
بس سفهتو!!؟ وبما انو النومة طارت اواصل ليكم قصتي وبالمرة اوريكم عبدالله دخل حياتي كيف ومتين!!؟
حسام بعد ابوي اداهو موافقتو ع زواجنا م اتردد بعد يومين بس جاب اهلو!! امو واخواتو الاتنين وتلاتة نسوان اول م كنت معرفهم بس طلعت واحدة خالتو والتانية عمتو والتالتة جارتهم!!؟ واعمامو وهو وصاحبو!! كانو منقسمين ف تلاتة عربات!! جو عادي م زي م نحنا متعودين!! دلوكة وجوطة وهيصة وهجيج!!؟ كانو قاشرين ومجيهين وجابو لي حاجات معتبرة!! م كتيرة لدرجة الترف!! ولا قليلة! المهم اخر همي كانالحاجات الجابوها لي!! وكل تركيزي مع حسااام كان لابس جلابية كحلية وهو اخددددر بس ظابطة فيه ظبطة تبارك ****!! وانا قلت بلبس فستان كدا كان اشتريتو للتخريج حق الجامعة!!؟ يعني شبة جديد!!! والحمدلله انو امل دستو مني ومنعتني البسو ومشت مع امنية اجرو لي فستان خطوبة رهيييب!! بالجد انا ممنونة ليهم طول حياتي بسبب الموقف دا لاني كنت ح اخش ف حرج م بعدو حرج اذا لبست فستاني داك!!؟ المهم الخطوبة تمت بسلام وم لقينا طريقة نبارك لبعض برااانا!! بس كانت نظراتنا لبعض بتوصل الاحساس!؟ لبسنا الدبل!! وكنا مبسوطين وامو بتشكر فيني ساااي لامي!! وريم كل عيني تقع ف عينها نغمز لي!!؟ وانا بضحك وهي خشمها م بتفتحو وبتحرجني معاهم!!؟ جو من العصر طلعو قريب العشاء!!؟ كانو رافضين يقعدو بس ابوي حلف فيهم وقال م حيطلعو إلا يتغدو!! والحمدلله **** سترنا معاهم وطلعو ممنا مبسوطين وانا اكتر منهم!! كنت تعبانة لاني واقفة ف البيت من الصباح وحتي الاكل طبختو مع امي بمساعدة امل وخالتو مريم جارتنا!! وامنية وعبير جهزو صواني الحلويات والخبائز والفواكه!! ومن شدة م مبطلة الفستان غلبني اطلعو!!؟ امل لبعتني وقالت لي دا اجار م جابو خطيبك!! ولو اتكرفس ساااي بدفعوني غرامة!! ضحكت وقلت ليها م قادرة اقوم و****!! والمسخوطة بقت تحاول تقلعو مني!! وانا بضحك خجلانة منها!! بت عينها قوية خلاث!! المهم جيت متلبه من السرير!! وهي بتدعي فيني وبتقول لي الفستان بيتفتق ي كريها!! لحدي م طلعتو ورجعت لسريري بتمنظر ف دبلتي ومحبسي!!؟ وهو بيتصل وانا برد بقول ليه نعسانا وفترانة خليها الصباح وبقفل!!؟ وهو تاني بيتصل!! لم زهجني!! رديت بإنفعال وقلت متين خطبنا اسسه علشان نبدى عباطة!!؟ سكت شوية وقال لي انتي دخلتي موسوعة غينيس!! استغربت وقلت ف شنو؟! قال لي انتي البت الوحيييدة البتشاكل خطيبها بعد اول مكالمة من خطبتهم!!؟ انا ضحكت وقلت ليه ف ناس بيتطلقو يوم العرس هي شكلة ف يوم الخطوبة!!؟ قال لي فال **** ولا فالك ي شيخة!!؟ المهم كنت متوقع مبروك علينا و**** يحفظك ويحميك لي ويتمم لينا ع خير!! والجلابية كانت حتاكل منك حتة!!؟ كلام زي دا ياااخ يخليني اكل التلفون ولا افرفر افرفر لمن اخش ليك بجواهو!!؟ انا ضحكت وقلت بتقراء الروايات دي ف ياتو قروب!! ضمني ليه!! اتنهد بصوت عالي وسكت!! حسيت بالموضوع قلب جد؟! قلت ليه جلابيتك دي م فضل منها باقي قماااش!!؟ بإستغراب كدا قال لي لشنو؟؟! قلت ليه عندي تيشيرت م لقيت ليهو طرحة اطقمو بيها وسبحان **** قماشة جلابيتك كأنها اتفصلت ليها؟!! بقي يضحك لمن بقهقة!!؟ انا ابتسمت! وقلت ليه شفت الضحكة دي!! مستعدة اقتل ولا انحرم منها!! سكت!! قال لي امل جنبك!! استغربت وعقدت حواجبي وقلت ليش السؤال؟! قال لي لانو مستحيل تكوني براك تقولي كلام حلو زي دا!!؟ وبقي يضحك وتاني غاظني!! قلت ليه يلا اقعد اتعاور لي كدا وبعدين طلعني عصبية وم بعرف اتكلم!!؟ وغلطانة انا الحبيت اجاملك!! قال لي شفتي الصرة دي!! اااي ااااي حقدة حواجبينك دي!!؟ ووشك المدور دا!! انا متمني الفظ انفاسي الاخيرة وانا بتأمل فيه!!؟
وانا بلعت ريقي والرد غلبني!! كنت لسسه جديدة ع سماع كلام زي دا!!؟ المهم باركنا لبعض تاني!! وعلق ع الفستان!! والحيرني انو تصميمو كيف انا م انتبهت ليه بس حلو ولبستو!؟! هو لخنصرة الوسط لاحظ ليها!! وتفاصيل صغيييرة شديد زكرها لي وانا بتخجل وبتعاور!! بس كان بحبني زي م انا وب طبعي!! م بزيف حقيقتي ولا بصطنع الكلام ولا بعرف اجامل!!؟ كنا طبيعين شديييد..وامونا كانت سمنة ع عسل وعلاقتنا ماشة تطور اكتر وتتعمق!! لحدي م نزلت المجلة الحقضي فيها الخدمة الوطنية!!؟ واتعرفت ع عبدالله!! والشيطان دخل بيناتنا!!!؟.
نواصل بعدين.
يتبع ……….

الجزء الثاني عشر من رواية معذبتي​

بتزكر كان اتناقشت مع حسااام ف موضوع الشغل!!؟ ضحك وقال لي اعتمدي ع نفسك هوووي انا روحي م قادر اشيلها!!؟ ضحكنا ونسينا الموضوع وم سألتو اذا كان جادي!!؟ بس شكلو بهزر!! ف ليلة كنت بتكلم معاه وسألت امل اذا كوت لي معاها عبايتي!! قال لي ماشة وييين؟! قلت ليه بكرة ان شاءالله نازلة خدمتي!!؟ قال لي والطرطور دا كان ناوية تكلميهو متين؟؟ ضحكت وقلت كنت حوريك بس انت من قبيل ماعطني كلام!! وم اديتني فرصة!!؟ قال لي م مشكلة!! وموفقة ****! اها اجي اوديك ولا بتدبري امورك!!؟ قلت ليه دا شنو السؤال دا!! قول لي بس من الاخر انا م فاضي ليك وم تبليني!!؟ ضحك وقال لي ااي اااي فتشي ليك مشكلة!! فعلا كنت عايزة اتعابط معاه وافسر كل كلامو بطريقة غلط بس كان بقفلني وكأنو م عايز يخش معاي ف نقاش ولو كان بالهزار!!؟ قلت ليه اكيد م حخليك تجي من الصحافة للبيت علشان توديني الشهداء!! قال لي الحمد*** طلع عندك زوق!! اسه كنت شايل هم الجية!!؟ ضحكت وقلت ي جبان **** م تكلني عليك!! همس لي ف التلفون وقال انتي بس حاولي مييلي وشوفي منو الحيسندك!!؟ ابتسمت وقلت اكيييد ابوي!! ضحك قال لي لو اتكلمت بهزار تسويهو جد علشان كدا يستحسن اسكت وم اتكلم عن والدك!! لمن قعدت ف نص السرير وقلت ليه تقدر تقول كلمة ف ابوي!! وبقي يستهبل ويقول الووو الوووو الشبكة اااي انتي طشيتي!! وانا بضحك ع عوارتو!! واتفقنا انو يجيني بكرة ف المجلة بعد الدوام!!؟ وفعلا قملت الصباح وجهزت وكنت متفقة مع ريان وعبير نمشي مع بعض!! بس لقيت ريان وقالت عيانة م بتقدر تمشي!! وعبير اصلا م قدمت معانا بس مجاملانا سااي وقالت عايزة تشوف محل خدمتنا!! هي محظوظة اشتغلت ف منظمة وبتصرف الا بالدولار!! ماشاءالله **** فتحها عليها بعد التخرج مباشرتاً والخدمة م طالبوها بيها!! علشان كدا نخليها ع رب العالمين وهو المسطر والمقدر والميسر!! وكل واحد ممنا برزقو ومرات بجيك لحددي عندك!! بس دا م يعني اننا م نسعى ونفضل مكتفين ايدينا ومنتظرين رزقنا يجينا!!؟ المهم اتوكلت ومشيت برااي والمواصلات اتصعبت علي!! وف حرامي فتح شنطتي قرب يسرق تلفوني الجديد بتاع خطوبتي!!؟ بس انتبهت وحسيت بالحركة!! قبضت شنطتي!! واتلفت عليهو!! حمرت ليه طوالي نزل وكان بدافر معانا ولا ركب!! طوالي نزل؟؟! المهم حضنت شنطتي قدامي!!ووصلت المجلة؟! ولقيت المكتب مقفل!! لسسه م جو!!؟ نزلت تحت واتونستا بتاع مكتبة وحكى لي عن اعمامي المالكين المجلة وعن مواقفهم الطريفة!!؟ وانا بضحك وقلت حتكون ايام ولا اروع!!؟ والزمن سرقنا!! وقعدت معاه اكتر من ساعتين!! وقربت ارجع بيتنا!! بس اشوف واحد فيهم شايل شنطتو وجاي علينا!!؟ سلم من بعييد وطلع فوق!! انا حصلتو ولقيتو بيفتح ف الباب!!؟ سلمت ووقفت!! عاين لي بإستنكار انا عرفك!!؟ ضحكت!! اظنو اتضايق من ضحكتي!! وانا زاتي اتحرجت من نغسي!! اعتذرت منو؟! واتزكرت كلام عمو السر بتاع المكتبة التحت! وتاني ابتسمت!! قلت ليه ي استاذ احمد انا هيااام المتدربة معاكم ف المجلة!!؟ ضحك وقال لي ايواااا معليش ي بتي الخرف ختى يدو!!؟ ابتسمت وقلت لسسه عز الشباب!! عاين لي بخبث كدا وقال لي كذب عينك عينك!!؟ ضحكنا!! وسألني عن زميلتي المعاي!! قصدو ريان!! قلت ليه عيانة بس حتنزل ف الاسبوع دا!!؟ بعد دخلنا!! وقعدنا وحكي لي عن فكرة المجلة الصعوبات الواجهتم والشغل ماشي كيف والجهات المراغبة لعمل المجلة واخر شيء وراني الرسومات!! بالجد عجايز مبدعين!! وااااااو!! وبعداك البقية جو استاذ ناصر واستاذ محمود جو بفطورهم!! م كانو عاملين لي حساب بس بالبركة اكلنا ولمن فضل!!؟ ومن اول يوم مسكوني الشغل!! اول مهمة كانت كتابة حوارات او بالاصح قصص قصيرة مع اني م بعرف اكتب قصص بس الموضوع كان بسييط!! لانو الرسومات جااهزة وانا بس علي اختار الكلمات البتناسب المشهد!! وكلها طااااااخ طراااخ وياللهول وسوف اسبقك!! وانا بكتب وبضحك لانو بالجد الرسومات رهيبة وبدون مبالغة تحسي كأنو الصورة بتتكلم عن الفيها وم محتاجة اضافة تعليق!! بس حبيييت الشغل!! ورجعت بيتنا مبسوطة شدييييييد من اول يوم وقعدت ناس البيت واحكي ليهم عن حكاوي ناس عمو احمد وعن القصص المصورة واحمد اخوي اتغاظ مني!! وقال الزول لو بقي كبير وعوير ياهو انتي بس!!؟ م اشتغلت بيهو وقلت ليه اخير منك ي عاطل!! وقام علي!! كان م ادسيت ورا ابوي كان بالجد حيضربني!!؟ وانا بضحك!! وشغال لي انا عاطل ي عواليق؟! قروش الجامعة لم بتجي وتتمسكني م بيديك ليها العاطل دا!!؟ وناس البيت بضحكو علينا!! يلا هو ضيع وظيفتو براااهو!! كان محاسب ف مصنع بس قال الشغل متعب وم مغطي ومرات بشغلوه اشغال هو م ليه علاقة بيها ف المصنع!! فصاحبو ف قطر جاب ليه عقد!! ومن الفرحة مشي استقال من الوظيفة وموضوع قطر شبه طرشق!!؟ وللان مجرجرنهم!! عشان كدا انا بشمت فيه!! ودخلت المطبخ اشوفهم عاملين شنو!؟ واتزكرت حسااام!!؟ و**** نسيتو!! مع شماراتي لناس البيت ونقاشي مع احمد! م رجعت ع غرفتي ولاني خاتة التلفون ف الشحن!! طلعت من المطبخ جري!! ع التلفون!!؟ لقيت اكتر من عشرة مكالمات!!؟ لمن ختيت يدي ف رأسي!! اقول ليه نسيتك؟! المهم رجعت ليه!! وردا بزعل وكان جايط وين انتي؟؟ مالك خوفتيني عليك!! ان شاءالله م يكون حاصل معاك مكروة!! لم شفت خوفو علي!! اتكسفت وم حبيت اكذب عليه!! بس خجلانة اقول ليه نسيت انك جايني!! قلت ليه م تزعل مني عليك ****!! بس و**** نسيت انك جايني!؟ قال لي انتي جادة!! قلت ليه ليك حق تزعل بس اليوم كان مزحوم ومليان احداث!! ونسيت زاتو اني مخطوبة!!؟ قال لي كتر خيرك؟ المهم انك بخير!! معليش مضطر اقفل كنت مواعد لي ناس بس لغيت موعدي علشانك!! لكن حصل خير!! تاني اعتذرت!! قال لي ي غبية بيناتنا ماف اعذار!!؟ بس حركتك شينة يااااخ!! وبتخجل عدييل لكن نقول شنو؟ **** يصبرني عليك!! وع عذابك لي!!؟ قلت ليه انا معذباك!! ضحك ضحكة صغيرة كدا!! وقال لي انا من يوم خطبتنا م شفتك!! م شفني اللهفة من الصباح علشان اجي عليك!! بحسب ف الدقائق عشان الزمن يمر سريع!! وصدقيني انا حايم بالعربية من الصباح ف الشوارع علشان مانشغل عنك ولا يظهر لي برنامج!! لم م رديتي نزلت ولفيت الشهداء كلها م لقيت مجلتك دي!!؟ وصدقيني م ندمان!! وكل حاجة اعملها عشانك بتقربني ليك اكتر وبتشدني ليك!! بس تفاجأت لم قلتي انك نسيتيني!! يمكن لانك م بتحبيني!!؟ بالجد كلمتو دي استفزتني!! قلت ليه م تخلط الامور ببعضها!! الدخل الحب هنا شنو!! وكيف يعني مابحبك!!؟ قال لي بس م حصل قلتيها!!؟ قلت ليه دا م موضوعنا!! بس م تزعل مني!! شال نفس حااار وقال لي **** يصبرني عليك معذبتي!! قلت ليه ح اراضيك!! قال بلهفة كدا حتراضيني بشنو؟! انا ابتسمت وقلت انت عايز شنو!!؟ ضحك وقال لي العايزو م بتقدري عليه!!؟ حكيت جبيني لاني م فهمتو!! بس قلت ليه يوم باكر كلو ليك ان شاءالله!! قال لي قولي و****؟؟! ضحكت وقلت وحاة غلاوتك!! قالي الليلة م بنوم!! ضحكت وقلت انت م ساهل **** م يحرمني منك!! قال لي ولا منك!! بس دي مسكنة ساااي خليني اعرسك بعدين اادبك ادب!! ضحكت وقلت ليه ماشة اصلي!! قال لي ادعي لي معاك!! ابتسمت وودعتو!! وقبل م يقفل قلت ليه دقيقة!! قال لي نعم عيوني!! بصعوبة طلعت مني بس قلتها!! بحببببك!! وقبل م يرد قفلت الخط والتلفون واتحشرت انا وتلفوني تحت المخدة!!؟

اليوم التاني قمت نشييييطة!! وشربت الشاي مع اهلي حبايبي وطلعت ع المجلة ولقيتو منتظرني ف الظلط!! ضحكت بصوت عااالي! وركبت؟! قلت ليه جيت متين!!؟ قال لي ي باردة ي تلاجة ي فريزر!! ف حاجة اسمها صباح الخير حبيبي! واااو انت هنا عمري؟! ضحكت وقلت م بعرف اتمايص!! عاين لي جوووة عيوني وقال لي الليلة حلوة زيادة عن اللزوم!! م بقدر اسوق!! وم بقدر اشيل نظري عنك؟! انا خجلت شديد ولمن وجسمي بقي يقرصني من شدة م قشعر!! قال لي ممكن امسك يدك!! ربعت يديني علي!! وقلت ليه دور العربية ولا حنزل!! ابتسم ولسسسه بعاين لي!!! انا قربت افتح شنطتي واحشر راسي جواها!! لم حسي بي اتوترت شديد!! اتنهد بصوت عالي واتحركنا!!؟ قال لي اها نمشي المجلة ولا نكسر الحنك!! قلت ليه يكسر رقبتك!! بقي يضحك!! قال لي خلاص بقعد معاك!! بعد تخلصي نصيع مع بعض!! ابتسمت وقلت كدي وصلني اول!!؟ وفعلا وصلنا المجلة واول قعد مع عمو السر بتاع المكتبة واتونس معاه معداك جاني فوق ف المجلة ولقاني بكتب ف قصة مع شاب جديد!! وتعليقو ع احدى الصور عجبني وكان مضحك شدييد!! فدخل علينا لقاني بقرقر معاه!!؟ م قال شي بس الغيرة كانت باينة عليه سلم عليهم كلهم القاعدين!!؟ وعرفتهم بيهو!!؟ واستأذن الاساتذة علشان عندنا مشوار مهم!! وفعلا سمحو لي وطلعت قبل الزمن بمدة طويييلة!! ونزلنا وركبنا وقريييب الخمس دقائق م اتكلمنا مع بعض!! انا بادرت وفتحت معاه موضوع!!؟ وبعداك الامور رجعت طبيعية وكنا بنتونس عادي والونسة جابت الونسة!! فقال لي اسألك!! كنت بلعب بالتلفون!! ورفعت عيني وقلت ليه اممم قول!! قال لي م قلتي لي معاكم شاب ف المجلة!!؟ انا ضحكت لمن رميت رأسي ف رجولي!! وقلت ليه دا متدرب جديد الليلة اول مرة ينزل معانا!! اسمو عبدالله!! قال م ارتحت ليه!! انا تاني ضحكت!! وقلت ليه احساس حلو لم القي حبيب حنيين بغير علي!!؟ قرصني من اضاني وجراني عليه!! بالجد كان تصرف غبي ومستفز!! بس عملها بطريقة حنينة شوية ولهجة عتاب مخللة بغيرة وحاجة كدا كانت حلوة شديد!! قال لي لو لقيتك بتتونسي مع شاب ومداحة معاه وضحكتك تجيب الرايح!! ح اقتلو هو واقش السكين فيك انتي!! انا تميت العباطة وعضيتو!! وياريتني م سويتها!! حركاتو وتصرفاتو الحصلت بعد داك م بتهمنا كتير

بس اتعابط معاي شديييد!! ولو م فتحت باب العربية وهي ماشة م كان قعد ساي!! اخدني ع مطعم ف بداية شارع الربعين امدرمان!! وقال لي نطق سرييع علشان حنمشي الخرطوم ف حتة عايزك تشوفيها!! ابتسمت وخلت معاه!!؟ قبل م تعرفو بعداك حصل شنو ثواني اتصل اطمئن عليه اول!!؟ اتصلت ع ريم!! واستقبلتني وهي مبسوطة وقالت لي بت حلال اسسسه كنت بفكر اتصل عليك!! قلبي بقي يضرب!! وقلت ليها طمنيني!! قالت لي حسام استعاد وعيو!! واسسسه ف الغرفة طلعت منو قبل ١٠ثواني!! انا بكيت وقلت الف حمدوشكر ليك ****!! يعني اتكلم معاكم!! كانت بتبكي وقالت لي بس بقول الحمد***!! والدكتور قال م تكلم معاه!! وحتى السلام يكون مختصر وم نخلي ناس ف الغرفة علشان م نزعجو!!؟ بس حبيت اطمنك!! انا بكيت بحرقة لاني م قدرت اشوفو بعد استعاد وعيو!! قالت لي م سأل عنك بس عيونو كانت بتفتش فيك!! وقبل م ارد واصلا من شدة البكاء م عارفة اقول شنو!! قالت لي وريتو انك جيتي كذا مره وكل شوية بتسألي عنو!!؟ قلت ليها بصوت مخنوق!! قال شيء!! قالت لي لا بس شكلو متأثر!!؟ بكرة لو لقيتي طريقة مري عليه متأكدة حساهمي ف رفع معنوياتو!! وقفلت مني قالت جوهم اهلهم وماشة تستقبلهم!!؟ اتنهدت!! وقلت سبحان ****!! شوفو كنت وين ووصلت وين؟!
نواصل بعدين

لم اجد الطريقة المناسبة لشرح م اشعر به الان!!؟ اخاف ان يكون سخيفاً!! بينما هو يمزقني الان!!

يتبع ……….

الجزء الثالث عشر من رواية معذبتي​

اصعب احساس انك تكون عالق ف زكرياتك!! لا قادر تنساها او تتناساها ولا قادر تكمل حياتك وترضى بواقعك!! انا تائهه واحاسيسي ملخبطة!! وم عارفة انا عايزة شنو؟! بس كل البعملو بهرب!! بهرب من الحاضر وبجري لماضي حسام ببل شوقي وبواسي نفسي!! ولم احاول انتشل نفسي من دوامة الزكريات دي برضو بلقي حاضري متمركز ع حساام!! كيف اهرب منو وامشي ليه؟؟! كيف اقدر اطلع ودالناس دا من رأسي!!! بقول لي انتي معذبتي!! منو الفينا بعذب ف التاني اسسسه!! انا ضايعة!؟ بس اذا فضفضت ليكم يمكن ارتاح وارسي لي ع بر!!؟ وقفنا اخر مره يوم مشيت معاه المطعم صااح!!؟
يلا دخلنا وكان المطعم شبه فاضي!! بسط لي يدو بمعني اتفضلي اختاري طاولة!!؟ وم اتحركنا خطوتين جا زول داخل وسلم وقال لحسام لو سمحت مبركن غلط وم قادر اطلع عربيتي!! ممكن تجي تحرك عربيتك شوييية بس!!؟ حسام قال ليه جداً وطلع معاه!! وانا شفت طاولة هناااك طرف وقعدت ومنتظراه!! دقيقتين بس وجاني يتبسم!!؟ قعد وبقي يتلفت!! قلت ليه مالك!!؟ حكي دقنو وقال لي المطعم فاضي!! لشنو مقعدانا جنب المغسلة!! فعلا اتلفت وراااي اشوف المغسلة ع جنب كدا!! انا ف نظري الموضوع عاادي ولا قاعدين جنب وساخة ولا حمامات **** يكرمكم!! بس م بعرف ليه مالو معاي!! قلت ليه بس شفتو بعيد شوية وحسيت بيهو مناسب!! ابتسم وقال لي خجلانه من الناس!! ولا خايفة!! ولا يمكن تكون م عندك ثقة ف نفسك!!؟ بالجد اغتظت منو!! وبوزت وم حبيت اخرب اليوم!! فما ناقشتو!!مسك اطراف اصابعي!! وانا مدنقرة!! ضغط عليهم!! وانا م ابديت اييي ردة فعل!! واكتفيت ببلع ريقي!! قال لي م تزعلي مني ي انا!! حبيبك متخلف وم بيعرف يختار كلماتو!! وقبل م ارد عليه كان الجرسون واقف ف رأسنا وبقول احم احم!! حسام عاين ليه وهو بيتبسم وانا اديتو نظرة صغيييرة وانشغلت بعداك بتلفوني!! قال لينا طلباتكم شنو؟! حسام رفع المينيو وقلبو!! وقال لي اختاري ليك حاجة!! انا مديت ايدي وم عرفت إلا انواع اللحوم البتعرفها الاسرة السودانية عدا لحمة البقر م كانت مزكورة!!؟ ابتسمت وقلت كدي النجرب حاجة جديدة وف شكل اكلة كدا عجبني وقلت علشان م اقراه غلط واصلا حسام قاعد لي ع الهبشة!! وصفتو للجرسون بيدي وقلت ليه عايزة دا!! حسام مدا راسو وقال لي دا عندو اسم!! حمرت ليه!! اصلا انا طيرة كل م اقول اكحلها بعميها ودايما خاربة برستيجي قدامو!! دا لو طلع عندي!! وبقيت اضحك ع نفسي!! قال لي ضحكيني معاك!! قلت ليه بضحك ف حاجة م بتخصك!! رفع حاجب واحد وبإبتسامة صفراء كدا قال لي م تلعبي معاي!! م بتقدري تستحملي هزاري!! وان قصفتي جبهتي مره!!؟ انا ببيدك من اول مره!! ضحكنا واتبادلنا الدعابات واتحدينا بعض!!؟ وكانت لحظات حلللللوة شديد!! ودقائق م تميناها اكلنا وصل!! طقينا تماااام!! واتونسنا وقال لي يلا انا ح احاسب لانو مشوارنا طويييل!! قام من الطاولة وغمز لي ومشى!! وانا شايفة الاكل قدامي مردوم!!؟ وم اتحنكشت!! ضربت ضرب نضيف بس ماشاءالله كتير!! وخجلت اقول لحسام نشيلو معانا سفري!! ولا حيتريق علي!! ولا نخليه ليهم!! المهم جا لقاني قاعدة متمحنة!!؟ صفق لي بأصابعو وقال لي خلاص مليتيها ونعستي!!؟ انا ابتسمت وقال لي ارح الزمن!! علشان بعدين م تستعجليني وتقولي لي اهلي بضبحوني واتأخرنا!! قلت ليه من هنا وع بيتنا!! رفع لي حواجبينو ومعاها هزة رااس وكأنو بقول ااا وين يااا!! ابتسمت وقمت حيلي ومشيت غسلت!! ولو م خفت يقولو حرامية قربت اشيل الغسول بدل الطقة الحنخليها ليهم!! بس اتراجعت!!؟ طلعنا وركبت منتظراه وهو غاطس جوا!! وبيني وبين نفسي قلت يستعجلني وهو م عايز يطلع!! وقبل م اخلص جملتي اشوفي جاي بيتقدل وابتسامتو مسمحاة اكتر وشايل كاستين عصير وقال لي افتحي الباب ي سجم!!؟ فتحت ليه وقلت انا شبعانة م عايزة!! برفعة حاجبو المعهودة قال لي وهوالقال ليك جايبهم ليك منو!!؟ انا ضحكت ونزلت القزاز!! قال لي مالك!!؟ قلت ليه سخنت!!؟ ابتسم وقال ح اشغل التكيف ي السمحة شيلي الصبر!!؟ انا واااي من الفضيحة والاحراجات!!؟ علشان اتدارك الموقف قلت ليه بهزر معاك!! بس كان ف ذبابة حايمة ففتحت ليها شان تطلع!!؟ ابتسم وقال لي حرام عليك تفصليها عن اختها!! انا بغضب قلت ليه اختها منو!!؟ قال لي و**** انا و**** انا!! وبقي يضحك زانا متنرفزة وصارة وشي!!؟ بالجد كان جنو مكاوة!! اتحركنا وبحاول يفرفش معاي بس انا قفلت معاي!!؟ قال لي عليك **** نتجاوز الحكاية دي يااخ م كل شوية انتي زعلانة!!؟ خلي صدرك رحب ياااخ!! ابيت ارد عليه!! شال كاسة العصير ودخل لي فيها المصاصة ومداها لي ابيت اشيلها!!؟ وقلت م عايزة!!؟ قال لي راحتك!! وبقي يشفط فيها بطريقة مستفزة ومغرية ف نفس الوقت!!! ولمن بيعمل شششوووووطك معاه وبطقة لسان!! ذكرني ابوي لم نديهو شاي بيشربو بنفس الطريقة!!؟ قال لي معاي مكشرة ومبوزة!!؟ ومع خيالك بتضحكي وتتبسمي!! اقتل منو فيكم!!؟ انتي ولا خيالك!! قلت ليه انت متأكد بتشرب ف عصير عادي!!؟ م فيهو اي اضافات!!؟ بقي يضحك !! قال لي ي اما انتي مميزة شديد وعندك سحر خاص بتمارسيهو علي!! ولا انا واحد مسكين ودلاها!!؟ قلت ليه قبل م اعرف الموضوع شنو؟ بوافقك ع الخيار التاني!! ضحك وقال لي بكون متنرفز منك!! وبكلمة واحدة منك بروق!!؟ بالجد ي هيامي صوتك برد لي روحي وبيرخي اعصابي!! قلت ليه يلا عاين للطريق علشان م تعمل بينا حادث!! نحنا كنا ماشين بكبري الفتيحاب لاننا طلعنا ببانت ومع اللفة حقت حدائق جياد ديك!! كان بعاين لي وسايق سريع و****!! يعني اذا جات عربية بالاتجاة المعاكس حتصدمنا حتصدمنا!!؟ بس م اشتغل بي!! مرة يعاين لي ومرة للشارع لحدي م طلعنا الكبري!!؟ بعداك انا فتحت تلاجة العربية ومرقت عصيري!!؟ قال لي لالا دا حق زول!!؟ قلت ليه يشرب السم الزول!! بقي يضحك وقال لي امين لو دا بيرضيك!!؟ وعاين باتجاةالبحر وقال ادوه ابى خلوه شحد!!؟ انا بقيت اضحك وم اشتغلت بيه!!؟ بس انا م مفضوحة ودائما اموري بتجوط!! شفتو ختى المصاصة جنب صندوق المناديل!! شلتها وقدر م عافرتها علشان تدخل ابت!!؟ وهو بيضحك وبقول بركاتك ي شيخ حسااام!! ايواانحنا ناس صالحين وحقنا م بيضيع!!؟ وانا كلامو م كان هاميني وبيني وبين نفسي بقول معقولة مصاصة م قادرة ادخلها ف غطاية الكاسة!! دا تخلف ولا عوارض!!؟ لم يئست!! شالها مني وحاولها هو وبقول **** **** م تخش معاه!!؟ و**** استجاب لي!! لمن قربت انط من الفرحة!! قال لي المشكلة ف الكاسة غطاها سميك زيادة عن اللزوم!! قلت ليه عليها بطلع الغطا وبشربو سااي!! قال لي ولو لاقانا مطب قدامنا وانخجيتي!!؟ ودفق فيك!! حتسكتي!!؟ قلت ليه ح اقتلك بس!! ضحك!! وقلت ليه جيب غطاية حقك الشفطو !! طلع رماها من العربية!!؟ طلع مفتاح باب ولا مكتب م عارفة من الطبلون!! وقال ي انا ي كاسة العصير!! وضغطها لمن اتقدت غصب وطار فيه!! وانا بقيت اضحك!!؟ شلتها منو وبقيت اشرب!! وهو بنضف ف نفسو وبحمر لي!؟ لكن عصير م عصير ماشاءالله!!؟ م خسارة فيهو القروش!! وليه الحق يطق فيهو اللسان!!؟ قلت ليه ماشين وين!!؟ قال لي اديني شفطة وااااحدة بس وحورك!! ضحكت وابيت اديهو!!؟ بمد ليهو الكاسة ويقرب يلمس المصاصة بشفاهه انا بجرها منو!! وبعد محاولتين ونفس الحركة بتمشي فيهو!!؟ وانا ميتة من الضحك!! قال لي م عايز اذل نفسي اكتر!! ومستعد اعمل اي شيء عشان افضل اسمع الضحكة دي!! انا خجلت!! وقلت شفطه واحدة بس!! واديتو!! بمص وبزغلل لي ف عيونو نظام مستتمتع بالطعم!! وانا لمن فكي وجعني من كترة الضحك!! السغيل شربو معاي كلووو شفطة لي والتانية ليهو!! حكي فرملة لمن اتخلعت وقلت بكون قرب يعمل حادث!! بس فاجأني لم مسك يدي شديد وقال لي انا اسعد شاب ف الكون لانك معاي ولانك وافقتي تكوني جزء من حياتي الفوضوية دي!! بشكرك ع السعادة المنحتيني ليها ي هيامي وبتمنى **** يقدرني واسعدك واقدم ليك كل البتتمنيه!! خجلت وعيونو دمعو وقلت بيكفيني انك ف حياتي تاني م عايزة شيء!! اتبادلنا الكلمات الطيبة الحلوة!! وبالرغم من برودة العربية بس جسمي بقي ينقع موية وبقيت زي الزير!!؟ بالجد م بستحمل لمسو لي وبتجهجة عديييل!! ياخ انا بحبو لدرجة اني بخاف اضعف قدامو!!! لانو نظرتو كغيلة بأنها تأثرني!!

وقلنا حتى كدا م عارفاها وين؟؟ وقلت ليه وصلنا!! قال لي لالا بس العربية فترت عايزة تنجم شوية!! ضحكت وقال لي انزلي ي سجم!!؟ نزلت وكانت عمارة تحت التشييد!! قلت ليه دا شنو؟! مسك يدي ودخلنا قال لي دا مشروعي!! بإستغراب قلت ليه حق شنو؟! ابتسم وقال انا وريتك انو والدي **** يرحمو حملنا مسئولية الشغل انا وخالد والحمدلله **** فتحها علينا وشغلنا كبر!! بس المبني دا حقي!! من حر مالي!! وحتى الخرطة انا الراسمها!! قلت ليه ماشاءالله **** يزيدك ويرزقك من اوسع رزقو!! قال لي امييين وبوجودك ي غاليتي!! قلت ليه بس م فهمت لشنو جبتني اشوفو!! ومشروعك شنو بالضبط!! ابتسم وقال لي بطلي شفقة!! جبتك لانك مرتي!! انا عاينت ليه وقبل م اشاكلو!! نهرني وقال لي ايي مرتي وم خايف من ردة فعلك!! واول زول يشوفو انتي!!؟ ناس البيت عارفين بالمشروع بس م حصل شافوه!! قال اما السبب التاني!!؟ عايز اشاورك وعايز اخيارك!! قلت ف شنو!! قال لي محتار بين الطابق الارضي بكون مطعم والتاني كآفي ولا العكس!! بالاضافة لاسم الكآفي شنو؟!+الطابق التالت عيكون موقع مجلتك ولا جريدك المستقبلية!! يعني هدية مني ليك ي السمحة!! انا م صدقت وقلت ليه اكيد بتهزر!! بس دا كتير؟! قال لي ماف شيء بيكتر عليك!! ومسكني من يدي وتخلنا وطلعنا ع الطوابق التلاتة!! وقلت ليه من برا شايفاك بادي بناء ف الرابع دا حيكون مخزن ولا شنو؟؟ قال لي اصلا مصدقين لي بتلاتة طوابق بس!! والسطوح استغليتو بغرفة واحدة!! قلت ليه لشنو؟! ضحك وقرب ع اضاني وقال لي بعدين لو اشتقت ليك شديد وشديييد كمان!! بقولك حقدر اصبر لحدي م نمشي البيت ولا حنطلع فوق!! وغمز لي!! انا ابتسمت بخجل!! ونزلت قبالو!! وهو بيضحك وراي وبقول لي اصبري ي الجارية دي!! دا م قلت اسسسه!! بعدين بعدين!! وبقي يضحك!! ركبت وانتظرتو!! شويتين كدا وجاني!! بتبسم ساااي!! قال لي اها اختاري اسم!! قلت ليه فآن او آن!! قال لي دي اسماء فيران بيتكم!! ضحكت!! قال لي لشنو؟ قلت ليه فان بتزكرك بالموت وعلشان الدنيا م تغرك!! وتتزكر انو كل من عليها فان..ابتسم وقال لي وآن!! قلت ليه اسم سااي عاجبني وقلت اسميهو لبتي!! عاين لي بإستغراب وقال لي كان ابوها توم ولا جيري سميها آن!! ضحكت وقلت ابوها الغول شيرك!! ضحك وقال لي طيب انتي مرتو فيونا!! ابتسمت!! قال لي ح اختار الاسمين مع بعض!! قلت ليه كيف!!؟ قال لي حسميهو فآن وآن ضحكت وقلت فنان!! ضحك وقال لي جادي معاك!!؟ ودورنا ومشينا وافتكرتو بهزر بس كان جادي!! وقال لي نتغداء وين!! قلت ليه الزمن فات والمغرب قرب يأذن رجعني البيت!!؟ قال لي انتي م نصيحة!! انا خطيبك!!؟ قلت ليه بس م عاقد علي!! وانا بحترم ابوي واخوي!! وم بجامل ف مواضيع زي دي!! بعد ابقى حلالك ان شاءالله نبيت ف الشارع!!؟ بس اسسسه رجعني بيتنا!! قال لي خلاص نشيلو سفري!! وفعلا دخل بيت من البيوت الشامية وجا شايل شي وشويات!! قال لي انا شبعان بس طقي مع ناس البيت!! وبنتونس والطريق بقي قصير خلاص ورجعني البيت!!؟ احمد اخوي كان قاعد مع اولاد جيرانا وحسام جابني جنب الباب وم نزل وانا نزلت بيديني الاتنين اكياس!! واظنو زعل مني ولا غار من حساام!! بس جا جاط فيني!! وفضحتينا ف الحلة طالعة ونازلة معاه!! وانتي وانتي!! واسسسه بتصل عليه يجي يسوقك وتطيري معاه!! بالجد كلامو كان جاااار ومغص علي الطلعة!! والغريبة ابوي م اتكلم ف حين انو دائما بقيف معاي!!؟ قلت يمكن اكون فعلا المرة دي غلطانة!!؟ اليوم التاني صحيت بدري ومشيت المجلة!! لقيت عمو السر مقفل!! قلت ان شاءالله عافية م يكون صايبو شني!! لانو بيفتح ع مدار الساعة!! طلعت المجلة واصلا عم احمد كان مديني نسخة من المفتاح!! وقال لي يمكن نجي متأخرين فخليه معاك!! بس م احتجت ليه ولقيت المجلة فاتحة!! سلمت ودخلت لقيتو عبدالله!! سلمت عليه وقعدت وكان مشغول بيرسم!! وبالجد فنان موهوب!! تحلف تقول الرسومات حقيقية!!
كان أ احمد كلفو بشغل امس!! قلت ليه اها خلصتو!! قال لي تعالي كشفي عليهم!! كانو ف اسكيتش كبير وجيت قعدت جنبو ووهو بيبهرني بالرسومات!! قال لي ممكن اسألك!! قلت اتفضل!!؟ قال لي عطرك دا اسمو شنو!! ابتسمت وقلت تقريباً اسمو دِيفااين!! قال لي ماشاءالله ريحتو حلوة ولا ريحتك محلياه م عارف!!؟ انا طوالي زحيت من جنبو ومشيت ع تربيزتي!!؟ واتصلت ع حسااام!! م عارفة السبب الخلاني اتصل شنو!! بس كنت عايزة اسمع المتدرب الجديد اني مخطوبة!! ف حين انو م قال لي شيء!! بس احساس مني سااي بقول لي ف شيء غلط!! نوقف هنا لانو موضوع عبدالله عايز ليه قعدة برواق!! انا وعدت ريم اني اجي اشوف حسام وامي نبهت علي م ازورو تاني!! وم عارفة اتصرف كيف!!؟ وشكيت لامل!! ونزلت لي كم دمعة كدا!! وطلعت خلتني راقدة!! وبكرة الجمعة ماف طريقة اتحجج بالشغل لانو اصلا ماف شغل!! وخليتها ع ****!!؟ ربع ساعة كدا وجاتني امل عابسة!! قالت لي حاولت مع امي بس رفضت!! عيوني رقرقو وقلت ليها اصلا امي كلمتها واحدة!! ورضيت بالواقع!!؟ ورقدت وطفيت اللمبة!! جاتني براحة ف سريري!! لمن خلعتني وهمست لي وقالت امي قالت لينا امشو بس م تتاخرو لاكتر من ساعة!!؟ انا لمن صرخت!! وامي جات جارية!! امل قالت لي نطا لينا فار الجغر ي امي!! حتي امي مشت وانا مغطية خشمي بيديني وم مصدقة!! حضنتها علي شديييييد وبكيت فيها!! **** احفظ لي اختي وكل الاخوات!! خلاص بكرةحشوف حساام وحيكون واعي!! كيف اقابلو؟! كيف اواجعو!!؟ كيف ح اخت عيني ف عينو وم اتلخبط ولا اتربش!!؟ اااااخ من يوم بكرة!! ياترا كيف حيكون؟؟!

نواصل بعدين

واضاعني ف لحظة من طيشة!! فماذا يفيد اذا اعتذر

يتبع ……….

الجزء الرابع عشر من رواية معذبتي​

اخر تلاتة شهور مضت!! كانت صعبة شديد علي!! اتوجعت فيها كتييير!! وبكيت فيها اكتر؟! وم ظنيت اتعلمت الكتير! بس تاني بقي ماف شيء بأثر فيني!! لا الكلام الحلو والاحلام الوردية!! م عارفة! يمكن يكون شغفي بالحياة انطفى!؟ راقدة وبفكر ف يوم بكرة حيكون كيف!! وكل شوية اطلع التلفون من تحت المخدة! واشوف الزمن؟ من ناحية عايزة الصباح يجي بفارق الصبر علشان اشوف غلاي!! ومن ناحية تانية خايفة من لحظة المواجهة!! انا من يوم انفصلنا م شفتو!! ولا سمعت صوتو!!؟ بالجد متوترة شديد!! ويمكن اكون خايفة!!؟ والصباح جا وانا عيني م غمضت!! وكانو ورمانين وحمممر!! وظاهر علي الارهاق!؟ قمت استحميت!! وصحيت امل قلت ليها الزمن؟! قالت لي زمن شنو م صليت الصبح حاضر!! ابتسمت وصحيتها تاني وقلت ليها المشية لحسام!! فتحت عيونها وعاينت لي بغضب؟! وقالت شوفي الساعة كم!!؟ متخلفة انتي!! ضحكت وقلت ليها نمشي بدري علشان نرجع بدري!! قنتت واتقلبت ع الحيطة وخلتني واقفة وواصلت نومتها!! انا مشيت بديت انضف ف البيت!! امي لم شافتني قالت لي من متين بتنضفي من اسسسه!! ابتسمت وقلت ليها الليلة جايبين شيلتي!! يجو يلقو البيت وسخان!! ضحكت وقالت لي البورة طالعة ليك ف رأسك انتي!! وبعداك لقيتها جهزت الشاي وجيت شربت معاها وابوي!! واتونسنا!! ابوي قال لي م حقول ليك م تمشي بس اعملي حسابك!!؟ عاينت لامي بمعني انتي وريتيهو!! قال لي م تعايني لامك!! يعني م كنتي عايزة تستأذني مني قبل م تطلعي!! ولا كبرتي وبقيتي صحفية!!؟ قمت مسرعة وقعدت جنبو وحضنتو بالجنبة وقلت ليه مهما كبرت! ح افضل اميرتك الصغيييرة البتريدك شدييييييد!! ضحك ضحكتو البتشرح القلب ديك وقال لي زحي خليني اشرب الشاي بيبرد!! قبلت يدو وجيت قايمة!!رجعت حتتي الكنت قاعدة فيها وشلت قطعة لقيمات!! امي قالت مخير ****!! انا لي ****!! وياحليلك ي احمد ولدي!! م كانت بعيدة مني!! قعدت جنبها وبقيت اديها قبل عشوائية مره ف رأسها ومره خدها ومره تزح مني وتجي ف رقبتها وتقول لي م عايزه بعد شنو!!؟ ضحكت وقلت ليها انتي عارفة بتك مطموصة!! اديها عفوك ورضاك!!؟وشغلتها ليهم هي وابوي وخليتهم يضحكو!!جات امل تجرجر ف رجلينها وصبحت عليهم وحمرت لي!! انا ابتسمت وعرفتها انها اتغاطت مني!!؟ بس ليها حق!! لانو الاسبوع كلو شغالة دراسة وم بتاخد راحتها إلا جمعة وسبت!!؟ مشت جِهزت وشربت الشاي وعلشان م تتحجج لي بالنضافة لقتني رتبت البيت!! بعداك طلعنا وامي نبهت علينا م نتأخر!! وطلعنا وانا قلبي ف يدي!! وكل م نقرب اكتر بطني توجعني اكتر!! ولم وصلنا باب المستشفي نبهت ع امل م تنفعل ولا تعلي صوتها مهما حصل ولا سمعت اي كلمة جارحة ف حقنا!! قالت لي بحاول اضبط اعصابي بس كان كتروها بلم فيهم خبت من طرف!! ضحكنا وجينا داخلين!! بتاع الامن عرفني!! وقال لي وين انتي!! ابتسمت وقلت حصلت لي ظروف وم قدرت اجي!! قلت ليه ادخل!! ابتسم وقال لي دي عايزة ليها سؤال!!؟ جينا داخلين ف راجل عاتي لابس فريم اسود وبدلة اشتراكية نهرنا وقال لينا اقيفو هنا!! زريبة هي!! بتاع الامن اتخلع وم عرف يقول حاجة وظاهر عليه انو دا اعلى منو ف الرتبة ولا المسئول عنو!! بس انا علشان م اجيب ليه مشاكل طلعت كرت المرافقة من شنطتي!! اتكرتو وجبتو معاي قلت يمكن م القي بتاع الامن ولا ينساني!!؟ وسبحان **** جبتو لخير!! وبتاع الامن بعد شاف الكرت لمن شال نفسو وختاه!!؟ قلت ليه هنا كرتي!! مسكو مني وقراهو ولقاه لسسسه ساري ومدتو م خلصت!! قال لي انتي هيام!! قلت اااي قال لي ادخلي بس المعاك تفضل برا!! قدر م حنستو رفض ومشى خلاني واقفة بنضم!! بالجد لئيم خلاص!! وقبل م يمشي نبهه ع بتاع الامن م يدخلها الا بعد مواعيد الزيارة تجي!! بتاع الامن قال لي انتي ادخلي وهي بتحصلك بس خليهو بعد يطلع!! وفعلا دخلت وخليت امل قاعدة براا وشامة الوضع!!؟
دخلت وكل خطوة بخطيها قلبي بيوجعني معاها وبحس برعشة جواااي!! واطرافي بردو!! وبقول ياربي ثبتني!!؟ واتصلت ع ريم قالت لي جاية عليك!! م وصفت لي الغرفة!! م عارفة هل ياترى م عايزاني اجيهم فجأة!! ولا عايزاني ادخل عليهم وهي معاي علشان اتقوى بيها!!؟ المهم انتظرتها ف الصالة بتاعة الاستقبال!! وجاتني مبسوطة وم عارفة شبهت لي حسااام شدييد نفس الابتسامة ونفس نظرة الحب ف عيونو لم يشوفني!!؟ قمت واتلقيتها ف النص وحضنا بعض شدييييد!! وبعد سلمنا ع بعض قالت لي مستعدة!! ابتسمت ومسكتها من يدها وقلت لي متوكلة ع ****!! ابتسمت وقالت ونعم ب****!!! وطلعنا بالمصعد!! وصلنا الطابق الرابع تقريباً وجينا جنب غرفة كدا وشكلها دي المرقدنو فيها!! وبدون مقدمات دموعي ابت تقيف!!؟ قالت لي شدي حيلك!! والدكتور قال م يتعرض لاي ضغط ولا نبكي فيه ونوترو فبترجاك امسكي نفسك قدامو!!؟ قلت ليها تمام!! قشيت دموعي واتنفست كم مرة بصوت مسموع!! وكنت بحاول اهدىء ف نفسي!! وقالت لي دخلنا!! هزيت ليها راسي!! وفتحت الباب!! انا قلبي ضرب شديييد ولمن حسيت براسي لفي ولساني تقل!! ومن روعة شافتني جات قايمة علي وقالت انتي!!؟ خالد نهرها وقال ليها تعالي معاي!!؟ كان حساام معاين قصاد الشباك!! ولم انتبه ليهم عاين لي!!؟ خالد قبل م يطلع سلم علي!! بس انا م مديت ليهو يدي!! بالجد جسمي شبة مشلول!! وكل تركيزي منصب ع حسااام!! فربت ع كتفي وطلع!! واختو لمن طقشتني!! حسام حاول قوم بس م قدر وريم جرت عليه!! قالت ليه خليك مرتاح م تتحرك!! وكان بعاين لي جووووه عيوني!!؟ انا بالرغم من وعدي لريم بس م قدرت امسك دموعي!! غلبتني عديييل!! وبحاول اقشها وبقنع ف نفسي اني م ببكي ولام متأثرة بس زي م كان بقول لي!! انتي كاذبة فاشلة!؟ بصعوبة حتى قدرت اجي خطوتين لقدام!! واتنهدت بصعوبة وقلت حمدلله ع سلامتك!! وكفارة ليك!! ان شاءالله اخر الالام!!؟ عينو م شالها مني وم ردا علي!! وانا م قدرت اعاين ليه وفضلت مدنقرة!!؟ ريم اتدخلت وعايزة تضاري ليه!! قالت لي الدكتور منعو من الكلام لانو لسانو متأذي شديد!!؟ عاين ليها وقال ليها بصعوبة وصوت خافت خلينا برانا!!؟ انا خفت اكتر!! ولم جات مارقة مسكتها!! وابتسمت وربتت ع يدي ووطلعت خلتنا برانا!!؟ اشر لي ع الكرسي وقال لي اقعدي!!؟ وشكلو فعلا لسانو متأذي!! م قادر يتكلم!! زي التقول لسانو مبنج!! قعدت وياداب قدرت اسرق منو نظرة!!؟ جاني احساس اني اجري عليه واحضنو شديييد!! واشكي ليه من العملو فيني!!؟ واضربو بكل قوتي علشان تاني م يزعلني!!؟ ودمعتي جات نازلة!! عاين لي وابتسم!!؟ م عرفت سر الابتسامة شنو؟ قال بصعوبة!! خفت اموت قبل م اشوفك!!؟ انا انفجرت ف البكاء وقلت بعيدالشر عنك!! قشقشت دموعي وقلت ليه كيف حاسس نفسك!؟ قال لي بقيت كويس!! قلت ليه **** يتم ليك العافية ويعجل ليك بالشفاء!! وجيت قايمة!!؟ قال لي بس كدا ي هيامي!! انا بكيت بحرقة وم قدرت اتلفت اعاين ليه وفضت مدياه ضهري!! شال نفسو بصعوبة وكحة لمن بقي يأِن!! جيت جارية عليه!! واظنو خالد كان قريب لم سمح كحتو فتح الباب بسرعة وجا جاري عليه!! ومن وراهو روعة مالو عملت فيهو شنو!!؟ انا م قلت ليكم م تخلوها تشوفو!! لو م قتلتو م بترتاح!! ريم الاصغر منها نهرتها!! حسام قال ليهم انا كويس!! انا جيت طالعة وقفني وقال هيام!! انا وقفت بس م اتلفت!!؟ قال لي اسف!! يمكن يكون **** عاقبني علشان جرحتك!! بس اثبتي لي اني م بستحقك!! **** يسعدك وين م كنتي!! كان بتكلم بصعوبة وبطلع الكلمات غصب وبكح وتقريباً اسانو نزف وروعة بقت تصرخ وتحلف فيه علشان يسكت!! انا عاينت ليه لاخر مرة وقلت الف لابأس عليك!! وع طلعتي القي امل ف وشي!! لمن خلعتها!! جات داخلة كفرت ليهم بس كانو منشغلين معاه وخالد بقش ليه ف الدم من حولين خشمو وروعة بتبكي وريم جرت تشوف ليها ممرض ولا دكتور!! وامل اتخلعت لم شافت حالتو وانهارت!! وانفجرت ف البكاء!! اتحاضنا وبكينا!! وبتقول لي انا م كنت قايلة وضعو كدا!! حيموت ي هيام؟! وانا من اول متحجحجة وعايزة لي سبب!! وصرخت!! تقريباً دخت بس م فقدت الوعي تماماً لاني حاسة بزول شايلني!! شامة ريحة حسااام بكيت بحرقة واتمنيت يكون هو الشايلني!!؟ نزلوني ع الاستقبال!! وكانت معاي امل بس!! وقبل م نطلع جات ريم وشكرتنا وودعتنا ورجعت عليهم قبل م نحنا نطلع من المستشفي!! بالجد كلهم حالتهم صعبة وم لايماهم ع اي تصرف بدر عنهم!! لاني السبب!! ولو حسام جاتو اي حاجة انا مستحيل اسامح نفسي!!؟ رجعنا البيت وطول الطريق انا وامل بنبكي!! لمن لفتنا انظار الناس!!؟ ومن وصلنا البيت امي شافتنا وقال مالكم ف شنو!!؟ لقيتوه كيف؟؟! امل حضنت امي وبقت بكي وتقول ليها م كويس!!؟ امي اتخلعت!! قلت ليها لا كويس وافضل من اول بكتييير!!؟ امي احتارت!! وم عرفت تصدق منو فينا!! بس شافتني مطمئنة اكتر من امل…دخلنا غرفتنا وامل حضنت المخدة وبقت تبكي!! جيت قعدت جنبها وقلت ليها اهدي امولة هو كويس!!؟ قمت وحضنتني وقالت م حيموت مشش!! اتنهدت وقلت ليها كلنا حنموت!! والمرض م بيقتل!! ان شاءالله حيتعافى!! ويرجع زي اول واكتر!!؟ بقت تتنهف وتقول لي دا م حسام الزمان الضحاك والوناس!! م شفتي عيونو بسحب فيهم كيف!! م قادر يفتح!! حسام بودع فينا مووش!! حسااام حيفارقنا ي هيام!! بكيت وقلت ليها استغفري وادعي ليه!! انا عايزاك تصبريني ي امل!! لو انتي انهرتي انا البدعمني منو!!؟ حضنتني وبكت!! ابوي نادانا…قلت ليه اصبري ي امل ابوي م يشوفنا كدا!! ومشبنا عليه!! بس امل حبيبتي حنينة شديييد وقدام ابوي اتجرست وتمت الناقصة امي لم امل قالت عايدة احمد ينادو ليها احمد اخوي!! وتعالو شوفو امي!! قلبوها مناحة وم عرفنا نسكت منو!! بعداك الوضع هِدا شوية وكل واحد مشا بإتجاة…وبيني وبين نفسي قلت ياريت لو م مشيت ولا سقت امل!! دا م حب!! دي لعنة حب!!؟ كل الخش فيه م بنال الا البكاء!!؟ راسي حينفجر!! وبحاول اشيل صورتو من خيالي بس اتناسى الحادث!! اشوفو وهو مبتسم!! الحل الوحيد اني اواصل ليكم واهرب للماضي شان ارتاح!!؟ كلنا وافقين لم عبدالله سألني عن عطري واتصلت ع حسام!! اتونست معاه وبعد أ/احمد جا حتى قفلت الخط!! عبدالله قال لي بكاوي فيني ولا خاشة الحب جديد!! ابتسمت وقلت كيف!!؟ قال لي ولا شيء!! كان فيه شيء مميز هادي ورزين ومؤدب بختار كلماتو بعناية!! دا غير انو رسام وكاتب!! بالجد شخصية نموزجية!! بس بميل للوحدة وم بيتكلم كتييير!! ومعظم الوقت بكون قاعد براه!!؟ الايام مرت عادي لحدي م احمد اخوي اخيراً موضوع قطر اتسهل عليه!! وخلاص اشر وقطع التزكرة!! وكان يوم صعب خلاص!! وكأنو طالع جنازة لاسمح ****!! وامي نهائي م صبرت ع سفرتو دي وحتى هو بكى معاها!! وحساام جا علشان يوديهو المطار بس اصحابو سبقو حسام وجو كريز مليان!! ركبوه معاهم ومشو ع المطار!! وانا وامل وحسام وراهم…ابوي قعد يصبر امي ف البيت واكتفو بتوديعو ف البيت!! وسافر الغالي!! **** يرد غربتو سالم غانم ****!!؟ بعداك حسام م قصر ياخد ليه كم يوم كدا ويجي يطل ناس البيت وبكون شايل **** يديهو ع حسب نيتو!! وانا بكون ف المجلة لم ارجع واشوف الحاجات بقولو لي خطيبك جابهم!! لم اسألو واقول لشنو م انتظرتني لحدي م اجي!! بقول لي انا جيت ازور اهلي م انتي!!؟ كان اطيب اخ وصديق وحبيب!! بس القدر قال كلمتو وفصلنا عن بعض!!؟ المهم بقي برنامجي البيت المجلة والطلعة مع حسام ومتابعتنا لمشروعنا فآن وآن!! والايام جرت وانا وريان منظمين شغلنا مرات انا بسد ليها ومرات هي بتشتغل شغلي!! وم كانت متحمسة للمجلة وبالاخص انها حقت *****!! لانها بتحب الفاشون والميكب والحاجات السمحة ديك!! علشان كدا كانت زهجانة من الخدمة وكل العابزاه بس خلو طرف منها!! اما عبدالله كنا قريبين شديد من بعض!! ومرات بنشتغل شغل ريان مع بعض!!؟ وجاتو فترة كان عيان وانا استلمت الشغل كلو براي بس هو كانت عليه الرسومات لاني م بعرف ارسم!! والموقف دا قربنا من بعض شديييد وبدون م نحس بقينا اصحاب!! ف الاول بس نسلم ع بعض!! بعداك بقينا نخش نصبح ونمسي ع بعض ف الواتس!! تدريجياً بقينا نتونس وم بمر يوم الا ونحنا مدردشين مع بعض ولا متكلمين!! م كنت عارفة انو العواقب حتكون وخيمة!! علشان كدا اخدوها نصيحة من اختكم!! م تصاحبي ليك ولد!!! نهائي م تؤمني بالصداقة بين الجنسين!!؟ صدقيني م حتظبط!! عارفة ليش؟! ي حبيتيهو!! ي حباك!! ي كاان سبب خلاف بينك وبين سيد ريدك!! ولو دا كلو م حصل م حتسلمو من كلام الناس ونظرتهم ليكم!! فشنو البيست فريند م يكون شاب!! الايام مرت وكل مره حسام بنبهني وبقول لي الشغل م يسرقك مني!! وكأنو بلمح لي بشيء!! بس انام كنت فاهمة اشارات كلامو!!؟ والسبب الخلاني اتمسك ب عبدالله اكتر كان بينصحني وبساعدني كتير!! لدرجة اني غيرت اسلوبي ف الملابس بسببو!! والسبب كنت طالعة مع حسااام يلا حسااام م من النوع الراقي شديد داك وطوال اليوم بتلقاه مهندم!! بالرغم من انو باشمهندس ورجل اعمال!! بس مرات لم الاقيهو بكون لابس بنطلون جينز كمساري م بيلبسو!! مع فائق احترامي للكماسرة!!؟ ولو زول شافو شايل الايفون بقول سارقو!! المهم يعني م بدقق ع لبسي ومخليني ع راحتي!! بس يوم كان عازمننا اصحابو!! وانا مشيت بنفس هيأتي المعتادة!!؟ بالجد م اتوقعتهم يكونو كدا!! كنت مفتكرهم زييي وزي حساام!! لقد ظننت وخاب ظني!!؟ ماشاءالله تبارك **** عارضين ازياء بس!! وبالجد الراحة والترطيبة ظاهرة عليهم!! وكلهم دكاترة ومهندسين!! بالجد اتعقدت من نظراتهم لي!! الاولاد كانو طبيعين بس صديقاتو نظراتهم كانت بتقول الفي دواخلهم وتريقتهم بخبوها بين الكلمات!!؟ انا قلبت ابكي!! وقبل م القعدة تتم استاذنتهم وقلت عندي شغل!! واحدة قالت لي لاحقة عملية!!؟ بعني نحنا الدكاترة قاعدين انتي تمشي!! ابتسمت وقلت ليها عندي موضوع مهم!! بس نتلاقي ف اوقات اوسع!! واعتذرت وطلعنا حسااام م ضغط علي ولا سألني موضوعك شنو!!؟ لم ركبنا قال لي معليش لو فرضت عليك اصحابي بس دا اسلوبهم فيهم المتغطرس وفيهم الشايف نفسو بس كلهم طيبين و****!! ابتسمت وقلت ظاهر عليهم طيبين وجريت كلمة طيبييييين!! ضحك علي ورجعني!! لم حكيت لعبدالله!! قال لي اللبس م مقياس!! بس ليه دور كبير ف فرض نفسك وهيبتك امام الناس!! وبراحة وم تزعلي انتي م بتعرفي تلبسي!!؟ بقيت اضحك وقلت ليه امل اختي بتقول نفس الشيء!!؟ المهم ساعدني كتير وبوريني صور ازياء راقية شدييد ومحترمة جدا!! بس ماركة وغالية الصراحة!! بس حسام واحمد اخوي م مقصرين معاي!!؟ وانا اتحولت لبت تانية!! بالجد اللبس غيرني شديد!! ولمن بقيت احس بنفسي راقية راقية وبقدر اطلع مع حسام وانا ماسكاه من يدو!!وهو بقول لي انا بحبك بكل حالاتك ومهما عملتي حتفضلي بت الاسانسير الهواها قلبي!!؟ لحدي م ف يوم انا وريان جينا من الفطور لقينا عبدالله بيرسم!!؟ يلا هو عندو اسكيتش خاااص كدا م بوري زول رسوماتو نهائي!! قدر م حنسناه ابا يورينا المهم قبضناه وهو بيرسم فيهو!!؟ واخلسنا النظر!!؟ كان بيرسم ف ضحكة بت شكلها لانو دا خشم بت!! م رسمة كاملة بس شفايف بتضحك!! ريان ضحكت وقالت ليه دا الداسيهو مننا!! اتخلع وقفلو سريع!! ابتسم وقال حراميات!!؟ وطلع خلانا!! اتجاهلنا الموضوع بس حسام بقيت لم احكي ليهو عبدالله قال لي وعمل لي ونصحني ب كدا!!؟ بيزعل شدييد!! وانا بقول ليه بعفوية لانو حبيبي وانا عارفة اني م بعمل ف شيء غلط!! لحدي م يوم حسام قال لي نعزم عبدالله وياريت لو معزمناه!!؟ م تنسي اياك تصاحبي ولد!!؟

نواصل بعدين..

قبل ان تبدأ الحب فكر واسأل نفسك!!؟ اااي موت تحب؟! رمياً بالفراق!!؟ ام خنقاً بالحنين!! ام دهساً بالذكرى؟!! ام انك تفضل الموت بوعكة شوق!!

يتبع ………

الجزء الخامس عشر من رواية معذبتي​

لم نحب بإندفاع ونقدم قل العندنا وم نأبه للمكن يحصل بعدين!! بنكون زينا وزي الشال اصبعو وقد بيه عينو؟؟! حب بإخلاص بس م تترهق روحك؟! لانو **** حيسألك عنها بعدين!! م تكسر قلبك بيدك!!؟ والحب البتسبقو بمشيئة رب العالمين!! **** ببارك فيه وبزيل ليكم كل العقبات الممكن تقيف قدامكم!! بل حيجعلها سبب علشان علاقتكم تقوى اكتر!! وان م حصل نصيب حتكون متيقن انو **** قاسم ليك الافضل واكيد **** م حيخذلك وحيجبر بخاطرك!!؟ بس كيف نحنا نربط الحب بمحبة **** عزوجل!!ويارب لا تعلق قلوبنا إلا بك!! انا انكسرت!! والحياة علمتني درس وللاسف الحياة م بتدي دروس مجانية!!؟ فكان المقابل قلبي!! وسعادتي!! ودموعي!! وحاجات كتيرة حتى انا م بقدر احصيها!! بس ثقتي كبيرة ف *** واكيد كلو لخير… نسقت انا وحساام اننا حنلاقي عبدالله ف نفس المطعم الكان عزمني فيهو داك!!؟ الكان ف شارع الاربعين!!؟ هو كان ف موقع عندو متابعة ولا مراقبة م عارفة؟! وقلت بدل م يجيني ونمشي احسن اختصر علية المسافة!!؟ وهنا عبدالله اصر علي انو نمشي مع بعض!! قال لي م من المنطق اننا ف نفس مكان العمل وماشين لنفس المكان!! وكل واحد ممنا يمشي براه!!؟ انا م كنت رافضة المشية معاه!! بس حسااام باقي حساس زيادة عن اللزوم وم عايزه يشوفني جاية مع عبدالله!! بس مع إلحاحو داك طلعنا!! ووصلنا قبليهو كمان؟! طلب لينا عصير وكنا بنتونس؟! عشرة دقائق كدا وحسام جا!!سلم عليه وانا لاول مرة سلم علي ف رأسي واعتذر عن التأخير!! وبإبتسامة عريضة عاين لي وقال اهاا الفاتني شنو؟! عبدالله سبقني ف الرد وقال شربنا عصير بااارد وسمح!! وبقي يضحك؟! انا ابتسمت وقلت ليه م فاتك كتير! حساام قبل ع عبدالله وهو مبتسم وقال ليه بالهنا ليك ان شاءالله ينفعك!!؟ وعاين لي ومسك يدي وقال ليه بس انا لسسه م شربت عصيري!!؟ خجلني وم عرفت ارد وسحبت منو يدي!! وعبدالله ابتسم ابتسامة باهتة كدا ودنقر ف تلفونو!!؟ وحسام كان بيهمس لي وبسألني عن يومي كان كيف!؟ ولاطفني بكم كلمة!! حسيت بالغيرة ف عيونو!!؟ زي الكان بقول لعبدالله دي حقتي براااي!! انا ببتسم بعفوية وبقول بيني وبين نفسي انا مستحيييل اعاين لولد غير حسام!! اصلا مالي عيني ومكفي وم شايفة غيرو!! بس منو يفهمو كدا!!اقترح لينا نوع الغداء ونحنا وافقناه!! واتغدينا ونحنا بندردش وبالاخص حسام وعبدالله كل واحد بيسال التاني ف مجال شغلو!! ومرات بينسو اني بيناتهم!! وانا مليت منهم الاتنين ومن كلامهم وبقيت اكل مجاملة سااي!! لحدي م عبدالله رفع صحن من قدامو وختاه قصادي!! قال لي جربي دا وكفاك من السلطة!! حسام حمر ليه!! وعاين لي قال يمكن م واخدة راحتها!! لانو الليلة م زي عوايدها!!! كان يقصد يعني متضايقين من وجودك!! وعبدالله شكلو فهم م بين السطور!! وابتسم!! وقال بتختف الاكل من يدي واسسسه تقول خجلانة!! ولا يمكن تكون خجلانة منك!!؟ حساام شياطينو قامو وقال ليه انت بتعرفها اكتر مني!! انا اتدخلت وقلت ليهم هي منك ليه!! شنو الحكاية!!؟ انا زاتي شبعت!! وقمت خليتهم!! مشيت غسلت وجيت قعدت مبوزة وندمت لليوم الجيت معاهم فيه!!؟ حسام قال لي مالك ي الغلا ف شيء!! ابتسمت غصب عني وقلت ليه بس مصدعة شوية!! ممكن نطلع!!؟ عبدالله قال متين قعدنا اسسسه!!؟ ولا خلاص كدايسك قامت!! حساام كان بيتنفس بصوت مسموع!! وبقي يدق ع الطاولة بمفتاح العربية!! وكان باين عليه التوتر!! وعبدالله علشان يتم الناقصة!! قال لي ماشاءالله ياداب انتبهت للبستك!! ياداب بقيتي بت!! والفضل يرحع لي!! وبقي يقرقر!! حسام قال ليه ممكن اغض النظر ع تعليقك ع اناقة خطيبيتي بحكم انك اخوها وزميلها !! بس انت دخلك شنو ف اختيارها!!؟ عبدالله قال لي انتي م وريتيهو!! حسام عاين لي بإنفعال وقال لي يقصد شنو!!؟ انا قلبي وجعني!! انا م وريت حساام انو عبدالله هو النصحني بأني اغير استايل لبسي!! لانو ف نظري موضوع هايف وم ليه معني ومجرد نصيحة من اخ لاختو!! وعاينت لعبدالله بإندهاش!!؟ قلت ليه عبدالله بهزر!! علشان نظر لي ف طريقة لبسي مفتكر نفسو اتفضل علي!!؟ حسام متنرفز وعبدالله بيتبسم!! قلت ليهم اذا انتو حابين القعدة خليكم مكانكم انا ماشة!! حسام قال لي انا زاتي نفسي اتسدت!! وجا قايم قال لعبدالله فرصة سعيدة وحنتقابل ان شاءالله!! عبدالله هو زاتو قام ومدا لحسام ساعدو لانو كفة يدو وسخانة!! وقال ليه انا اسعد!! وطالما هيوم بيناتنا حنتلاقي!! ومشي ع المغسلة!! حسام حمر لي!! دنقرت عيوني!! ولفحت شنطتي!! وسبقتهم!!؟ خليت حسام مشى يحاسب!! ركبت وبقول حسام من يومو شامي عبدالله والليله تمت الناقصة!! لم جا وركب وقفل الباب بقوة لمن جيت ناطة!!؟ عبدالله طلع وبنضف ف سنونو واتسند ع الباب الامامي ودقة لحسام القزاز!! حسام نزلو!! وقال ليه م شلت رقمك!!؟ وم شكرتك ع العزومة!! واهم شيء!! م ودعت اختنا الكاشفة دي!! وكان بعاين لي وبيتبسم!! حسام اتنهد بصعوبة وقال ليه م بين الاخوان شكر!! وملاه الرقم!! ورفع لي يدو وقال بيناتنا الشبكة!! ومشي!! حسام كان مدور العربية بطلها وعاين لي وقال ممكن اعرف الحكاية شنو ي هييوووم!! وضغط عليها!! انا ابتسمت بخوف!! وقلت الغيرة حلوة بس م تخليها تعمي بصيرتك!!؟ انا بحبك!! ومسكت يدو!! قال لي ماشيفة انو صديقك دا كان بيتعمد استفزازي!!؟ قلت ليه بس انت البديت!!؟ واديتو ثغرة فيك! بسبب غيرتك الزايدة!!؟ قال لي بغضب!! انا لو م غرت ع عرضي وحلالي ابقى واحد ديوث!! وانا ويميناً ب**** لو م ضبط اعصابي كان قتلتو ليك هنا!! انا اتنهدت بصوت مسموع وقلت انت م بتثق ف حبيبتك!!؟ قال لي اكتر من نفسي!! بس الصراحة كلامو كان مستفز!! اعتذرت وقلت تاني م حتشوفو!! قال لي وانتي حاولي اتجنبيهو!! وخلي علاقتكم محصورة ف اطار الزمالة!! ابتسمت وقلت حاضر!! قال لي حذريهو م يقول ليك هيوم!! ضحكت وقلت انت تأمر!! قال لي واهم شيء م يتونس معاك ف اي وقت!! لانو قال ليك بيناتكم الشبكة!! تاني ضحكت وقلت ليه بعدا زودتها!! قال لي جادي معاك!! اتنهدت وقلت مستحيل يخش علي وم ارد عليه!! بس بحاول اختصرو وم اتعمق معاه ف المواضيع!!؟ حتى شال نفسووختاه ودور العربية!! وصلني البيت وكان عادي!! بس م علي طبيعتو!! وقبل م انزل قال لي هيامي!! عاينت ليه!! قال لي انا بحبك وبغير وبخاف عليك!! ابتسمت وقلت وانا كمان!! قال لي ودا بيشمل اني بحبك زي م انتي؟؟! يعني م تتغيري علشاني ولا علشان اي زول!! خليك زي م انتي والعايزك بيرضى بيك بكل شيء فيك!!؟ استغربت من كلامو!! وقلت ان شاءالله!! وجيت نازلة!! قال لي بالمناسبة!!؟ عاينت ليه وقلت اممم قال لي انا عجبني فيك بساطتك وثقتك ف نفسك!! وعبايتك النصها ابيض والتاني اسود ديك اثرت قلبي ولو لمحت بت لابسها قلبي بينتفض!! انا عايزك زي م انتي ولبسك وشكلك وطباعك م بتهمني!!؟ لانها شيء ثانوي بالنسبة لي!! فما تجتهدي علشاني لاني متيم بيك ي غرامي!! انا خجلت شدييد وابتسمت وعيوني دمعو!! قلت ليه **** م يحرمني منك!! وانا اكتر بنت محظوظة!! لانو عندي حبيب زيك!! ابتسم وقال لي يلا طيري شميتك زاتو!! هيوم قال!! ضحكت ونزلت وودعتو من بعييد وجريت سلك الباب ودخلت!!؟ خليتو واقف م بعرفو مالو!! بعد مسااافة حتي سمعتو اتحرك!!؟ وامل شمارات منتظراني بفارق الصبر شان احكي ليها!! وتشيل وتدعي وتنبز ف عبدالله!! وتقول لي الولد دا عايز يخرب عليك!؟ اعملي حسابك!! انا بضحك ع سزاجتها م كنت شايفة الموضوع من منظورهم؟؟! وبعداك اموري مشت عادي لحدي م يوم تم تداول خبر وبقي قضية رأي عام!! وكان عن *** حديث الولادة اتلقى ف احدي المجاري جنب جامعة معروفة!!؟ ف استاذ احمد ومحجوب طلبو مننا نمشي للمكان ونكتب تقرير عن الحادثة دي واخترنا صورة للطفل علشان تكون صورة غلاف العدد القادم!! فلازم الموضوع يكون مكتوب بطريقة كويسة!! وماشاءالله عبدالله كان متمكن ف الكتابة وحتى الصورة التم اخيارها من قبل الاساتذة قام رسمها بطريقة طبق الاصل!! وإقترح انو المجلة م تخت الصورة الحقيقية والرسمة حتكون معبرة اكتر!! وحتى الخلفية كانت حزينة شديد رسمها!! مجاري واوساخ وكلب ع وشك ينهش الطفل!! بالجد الرسمة كانت بتبكي!! ودا بدل ع انو بالجد موهوب!!؟ المهم طلعت من بيتنا متحمسة شديد!! وم كنت عارفة انو دا حيكون اسوأ يوم ف حياتي!!؟ اتصلت ع حسام كالعادة!! لازم نمعط بعض ف كل صباح!! وريتو عن المشية!! وسألني حيمشي معاي منو!!؟ ودي كانت غلطة عمري!! اترددت!! وكذبت؟ ايوا كذبت!! خفت اضايقو من اول الصباح بسيرة عبدالله!! وقلت الموضوع عادي م حيدقق معاي لانو بيكرة يسمع اسمو!؟ م عايزة اقول ليهو حنطلع شغل ميداني مع بعض؟!! قلت ليه ماشة معاي ريان!! قال لي كويس!! وقفلت منو!! وف اثناء م بتكلم معاه كان عبدالله بيتصل!! بس مستحيل اقطع مكالمة سيد ريدي علشانو!!؟ بعد م قفلت من حسام حتى رجعت ليه وكان جايط الزمن ومشغولة وين!! وكلام كتييير واستوقفتني اخر كلمة! كرهتينا بحسام دا!! انفعلت وقلت م ليك دخل بخطيبي!! وبعدين حدك الشغل انت!؟ م ليك دخل بكلامي معاه ان شاءالله ٢٤ساعة الخط يكون مشغول انت مشكلتك شنو؟؟! لم لقاني جادة ومنفعلة اعتذر وقال لي بس الزمن م يروح علينا!! قفلت منو وطلعت!!؟ كل واحد مننا مشا براهو واتلاقينا هناك!!؟ وف الطريق قلبي واجعني وكأنو حسى بمصيبة حتقع!! وعاتبت نفسي لاني كذبت ع حسام!! واتصلت ع ريان علشان تحصلنا!! ووريتها بالموضوع وانو ضميري بأنبني!! تضحك وتقول لي بطلي خوف دي كذبة بيضاء!! وانتي م ماشة تعملي شيء غلط؟! دا شغلك!!؟ بس حساام دا عامل ليك ارهاب!!؟ ابتسمت وقلت ليها حسام ماف منو اتنين!!؟ وقفلت منها قالت م تقدر تجي!!؟ وصلت ولاقيت عبدالله!! سلمت عليه ببرود!! واول حاجة عملناها مشينا صورنا المجرى الكان مرمي فيهو!! وسألنا الناس الحولين المكان!! وكل زول بيروي رواية مختلفة!! ونفس الكلام المتداول ف الصحف!!؟ بس بتاع الدكان كانت اقوالو اقرب للحقيقة!! وحتي المؤتمر الصحفي العملوة ناس الشرطة بوافق كلامو!! فقلنا نعتمد قصتو!! ودخلنا جوووا الدكان وكان بيحكي لينا!! ودا م ساي!! كان شرطو اننا ننزل صورتو مع القصة!! وافقنا!! وف اثناء م بيتكلم معانا الكهرباء حقت الدكان خلصت!! قال لينا ثواني جااي!! وطلع ف كشك م بعيد مننا تقريبا بنزل كهرباء!! ونحنا قاعدين جوا الدكان!! ف زول جا نادى بس م دخل علينا!! لانو ف مسطبة وسكسبنده!!؟ ونحنا م حبينا نرد نيابة عن بتاع الدكان!! واظنو شافو بيتكلم مع بتاع الكشك!! وفجأة جاتو مكالمة!! والشي الحيرنا انو م تلفون عادي كان لاسلكي!!؟ وف الغالب م بستخدموه الا ناس الشرطة والامن!! وكلامو كان مشفر!!؟ اي الفار ف الجحر والجوكر نزل وكلام م مفهوم!! ولم بتاع الدكان جا غير كلامو!! وقال ايي ياااخ نقليتنا جات وحسافر الابيض وبقي يضحك وقفل!!؟ انا وعبدالله بقينا نعاين لبعض بإستغراب!! سأل بتاع الدكان عن سجار برينجي!! وشال معاه بارد ومشى!! لم دخل علينا اعتذر عن التأخر !! وقلنا ليه م مشكلة!! وقبل م يواصل!! سألناه عن الزول الشال السجائر!! قال غريب عن المنطقة بس شكلو من الحكومة لانو نزلو زول بموتر حكومي والطبنجة الفي نصو دي حقت عساكر!! اظنو م انتبه للتلفون!! قلنا ليه بس غريبة!! موضوع الطفل ليه اكتر من اسبوع ولسسه الشرطة حايمة ف المكان!!؟ قال لينا بإنفعال!! ياااخ ديل الزفت الخاربين سمعة الحتة دي!! قلنا ليه بصوت واحد انا وعبدالله!! ديل منو!! قال لينا استغفر **** العظيم ف شقة مشبوها!! كل يومين تلاتة بيعملو ليها مداهمة!! واظنو الوسخة الماسكاها عندها قرن ف الحكومة!! يومين تلاتة وتاني ترجع لعفانتها!! وبلاغات ناس المنطقة م بتجيب نتيجة معاها!! انا شخصياً اتخلعت!! بس عبدالله كانت الفرحة باينة عليه!! وقال لي براحة كدة!! لقينا موضوع ظابط!! كشرت وقلت ليه نحنا مجلة ***** اذا حضرتك نسيان!! قال لي انتي عويرة مشش!! خبر زي دا اي جريدة ممكن تدفع ملاين علشان يتصدر عددها الجاي!! قلت ليه انا م معاك ف فكرتك دي ولا بخاطر!! بتاع الدكان قال لينا بتهمسو ف شنو!! انا معاكم!!؟ وبقي يضحك!! تمينا تقريرنا وكتبنا القصة الرواها لينا وبعدين عبدالله حيعدل فيها ويقدمها بإسلوب كويس وحتتطبع ان شاءالله!! لم جينا طالعين قال لي فضل لينا شهرين تلاتة ونخلص الخدمة!! م تقولي لي عايزة تقضي عمرك كلو ف المجلة دي!!؟

اذا سربنا خبر زي دا للجريدة الفلانية ديك!! اكيد حيتعاونو معانا!! واحتمال نبقي صحفين متعاونين!! قلت ليه امش براك وانا ماشة بيتنا!!؟ قال لي انتي مالك جبانة!!؟ وين حس الصحافة الجواك!! وين شغفك؟؟!وين ثقتك بنفسك اتحدي الخوف ياااخ انتي صحغية!! وخير زي دا بتمناه ااااي صحفي!!؟ قلت ليه بس نحنا م متأكدين!! دي تخمينات من بتاع الدكان ساااي!! قال لي لو كنتي صحفية بالجد كنتي ربطي الاحداث مع بعض!! وبعدين نحنا م خسرانين شيء!! نتابع من بعيد لبعديد لو طلعت مداهمة نوثق ليها وناخد كم صورة ونمشي نبيعهم!! ولو طلع ماف شيء!! ح اعتذر ليك واعزمك انتي وخطيبك المفتري داك!!؟ لسسسه خايفة بس قدر يقنعني بإسلوبي المميز داك!! واتوكلت ع **** وقعدنا تحت ظل شجرة!! وهو قام اتمشور حولين البناية!! وشوية كدا وشفنا عربية دفع رباعي وقفت ونزلت منها بت عشرينية ومعاها راجل عجوز!! عبدالله صور العربية وصورهم من ورا!! وجوهم م كانت ظاهرة!!؟ وجاني يبسم!! قلت ليه احسن الظن!! يمكن يكونو اهل!! ولا يمكن يكون دا بيتهم!! انت بتعرف ناس المنطقة دي!!؟ قال لي اقعدي وشيلي الصبر!! ف اقل من عشرة دقائق جات امجاد ونزلو منها اتنين واحدة ف منتصف الاربعينات تقريبا والتانية ي عشرين ي تسعةعشرات كدا!! قال لي ارح!! قلت ليه بخلعة كدا نمشي البيت!! قال لي م بيوتنا!! اقصد نقرب اكتر!!؟ حمرت ليه وقلت م عايزة معاك قلة ادب!! لو الشمار قاتلك امش خش عليهم عديييل!! بقي يضحك وقال لي جبانة خلاص!! خلاني ف حتتي واتقدم بس خطوتين!! جات عربية طارة!! ونزلو منها غرابة السبعة عساكر وداهمو البيت!!؟ انا من الخلعة لمن فتحت خشمي!! وشلت شنطتي وقلت لعبدالله ارح!! وقبل م يلقط ليه كم صورة قبضونا!!؟ وف عسكري قال للقائد بتاعو ديل بصورو!! بكونو مع الجماعة!! وداك ولا كذب قال ليه ارفعهم!!؟ انا لمن بركت ف الارض!!؟ وعبدالله شغال ليهم نحنا صحفين ونحنا ونحنا!! والعسكري بدفر فيه!! لم خلاص الموضوع بقي جدي!! عبدالله انفعل معاهم والقائد اتدخل!! وقال لينا جيبو دليل ع انكم صحفين!!؟ وحنخليكم!! ونحنا تحت التمرين!! بطاقات م عندنا!! نثبت ليهم كيف!!! انا قلت ليهم و**** م لينا دخل ووريتهم تقريرنا عن الطفل الضحية والقصة السردها لينا بتاع الدكان!! بس كان حقار وكريه!! وقال لينا كلامكم دا قولوه ف القسم!! ورفعونا مع الجماعة!! وانا بقيت ابكي وعبدالله بقول ليهم خلاص سوقوني انا وخلوها تمش!! بس ماف زول اشتغل بيهو!! واخر الزمن يرفعوني ف طارة!! وياريت لو كنت قاتلة زول كان حيكون ع قلبي ارحم من اني راكبة مع مجموعة دع*رة!!؟
ومشينا القسم!!؟
نواصل بعدين
يتبع ………

الجزء السادس عشر من رواية معذبتي​

امي **** يمتعها بالصحة والعافية بتقول لينا الصاح كان م حلاكم!! الكذب م بحلكم!! وكم وكم من كذبة صغيييييرة خربت بيوت وقطعت علاقات وهدمت عشرة سنين؟؟! وانا راكبة ف دورية الشرطة بفكر!! كيف اوري حساام!! واقول ليه شنو؟! واتصرف كيف انا؟! ودا شنو الوقعت فيه نفسي دا!!؟ والف سؤال بيطرحو نفسهم ف نفس الوقت!!؟ وم سكت من البكاء لحدي م وصلنا القسم!! نزلو الجماعة بتوع الشقة ف الحراسة!! ونحنا كان معانا القائد القبيل!! كان ملازم؟ وهو بنهر فينا وبسكت فيني!! جا ماري القائد الاعلي منو!! كان رائد لم شافني ببكي وبشرح ليه بإنفعال!! قال ليه الحاصل شنو؟؟! الملازم حكي ليه الحصل!! عاين لينا وقال جيبهم ع مكتبي!!؟ وساقونا وقعدنا اكتر من عشرة دقائق هو م جا!!؟ وانا بلوم ف عبدالله وشغالة ليه كلو منك!!؟ وانت السبب!! وعامل فيها صحفي!! اها طلعنا من هنا!! وبكيت بحرقة!! لاني خايفة من الحيحصل بعدين!!؟ وهو مرة يعتذر ويحاول يهديني ومرة يسكت!! لحدي م دخل علينا الرائد!! قعد ف مكتبو وبعاين لينا!! وقال احكو لي الحصل!!؟ بقيت اتكلم انا وعبدالله ف وقت واحد!!؟نهرنا وقال انا عندي اضان واحدة افتكر!! يتكلم واحد بس!؟ وعبدالله بقي يشرح ليه ف الحصل!!؟ الحمد*** اقتنع!! وقال لينا صدقت قصتكم!! بس لازم تجيبو مايثبت انكم صحفين!!؟ علشان تمشو بأدبكم!! وإلا حنفتح حنحجزكم بتهمة تعطيل مهمة مهام شرطية!! وانا بقيت احمر لعبدالله لانو م عندنا بطاقات ولا شيء يثبت!! فقال ليه ممكن يجي واحد من الصحفين اصحاب المجلة ويأكد لسيادتكم!! جنابو وافق!! فعبدالله اتصل ع أ/محجوب وحكي ليهو الحصل!! وداك م كذب طوالي قال ليه مسافة السكة واكون عندكم!!؟ حتى انا اطمئنيت شوية!!؟ م بعرف الجماعة بتوع الشقة الوراهم منو بقصتنا!! بس شكلهم يدهم وااااااصله!! وم طلعو منها زي الشعرة من العجين وبس!!؟ ديل اتكلمو مع شرطي انو يمسح اي صورة نحنا لقطناها ويمنع تسريب اي خبر لاي جهة!! المهم جانا عسكري بيطاول!! وطلب من الرائد نمشي معاه لانو!! حياخد اقوالنا ويبدأ اجراءات اخلاء سبيلنا!! وطلعنا معاه!! واستلمنا ليك!!اولا اللهجة اتغيرت!!؟ وبقي ينهر ويخوف فينا…وشال مننا الكاميرا حقت عبدالله وطلع كرت الزاكرة ودخلو ف جيبو!!؟ عبدالله انفعل وقال ليه عندي فيها كل اعمالي لو سمحت رجعها لي!! وم كنا عارفنو عايز يمحي صور الجماعة دلاك!! وافتكرناهم حيشيلو الزاكرة لانهم مفتكرين اننا صورناهم!! بس م اشتغل بينا كتير!!؟ اتصل علي حساااام م رديت وقلبي وجعني وخفت عديييل!! تاني اتصل!! استغربت!! اولا لم اكون مشغولة م بيتصل!! ولو م رديت م بزعجني وبرسل لي رسالة!! خفت يكون حاصل معاه شيء!! ومن م الخط فصل تاني اتصل!!؟ قلبي بقي يضرب شديد!!؟ وقلت ياربي بكون عرف!! بس انا م وريت زول!! عبدالله قال لي مالك م بتردي يمكن يساعدنا!! قلت ليه بعفوية!! هو م عارف اننا مع بعض!! عاين لي مسافة ودنقر!! فصلت فيهو الخط ورسلت ليه نموزج جاهز سوف اعاود الاتصال بك!! وعملت التلفون وضع طيران!!! م كنت عايزة اكذب عليه تاني!! وم قادرة اقول ليه انا ف القسم!! قلت بما انو الموضوع اتحلا بعد ارجع ابيت احكي ليهو الحصل وحتى كذبتي ديك حوريهو بيها!!؟ وقاعدين ومنتظرين الاستاذ يجي يحلنا من المصيبة الوقعنا فيها دي!! وعبدالله جاهو تلفون قام بعد مني اتكلم ورجع محلو!!؟ وف الاثناء ديك جا أ/محجوب وانا من شفتو بكيت!! اتكلم مع الملازم!! وابرز ليه بطاقتو واكد ليه اننا بنعمل ف المجلة وجاب معاه خطابات إلتحاقنا بالمجلة!! حتى الملازم الغياظ اقتنع وقبل م نطلع عبدالله كلمو بموضوع الزاكرة!!؟ اول العسكري جاط بس لم لقي الاستاذ جادي وحيسبب ليه مشاكل!! واصلا الرائد م عارف بموضوع الزاكرة!! طلعها من جيبو ودخلها ف الكاميرا وحزف الصور بنفسو حتي رجعها لعبدالله ونهرو وقال كدي تاني اشوفكم ف واحدة من مداهماتنا!! وكنا حنطلع بس عبدالله بأخر فينا!!؟ وقال عندو صاحبو جاي يسوقنا!!؟ وقال لي افتحي تلفونك اتصل عليه انا رصيدي خلص!! ملاني الرقم وقبل وضغط ع الاتصال ولمصيبتي جات داخلة مكالمة حسااام واتفتحت بالغلط!! كان جايط وين انتي!! والحاصل شنو!! قلت ليه اهدي انا كويسة!! ف شنو؟! قال لي وين انتي!! سكت مسااافة وعيوني دمعو!! قلت ليه طلعت من مصيبة الحمد***!! انفعل اكتر وقال لي سألتك وين انتي!! قلت ليه طلعت من الموقع المرسلين ليه وراجعة البيت!! وقلبي بقي يرجف وجسمي كلو برد!! وانا بتكلم معاه طالعين من القسم!! قال لي يعني انتي م ف القسم!!؟ ولمن وقفت مشي ورجلي م قدرت ارفعها من الارض!! وياريت لو م رفعت عيني!! اشوفو نازل من عربيتو!! وبعاين لي بدهشة!! واتلفت يميني وكان عبدالله واقف!! بالجد انا بقيت قدر السمسمة!! اتمنيت الارض تتشق وتبلعني!! جا علي وقال لي انتي كويسة!! م عرفت ارد بشنو!! وبقيت اعاين ليه مصدومة!! أ/محجوب طمنو وقال ليه حاجة بسيطة وحليناها!! قال لي حمدلله ع السلامة!! وطالما عبدالله جنبك م بتكوني محتاجة لي!!! ورجع دور عربيتو وساق بغضب وقرب يضرب ليه عسكري وانا من الصدمة م قادرة استوعب!! الاحداث كانت متسارعة شديد!! وم عرفت اتصرف!! عبدالله قال لي م تشغلي باللك بكون غضبان وبيهدى!! خليه يروق واتفاهمي معاه!!؟ اتنهدت بصعوبة لمن قلبي وجعني!! وحسيت بطعم الدم ف حلقي!! وعبدالله سندني حتى مشينا!! وبقول ياربي جيب العواقب سليمة!! والاستاذ سأل عبدالله عن صاحبو!! قال م برد عليه!! ووقف لينا ركشة!!؟ ركبنا وخمس دقائق م تميناها!! عبدالله قال لبتاع الركشة اقيف اقيف!! وجرا برجولو ع القسم!! كلنا اتخلعنا!! الاستاذ قال لبتاع الركشة حصلو!! لم وصلنا القسم كان بيسأل زي المجنون!! عندي إسكيتش كان هنا!!؟ وبقلب ف الاوراق وبتلفت يمين شمال!!؟ وبقو يجوطو فيه!! الاستاذ قال ليه اسكيتش منو!! قال ليه بخلعة واضحة حقي!! ف قلبي نبزتو!! نحنا ف شنو وهو ف شنو!!؟ وقلت ليه شيل منهم رقم وخلي ليهم رقمك اذا لقاه واحد يتصل عليك!!! وبقي يقول اسسسه كان هنا!!؟ متأكد خليتو هنا!!؟ ف عسكري جاط فيه وقال شنو الحكاية!! دفتر رسم ولا دفتر شيكات اصلو!بعداك الاستاذ حاول يهديهو وقال ليه حرجع ليه مره تانية!! بس رفض وقال لينا امشو انتو انا بحصلكم!!؟ اصلا الفيني مكفيني!! طوالي طلعت خليتو!! لقيت بتاع الركشة فات!! وقفنا واحد تاني ومشينا الشهداء!! لاستاذ شكرتو ومشي المجلة وانا مشيت ع مواصلاتي!! الدموع جفت!!؟ بس قلبي يفر ويدق!! وحاسه بأنو ف مصيبة حتحصل!! اتصلت ع حسام تلفونو مقفول!! ورجعت البيت وانا صوت انفاسي بوجعني!! وم حكيت لزول بالشي الحصل!!؟ امي كانت حتخش ف كومة سكر لو عرفت!! وابوي يسألني عن كل الحصل!! ولازم احكي بالتفصيل الممل!! علشان كدا انا متوترة وخايفة! وم عايزة اخش ف نقاش قبل م اوضح لحسام الموضوع!!؟ وبحاول ف التلفون وبديني مقفول!! اتصلت ع ريم قالت لي لسسسه م جا البيت!! واتكلمت معاي عادي شكلها م عرفت الحصل لسسه!! وانا كل م دقيقة تمر قلبي بوجعني اكتر!! وبحس بأني قدر م اتأخرت ف الشرح قدر م بعدت عني حسام اكتر!! امل جات من الجامعة وشافت حالتي بالبلاء!! وقدرم آلحت علي م وريتها!! بس قلت ليها مشكلة بسيطة واتحلت!! افتكرت اني بحل الموصوع سريع مع حسام!! وقريب الساعة ١٢بالليل حتى فتح تلفونو وجاني استلام الرسائل!! اتصلت وبعد كذا محاولة ردا علي وقال لي نعسان عايز انوم!! نتلاقي الصباح بجيك جنب البيت!! وقبل م ارد قفل!! اتنهدت بصوت مسموع!! وقلت بما انو عايز يلاقيني معناها حنتفاهم!! وبحاول ارضيهو مهما قال وعمل ح اصبر لاني غلطانة!! ونمت وانا مطمئنا شوية!!؟ الصباح قمت ف نفس توقيتي الزمان!! نضفت واستحميت وجهزت وطلعت!! ومن وصلت الظلط اشوفو واقف!! مشيت عليه وانا خايفة وقلبي بيضرب!! سلمت ردا السلام!!؟ دور العربية واتحرك!! قلت ليه انا اسفة!! م ردا علي وانشغل بتلفونو!! واتصل ليه ع زول!! كان بيتكلم معاه!! اتجاوزنا لفه طريقي!! وقلت يمكن مع المكالمة م منتبه للطريق!!؟ قلت ليه دا م طريقنا!! عاين لي وعيونو بدفق شرار!! وقال لي مغضب م موديك شغلك!! انا بقيت حس بدقات قلبي تحتي ف المقعد!! ولمن اضني صنو!! وخشمي م فتحتو!! شكلو غضبان شديد وبقول اهدي واصبري خليهو ينفس عن غضبو!! نزلنا ف كافي!! وكان فاضي نحنا اول ناس ندخل!! وقال لصاحب المكان مؤجرو كلو لحدي م اطلع من هنا!! م تسمح لزول يدخل!! واداهو البطاقة قال ليه اسحب المبلغ العايزو!! انا قربت اموت من شدة الخوفة!! وصاحب المحل اتخلع!! وم عرف يرد بشنو!! بس شاف غصب حسااام وقال ليه اقعد اخد راحتك!! وفعلا قفل الباب علينا نحنا التلاتة وطلع ع الطابق التاني وخلانا برانا!! قلت ليه ليك حق تزعل وتضايق!! بس اسمعني للاخر وبعداك احكم!!؟ دمعتو جات نازلة!!؟ انا بدون اشعر بكيت!!؟ معقولة انا اكون سبب ف بكاء حسام!! بدل م اقدم ليه السعادة ابكيه!! قشى دمعتو!! وقال لي انتي عارفة اساس اي علاقة شنو!!؟ قلت ليه الحب!!؟ قالي غلطانة!!؟ وضرب يدو ع الطاولة لمن جيت ناطة!! قالي الثقة والاحترام حتى زفت الحب!!؟ انا سكت!! قال لي انتي جرحتيني ي هيام!! بالجد كسرتي ثقتي فيك!! قلت ليه علشان كنت خايفة زعلك وخبيت عليك!!؟ قال لي كذبتي علي!! م خبيتي!! عارفة يعني شنو كذبتي علي!! م ختيتي لي اي اعتبار!!؟ علشان نكون واضحين ي بت الناس!! انا ايتوقفتني كلمة بت الناس بس م خلاني اتكلم!! كان منفعل شديد!! وصدمني لم قال لي انتي بينك بين عبدالله ف شنو!!!؟ انا كأنو ف صاقعة نزلت ع رأسي!! اي صاح انا غلطت!! وكذبت!! بس دا م يعني انو يشكك ف علاقتنا ويتهمني اتهام زي دا!! بكيت وقلت ليه تقصد شنو بكلامك دا!!!؟ و**** من شدة م متوترة م انتبهت انو كان شايل ورق ف يدو!! وبقي يدع الورق ف قدامي وجزو هبشني ف وجهي وبقول لي دا شنو!!! وانا مخلوعة بقيت اكابس ف الورق اشوف هو قاصد شنو!! القاهم صوري!! صوري انا ومعاهم شعر وكلام فاحش!! وحتي ف رسومات مثيرة لي !!! وانا اتخلعت وبقيت اقول ليه ديل حقات منو!! دي م انا!!؟ عضى شفتو التحت بحرقة وضرب الطاولة وقال لي اسألي عبدالله صاحبك ولا حبيبك ولا شنو بالضبط هو!!؟

وكلماتو الاخيرة كسرت قلبي وقلت ليه وانا العابرة خانقاني تقول لي انا هيام حبيبتك!! صاحبك ولا حبيبك!! انا بخونك يعني!!
نواصل بعدين!!
يتبع ………

الجزء السابع عشر من رواية معذبتي​

سبحان ****!! فعلا الدنيا دواارة!! ف لحظة من لحظاتها كنت مالكة الدنيا!!؟ م وراثاها من ابوي!! ولكن بكمية حب وحنان واهتمام لقيتهم من خطيبي!! خلوني اكتشف هيام تانية!!؟ واحس بأني فعلا مالكة الدنيا!! بس للاسف وبغمضة عين الدنيا دارت مني وجهها!! وبقيت م فاهمة شيء ولا قادرة استوعب اذا كنت ف حلم ولا الحاصل معاي شنو!!؟ بس كان احساس بشع شديد وماف زول بيتمناه!! لكن نقول الخيرة فيما اختارة ****!! و**** يصبرنا ع الامتحان دا….!
انا بعاين ليه جووووه عيونو!! م كان حسام الانا بعرفو!! مستحيل عيوني م تلاقي عيونو م يبتسم لي!!؟ كان واحد تاني!! كمية شر تخوف؟! وانا بسأل فيه اذا كان قاصد فعلياً اني خنتو مع عبدالله!! اول م ردا علي وكان خاتي ايديهو ع الطاوله وضاغط علي دقنو بإبهمو!! وسرحان!! قلت ليه انا م انكر اني خبيت عليك!!؟ قاطعني بنهرة وقال لي كذبتي!!؟ اتنهدت وقلت ايوا كذبت!! وعايز يقاطعني بس وقفتو وقلت خليني اكمل كلامي!!؟ سكت..! اخدت نفس عميق وقلت ليه انا كذبت عليك لاني خفت زعلك!!؟ عاين لي وابتسم بإستهتار!! واصلت كلامي!! وقلت وحتى انا كنت حاسة بتأنيب الضمير ونفسياً صدقني م كنت مرتاحة!!؟ خبط يدو ع الطاولة وقال لي بس عايز افهم لشنو تخافي مني!!؟ لشنو م صارحتيني!!؟ معناه انتي م خاتة لي اعتبار!!؟ قلت ليه م كدا ي حسام!! انا عارفاك بتتنرفز من موضوع عبدالله!! علشان كدا م وريتك انو حيكون معاي ف الطلعة!!؟ قال لي لانك عارفة انك بتعملي ف شيء غلط!! وبزعل علشان كدا استغبيتيني بس **** فضحك؟؟! انا بكيت بحرقة!!؟ ما من التجريح بالكلام!!؟ من الثقة الانعدمت ولا اصلا كانت ماف وانا خادعة نفسي بيها!!؟ قلت ليه افهم منك انك بتشكك ف اخلاقي واحترامي لنفسي!! يعني انت م بتثق فيني ي حساام!!؟ قال لي شفتيها حااارة كيف!! لم حبيبك يكون م بيثق فيك!! جربتي الاحساس دا مؤلم كيف!!؟ بكيت وقلت يعني عايز تنتقم مني!!؟ اتنهد بصعوبة وغطى وجهُ براحة يديهو!! وقال لي انا من اصحاب التصرفات الرخيصة دي!! انفعلت وقلت طيب عايز تسمع مني شنو!! وانت م عايز تعرف الحقيقة واصلا جاي وكلك قناعة بأني كذابة وخائنة!!؟ انفعل اكتر وكرفس واحدة من الرسمات القدامو!!؟ وقال لي كل الحقائق قدامي وعقلي مدركها!! بس ف حاجة كدا جواي بتقول لي اتعمق اكتر ف الموضوع!! بس كل م احاول اربط المواضيع تظهر لي كذبة من كذباتك؟؟ نهرتو وانا م فيني حيل اتكلم واشاكل وقلت انا م كذابة ي حسام م تتمادى ف الغلط؟؟! عاين لي مسااافة وم ردا!! قلت انا م ناكرة اني كذبت مره!! بس…قاطني وم خلاني اواصل قالي المره دي عندك ممتدة ولا كل مره بتقولي دي اخر مره!!؟ تقصدي كذبة طلعتك مع صاحبك ولا مشكلة القسم الاستخسرتي فيني انك تلجأي لي فيها!!؟ انا تعبت ! كل م احاول اصلح البيناتنا هو يعقد الامور وليخبطها ف بعضها!! قلت ليه حقت القسم م كذبة!! انا كنت متوترة من الشيء الحصل ولمن جسمي بيرجف ووالله م عندي قدرة احكي ليك ف وقتها!!؟ قال لي اااي عارف!! لحدي م مزاجك يحكم بعداك تكلمي الطرطور دا!! م اصلا هو صفر ع الشمأل ووجودو وعدمو عندك واحد!!؟ سكت!! م لاني م قادرة ارد!! بس نفسياتي انهارت!! وحاسة كاني بتكلم مع زول وهو اتجاهو واحد وم عايز يغير افكارو او يستوضح الامور!!؟ لم شافني ف حالة صعبة ولم جسمي كلو بيرجف!! والنفس غالبني!!؟ قال لي لو افترضنا!! مجرد افتراض!! انك بريئة!! وانو م بينك وبين الزفت داك إلا الزمالة الصداقة ع قولك!! ممكن توريني دا شنو!!؟ اذا فعلا هو اخوك وصديقك م اكتر!! وبقي يلم لي ف الاوراق من الارضية وبرص لي ف الطاولة!! وبقول لي نعم الاخوان!! ف اخو بيكتب كلام زي دا لاختو!! ولا الصورة شوفي الرسمة دي!! والاهاني اكتر انو جدعها لي ف وشي وقال لي شوفي!!؟ شوفي اخوك راسمك كيف!! عايني!! وكان بأشر علي مفاتني ف الرسمة!!؟ وانا فقدت السيطرة ع نفسي وبقيت اصرخ!! بكييييت بحرررقة!! الراجل جا جاري نازل علينا!!؟ لقى حالتي صعبة وحسام شابك يدينو ورا رقبتو وبتمشور حوليني وكان متوتر شديد!!؟ الراجل ماف زول مننا اشتغل بيه!!؟ وقف شوية كدا ورجع فوق تاني!! وصوت استغفارو كان عامل صدى ف اضاني!!؟ بكون مفتكرني واحدة رخيصة!! قلت لحسااام جبت الرسومات دي من وين!!؟ انا م حصل شفتها قبل الان!! بس توقيع عبدالله ف كل رسمة عرفت انو هو فعلا رسمني!! وغير كدا شعرو البذئ الفاحش دا كان بخط يدو!!؟ حسام قال كل الاثر فيك واستوقفك الرسومات!! وانو كيف وصلت ليدي!! وكأنو بتهمني وبثبت تهمو فيني وبيحكم علي!!؟ وانا قاعدة لاحولا لي ولا قوة!!؟ قشيت دموعي!! وقلت الكلام معاك م بجيب نتيجة لانك اصلا م عايز تصدقني!!؟ فياريت تتكرم علي وتوريني كيف الرسومات دي جاتك وعرفت من وين اني كنت ف القسم!!؟ ابتسم!! قال لي بقيتي تفاجئيني كتيير!! وتصرفاتك بقت غير متوقعة!!؟ اتنهدنا بصوت مسموع وف اناً واحد!! قال لي اباذر صاحبي لقاه ف القسم وجابو لي!!؟ اما عرفت كيف انك ف القسم امشي اسألي صاحبك!!؟ انا صعقت!!؟ معقولة عبدالله وراهو اننا ف القسم!!؟

قال لي انا من يوم شفتك دخلتي قلبي بدون استئذان!! واتمنيتك تكوني مرتي حلالي!! بس يمكن نكون استعجلنا ف اتخاذ قراراتنا!!؟ انا ابتسمت!!؟ م فضل الا يقول لي خطوبتنا كانت غلطة!! ومعرفتي بيك حتندمني طول حياتي!! اتنهدت وقلت كمل!!؟ قال لي راسي جايط وم قادر اتخذ قرار!! واي تصرف يبدر عني انتي الحتتحملي مسؤليتو لانك فقدي ثقتي يوم كذبتي علي!!؟ قلت ليه واخر كلامك!! قال لي م عارف اقول ليك شنو؟؟ بس ح ادرس الموضوع!! وبالرغم من اني م مقتنع بكلامك!! بس ح اختو بعين الاعتبار علشان م اظلمك واظلم نفسي!! انا بكيت!! واقلت امممم وتاني!! كان بيدعك ف جبينو وبطلع الكلمات بصعوبة!! وم بعاين لي ف عيوني!!؟ وبيتكلم!! قلت ليه تقصد انك استعجلت واتهورت بخطبتك لي!! وحابي تصلح غلطك!!؟ قال لي انا م قلت كدا!! بس قلت ندرس الموضوع من كل الجوانب!! واذا وصلنا لحل وتفاهم يكون افضل!!؟ ولا….وسكت!! قلت ليه ولا شنو!!؟ م جاوب!! قمت ع حيلي وقشيت دمعتي!! وبيني وبين نفسي قلت ي هيام زليتي نفسك اككتر من اللازم!!؟ بما انو حساام لمح ليك بالكلام معناه مكسوف يفسخ خطوبتو معاي!!؟ اصلا بعد القالو لي والاهانة السببها لي انا بطني طمت من العلاقة دي ودوامة الشكوك دي لازم تخلص!! جيت قايمة وقلت بعتذر اذا دخلت حياتك ولخبطها ليك!!؟ وزي م دخلت بهدوء ح اطلع انا وقلبي المكسور بكل هدوء وقد م تلاحظنا!!؟ كان متردد!! وكأنو قلبو بقول ليه وقف حبيبتك وم تكسر قلبها!! بس عقلو بيمنعو وبقول بس هي خسرت ثقتك لانها طلعت اصلا م بتثق فيك!! انا قمت ع حيلي ولميت الرسومات الوسخة حقت عبدالله وجيت ماشة!! م وقفني!! مشيت خطوتين ووقفت وقبل م اتلفت بقول ف نفسي اللعن الشيطان ي حساام وم تخليهو يعمي بصيرتك!! بس كان ف عالم تاني كلو شكوك وخيانة وانعدام تام للثقة!!؟ اتنهدت ورجعت لاخر مره!! وطلعت دبلتو ومحبسو من يدي وختيتها ليه ف يدو م مسكها!! وقلت ليه كدا حترتاح مني وللابد!! خلاها وقعت وكان بعاين لي بدهشة!!؟ وكأنو م متوقعها مني!! وجيت ماشة الباب ابا يفتح لي!! بقيت اعافر وخبطتو من شدة التوتر والغضب الاتملكني جا باع المحل صلح القفل وفتح لي الباب!!؟ حسام جا طالع وراي!! وقال لي اقيفي نتفاهم!! ابتسمت وقلت بس م خليت فيها تفاهم!!؟ اصلا انت م عايز تفهم!!؟ وانا فترت من الشكوك والاتهامات الباطلة!! بتاع المحل قال **** يصلح البينكم!! وقفل عليه الكافي!! شكلو م حيشيل من حساام قروش!! وجيت ماشة!! خليتو واقف!! ولا قادر يوقفني ولا يحصلني ولا يمشي يخليني!! انا م بنكر اني غلطت!! بس هو عالج الغلط بغلط اكبر منو واتهمني اتهام صعب ماف بت بتستحملو!! كلو ولا الشرف؟! دموعي جفو!! وقلت **** اربط ع قلبي وصبرني!! لانو بالجد م متخيلة حياتي بدون حسام حبيبي حتكون كيف!!؟ م رجعت البيت؟؟! ركبت المواصلات وقلت لازم اقابل عبدالله الكلب دا واعرف اتصرف معاي كدا لشنو!!؟ والطريق بقي لي طويل خلاص وانا متوترة ولمن رجولي بتهزو وقلبي قابضني!!؟ وغبينتي دي كلها ح افشها فيهو!!؟ فعلا وصلت ومن الاتستعجال نسيت ادفع لبتاع المواصلات!! بنادي فيني وانا ماااشة!!؟ وشكلو عفاهم لي ولا ف راكب دفع لي **** يعلم!!؟ طلعت ع المجلة وعمو السر بتاع الكتبة ناداني وسلم علي ولا رديت السلام وجريت بالسلالم جري!!؟ لقيتو قاعد براهو وكان سارح بعيد!! لم شافني قام ملهوف وجا علي متوتر وقال هيوم حمدلله ع السلامة!! مالك متاخرة وقافلة….وقبل م يتم كلامو كشطو كف لمن نظارتو وقعت من وجهه!!
نواصل بعدين
يتبع ………

الجزء الثامن عشر من رواية معذبتي​

لشنو دائماً بنتخذل من اقرب الناس لقوبنا!! لشنو م بنشوف الخبث الفي عيونهم الا بعد فوات الاوان!!؟ لشنو بنجرح بعض؟؟! هي الدنيا دي مستاهلة يعني!! علشان نمشي لربنا بجبال من الذنوب!! الموضوع بستاهل ف رايكم!!؟
اتخلع وبقي يعاين لي!! وقال انا ي هيوم!! وتاني كنت ح اديهو واحد!! بس ثبت يدي وقال لي اهدي ف شنو!!؟ سحبت يدي منو بقوة!! وقلت ابعد مني ي كلب!!؟ ليش انا ي عبدالله!! اذيتك ف شنو انا!! غير اني بادلتك الاحترام!!؟ حصل انا قليت ادبي معاك ولا اتجاوزت حدودي!! حصل انا عشمتك فيني!! وانهرت وقعدت ف الارض!! قرب علي دفرتو مني!!؟ وبقي يتراجف!!؟ وبيعتذر!! وقال لي و**** انا غلطان وف لحظة طيش وتهور اتصلت ع حساام!! م كنت متخيل انو لو عرف ح اسبب ليكم مشكلة!!؟ انا ابتسمت وطلعت ليه الرسومات من شنطتي وقلت ليه دا شنو ي م راجل!!؟ دا شنو ي عفِن!! بعد شافهم لم ختى يدينو ف راسو!! وادني ضهرو!! وانا بقيت ابكي!! وقلت ليه دي هيوم اختك وصديقتك!! بتكتب فيها قرف زي دا!! وكمان جبت الجرأة والوقاحة دي من وين علشان ترسمني كدا!!؟ منو اداك الحق!!؟ وانفعلت وغاظني اكتر سكاتو!!؟ قمت ع حيلي ومسكتو من قميصو وبشاكل فيه!! وبسأل فيه!! بترضاه ف اختك!! مش قلت لي انا اخوك وسندك!! دي خوتك ي كلب!!؟ وهو واقف بدون حراك!! وانا بخبط من طرف وانفعت فيه شدييييد…صدقوني لمن فترت من الضرب وهو لا رفع عينو ولا يدو علشان يمنعني!!؟ وبقول لي اسف!! حقك!! اعملي اي شيء بس اهدي!! بروده دمو بتستفزني اكتر!!؟ قلت ليه انت اوسخ من انو يدي تترفع عليك!!؟ والكلام معاك م حيجيب نتيجة لانك مريض!!؟ بس **** ينتقم منك وشيل حقي منك!!؟ وخطفت شنطتي من الارض!! لم جيت طالعة مسكني من يدي!! حاولت افك منو بس م قدرت ولاويتو وقربت اصرخ الم فينا الناس!! وجايطة فيهو!! جراني ع الكرسي ودفرني!! لمن اتخبطت ف الكنبة!!؟ قال لي لازم احكي معاك!!؟ جيت قايمة ودفرتو!! وقربت اقوم جارية!! بس قال لي م عايزة تعرفي السبب!!؟ اديني فرصة اشرح ليك!! انا م طايقة اشوف ولا اسمع صوتو!!؟ بس لازم اعرف لشنو يتصرف معاي بالحقارة دي!!؟ دمعتي جات نازلة!!؟ وقلت ليه قطعت كل شيء بيربطنا وحتي سماع صوتك بعتبرو خطيئة لي!!؟ وجيت ماشة!! تابعني وبقول انا بحبك ي هيام *** يعلم بحبك!!؟ قلبي وجعني وقلت ليه البحب بيجي بالباب!! م بيتداعر بصور محبوبو!! قال لي افهميني م خليتي لي طريقة!! وبتصديني كل مرة!! بكيت وعترت ف السلم قربت اقع من شدة م عيوني مطششة!! وقرب علي بس ابيت اخليه يقرب علي!! ونزلت وهو مسرع وراي!!؟ قال لي صدقيني م بيدي انا مجنون بيك!!؟ والشيء الوحيد البصبرني ع شوفتك كل يوم هو رسوماتي وكلماتي!! بس صدقيني م كنت ح اصرح ليك بمشاعري!! ولا حغرض نفسي عليك!!؟ زعلت منو شديد وقلت لكن تتصل ع حسااام وتفتن بيناتنا!!؟ عيونو دمعو وقال لي دي غلطة عمري!!؟ غيرتي منو عمت ع عيوني!!؟ ولم قلتي م خبرتيهو انك معاي حبيت اشوفو غضبان وغيران!!؟ بس صدقيني م قصدي اسبب خلاف بيناتكم!!؟ وانا بكيت وطلعت مهروله!! وبقول لنفسي علشان كدا كان بأخر فينا ف القسم علشان م نطلع لحدي م حسام يجي!!؟ بالجد انا كنت غبية!! وع نياتي!!؟ وخليتو واقف وبتكلم بس من شدة واقع الصدمة م عارفة بقول ف شنو!!؟ ودا كان اخر لي يوم ف المجلة!!؟ رجعت البيت!! وبعدا لازم اكلم ناس البيت!! لقيت ابوي ف الصالون من شاني!! قطع تسبيحو وختى السبحة!؟ وقال لي خير مالك!!؟ كان وشي ورمان ومحمر من شدة البكاء!! حضنت ابوي!! وبدون احس بقيت ابكي واحكي ليهو الحصل!!؟ واتهامات حسااام وم خليت ليه شيء!!؟ وقرب يغمى علي من شدة الصغط النفسي البمر بيه!! وابوي بيسمع فيني وم قاطني نهائي ولا حتى استوقفني ف حاجة لمن طلعت كل الجواي وارتحت!! ومنتظرة ردة فعلو وبعاين ليه وم قدرت احلل نظراتو!!؟ ربت ع كتفي وقال انا واثق انو بتي م بتعمل شيء غلط ولا بتنزل راسي ف يوم!!؟ خليك واثقة ف نفسك وازمة وحتعدي!! وابوك معاك م تخافي!! تاني حصنتو وبكيت!!؟ واتحسرت ع حسااام!! ليش م وثق فيني!! امي جات داخلة ع ابوي علشان تنادية الفطور!!؟ واتخلعت لم شافتني!!؟ وجات جارية ف شنو؟؟! ابوي قال ليها موضوع عادي بس بتك جبانة!!؟ وابوي قال لي قومي غسلي وشك الشين دا وراح الفطور!! امك عاملاه بحب!!؟ وضحك!! امي شوية اطمنت لم شافت ضحكة ابوي!!؟ وابوي خارجني علشان يشرح لامي الحصل!!؟ طلعت ومشيت ع غرفتي!! م عندي نفس اقلع ملابسي!! بس لازم اجامل ناس امي ف الاكل لاني م متعودة ع كسر الخواطر!! وكمان م اشيلهم همي كفاية انهم شايفنو ف عيوني!!؟ جاملتهم شوية!! وتلاتة لهمات م زدتهم!! وجيت قايمة!! والشيء الكويس م وقفوني بالجد م كنت حقدر اجادلهم!!؟ طلعت ع غرفتي وقبل م اقعد ف سريري اتصلت علي ريم!!؟ ومن قريت الاسم ساي دموعي نزلو!!؟ العبرة خنقتني!! ومن قلت الوو!! انهالت علي بوابل من الاسئلة!!؟ صحي فسختي خطوبتك!!؟ انتي متخلفة!! شفع انتو!!؟ المشاكل دي م طبيعية م بتقدرو تتجاوزوها!!؟ وم ادتني فرصة ارد!!؟ لم خلصت قالت الووو بنهرة كدة!! افتكرتني بعدت التلفون!!؟ قلت ليها معاك!!؟ قالت لي الحصل شنو!!؟ قلت ليها اخوك م وراك!!؟ قالت لي بطلي سخف!! انا سألتك انتي؟ وبحرقة حكيت ليها الحصل!!؟ بقت تبكي معاي!! وقالت لي كنت متأكدة انو ف سوء تفاهم وواثقة ف انك م بتغدري باخوى!!؟ قلبي وجعني اكتر!!؟ وبكيت بصوت مسموع!! وقلت ليها يعني مصدقاني!!؟ سكتت لوهلة! وقالت لي اكيد!! بقيت اتنهف واشيل نفسي بصعوبة وقلت ليها طيب اخوك لشنو م مصدقني!!؟ قالت لي حسااام متهور واحمق!!؟ بس هو م الملام الوحيد!! قلت ليها بإنفعال م تبرري ليه!!؟ قالت لي جادة معاك!!؟ قالت لي اباذر جاهو امس العصر ف البيت وداهو اسكيتش!! ع حد علمي انو فيهو صور ليك!!؟لكن حسام م خلاني اشوفهم!!؟ وقال ليه انك وعبدالله قبضوكم ف بيت دعارة!! وقريبو فلان معاكم!! بس ف زول ف الحكومة جا ضمنكم!! كان يقصد أ/محجوب!! شوفو الافترى والتلفيق دا كيف!!؟ انا بقيت اتشهد واسمع فيها!!؟ وقلت ليها بس حساام م قال لي كدا ولا سألني من الموضوع دا!!؟ قالت لي لانو بحبكومستحيل يصدق فيك شيء زي دا!! انفعت وقلت ليها بس صدق اني ع علاقة بعبدالله!! وبسبب رسومات انا *** يسألني م حصل شفتها!!؟ قالت انتي شكلك م عارفة!! قلت ليها شنو؟! قالت لي ف الاول بصراحة لم شاف الاسكيتش اتنرفز وجاط!! وانا قربت اجري عليه!! بس هم م كان عارفين اني بسترق السمع!!؟ المهم اتصل ع عبدالله ف الوقت داك وف وجود اباذر!!؟ قال ليه يعني انت الشلت دفتري!! واكيد شفت رسوماتي!! انا سمعت الكلام دا بفضل اباذر لانو شمار اكتر مني!! وفتح الاسبيكر!!؟ وعبدالله الصراحة اتبجح مع حسام ف الكلام!! ولم جاطو شديد مع بعض وبقيت م بفرز كلامهم من بعض!!؟ لحدي م حسااام قال ليه البيربطك شنو بخطيبتي!! والتافة داك قال ليه رابط اقوى من البيناتكم وانها غلطت واتسرعت بالخطوبة منك وانها بتحبني!!؟ انا فتحت خشمي وبسمع فيها!!؟ قلت ليها عبدالله م بقول كدا!!؟ قالت لي سمعتو باضاني ماف زول قال لي!!؟ انا بكيت!!؟ قلت ليها عذرك اقبح من الذنب!!؟ يعني اخوك صدق عبدالله وكذبني انا!!؟ وكمان م اداني فرصة ادافع عن نفسي!! قالت لي انتي لانك كذبتي ف مشيتك مع الوسخ داك وموضوع القسم!! بقي الموضوع م ف صالحك!! وخلتي الشك ف راسو!! قلت ليها يعني بتوافقيهو!! قالت لي ابدأً و**** بس بوريك انو كان مضغوط من اباذر ومن عبدالله ومن تخبايتك عنو!! بس اسسه م حصل شيء!! **** يصلح بيناتكم!! والخلاف دا ينتهي وعلاقتكم تقوى اكتر!! اتنهدت بصعوبة وقلت ليها حساام قطع حبل العشم بيناتنا!! وم خلي لي اي طريق يجمعنا سوا!!! اتكلمت معاي كتيير بس صدقوني كلامها م حيجيب نتيجة!! ولم سألتها اباذر لقى الاسكيتش وين!!؟ قالت لم ضمن صاحبو المع الجماعة بتوع الشقة المشبوها!! شافني وعرف اني خطيبة حسام لانو لاقني معاه كذا مره!!؟ وسأل عن سبب تواجدي!! وبعد م عرف الحقيقة مشي زورها لحسااام وسحب الاسكيتش وم كان عارف الفيهو!!؟ بعد شاف الرسومات!! لو صحي راجل كان شرطهم ولا حرقهم ولا سلمني ليهم!! بس الخسيس شالهم ووداهم لحسام!! انا القاها من منو ولا منو؟! اخر تلاتة شهور م مشيت المجلة!! والاساتذة **** يديهم الصحة والعافية م قصرو معاي وادوني شهادة المواظبة!! وم بلغو المنسقية اني غايبة الفترة دي كلها!! وشلت خلو الطرف من الخدمة!!؟ م بسأل عن زفت عبدالله ولا عايزه حاجة تزكرني بيه!! بس مرات ريان بتقول مرات يجي وعشرة يوم يغيب!! وحتى الاساتذة معاملتهم معاه اتغيرت!!؟ وبالصدفة يقدم لنفس الجريدة الانا عايزاها!!؟ يمكن يكون سمعني زمان اني عايزة اقدم فيها!!؟ المهم اتلاقيت معاه ف الجريدة وانتو عارفين اتلاقينا كيف!!؟ ومن يومها اخبار حسااام انا قاطعاها!! وحاول يخش علي كذا مره!! بس انا بصدو وحتى اتكلم مع ابوي وناس بيتنا!! بس وروه انو ماف زول بيجبرني ع شيء انا م عايزة!!؟ م بعرف اذا عرف الحقيقة ولا حتى عرفها من منو!!؟ ولا م قدر ينساني وعايز يواصل معاي رغم الشكوك والخلافات القديمة ديك م عارفة!! لحدي م جا موضوع الصورة الفي المطعم وبرضو بسبب اباذر!! وم بعرف تاني حيحصل شنو!!؟ بس كل البقدر اقولو **** يديه الصحة والعافية ويقومو بالسلامة لاهلو وناسو!!؟ وباكر لو امي وافقت ح امشي ازورو!! سمعت انو ماشي بتعافي!! بس لازم عيني تطمئن برضو…!

يتبع ……..

الجزء التاسع عشر من رواية معذبتي​

ف سؤال بشغل بالي دائماً؟!! هل الحب حظ!؟ ام حسن اختيار!! من ناحيتي انا **** رزقني بحساام حتى وان قصتنا م انكتب ليها تستمر!! صااح دي اكتر فترة انا اتألمت فيها وزرفت فيها كل دموعي!! واتوجعت شديد…بس اللحظات العشتها معاه م بتتوصف! ولا بتتقاس!! فبعتبر انو حبي كان حظ!! بس حسااام قال لي انا اخترتك من دون البنات!!؟ ف اختلط الحابل بالنابل!!؟ وم قدرت اصل لاجابة مقنعة ف جاوبو انتو؟! من وجهة نظركم الحب شنو؟! حظ ام اخيار!؟ ولا شيء اخر!!! ومهما اتعددت الاجابات!! مربط الفرس انو احساس حلوووو وم بتهمنا مسمياتو ولا طريقتو البيدخل بيها حياتنا!! قعدت جمعة وسبت ف البيت وم استثمرت زمني!! وفضلت احكي ليكم قصة حياتي!! وهداك سبت الغسيل يقنت!!؟ والبيت مقلوب وداخلين ع رمضان!! وامي اهم حاجة عندها بعد الحلو مر!! انو تكون العدة مغسلة وملمعة!! وشغالة تهرج فينا!! انتي عاملة لي ممتحنة!! تقصد امل!! وانتي ماسكة لي تلفونك٢٤ساعة!! عرفتوها تقصد منو!!؟ المهم ضحكنا وهزرنا معاها وقلنا كلو حنعمل ليه قومة زي حقت السودان!! وبنجيهو ليك!!؟ ابتسمت ومشت خلتنا ف نفس الهيئة!! م قمنا! سألت امل لو ريت امي اني ماشة ازور حساام حترضى!! ختت الشيت من يدها وعاينت لي مسااافة!! وم قدرت افسر نظرتها بس كانت بدل ع التعجب تقريباً!! قلت ليها مالك!!؟ قالت لي بنهرة كدا!! انتي المالك!! عايزه شنو!؟ استغربت وقلت ليها ف شنو؟! قالت لي م تتغابي!!؟ انتي مووش انفصلتي عن حساام!! ونحنا حنسناك وهو اترجاك علشان ترجعي ليه!! طيب مالك غيرتي رايك وكل شوية جايبة سيرة ودالناس!! ارسي ليك ع بر!! واقعدي مع نفسك وشوفي انتي عايزة شنو؟! وهل فعلا انتي مهتمة لامرو!!؟ ولا شفقاانة عليه!!؟ زعلت وقلت ليها ابدا لشنو اشفق عليه!!؟ انا بس متعاطفة معاه!! بس دا م يعني انو ارجع ليه تاني بعد م اهاني وشكك ف اخلاقي!!؟ قالت لي يبقي تكسري حنك المشية وتطمني عليه بالتلفون بسسس!! اتنهدت وم رديت وهي مسكت شيتها وختت قلبها ف شفاها وانشغلت عني!!؟ وبقيت افكر ف كلامها!! انا عايزة شنو!!؟ وبعداك نمت!! م صحيت للعصر!! صليت وجهزت مع امي الغدا!! وغسلت لي غيار ليوم باكر!! لانو ملابسي كللللها وسخانة!! وكالعادة محاضرة امي إبتدت!! وشغالة لي اهااا سليمة رجعت لقديمها!! ومتمنية يوم تجي طالعة تتناولي الملابس مكوية من الدولاب!! ضحكت وشريت ملابسي!! انتو صحي ف بنات دولابهم بكون مرتب دائماً وحتى ملابس البيت مكوية!!؟ المهم انا م من ديييل!! رمتاليه ع قول امي!!؟ ابوي قال لي بكرة شغالة وين!! قلت ليه م عارفة!! ح امشي الجريدة اول وبعداك ح اشوف الشغل شنو؟! قال لي موفقة!! شربنا شاي المغرب مع بعض واتونسنا واتصلنا ع ابوحميد اخوي!! وبعد شاف جرسة امي وشوقها ليه!! قال حياخد اجازة وحيجي عيد رمضان!! وامي لمن زغرتت!! وبعداك كل واحد مشى ع محل نومو!! كنت بقرا ف كتاب والنعاس بحاول يتملكني!! وانا بغالب فيه!! لانو الموضوع شداني وحبيت اخلصو!! بس تلفوني رنه!! م قادرة اقوم من سريري!! وحنست امل علشان تناولني ليه كان ف الشحن!! لم قالت لي ريم!! قعدت ف نص السرير!! والنعسة محل طارت م بعرفها!!؟ امل حمرت لي وفتحت الخط وجدعت لي فوني ف السرير!! ابتسمت ورديت بلهفة!! سلمنا ع بعض واعتذرت اذا ازعجتني لانو الوقت اتأخر!! هزرت معاها وضحكتها!! وسألتها جابت الادب دا من وين!! دي م طباعها!! سكتت شوية!! وقالت لي غريبة!! قلت م غريب إلا الشيطان مالك!!؟ قالت لي م سألتي عنو!!؟ ابتسمت!! كنت متعمدة اني م اسأل ومنتظرها بفارق الصبر تطمئني عليه!! قلت ليها دعواتنا معاه واكيد **** حيجبر بخاطرنا ويقومو ليكم بالسلامة!!؟ قالت لي اشمعنى ليكم!! وانتي م معانا!! ابتسمت وقلت ليها انتي اختي وصحبتي واخوك اكييييد بتمنى **** يفرح قلبك بيه وم تشوفي فيه شر!!؟ قالت لي م تستهبلي انا بعرفك اكتر من نفسي!! انا ضحكت!! قالت لي ماف زول بيدخل ف علم الغيب!! بس انا متأكدة انك وحسام خلقتو لبعض!! واحساسي عمرو م خاب!! قلت ليها من الاخر كدا!! متصلة علشان مشتاقة لي!! ولا عايزة تفتحي مواضيع تانية!!؟ ضحكت وقالت الاثنين و****!! ابتسمت وقلت انا نعسانة باكر عندي شغل!! برجع ليك مرة تانية ي السمحة!! نهرتني وقالت افتري ع اخوي م علي انا!! وبقت تنبز وتردح لي وانا اضحك!! دردشت معاي وقالت لي استخيري وسامحي و**** بسامح نحنا نطلع شنو؟ امام ****!! وكلام كتيير…وختمت محادثتنا ب جملة ححمتني النوم وصدها من اضاني م راح!! قالت لي حسااام بسأل عنك وقال بكرة لو م جيتي شوفتيهو حيطلع يجيك هو!! انا اتخلعت!! لاني متأكدة من انو جادي وحيعملها!! قلت ليها هو كويس يعني وبيقدر يتحرك!! قالت لي من السرير للحمام إلا يسندو خالد!! لكن اخوي بعرفو!! اعند منك!!؟ ممكن يزحف ف الارض من المستشفي لبيتكم!! ابتسمت وعيونو لمعو!! اتنهدت وقلت ليها باكر مشغولة بس لو لقيت طريقة ح اجي!! قالت لي لازم لازم تجي ي هيوم!! م حبيت كلمة هيوم لانو كان بقولها عبدالله!! بس مشيتها!! وقفلت منها!! وبسأل ف نفسي هل ح اقدر امشي!! وبصفتي شنو وعلشان منو!!؟ واقول شنو؟ بس متأكدة انو روعة مستحيل تخليه يطلع من المستشفي!! وكمان علشان يزورني؟؟! ونمت ع كدا!! اليوم التاني صحيت فترانة!! وبعد صراع مع نفسي حتى قدرت اقوم اصلي الصبح!! وبعداك النوم طار!!عملت ليهم الشاي وكويت ملابسي لانو الكهرباء م مضمونة وبديت انضف!! لانو امل ممتحنة وبتطلع بدري فما ظريفة اخليها تنظف ولا تغسل عدة من الصباح!! خلصت والزمن ضاع علي!! كان سبعة ونص صباحا!! بس لحدي م اتحمم واجهز وبالاضافة لوقفة المواصلات ح اصل الشغل قريب تسعة ونص!! وفعلا دا الحصل!! وصلت الجريدة ولاقيت عمو حسين الخفير!! سلم علي بأبتسامة عريضة وقال لي بتي الكسلانة جات!! ضحكت وسلمت عليه بحضن الا كم سنت!!؟ وسألني عن ناس البيت…وقال لي م ااخرك اكتر!! ومشي يفتح لرئيس التحرير الباب علشان يدخل عربيتو!!؟ وانا دخلت!! مروة لاقيتها ف وشي!! سلمت علي بلهفة وحضنتني عليها شدييييد وقالت لي ماشاءالله وشك منور عملتي شنو؟؟! وعيني باردة مالك انيقةكده الليله!! قلت ليها حبيت اغير شوية!! قالت بس ي زولة خيرا م فعلتي!! انتي لسسسه شابة وصحفية ولازم تكوني انيقة ومهندمة!! دردشت معاها ومعطتتني بالكلام لحدي م جا علينا عبدالله ولقيت لي حجة!! استأذنتها وجيت ماشة!! لاقتني سكرتيره أ/مرتضي!! قالت لي الاستاذ عايزك!!؟ ابتسمت وصبحت عليها!! واعتذرت قالت لي معليش!! مشغوله و**** م انتبهت وسلمت علي وصبحت تاني!! وربت ع كتفها وقلت عادي ولا يهمك!! ومشينا مع بعض ع المكتب!! طرقت ع الباب ودخلت!! كان متحكر ف كرسيهو رفع راسو!! وبأبتسامتو الساحرة ديك قال لي اهليييين اتفضلي ي استاذة!! دخلت وسلمت وقعدت وبإبتسامة سالني عن صحتي وناس البيت!! وقال لي ممازح تغيبي ع كيفك وتجي ع كيغك!! واليوم التجي تجي متأخرة!! ضحكت واعتذرت!! قال لي اتعودنا عليكم ي جيل الزمن!! كان قدامو تقارير تقريبا!! مدا لي واحد وقال لي الشغل كتيييير الفاتك بس الجاي اكتر شدي حيلك!! قلت ليه ان شاءالله!! قال لي دا تقرير من المفترض تكتبيهو مع عبدالله بس بسبب غيابك سلمتو لنادر!! ودا متدرب معانا!! قال لي بس للاسف جاط الشغل!! ودا شيء طبيعي!! كلنا بنغلط حتى بنتعلم!! بس علشان نتعلم لازم يكون ف طموح وصبر واهم شيء الرغبة ف الشيء البنعملو!! وبكدا بننجح بأمتياز!! قال لي شيليهو ونقحيهو!! وم اوصيك لازم يطلع بطريقة كويسة!! قلت ليه ان شاءالله!! قلت ليه تاني ف شيء!! قال لي م تستعجلي كلو بيجي بوقتو!! والشغل مردوم ردم!! وبقينا نضحك!! جيت قايمة!! قال لي لازم تشتغليهو اليوم وسلميهو لمي!! دي السكرتيرة!! علشان يتراجع ويخش الطباعة اليوم!! قلت ليه تمام!! وطلعت منو مشيت ع المكتب!! كان شيه هادئ!! م زي العادة!! قعدت وبقيت اقراء ف التقرير!! مره اضحك ومرة اتبسم!! بالجد اغلاطو كتيرة!! منها الاملائية ومنها حشوه كلام ساي م حيفيد القارئ ولا حيشدو لمتابعة المقال!! وظاهر عليه شغل مبتدئ!! بس الحمد*** انا مبتدئة بس م زيو!! وبقرا وبدون الملاحظات ف دفتر تابع لي!! وفجأة احس بزول واقف ف راسي!! لمن رفعت عيوني القاهو عبدالله!! قال لي هيوم كيفك!! م رديت السلام!! قال لي بالجد اشتقت للكلام معاك!! لضحكاتك الساخرة!! ونظرتك الحادة!!ولطيبة قلبك! وكلماتك العفوية!!؟ بالجد انا فقد كل تفاصيلك!! جيت قايمة!! م عايزة مشاكل قدام الناس!! لمصيبتو مسكني من يدي!!؟ دفرتو لمن اتضرب مع زاوية الشباك!! وقلت ليه بحذرك تمد يدك علي ولو بالغلط!! اياك تتكلم معاي!! كنت منفعلة شديد ولفتت انظار ناس مروة وبعض الزملاء!! بس صدقوني كان اخر همي نظرتهم لي!!؟ وقلت ايااااك تلمسني تاني!!؟وكنت منتظراه يفتح خشمو بس ولا يرد علي علشان اوريهو مكانتو والزمو حدو!! بس سكت!! وجا ماشي اتلفت علي وقال لي بصوت خافت م شفتي انا بعمل فيك شنو ف خيالي واحلامي!! وابتسم!! وانا من شدة الغضب جدعتو بالدفتر الفي يدي ولسوء حظي جلا منو واستقر ف وجه استاذ مرتضي!!؟

نواصل بعدين..
يتبع ……….

الجزء العشرون من رواية معذبتي​

م عارفة المشاكل غرامها معاي شنو؟؟! قدر م ابعد عنها القي مغنطيسها بجذبني!!؟ نسيت الماضي وحاولت ابدى صفحة جديدة!! بس عبدالله وامثالو م عايزين يخلوني ف حالي!! انا لم شفت الدفتر استقر وين؟! جسمي اصابو شلل!! وبقيت فاتحة خشمي ودماغي رافض اسيعاب الموقف!!؟ أ/مرتضي بانت ع وشو ملامح الغضب!! بس م قال شيء!! ودا الشيء الخوفني اكتر!! واصل طريقو وخلانا كلنا مصدومين!! قعدت ف كرسي وبقيت اتنفس بصعوبة!! وبفكر كيف اعتذر منو؟! وهل حيقبل اعتذاري ولا لا!!؟ وبقيت ادعي ع عبدالله!! وهو زاتو شكلو احرج!! بس الغلطة غلطتي!! انا الجدعت الدفتر!! جاتني مروة مستغربة!! قالت لي دا شنو التصرف الطفولي دا!! ناسين انكم ف محل عمل!! وكمان تضربي المدير!! وخوفتني زيادة!! وقلت الليلة مفصولة مفصولة!!؟ اصلا انا ف الاول لم شفت عبدالله وعرفت انو اتعين معاي! طوالي فكرت ف الاستقالة!! بس بعداك راجعت نفسي!! لشنو اهرب منو!!؟ هو الغلط ف حقي!! هو المفترض يكون مكسوف يعاين لي!! بس شوفو وقاحتو!! وصلت لوين؟ بس انا اقوى من اني اتنازل عن تحقيق هدفي بسبب واحد تافه زي دا!! والزملاء بعاينو لي وبتهامسو!! وانا نسيت التقرير والعمل الكلفني بيه الاستاذ وبفكر ف المصيبة الحصلت دي!! اتمالكت نفسي واتوكلت ع رب العالمين! وقمت مشيت عليه!! كالعادة طرقت الباب ودخلت بس للاسف لم عاين لي م شفت الابتسامة الزمان ديك!! بل كان الغضب متملكه!! ولمن تغطيبات جبينو ظهرت لم شافني!! وم قال لي اتفضلي!! دخلت ووقفت قدامو!! واعتذرت!! ووريتو انو كان حادث عرضي غير مقصود!!؟ جدع القلم من يدو!! وقال لي زوديها ي استاذة!! انا قاطعتو وقلت و**** م كنت اقصد!! قال لي انا م بتكلم عن الموقف البايخ الغير متوقع منك داك!!؟ انا اقصد تصرفاتك انتي وعبدالله!! انتو ف مكان محترم وجريدة محترمة!!؟ فتصرفات الاطفال دي تعملوها ف الروضة ف الشارع ف اي حتة بس هنا لا!!؟ انا جددت اعتذاري وقلت تاني م حتحصل بس سامحني ع الخبطة غير المقصودة؟؟! قال لي فالنفترض اني سامحتك!! المرة الجاية حتضربي المدير العام!! ولا الزوار!!! دا شنو التصرف المشين دا؟؟! انا بيني وبين نفسي قلت خلاص عبدالله حيتسبب ف طردي!!؟ والاستاذ كان جادي شديييد!!؟ وقبل م يتم كلامو عبدالله فتح الباب!! وجا علينا!! وقف جنبي زحيت منو!!؟ والاستاذ بعاين!! اعتذر منو؟ ووراه انو هو السبب وانو استفزاني بالكلام وتصرفي كان طبيعي!! بس ف المكان الغلط والتوقيت الغلط وحضرتك اتضربت غلط!!؟ واتجادل معاه بس عبدالله عندو اسلوب خاص!! بيقدر يقنع اياً كان!! بس الغريبة اسلوبو م نجح معاي!! قد يكون السبب انو حسااام كان ممتلك قلبي ف وقتها!! شوية كدا والاستاذ هدى!! وقال تمام!! ح اديكم فرصة بس بشرط!! عبدالله قال موافق!! قلت ليه شرطك شنو استاذ!! عاين لي وقال تحلو الخلاف البيناتكم دا!! وتفصلو مشاكلكم الشخصية عن العمل!! قلت موفقة بس بشرط!! الاستاذ وعبدالله عاينو لي بإستغراب!! أ/مرتضي ابتسم مستهتر!! وقال كمان بتضعي شروط؟! اتنهدت وقلت اذا فصلت عملي عن عبدالله يكون افضل واوعدك م تشوف مني شيء يسيء للجريدة!! عبدالله ابتسم!! أ/مرتضي قال لي انا م عارف سبب خلافكم شنو!!؟ بس شكلو عميق شديد!! ودا م بهمني اعرفو!! بس حاولو اتفاهمو وم تخلطو بين الشغل وعواطفكم!! وانا جمعتكم ف تيم واحد لانكم مناسبين لبعض شدييييد وبتكملو بعض ف الافكار!!! فثنائيتكم كانت مثالية!! وحتضيف ليكم الكتير ف مسيرتكم المهنية!! بس طالما انو قربكم لبعض بسبب ليكم ازعاج وقد يسبب لينا مشاكل ف الشغل! زي اللبعة القبيل!!؟ ح اضطر افصلكم عن بعض!!؟ انا من ضحكت!! عبدالله كان هادئ وم ابدى اي رده فعل!! وحذرنا تاني عن الوقوع ف نفس الغلط!! وادانا انذار مكتوب لو اعدنا الكره حنطرد من الجريدة!! وقرب يعمل خصم من المرتب بس شكلو اتراجع!! والزملاء الصحفين قالو لينا احمدو ربكم كان مرتضي م عباس!! و**** كان حيفتح فيكم بلاغ جنائي تحت المادة٣٩اذى جسيم!! بس انتو محظوظين!! لانو تصرفكم يستحق الطرد!! طلعت اشم هواء نضيف لاني مخنوقة!! واتزكرت التقرير الما نقحتو!! وبقيت افتش فيه م عارفة ختيتو وين!!؟ جاني عبدالله من بعيد قال لي انا م محتاح اكون معاك ف فريق واحد علشان اكون جنبك!! كافية اني شايفك!! وضحكتك وعطرك بيتكفلو بالباقي!! انا الولد دا عايز يجلطني!! اعمل ليه شنو السغيل دا!!؟ ولو م كان دخل سريع كنت ح اشترو تاني بطوبة المره دي!!؟ قفلها معاي!! مشيت للسرير بتاع عمو حسين الخفير! وقعدت والهواء هابي ولمن نعست!! وكتبت تقريري ووديتو لمي!! وطلعت…م عندي اخلاق اتكلم مع زول ولا اتونس!! وقلت ارجع بيتنا!! وانا واقفة ومنتظرة المواصلات!! جات وقفت قصادي عربية سوداء مظللة!! بيني وبين نفسي قلت خلاص اخطفوني وتمو الناقصة!! اصلا اليوم دا م حيعدي ع خير!!؟ العربية واقفة قدامي لا عايزة تمشي ولا ف زول طلع منها!! لمن لفتت انظار الناس!! زحيت منها بعيد ووقفت لي جنب مرا كبيييرة!! قالت لي واقفة ساعة لا ف مواصلات ولا ف زول عبرني وقال اكسب ف الحاجة دي اجر!! وانتي دقائق م تميتيها شوفي وقفت ليك شنو!!؟ الرجال ديل بقو خايبين خلاص!!؟ انا ضحكت وقلت م نظلم الزول يمكن يكون بركن غلط ولا مضيع طريقو!! لانو ماف زول طلع منها ولا اتكلم!! قالت لي يمكن يكون سايقها شيطان ولا بعاتي!! وانا بقيت اضحك وقلت الخالة دي جابتها وارمة!! وبقينا نتونس!! لحدي م جات مواصلاتنا وركبنا!!؟ وقبل م اصل البيت اتصلت علي ريم!! ابتسمت ورديت!! قلت ليها منتظرني ف البيت ولا شنو!!؟ ضحكت وقالت لي البترولي عامل شغل لكن!!؟ انا اتخلعت وبقيت اتلفت!! افتكرتها معاي ف المواصلات!!؟ قالت لي م تتهجمي ي طيرة!! قلت ليها شفتيني وين!!؟ قالت لي كنا جنبك قبل شوية!! يخسي عليك م حسيتي ب حسام جنبك!!؟ انا بدون احس صدقوني دموعي جات نازلة!! قلت ليها وانا بتأتي!! حسام كان هنا جنبي!! قالت لي العربية الكانت واقفة جنبك!! الباب الخلفي القصادك ف يد بجوه القزاز كانت بتتحسس انعكاسك!!؟ العبرة خنقتني!! قلت ليها لشنو خليتوه يطلع من المستشفي!! احتمال يتعب!!قالت لي مصر يشوفك وماف زول بيقدر يمنعو!!؟ قلت ليك تعالي وابيتي!! قلت ليها طيب لشنو م اتكلم معاي!! ولا ع الاقل انتي تنزلي وتتكلمي معاي!! قالت لي هو اصر انو م نزعجك وخايف شوفتك ليه تضايقك!! فما حبى يزعلك!!؟ شفتو الفرق بينو وبين عبدالله!! بكيت واتنهدت وقلت ليها جنبك!!؟ قالت لي اديك ليه!! بخلعة قلت ليها لا!! خلي بجيهو زيارة!! قالت لي كلنا منتظرنك ع احر من الجمر!! رجعت بيتنا وانا بتخيل ف شكلو وهو بعاين لي!! واشيل واعاين لنفسي بالمرايا!! كنت كيف؟ شافني وانا زعلانة ومكشرة!!؟ وتاني اراجع ف نفسي واقول هيام **** يهديك خلي ودالناس ف حالو!! وكملي حياتك!!؟ لقيت امل مبسوطة لانو اخر امتحان كان حلو شديد معاها!! حكيت ليها عن الحصل والبت تقوم فوق وتهرج ولمن تفرك يدبها وتقول لي انتي مسكينة خلي لي عبدالله دا انا بأدبو ليك!! بكرة بمشي معاك الشغل!!؟ ونبزتو كويس!! وقدر م سألتني اني ظاهر علي مبسوطة ف شنو!!؟ انا بقيت اخبي ف ابتسامتي!! وبقول ليها ماف شيء!! عرفتني بكذب بس م ضغطت علي!! لس انا م عارفة شنو فرحانة!! ولشنو م وريتها انو حسام بالرغم من حالتو الصحية جا يشوفني!! لشنو كل م اجيب سيرتو قلبي يضرب وشعر جسمي يقوم!! م تقولو لي اني غلطت الغلطة الزمان ديك!!!؟ لا لا مستحيييل ارجع احبو!! م تفكرو كتير ف الموضوع!! نحنا انتهينا!! اخدت لي نومة عمييييقة وقمت مرتاحة!! واكلت بنهم!! واليوم انتهي ع كدا!! واليوم التاني من النجمة قمت وجهزت وقلت لازم ارد الزيارة!! هو استرق النظر!! وم قدر يواجهني بس انا بمشي ليه جووووه غرفتو وبخت عيني جوة عينو واليحصل يحصل!!؟ اتصلت ع ريم قلت ليها جاية عليكم!! صعبت علي الحكاية وقالت لي حسااام كره المستشفي واصر انو يطلع وانهم الان ف البيت!!؟ وكيف انا امشي ليه ف البيت!! اتراجعت ومشيت شغلي!! ومن هناك جاتني ريم ف الجريدة وفاجأتني وقالت لي عارفاك م بتجي بيتنا براك!! بس مشيتك معاي حتقويك!! قلت ليها بإستغراب حتستفيدي شنو من دا كلو!!؟ قالت لي شوفة اخوي مبسوط بتعادل الدنيا وما فيها!! واهم شيء انتي بتستحي انك تسعدي ف حياتك!!؟ كفاية آلم وبكي وحزن!! اترددت ف الاول بس اتوكلت ع **** ومشيت معاها والطريق كلو انا قلبي بيضرب كيف اتمالك مشاعري ف حضرتو!!؟

نواصل بعدين
يتبع ………

التالية◀​